ခမ်းထီပြောင်ꩻလုဲင်ႏ

"ခမ်းထီပြောင်ꩻလုဲင်ႏအဆုမ်ႏကို အခွင်ꩻရေꩻဖေႏကလွစ်ဗာႏမွုန်းနုဲင်းပင်ႏလုံ" အဝ်ႏအစိုႏရတသွုပ်စူကို တထွူသွတ်ꩻတဝ်းဒွုန်းဒါႏ ငိမ်ꩻချံꩻရေꩻထာꩻမာꩻစဲဉ်ႏယို အီႏတွိုႏဆွိုက်လွဉ်ယင်း အစိုႏရအစွိုꩻတသာစူကိုတဲင် အစိုႏရသွုပ်တသာယိုနဝ်ꩻ ထွာဒီမိုကရေသီအာႏရဲင်ꩻစုနဝ်ꩻမꩻ ငိမ်ꩻချံꩻရေꩻထာꩻမာꩻစဲဉ်ႏယို အာႏအီႏဟဝ်လွိုလွဉ်ထဲင်းဟောင်းနဝ်ꩻ နဲင်ႏငံႏရေꩻသားသီးဖုံႏ အဝ်ႏသုံꩻသပ်နဝ်ꩻသွူ။ နုဲင်းယိုခါ ငိမ်ꩻချံꩻရေꩻဒေါ့ꩻငဝ်းဝဲင်ꩻကို ကပါလွဉ်လဲဉ်းဒါႏ ခုမ်စူခြွိုင်းခမ်းရင်ꩻသားတဲ့အဝ်ႏ၊ တပါလွဉ်တဝ်းဒွုန်း ခမ်းရင်ꩻသားအစွိုꩻတဲ့ အဝ်ႏနဝ်ꩻသွူ။ တဲမ်းထွို့ꩻငိမ်ꩻချံꩻရေꩻ သဘောꩻတူႏလိတ်ချုက်တွမ်ႏ ခမ်းခြွဉ်းဗူႏငိမ်ꩻချံꩻရေꩻညီႏလာႏခံႏ ဒေါ့ꩻနဲင်ႏငံႏရေꩻငဝ်းဝဲင်ꩻကို တပါတဝ်းဒွုန်းဒျာႏ ခုမ်စူခြွိုင်းခမ်းရင်ꩻသားစွိုꩻဖုံႏလဲ့ အခေႏအနေႏ အီႏဟဝ်လွဉ် တွမ်ႏခမ်းတန်ခမ်းလင်သားသီးလဲ့ အဝ်ႏပွေါးထွား အဝ်ႏကူႏညီႏတဲင် အခေႏအနေႏ အအာႏအီႏဟဝ် ငိမ်ꩻချံꩻရေꩻထာꩻမာꩻစဲဉ်ႏ ခမ်းပေါင်ꩻစွုမ်ႏတွမ်ႏ နဲင်ႏငံႏရေꩻပညာႏသျင်ႏသီး အဝ်ႏသုံꩻသပ်နုဲင်းနဝ်ꩻသွူ။ နဝ်ꩻမꩻ မန်းခမ်းထီကို ခမ်းရင်ꩻသားသီးကမဲဉ်ထွာ၊ ကမဲဉ်လွေꩻဒါႏ ခမ်းခြွဉ်းဗူႏ ပုံႏစံႏ၊ ခမ်းရင်ꩻသားနမ်းပဲင်ႏပျဌာန်းခွင်ꩻ၊ နမ်းပဲင်ႏအိုပ်ချုက်ခွင်ꩻ အဝ်ႏခမ်းခြွဉ်းဗူႏခမ်းထီ ဖေႏကထွာနဝ်ꩻ မဉ်ႏဒေါ့ꩻရီနေးဒျာႏနဲင်ႏငံႏရေꩻငဝ်းဝဲင်ꩻဒျာႏမꩻတဲင် ခမ်းရင်ꩻသားအစွိုꩻလောင်ႏလင် အီႏပါလွဉ် အာႏအီႏဟဝ် ထီႏဗာႏနုဲင်းနဝ်ꩻသွူ။ နဝ်ꩻမꩻတဲင် ငိမ်ꩻချံꩻရေꩻထာꩻမာꩻစဲဉ်ႏယိုတဗာႏနဝ်ꩻ မန်းခမ်းထီအတာႏ အပြောင်ꩻအလုဲင်ႏတန်တဗာႏ အီႏထွာလွဉ်နွောင်ꩻနဝ်ꩻသွူ၊ ခမ်းထီအပြောင်ꩻအလုဲင်ႏတန် ကအီႏထွာဗာႏနုဲင်းယို တလဲင်ႏလဲင်ႏမꩻနဝ်ꩻ အုံပွေါးဗာႏနေး လစ်ꩻငတ်ꩻဆီ နေင်ႏတရျာꩻမဉ်ႏအဝ်ႏတဲ့ အဝ်ႏနွောင်ꩻနဝ်ꩻသွူ၊ အီႏထွာပေါႏဗာႏနဝ်ꩻ တယိုꩻတဝ်းသွူ။ မဉ်ႏထွားချာယင်း သမဲင်ꩻကို ထီႏချာဗော့ꩻ ခမ်းရင်ꩻသားပါ (၁၉၄၇)ပင်ႏလုံညီႏလာႏခံႏ သဘောꩻတူႏလတ်ချုက်နဝ်ꩻ ကွပ်အခိန်ႏခါႏ အခေႏအနေႏတဲင် ပအိုဝ်ႏလိုꩻမျိုꩻသီး တအဝ်ႏတဝ်းအထွူနဝ်ꩻမꩻ ပအိုဝ်ႏလိုꩻမျိုꩻသီးအခန်ꩻကဏ္ဍ စဲင်းစဲင်းတပါသော့ꩻဗာႏတဝ်းနဝ်ꩻသွူ။ ပအိုဝ်ႏလိုꩻမျိုꩻသီး တအဝ်ႏတဝ်းအထွူနဝ်ꩻ လိုꩻကအီႏဝါႏသနာႏနဲင်ႏငံႏရေꩻသားဖုံႏ၊ ခုမ်မာꩻဖေႏနဲင်ႏငံႏရေꩻအစွိုꩻအဗူႏဖုံႏ နမ်းခြောင်ꩻထွာ ပအိုဝ်ႏလိုꩻမျိုꩻအစွိုꩻအဗူႏဖုံႏ၊ နဲင်ႏငံႏရေꩻထာꩻထီႏဖုံႏ၊ ပအိုဝ်ႏလိုꩻမျိုꩻတာႏ မဲဉ်လꩻနမ်းပဲင်ႏပျဌာန်းခွင်ꩻ၊ မဲဉ်လꩻနမ်းပဲင်ႏအိုပ်ချုက်ခွင်ꩻ၊ မဲဉ်လꩻပအိုဝ်ႏလိုꩻမျိုꩻနမ်းပဲင်ႏခမ်းနယ်ႏဖုံႏစတဲင် အဖဲ့ꩻဖဲ့ꩻအဒဝ်ႏဒဝ်ႏ အာႏယိုပေႏ၊ ဖျင်ဆင်ခါꩻမု တအဝ်ႏတဝ်းအထွူတဲင် ခမ်းထီအမွဉ်းအဖျင် အဆုမ်ႏနဝ်ꩻတလဲင်ႏကို ပအိုဝ်ႏလိုꩻမျိုꩻအတာႏ အခွင်ꩻအရေꩻ လွစ်ထိုꩻဗာႏလဲဉ်းနဝ်ꩻ ဟန်ႏနီꩻပအိုဝ်ႏစုမ်ႏဖြာꩻ အဝ်ႏသေထွꩻဒျာႏဝင်ꩻသွူ။ ယိုတလဲင်ႏ ယိုတခြွိုက် မန်းခမ်းထီ အပြောင်ꩻအလုဲင်ႏ၊ မန်းခမ်းထီ အမွဉ်းအဖျင်အဆုမ်ႏတခီႏနဝ်ꩻ ကျုံႏတနꩻတွမ်ႏနမ်းခြောင်ꩻဖေႏပအိုဝ်ႏလိုꩻမျိုꩻနဲင်ႏငံႏရေꩻအစွုမ်ꩻအစွိုꩻတဲ့အဝ်ႏ၊ ဗွိုန်ပီနုဲင်းခမ်းရင်ꩻသားအလောင်ႏလင် ခေတ်နဲင်ႏငံႏရေꩻထာꩻထီႏသားဖုံႏတဲ့အဝ်ႏ၊ နဝ်ꩻမꩻတဲင် မန်းခမ်းထီအမွဉ်းဖျင်အဆုမ်ႏယိုတလဲင်ႏယို ပအိုဝ်ႏလိုꩻမျိုꩻသီး နဲင်ႏငံႏရေꩻအခန်ꩻကဏ္ဍ၊ ပအိုဝ်ႏလိုꩻမျိုꩻသီးအခွင်ꩻရေꩻ၊ ပအိုဝ်ႏလိုꩻမျိုꩻသီးနဲင်ႏငံႏရေꩻသမဲင်ꩻ ဖေႏကလွစ်ထိုꩻလꩻမွုန်းဒွုမ်နဝ်ꩻ အဝ်ႏလိုႏဖြွမ်းဗူႏ၊ အဝ်ႏလိုႏဖြွမ်း၊ ကတူႏအဝ်ႏလိုႏရိုပ်ထာꩻယူႏ၊ အဝ်ႏလိုႏနေးနာႏထူႏချာငါလွဝင်ꩻငဝ်းတဲင် အဝ်ႏလိုႏအုံကိုမ်ဒေါ့ꩻရီလွေꩻမွေးမွေးလဲဉ်းဝင်ꩻနဝ်ꩻ ပအိုဝ်ႏခမ်းသားသီး မဲဉ်ထီႏလွလဲဉ်းနဝ်ꩻသွူ။ သင်စွဉ်ႏ ကခုမ်မာꩻဖေႏ ပအိုဝ်ႏလိုꩻမျိုꩻနဲင်ႏငံႏရေꩻသား အစွိုꩻမုဲင်ꩻတယဝ်း မန်းခမ်းထီအပြောင်ꩻအလုဲင်ႏတန် ကအဝ်ႏထွာခိန်ႏနုဲင်းယိုနဝ်ꩻ ပအိုဝ်ႏလိုꩻမျိုꩻတာႏ အကျိုꩻဖေႏကအဝ်ႏနဝ်ꩻ အဝ်ႏလိုꩻမာꩻသေꩻငါႏသွူ၊ ခုမ်မာꩻဖေႏပအိုဝ်ႏလိုꩻမျိုꩻနဲင်ႏငံႏရေꩻသား နမ်းခြောင်ꩻအဝ်ႏနီသိုမ်စွိုꩻလဲ့ မဉ်ႏပတ်သဲစ်တွမ်ႏ လိုꩻမျိုꩻရေꩻရာႏ မူဝါဒနဝ်ꩻ ခံႏထူႏချက်အဝ်ႏလိုႏထန်ႏညီႏလဲဉ်းဝင်ꩻ တချက်ချင်ႏတငွါချင်ႏသွူ။ ခမ်းခြွဉ်းဗူႏအရန်း ငိမ်ꩻချံꩻရေꩻညီႏလာႏခံႏနဝ်ꩻ အစိုႏရအွဉ်ငါအဝ်ႏမာꩻလွေꩻလဲဉ်းသွူတဲင် ဒင်ႏသွင်ꩻလိုꩻမျိုꩻမူဝါဒ၊ ခံႏထူႏချက်တာႏ အဝ်ႏလိုႏရဲဉ်ꩻခါꩻ၊ မာꩻစွိုးခွိုꩻ(အမျိုꩻသာꩻ)အရန်း ဒေါ့ꩻရီပွယ်ꩻနဝ်ꩻ အစွိုꩻစွုမ်ႏ လိုꩻစွုမ်ႏ အဝ်ႏလိုႏကျုံႏပါဝင်ႏလို့လဲဉ်းသွူ။ ပအိုဝ်ႏစွိုးခွိုꩻအရေꩻယို မာꩻတစွိုꩻ မာꩻတဖြာꩻ တမွေးတဝ်း၊ မာꩻတဲ့ တဒါႏတဝ်းတွော့ꩻ ဖေႏကတဝွုန်ꩻနဝ်ꩻ နဲင်ႏငံႏရေꩻသားအစွိုꩻလုမ်ꩻ တကာႏတဝ်း တွမ်ႏပအိုဝ်ႏခမ်းသားထုတွော့ꩻ အဝ်ႏလိုႏဆွန်ꩻစူမာꩻညီꩻလဲဉ်းနဝ်ꩻသွူ။