ကာမေသုမိစ္ဆာစာရ
ဗွောင်နယ် ကာမေသုမိစ္ဆာစာရာ ဝေရမဏိခရာႏ
[မွဉ်းဖျင် | မွဉ်းဖျင်အရွီးခိုႏ]- ကာမေသု+မိစ္ဆာ+အာစာရ ဖပုဒ်နုဲင်းနောဝ်ꩻ။
- ကာမေသု-အကျင်ꩻလိုꩻဒုံ မေထုန်အလောင်း (ကာမဂုဏ်ႏအလောင်း၊ ဝင်ꩻပိုမာအလောင်း၊ ဝင်ꩻပိုဝင်ꩻဝါꩻအလောင်း။)
- မိစ္ဆာ- တရွို့ꩻမာႏ။
- အာစာရ-အကျင်ꩻ(ပဲစ်မာႏ)။
- ဝေရမဏိ-သျောင်ႏထိုꩻ (ပဲစ်မာႏတောဝ်း)။
ကွပ်နဝ်ꩻမꩻ "ကာမေသု မိစ္ဆာစာရာ ဝေရမဏိ"ကရိုꩻနဝ်ꩻ- "ပဲစ်မာႏတောဝ်း ဝင်ꩻပိုမာ ဝင်ꩻပိုဝါꩻ"အဓိပ္ပါယ်ႏလꩻနုဲင်းနဝ်ꩻသွူ။
"ကာမေသု မိစ္ဆာစာရ-ပဲစ်မာႏ ဝင်ꩻပိုမာ (ဝင်ꩻဝါꩻ)"ကရိုꩻနောဝ်ꩻ-
[မွဉ်းဖျင် | မွဉ်းဖျင်အရွီးခိုႏ]လိုꩻမူႏပေႏ၊ မူႏနံꩻ၊ မေးရင်း၊ မေးမုဲင်း (မဲးရင်း မဲးမုဲင်း)ဖုံႏနဝ်ꩻ အဝါꩻ (လမ်းသား)အဲဉ်ထောဝ်းတဲ့ယောဝ်း၊ အမွိုးအဖါ အဖူးအဝေး စတဲင်စားနောဝ်ꩻဖုံႏ အောဝ်ႏထိန်ꩻခါꩻတဲင် လိုꩻခို ပဲစ်မာႏဒါႏတောဝ်း၊ အမာကအောဝ်ႏဒါႏ လိုꩻခို(ပိုဝါꩻ)ဖုံႏနောဝ်ꩻတဲ့ လိုꩻမူႏပဲစ်မာႏဒါႏတောဝ်းနောဝ်ꩻသွူ။
မိစ္ဆာစာရ- အကျင်ꩻမာႏပဲစ်မာႏ"ကရိုꩻနောဝ်ꩻ-
[မွဉ်းဖျင် | မွဉ်းဖျင်အရွီးခိုႏ]ခိုမူႏ သဖော်ꩻတူႏဝင်ꩻတဲ့နဝ်ꩻ၊ အခိုအမူႏ သဖော်ꩻတူႏတောဝ်းတဲင် နေးအဓမ္မ အနွိုင်ႏအဆေꩻ ပဲစ်မာႏတဲ့နောဝ်ꩻ၊ နေးတွမ်ႏတသီႏ ဂါႏထာႏထာꩻဒါႏအမျိုꩻမျိုꩻတဲင် ပဲစ်မာႏတဲ့နောဝ်ꩻ၊ ထွာအကျင်ꩻမာႏ၊ ထွာပဲစ်မာႏလွဉ်းလွဉ်း၊ ထွာကာမေသုမိစ္ဆာစာရ-အကုသိုလ်ႏကံႏလွဉ်းလွဉ်းနောဝ်ꩻသွူ။
"ဝေရမဏိ-သျောင်ႏထိုꩻ (ပဲစ်မာႏတောဝ်း)"ကရိုꩻနောဝ်ꩻ-
[မွဉ်းဖျင် | မွဉ်းဖျင်အရွီးခိုႏ]နမ်း (ကိုႏတဲင်ႏ)တဲ့ သျောင်ႏထိုꩻ ပဲစ်မာႏတောဝ်း၊ မဉ်ႏထီႏ မဉ်ႏသေဝင်ꩻပဲစ်မာႏတဲ့ ဆီꩻခါꩻရဲခါꩻ ဖေႏပဲစ်မာႏတောဝ်း၊ ပဲစ်မာႏဝင်ꩻပိုမာနုဲင်းနောဝ်ꩻနောဝ်ꩻ သꩻရေꩻတောဝ်း၊ သဖော်ꩻတူႏတောဝ်း၊ နစ်သက်တောဝ်း၊ ဟွိုန်ဟောဝ်တောဝ်း၊ ကျွိုက်တောဝ်း၊ မဉ်ႏပဲစ်မာႏ ဝင်ꩻပိုမာꩻနောဝ်ꩻ ခံႏဗာႏအပဲစ် နုဲင်းယိုနုဲင်းယို၊ သွဉ်သင်ဆွုံꩻမꩻ ချꩻနားဖေႏ စတဲင်နုဲင်းနောဝ်ꩻဖုံႏနောဝ်ꩻ ထွာသျောင်ႏထိုꩻ (ထွာပဲစ်မာႏတောဝ်း ဝင်ꩻပိုမာ)နောဝ်ꩻသွူ။ ပဲစ်မာႏ ဝင်ꩻပိုမာ (ပဲစ်မာႏဝင်ꩻဝါꩻ)နောဝ်ꩻ ဟောဝ်တဝ်း၊ ထွာကာမေသု မိစ္ဆာစာရ ဒုစရဲက်၊ ထွာအကျင်ꩻဟောဝ်တဝ်း။ ပဲစ်မာႏတဝ်းဝင်ꩻပိုမာ၊ ပဲစ်မာႏတဝ်း ဝင်ꩻဝါꩻနဝ်ꩻ ဟောဝ်၊ ထွာကာမေသု မိစ္ဆာစာရာ ဝေရမဏိ သုစရဲက်၊ ထွာအကျင်ꩻဟောဝ်နောဝ်ꩻသွူ။
"ဟောဝ်တောဝ်းနုဲင်းမုဲင်ꩻ၊ ဟောဝ်နုဲင်းမုဲင်ꩻ"နဲတဲင်- ပါꩻခိုတဖြာꩻ မဉ်ႏပဲစ်မာႏ ဝင်ꩻပိုမာနောဝ်ꩻ ဂုဏ်ႏသိက္ခာႏ ထဲ့လင်ꩻ၊ ဝင်ꩻမီႏစွယ်ꩻတရာꩻတဲ့ မဲ့ငါပေႏ တရေႏကုဲင်၊ ခံႏဗာႏဝင်ꩻ အစွိုင်အကျꩻ အောဝ်ႏခံဗာႏအချွုတ်၊ ထဲ့ဗာႏထောင်ႏ၊ မော့ꩻဗာႏတံႏ၊ ယောႏဗာႏဝင်ꩻ။ ဝင်ꩻတမာဝါꩻတဲ့ အာငေါဝ်းအီတောလို့ဝင်ꩻ၊ အွဉ်ႏကုဲင်တောလို့ဝင်ꩻ၊ ကွပ်မွိုးဖါ အွဉ်ႏကုဲင်လို့ဝင်ꩻတဲင် ပိုဖုံႏတဲ့ အုံညိꩻဗာႏတောဝ်းမွိုး၊ အုံညီꩻဗာႏတောဝ်းဖါ၊ အံႏဗာႏဟောဝ်တဝ်း၊ ကွဉ်ကꩻဗာႏဟောဝ်တဝ်း၊ အုံဗာႏဟောဝ်တဝ်း၊ သွဉ်ဗာႏတဝ်းပညာႏ၊ မော့ꩻလို့ ထာꩻဒုက္ခ၊ ပါꩻကပဲစ်မာႏဒါႏ ဝင်ꩻမာနဝ်ꩻတဲ့ တွိုႏဘဝငါသူꩻ လင်ꩻထဲ့ငါးရုဲင်ꩻ၊ ထွာဗာႏလိုꩻညဉ်ꩻစုဲင်ꩻ (ယိန်ႏစုဲင်ႏ)၊ ထွာဗာႏလိုꩻမူႏ စတဲင်နုဲင်းနောဝ်ꩻသွူ။
လိုꩻမူႏတဖြာꩻ မဉ်ႏပဲစ်မာႏလိုꩻခိုတဲ့ ဝင်ꩻရိုꩻ လိုꩻမူႏဖွီ၊ ဝင်ꩻရိုꩻလိုꩻမူႏအကျင်ꩻဟောဝ်တောဝ်း၊ လိုꩻမူႏနုဲင်းနောဝ်ꩻနောဝ်ꩻ ဝင်ꩻထီႏဖွီ၊ ဝင်ꩻတအံႏသွင်ꩻတောဝ်း၊ လိုꩻမူႏအငိုꩻ တအဲဉ်ထောဝ်း၊ လိုꩻမူႏခွဉ်ႏဆေ့ꩻ ဝင်ꩻမတ်နုဲင်းနောဝ်ꩻ။ တွိုႏဝါꩻ သမ်းအဲဉ်ထဝ်း၊ သမ်းအဝ်ႏနမ်းလောင်းတဲင် ဟွိုန်ဝင်ꩻသꩻဝင်ꩻတွော့ꩻ ယားတေား အသန္ဓေႏ၊ ယားမဉ်ႏတလꩻတဝ်းတဲ့ လွူးထွူ မာꩻသီတေ့ꩻထိုꩻ၊ ဝေါင်းတေ့ꩻထိုꩻ၊ ဖေႏထိုꩻတောဝင်ꩻ၊ မဉ်ႏတဖေႏတဝ်းဝင်ꩻတဲ့ ပါꩻပေႏနဝ်ꩻ ဟဲ့ꩻဖါခရာႏ အဲဉ်ထောဝ်း၊ အံႏဗာႏဟောဝ်တဝ်း၊ ကွဉ်ကꩻဗာႏဟဝ်ဝတဝ်း၊ အုံဗာႏဟဝ်တဝ်း၊ သွဉ်ဗာႏဟောဝ်တောဝ်း ပညာႏ။ ကွပ်စွဉ်ႏ မွိုးမွိုက်ဒျာႏရာႏရာႏတဲင် အပဲစ်လွစ် အပိုပေႏပေႏနဝ်ꩻ မော့ꩻတောထာꩻဒုက္ခ၊ ပါꩻမူႏကပဲစ်မာႏဒါႏ လိုꩻခိုနောဝ်ꩻတဲ့ မဲ့ငါပေႏ၊ တရေႏကုဲင်၊ တွိုႏဘဝငါသူꩻ ထဲ့ဗာႏငါးရုဲင်ꩻ၊ မော့ꩻဗာႏထာꩻဒုက္ခစတဲင် နုဲင်းနောဝ်ꩻသွူ။ ကွပ်နဝ်ꩻမꩻ ပဲစ်မာႏဝင်ꩻပိုမာ (ပဲစ်မာႏဝင်ꩻဝါꩻ)နောဝ်ꩻ ဟောဝ်တောဝ်းနောဝ်ꩻသွူ။
လိုꩻခို မဉ်ႏပဲစ်မာႏတောဝ်း ဝင်ꩻပိုမာနောဝ်ꩻ (လိုꩻမူႏတဲ့ မဉ်ႏပဲစ်မာႏတောဝ်း ဝင်ꩻပိုဝါꩻနတ်ꩻ) ကရိုꩻဒါႏ အပဲစ်ချာဖုံႏနဝ်ꩻဟွဉ်ႏနောဝ်ꩻ မော့ꩻဗာႏတောဝ်း၊ ဂုဏ်ႏသိက္ခာႏတဲ့ အောဝ်ႏ၊ မဲ့ငါပေႏ တရေႏကုဲင်ဗာႏတောဝ်းတဲင် မဉ်ꩻအွီႏ၊ မဲ့ငါမေတ္တာႏအာ၊ ဝင်ꩻကေႏညိုႏ ရိုႏသေႏ၊ နမ်းချမ်ꩻသာႏ၊ သꩻချမ်ꩻသာႏ၊ တွိုႏဘဝငါသူꩻတဲ့ ထဲ့ဗာႏတောဝ်းငါးရုဲင်ꩻ၊ ထွားအဖဲ့ꩻမုဲင်ꩻတဲ့ဟောဝ်၊ ထွားအခေါဝ်မုဲင်ꩻတဲ့ သေႏချာႏ စစွဉ်ႏဒျာႏနုဲင်းနောဝ်ꩻသွူ။
ပဲစ်မာႏတောဝ်းဝင်ꩻပိုမာ (ဝင်ꩻဝါꩻ)တဲင် ကခံႏစာꩻဗာႏ အကျိုꩻဖုံႏနောဝ်ꩻ-
[မွဉ်းဖျင် | မွဉ်းဖျင်အရွီးခိုႏ]၁။ ဘေꩻရန်ႏအန္တရာယ်ႏ အဲဉ်ထောဝ်း ၂။ လိုꩻရက်လိုꩻပဲင်ꩻအာ ၃။ အုံဗာႏ ချမ်ꩻချမ်ꩻသာႏသာႏ ၄။ တွိုႏဗာႏတောဝ်း အပါယ်ႏခမ်း ၅။ ထွာဗာႏတောဝ်း လိုꩻမူႏ၊ ထွာဗာႏတဝ်း လိုꩻညဉ်ꩻစုဲင်ꩻ ၆။ ဝင်ꩻအမျာꩻတဲ့ (ရိုႏသေႏ) ယွုမ်းအံႏ ၇။ မေတ္တာႏအာ၊ မဲ့ငါတန် ၈။ ယောင်ꩻဆင်ꩻတရေꩻ (မဉ်ꩻအွီႏလွီးဟွမ်) ၉။ မာဝါꩻချင်ꩻချင်ꩻ ရက်လို့ဝင်ꩻ ၁၀။ ပိုဖါမာဝါꩻ အုံညီꩻသေႏသေႏဗာႏလို့ဝင်ꩻ (သွတ်ꩻစိုးဝုဲင်ꩻပန်)စတဲင် နုဲင်းနောဝ်ꩻဖုံႏသွူ။ ကွပ်နောဝ်ꩻမꩻ ပဲစ်မာႏတောဝ်းပိုမာ (ဝင်ꩻဝါꩻ)တဲင် ဟောဝ်ငါႏ မရေႏမရာႏနောဝ်ꩻသွူ။
ကာမေသုမိစ္ဆာစာရာ အင်္ဂါႏ ၄-ပါꩻ
[မွဉ်းဖျင် | မွဉ်းဖျင်အရွီးခိုႏ](ပဲစ်မာႏ ဝင်ꩻပိုမာ အချက် ၄-ချက်)
- တဟောဝ်ပဲစ်မာႏတောဝ်း ဝတ္ထု (လိုꩻမူႏ/ လိုꩻခို)တဲ့ ဖေႏကမွေးမꩻ
- သꩻမဉ်ပဲစ်မာႏတဲ့ ဖေႏကအောဝ်ႏမꩻ
- ဖေႏကပဲစ်မာႏဗာႏတဲ့ ကျိုꩻစာꩻဗာႏ
- ပဲစ်မာႏဗာႏ (သာႏယာႏဗာႏ)မꩻ
အင်္ဂါႏယို ၄-ပါꩻ မဉ်ႏပြဲ့ꩻစွုံႏလို့မꩻ (အချက်ယို ၄-ချက်မဉ်ႏမဲဉ်ႏတနꩻသော့ꩻလို့မꩻ) ထွာကာမေသုမိစ္ဆာစာရ အကုသိုလ်ႏကံႏနောဝ်ꩻသွူ။
ကဗျာလင်္ကာႏ
[မွဉ်းဖျင် | မွဉ်းဖျင်အရွီးခိုႏ]+ ဝင်ꩻမာဝင်ꩻဝါꩻ - စောကာꩻလွဉ်ꩻမာႏ နုဲင်းနဝ်ꩻမာꩻမွိုန်း - မဉ်ႏယွိုန်းနောဝ်ꩻရာꩻ အကျင်ꩻဟဝ်မျတ် - စွုမ်ႏဇာတ်ချမ်ꩻသာႏ လိုꩻခိုဒျာႏ - ထွာဗာႏ ယံငါငါ။ ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ- ဝင်ꩻမာဝင်ꩻဝါꩻ စောကာꩻလွဉ်ꩻမာႏ နုဲင်းနောဝ်ꩻနောဝ်ꩻ တွမ်ႏမာꩻမွိုန်း၊ မဉ်ႏယွိုန်းထိုꩻနဝ်ꩻ ထွာအကျင်ꩻဟောဝ်၊ ထွာအကျင်ꩻမျတ်၊ (ကွပ်အကျင်ꩻဟောဝ် အကျင်ꩻမျတ်တဲင်) ချမ်ꩻသာႏဗာႏ စွုမ်ႏဇာတ်ဇာတ် စွုမ်ႏပန်ပန်၊ သဲင်ꩻကွိုတ်ဗာႏဒျာႏ လိုꩻခိုဘဝ ယံကျလွေꩻတငါငါစွဉ်ႏနောဝ်ꩻသွူ။[၁]
ဗွောင်နယ်သမ်းထဲင်းအခရာႏ
[မွဉ်းဖျင် | မွဉ်းဖျင်အရွီးခိုႏ]ဟန်ႏနီꩻယို နီဆရာႏ စင်ꩻပညာႏ အုံပဆားတခါႏတဲင် ဆရာႏခွန်ထွန်း သွဉ်ဖေႏတော၊ ဆရာႏခွန်ထွန်းနဝ်ꩻ အွဉ်ႏဒေါ့ꩻပျောႏဒါႏထာꩻတဲင် နီသွဉ်လိတ် ဟန်ႏနီꩻယိုတဲ့ ပျောႏတန်ဒျာႏ။ "နဝ်ꩻဟွဉ်ႏ ပါꩻမုဲင်ထေင်လို့ဝင်ꩻ ညုက်ꩻညုက်ညက်ꩻညက်ꩻနဝ်ꩻဟွဉ်ႏ" "ခွေသွဉ်းတွမ်ႏ စိန်ထွန်းဗွေႏအော်" "သီထေင်လို့ဝင်ꩻနဝ်ꩻ ကွပ်ပွိုးထမုဲင်ꩻ မောင်ႏကျော်" "ကွပ်ပွိုးစွဉ်ႏ စိန်ထွန်းဖေႏ ခွေသွဉ်းဖူးမူႏလိတ် ဗွေႏအော်" "ဒေါ့ꩻနယ်မွုန်းဒွုမ် ဆရာႏနဝ်ꩻ ဝေးခို၊ ဝင်ꩻသꩻငါႏဝင်ꩻ" အဝေးခို ထင်ႏလဝ်းနယ် ဆရာႏနုဲင်းနဝ်ꩻတဲင် အဖူးမူႏ နင်ꩻဗိုလာႏနဝ်ꩻ ဒေါ့ꩻရဲးခါꩻခန်းနုဲင်းနဝ်ꩻ။ "မူႏနံꩻဘဝ ခိုဗင်ႏဘဝ ဖေႏလယ်ႏကွို့ꩻလိတ်လွုမ်ꩻဟ မလဲင်ꩻတွိုႏစွဉ်ႏ ထာꩻထေင်လို့ဝင်ꩻနုဲင်းမုဲင်ꩻ မောင်ႏကျော်" "အမဉ်ႏဖေႏဗဉ်ႏဗဉ်ႏဗꩻဗꩻတဲ မွေးဒျာႏ၊ ယိုနဝ်ꩻ ဖေႏစွဉ်ႏအမျာꩻငါ၊ ခွေသွဉ်းဖူးမူႏ တထူႏတဝ်းတဲ့ စက်ꩻစွဉ်ႏခွေသွ်းဖူးမူႏစူတဲင် ဖေႏနွိုင်ႏဖေႏဆေꩻနေးစွဉ်ႏ၊ စူဗာႏ ယာႏခွေါင်းနုဲင်းနဝ်ꩻနဝ်ꩻ ထွာထာꩻစောကာꩻဝင်ꩻ၊ ထွာထာꩻအံႏနွောင်ꩻဝင်ꩻ၊ ကွပ်နဝ်ꩻမꩻ ခွေသွဉ်းထေင်ဗာႏ ဗွေႏအော်" "နာꩻဖေႏနွိုင်ႏမွေး ဝင်ꩻလိတ်နဲ့ စိန်ထွန်း?" "ကရီးနဝ်ꩻ ဝွေꩻဖေႏခွေသွဉ်းဖူးမူႏ ခံꩻဗွာလိတ် ဗွေႏအော်၊ ခွေသွဉ်းဖူးမူႏခံꩻဗွာ တအုဲင်ႏထူႏတဝ်းတဲ့ စက်ꩻခံꩻဗွာစူ ဖေႏနွိုင်ႏဖေႏဆေꩻနေး ဗွေႏအော်" "နဝ်ꩻနဝ်ꩻ ခွေဖေႏဗဉ်ႏဗဉ်ႏဗꩻဗꩻဒျာႏ၊ ဝင်ꩻတထီႏတဝ်းဟ" "ရိုꩻဝင်ꩻထီႏတဝ်း၊ ခွေမွော့ သမ်းထီႏအီ" "နာꩻထွားချောင်ꩻလွဉ်ꩻဝင်ꩻဟ" "ဝေးခိုစိန်ထွန်း ထေင်မွုန်းဒွုမ်လို့ဝင်ꩻနဝ်ꩻ ဖူးမူႏသီးဝင်ꩻသꩻငါႏဝင်ꩻ" "ဝင်ꩻထုဲင်နီဟ နီပြဉ်းချာဝင်ꩻသနယ်" ခံꩻဗွာတွမ်ႏဗိုလာႏနဝ်ꩻ အလွိုးဝင်ꩻသꩻနာႏဝင်ꩻ၊ ဝင်ꩻသꩻသွီႏရောင်ႏ တောင်ႏလဲဉ်းသွူ အမဲ့ငါ။ "ဆရာႏဒေါ့ꩻဖေႏသီယို မောင်ႏကျော်တွမ်ႏ စိန်ထွန်းတဲ့ ကဟဝ်လို့ဝင်ꩻ၊ ခံꩻဗွာတွမ်ႏ နင်ꩻဗိုလာႏတဲ့ ကရက်လို့ဝင်ꩻꩻ ကွပ်စွဉ်ႏ စူဗာႏယာႏခွေါင်း ထာꩻစောကာꩻမုꩻတဲင် ထေင်ဗာႏလို့ဝင်ꩻနုဲင်းယို၊ ကွဲႏတွော့ꩻ ကိစ္စပေႏယိုနဝ်ꩻ လွဉ်ꩻချိုꩻငါႏ မရေႏမရာႏတဲ့ တမွေးတဝ်း၊ ကွပ်နဝ်ꩻမꩻ အွဉ်ႏစွꩻခွင်ꩻဖေႏသွော့လို့ဝင်ꩻꩻ တောင်ꩻပြန်ချာသွော့လို့ဝင်ꩻဟုဲင်း" 'မွေးဒျာႏ ဆရာႏ၊ ခွေစောကာꩻဗာႏရီးသီတဲင် ခွေတောင်ꩻပြန်ႏဒျာႏသီ စိန်ထွန်း၊ အွဉ်ႏစွꩻခွင်ꩻခွေနော သွꩻ" "အွဉ်ႏစွꩻခွင်ꩻဒျာႏ သွꩻဟွေး၊ ခွေတဲ့ စောကာꩻချာဗာႏသီတဲင် ခွေတောင်ꩻပြန်ႏဒျာႏသီ၊ အွဉ်ႏစွꩻခွင်ꩻခွေနော ကျော်" "အွဉ်ႏစွꩻခွင်ꩻဒျာႏ သွꩻ" "မွေးသွူ တပဲ့ꩻဖုံႏ တဗꩻရောင်စူဟုဲင်း" "ဗြက် ဗြက် ဗြက် ဗြက် ဗြက်" အဝ်ႏနဝ်ꩻတွော့ꩻ အကျော်ပျက်တယွို့သော့ꩻထာꩻနုဲင်းယို- "ယိုစိန်ထွန်း- နာꩻမဉ်ႏမဲဉ်လꩻ ခွေဖူးမူႏဗိုလာႏတဲ့ ဖေႏဖါႏနေးမွုန်းဒွုမ်လိတ်၊ လွေꩻရီတွိုႏတွိုႏ နီမွိုးနီဖါသူꩻ၊ ခွေကျွိုက်နာꩻဖူးမူႏ ခံꩻဗွာတဲင် ခွေတဲ့ မဲ့ꩻလွေꩻရီ သီမွိုးသီဖါနေနေ၊ မွေးနေဟာင်းမက်ꩻ" "မွေးဒျာႏ မက်" "ဝါး ဟား ဟား" နဝ်ꩻထွူတွော့ꩻ အသေစ် သမ်းဒေါ့ꩻပျက်သော့ꩻတောနုဲင်းယို- "ဗိုလာႏတွမ်ႏ ခံꩻဗွာတဲ့ ဟဲ့ꩻနေင်ခန်းလို့ဝင်ꩻလုဲင်း" "ဟား ဟား ဟား ဟား" နီဖဲ့ꩻနီခေါဝ် ဟဝ်လဲဉ်းလို့ဝင်ꩻတဲင်တွော့ꩻ နီငသင်ႏဝေါက်ထင်ႏစွဉ်ႏ နီကျောင်ꩻကိုနဝ်ꩻသွူႏ။
"တပဲ့ꩻသီးဖုံႏဟွေး- ဟန်ႏနီꩻယိုနဝ်ꩻ အီႏသွဉ်ဖေႏ ဒုစရဲက်အမုဲင်(၃) ကာမေသု မိစ္ဆာစာရာ - ပဲစ်မာႏဝင်ꩻပိုမာ။ "ကာမေသု"ကရိုꩻနဝ်ꩻ - ကာႏမဂုဏ်ႏအလောင်၊ "မိစ္ဆာ"ကရိုꩻနဝ်ꩻ - အမာႏတရွို့ꩻ၊ "စာရာ"ကရိုꩻနဝ်ꩻ - အကျင်ꩻ။ ကွပ်နဝ်ꩻမꩻ "ကာမေသု မိစ္ဆာစာရာ"ကရိုꩻနဝ်ꩻ- "အကျင်ꩻတရွို့ꩻမာႏ ကာႏမဂုဏ်ႏအလောင်း (ပဲစ်မာႏဝင်ꩻပိုမာ) အဓိပ္ပါယ်ႏလꩻနုဲင်းနဝ်ꩻသွူ။ "ဝင်ꩻမဉ်ႏပဲစ်မာႏ၊ ဝင်ꩻမဉ်ႏစောကာꩻ သီမွိုး၊ သီဝေးမူႏ၊ သီဖူးမူႏနဝ်ꩻ ကျွိုက်နေဟောင်း" "ကျွိုက်တောဝ်း ဗွေႏအော်" "ကွပ်ပွိုးနဝ်ꩻမꩻ အဝ်ႏလိုႏစာႏနာႏချာ နီနမ်း၊ စာႏနာႏချာဗာႏ နုဲင်းမုဲင်ꩻနဲတဲင်- ဝင်ꩻမဉ်ႏပဲစ်မာႏ နီမွိုး၊ နီဝေးမူႏ၊ ဖူးမူႏနဝ်ꩻ နီကျွိုက်တဝ်း၊ နီသꩻလျားဝင်ꩻ၊ နီသꩻဆာဝင်ꩻ၊ နီလွꩻထီႏဝင်ꩻ၊ ဝင်ꩻစောကာႏနီတဲင် နီမဲ့ငါပေႏ၊ တရေႏလင်ꩻဗာႏ။ နုဲင်းနဝ်ꩻနေနေ နီမဉ်ႏပဲစ်မာႏ ဝင်ꩻမွိုး၊ ဝင်ꩻဝေးမူႏ၊ ဖူးမူႏနဝ်ꩻ ဝင်ꩻကျွိုက်တဝ်း၊ ဝင်ꩻသꩻလျားနီ၊ ဝင်ꩻသꩻဆာနီ၊ ဝင်ꩻလွꩻထီႏနီ၊ နီစောကာꩻဝင်ꩻတဲင် ဝင်ꩻမဲ့ငါပေႏ၊ တရေႏလင်ꩻဗာႏနုဲင်းနဝ်ꩻ။ တပဲ့ꩻသီးဖုံႏဟွေး- လိုꩻကပဲစ်မာႏဒါႏ ဝင်ꩻပိုမာနဝ်ꩻ ဘဝယိုတဲ့ မဉ်ꩻတအွီႏတဝ်း၊ မော့ꩻဗာႏထာꩻခိုး ထာꩻလျား၊ ထာꩻတရေင်၊ ထေင်ဗာႏလို့ဝင်ꩻ၊ အာငဝ်းဗာႏလို့ဝင်ꩻ၊ တဟဝ်တောဝ်းတစိꩻစိꩻ၊ မွေးနေဟောင်း" "မွေး ဗွေႏအော်" "ခန္ဓာႏကုဲင် မဉ်ႏသီသူꩻတဲ့ လင်ꩻထဲ့ဗာႏငါးရုဲင်ꩻ၊ တွိုႏဆုဲင်ꩻကာႏလ ဘဝလိုꩻဒုံ မဉ်ႏသဲင်ꩻအုံဗာႏယင်း ဘဝလိုꩻခမ်းကရိုꩻနဝ်ꩻလဲ့ သဲင်ꩻထွာဗာႏလိုꩻမူႏ၊ သဲင်ꩻထွာဗာႏ လိုꩻညဉ်ꩻစုဲင်ꩻ၊ ပါꩻမုဲင်ꩻတဲ့ မဲဉ်ကျွိုက်တဝ်း၊ ခွေလွꩻထီႏဝင်ꩻလွꩻထွား၊ ဝင်ꩻယားတ၇ေႏ၊ မဲ့ငါပေႏရန်ႏသူႏအာ၊ ထွာဗာႏလိုꩻယုတ်၊ ရွုတ်ရယ်ꩻတကုဲင်ငါႏ၊ လက္ခဏာႏချို့ꩻယွင်ꩻ၊ ဗွန်တဝ်းဝင်ꩻ တကုဲင်သွတ်ꩻ၊ ထွာဗာႏနုဲင်းနဝ်ꩻနဝ်ꩻ ဟဝ်နဲ့၊ ဟဝ်တဝ်းနဲ့?" "ဟဝ်တဝ်း ဗွေႏအော်"
"ပဲစ်မာႏဝင်ꩻပိုမာ ဒါႏတဝ်း"ကရိုꩻနဝ်ꩻ
[မွဉ်းဖျင် | မွဉ်းဖျင်အရွီးခိုႏ]စွုမ်ႏဖြာꩻတန်ပေႏ ယံဖေႏကတောင်ꩻတဲင် နီဗွေႏစင်ꩻ တဲမ်းဖေႏနေး ကဗျာနုဲင်းယို- + ဝင်ꩻပိုဝင်ꩻဝါꩻ - စောကာꩻလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - မူႏယိုထွာဗာႏ ပဲစ်မာႏမွုန်း - မဉ်ႏယွုန်း ကျင်ꩻဟဝ်ထွာ။
"ကဗျာယိုတပွုက် ငေါဝ်းရိုꩻရိုꩻနဝ်ꩻ ဆရာႏပြန်ႏဖေႏနီနုဲင်းယို-"
[မွဉ်းဖျင် | မွဉ်းဖျင်အရွီးခိုႏ](ဝင်ꩻမာတရိုꩻတဝ်း၊ ဝင်ꩻပိုတရိုꩻတဝ်း စောကာꩻထွူတဲင် စူလွဉ်ꩻခင်ႏလွဉ်ꩻ မဉ်ႏပဲစ်မာႏဗာႏနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻခံႏဗာႏ ငါးရုဲင်ꩻသူꩻနဝ်ꩻ ထာꩻချမ်ꩻသာႏ အဲဉ်ထဝ်းတစိꩻစိꩻ၊ မဉ်ႏသဲင်ꩻကွုတ်ယင်း လိုꩻပိုတဲ့ ဝွေꩻယိုနဝ်ꩻ ထွာဗာႏလိုꩻမူႏ (ထွာဗာႏလိုꩻညဉ်ꩻစုဲင်ꩻ)၊ ကွပ်နဝ်ꩻမꩻ ပဲစ်မာႏမွုန်းဝင်ꩻပိုဝင်ꩻမာ၊ (မဉ်ႏထွာလိုꩻမူႏတဲ့ ပဲစ်မာႏမွုန်း ဝင်ꩻပိုဝင်ꩻဝါꩻ၀ မဉ်ႏယွုန်းထိုꩻနဝ်ꩻ ထွာအကျင်ꩻဟဝ်။) တပဲ့ꩻသီးဖုံႏဟွေး- သီမဲဉ်ထွာနေ လိုꩻမူႏဟောင်း?" "မဲဉ်ထွာတဝ်း ဗွေႏအော်" "မဉ်ႏမဲဉ်ထွာတဝ်း လိုꩻမူႏနဝ်ꩻ အီႏမာꩻဗာႏနုဲင်းမုဲင်ꩻ" "ပဲစ်မာႏမွုန်း ဝင်ꩻပိုဝင်ꩻမာ ဗွေႏအော်" "အွို- မွေးသွူ၊ ပဲစ်မာႏဝင်ꩻပိုဝင်ꩻမာတွမ်ႏ ပဲစ်မာႏတဝ်း ဝင်ꩻပိုမာနဝ်ꩻ အဖြာꩻမုဲင်ꩻ အကျင်ꩻဟဝ်၊ အဖြာꩻမုဲင်ꩻ အကျင်ꩻဟဝ်တဝ်း" "ပဲစ်မာႏဝင်ꩻပိုမာနဝ်ꩻ အကျင်ꩻဟဝ်တဝ်း၊ ပဲစ်မာႏတဝ်း ဝင်ꩻပိုမာနဝ်ꩻ အကျင်ꩻဟဝ်အော်" "တပဲ့ꩻသီး ဖေႏနေးကထွာ လိုꩻအကျင်ꩻဟဝ် ပငါပရာꩻ၊ ဖေႏနေးကထွာလိုꩻယံ ပငါပရာꩻနဝ်ꩻ ပဲစ်မာႏမွုန်း ဝင်ꩻပိုမာနော" "မွေးဒျာႏ ဗွေႏအော်" "ယိုတလဲင်ႏတဲ့ အခိန်ႏလꩻလဲန်း၊ အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏအော်"[၂]