ခမ်းထီဖေႏကလꩻ

"ခမ်းထီဖေႏကလꩻတဲ့နောဝ်ꩻ၊ ကလꩻထွူလဲဉ်းခမ်းထီ ဖေႏကတဉ်ႏခွေါင်တဲ့နောဝ်ꩻ" ပအိုဝ်ႏစွိုးခွိုꩻနုဲင်းယိုခါ တခွိုꩻလွုမ်းကအောဝ်ႏထောင် နဲင်ႏငံႏရေꩻတဖူꩻနောဝ်ꩻ စငါအီႏတွိုႏဗꩻ တထာႏဝကိုတဲင် အောဝ်ႏလိုႏသွုပ်ငါနောဝ်ꩻ အောဝ်ႏအာနေက၊ တဖူꩻဆွာꩻနေက၊ လိုꩻသေလိုꩻဒါႏ အောဝ်ႏလိုႏအာနေက၊ လိုꩻကျလိုꩻယံ လိုꩻရုဲင်းထင်ဖုံႏ၊ လိုꩻစွန်ꩻထီဗွေဖုံႏနောဝ်ꩻသွူ။ ခွိုꩻပအိုဝ်ႏဖုံႏဟွေး- နီပအိုဝ်ႏဘဝ ထင်ႏထိုတာႏ အောဝ်ႏခွုမ်မာꩻတွင်ꩻ ပါꩻမုဲင်ꩻမဲဉ်ယားယား ခံႏမွိုန်းအပꩻလီ၊ ခံႏမွိုန်းအကုဲင်ပြင်ꩻ၊ ခွန်နင်ꩻသီးယိုတအာႏ ဖေႏကလွစ်ဗာႏမဲ့ငါပေႏ၊ တရေႏလင်ꩻနောဝ်ꩻ အောဝ်ႏလိုႏစွူစွူဒျာႏ နီရဲင်ꩻအာႏ၊ အောဝ်ႏလိုႏထဲင်းထဲင်းဒျာႏ နီလွောင်ႏဗူႏရေꩻ၊ ယိုမာꩻငါ ကောဝ်ႏထွန်ႏထျꩻ ဖေႏကတွိုႏဗꩻ နီပအိုဝ်ႏကမဲဉ်လꩻ နမ်းပဲင်ႏခမ်းထီ၊ နာꩻတွမ်ႏနီသောင်ႏသာ၊ ထွိုင်ႏကျိုꩻစာꩻ နေးအမဲဉ်ႏတရာꩻ မဉ်ႏထောင်စွဉ်ႏစွဉ်ႏ အွဉ်ငါခေါင်းဆောင်တန်ဖုံႏ ကအွဉ်ႏနယ်အတွိုင်ꩻနောဝ်ꩻ မုဲင်ꩻခါခန်းတယောဝ်း အဲဉ်ထောဝ်းအထဲ့သွုမ်ꩻနောဝ်ꩻသွူ။ ကွပ်ပွိုးနောဝ်ꩻမꩻ ပညာႏသျိလိုꩻဒါႏ ဟောဝ်သေထွိုက်ငါႏ နယ်ꩻအစားစား လိတ်စောင်ႏကို ဖေႏကလꩻဗာႏ နေႏရာႏခင်ႏလမ်း(ခမ်းထီ)နောဝ်ꩻ အကျောင်ꩻတရာꩻ အောဝ်ႏသွစ်ꩻပါꩻတဲင် ခွိုꩻပအိုဝ်ႏခွန်နင်ꩻ ဖေႏကသေထွꩻနွောင်ꩻအီဝင်ꩻအတာႏ မဉ်ႏတဲမ်းထန်ႏနယ်ဗာႏနောဝ်ꩻ- ၁။ စဲ့ꩻကတူႏအွဉ်ငါ ပိုလ်ႏကဲႏပါ လွောင်ႏဗူႏဗာႏဝင်ꩻ၊ ဖြွမ်းဗူႏဗာႏဝင်ꩻလဲ့တပါꩻ။ ၂။ စဲ့ꩻမဲ့စဲ့ꩻနား ကထွားထိန်ꩻနာႏခံႏဒါႏ သတင်ꩻအမျိုꩻမျိုꩻ လိုꩻဟောဝ်သစ္စာႏမဲဉ်ႏသားလွိုင်ႏအာဗာႏလဲ့ တပါꩻ။ ၃။ စဲ့ꩻသားပေႏဖုံႏ ပြဲ့ꩻစွုမ်ႏတွမ်ႏထာꩻရုဲင်းလွိုင်ႏအာ၊ ပြဲ့ꩻစွုမ်ႏငီႏညွတ်ဟောဝ်ငါႏလဲ့ တပါꩻ။ ၄။ လိုꩻသေလိုꩻဒါႏ၊ လိုꩻပညာႏသား လိုꩻလက်ꩻလဲဉ်၊ လိန်ႏလဲဉ်နွောင်ꩻချာ ရန်ႏသူႏမဲ့နား ပြဲ့ꩻစွုမ်ႏလွိုင်ႏအာဗာႏနောဝ်ꩻလဲ့ တပါꩻ။ ၅။ စဲ့ꩻတပ်အစွယ်ႏ ကဟဲ့ꩻထွိုက်ဒါႏ လိုꩻလိမ္မာႏအမတ်တန် လွိုင်ႏအာစွုမ်ႏလင်ႏ လွောင်ႏဗူႏဗာႏဝင်ꩻနောဝ်ꩻလဲ့ တပါꩻ။ ၆။ စဲ့ꩻတပ်စွုမ်ꩻတန်ကို ကလိုႏအောဝ်ႏထွိုက်ငါႏ လော၊ ကာꩻ၊ သင်္ဘောꩻကျောင်ႏ၊ သေ၊ ဆင် စွုမ်ႏလင်ႏဗာႏနောဝ်ꩻလဲ့ တပါꩻ။ ၇။ စဲ့ꩻအင်္ဂါႏလက်နက် စွုန်ꩻ၊ ယမ်ꩻ၊ အမျောက်၊ ဗုံး လွိုင်ႏအာဗာႏလဲ့တပါꩻ ။ ၈။ စဲ့ꩻတပ်မဟာႏ တွမ်ႏထာꩻငီႏညွတ်၊ တွမ်ႏထာꩻရဲးကွယ်ႏဟောဝ် စွုမ်ႏလင်ႏဗာႏလဲ့ တပါꩻနောဝ်ꩻသွူ။ ခမ်းထီဖေႏကလုဲင်း၊ ဖေႏကအာ၊ ဖေႏကထင်ႏထိုနောဝ်ꩻ အကျောင်ꩻတရာꩻသွစ်ꩻပါꩻ ဆꩻကီယိုအောဝ်ႏဗာႏ၊ မဉ်ႏတအောဝ်ႏတောဝ်းနောဝ်ꩻ အောဝ်ႏစွဉ်ႏခမ်းထီလဲ့ ပါꩻလꩻထိုꩻဒါႏ၊ အောဝ်ႏစွဉ်ႏရွဉ်ခံꩻတဲ့ ထွာထိုꩻဒါႏပါꩻရွဉ်ခံꩻ၊ အောဝ်ႏစွဉ်ႏဟံႏယာႏလဲ့ ထွာထိုꩻပါꩻဟံႏယာႏ၊ အောဝ်ႏစွဉ်ႏလိုꩻမျိုꩻလဲ့ ထွာလို့ပါꩻသွဉ်း၊ ပါꩻကူႏလီႏနောဝ်ꩻသွူ။ နီလိုမျိုꩻ ခင်ႏကာမဉ်ႏထွာလဲဉ်းဝင်ꩻ၊ နီရပ်ရာႏ၊ နီဒုံဆောင်ႏ၊ နီခမ်းထီ မဉ်ႏအောဝ်ႏလဲဉ်းနောဝ်ꩻ ဖေႏကတဉ်ႏခွေါင်၊ ဖေႏကထင်ႏထိုအတာႏ (၁) အွဉ်ငါသား လိုꩻတန်လိုꩻယံအောဝ်ႏဗာႏ (၂) လိုꩻရက်ခမ်းထီ တဲမ်းလိတ်ဆရာႏ အတွိုင်ႏပင်ႏခံႏပုဂ္ဂိုလ်ႏအောဝ်ႏဗာႏ (၃) တသီႏဆရာႏ ဒေါက်တာ ပါရဂူအောဝ်ႏဗာႏ (၄) လိုꩻသစ္စာႏသား လိုꩻထွားချာ ခမ်းထီဖုံႏလွိုင်ႏဗာႏ (၅) အာႏဇာႏနီႏလိုꩻယံ လွိုင်ႏအာဗာႏ (၆) လိုꩻယောင်ꩻရေꩻ လိုꩻဖုဲင်ႏထွား လွိုင်ႏအာဗာႏ (၇) သဌေꩻတန် စီꩻပွာꩻရေꩻသား လွိုင်ႏအာဗာႏ (၈) ခမ်းသားစဲ့ꩻတပ်တန် အောဝ်ႏခါꩻဗာႏ (၉) စူခွုမ်ခြွိုင်းခြိုꩻအမျိုꩻမျိုꩻ လွိုင်ႏအာဗာႏ-စတဲင် ခမ်းထီရတနာႏနုဲင်းယို မဉ်ႏအောဝ်ႏမꩻ လိုꩻတဲ့ခွꩻသꩻ၊ ခမ်းထီတဲ့တဉ်ႏခွေါင်၊ နီခင်ႏကာလဲ့ အီႏထွꩻဝင်ꩻနောဝ်ꩻသွူ။ ကမာႏဖိုလဲဉ်းဒါႏ နီခင်ႏကာဖုံႏနောဝ်ꩻ ထူႏသွဉ်ခန်ꩻတဲင် ယိုမာꩻငါ ဖေႏကလꩻလွဉ်ထဲင်းထဲင်းယင်း နီအခွင်ꩻအရေꩻ၊ ဖေႏကတွိုႏဗꩻ နီရေႏမိုးချက် နေးတွမ်ႏအမဲဉ်ႏတရာꩻ ဥပဒေႏတဖွောင်ꩻကို မူႏခိုခွန်နင်ꩻ ကျိုꩻစာꩻလွေꩻထဲင်းထဲင်းသွော့ဝင်ꩻ၊ ခမ်းထီတဖြုံႏ လိုꩻမျိုꩻတမျိုꩻ ကလိုႏအပ်ဒါႏ အခန်ꩻကဏ္ဍပေါင်ꩻစွုမ်ႏနောဝ်ꩻ ဖေႏကအောဝ်ႏစွုမ်ႏအတာႏ သောင်ႏသာထဲင်းဗာႏနေကနောဝ်ꩻသွူ။ နီခွိုꩻထင်ႏထိုတာႏ နီလိုꩻမျိုꩻမာꩻချာဗာႏဒျာႏ၊ နီလိုꩻမျိုꩻအုံအောဝ်ႏမုꩻ တဉ်ႏခြွော့တာႏ နီခွုမ်မာꩻချာဗာႏဒျာႏ၊ နီကခွုမ်မာꩻဒါႏ စွိုးခွိုꩻထင်ႏထိုရေꩻ ထာꩻမာꩻနောဝ်ꩻအကို အနယ်ꩻယိုမဲဉ်ႏဗာႏ၊ အနယ်ꩻမဲဉ်ႏဖေႏကလꩻနောဝ်ꩻ ထုမ်ႏဗာႏ၊ ယူႏစဉ်ꩻစာꩻဗာႏ၊ ကလꩻခါꩻဒါႏ အနယ်ꩻပညာႏယံအတွိုင်ꩻ လွောက်ꩻနာႏခွုမ်မာꩻလွဉ်ꩻဗာႏနောဝ်ꩻသွူ။ ခေတ်တွမ်ႏစနစ် ပြောင်ꩻလုဲင်ႏမုꩻအကို ပအိုဝ်ႏပိုနီနာꩻ ဖေႏကပြောင်ꩻလုဲင်ႏနုဲင်းနုဲင်းဝင်ꩻနောဝ်ꩻ ကျိုꩻစာꩻသောင်ႏသာ ယိုမာꩻငါထွိုင်ႏခန်းဝင်ꩻအကျောင်ꩻ တဲမ်းနယ်ဗာႏ လိတ်ထွားသား ဗွေႏခွန်နင်ꩻသီးဖုံႏသွူ။