ခမ်းသားတဖြာꩻစီႏ

အဝ်ႏ ဝီခီပီးဒီးယား ကို

"ခမ်းသားတဖြာꩻစီႏ ဆန္ဒမဲးတဗီႏယို ခမ်းထီအတာႏ အရေꩻတန်ငါႏ" ခမ်းထီအပြောင်ꩻအလုဲင်ႏ ထွာနွောင်ꩻရေꩻယို အဝ်ႏသော့ꩻဒျာႏ ခမ်းသားလိုꩻထုသီးစူကိုသွူ၊ နဝ်ꩻမꩻ မဉ်ပြောင်ꩻလုဲင်ႏ ကျင်ꩻသုံꩻလွေꩻစနစ်နုဲင်းမုဲင်ꩻ၊ မဉ်ထွဉ်ႏအုပ်ချုပ်ခမ်းထီနုဲင်းမုဲင်ꩻ၊ မဉ်အွဉ်ႏလိုꩻနုဲင်းမုဲင်ꩻအုပ်ချွုတ်၊ မဉ်အွဉ်ႏထွာခမ်းထီနုဲင်းမုဲင်ꩻနဝ်ꩻ မဉ်ႏတွိုႏ တင်ꩻကျွစ်လာလောင်း ၁၁-နီꩻယို ခမ်းသားသီး အခန်ꩻကဏ္ဍ၊ ခမ်းသားသီး တာႏဝွန်ႏကေႏကေႏ အဝ်ႏလိုႏလွေꩻဖေႏငါႏ မဲးနဝ်ꩻသွူ။ အနီꩻယိုနဝ်ꩻ ထွာတမုဲင်ꩻမွော့ရိုꩻဗာႏတွိုႏ ခမ်းရေꩻထီရေꩻ ခမ်းထီအတာႏ အရေꩻတန်ငါႏဟောင်းနဝ်ꩻ အနီꩻယိုနဝ်ꩻ ထွာလွိုက်ရွေꩻ လိုꩻကအီႏခုမ်မာꩻဖေႏ ခမ်းထီရေꩻရာႏအကျိုꩻတဲင် ခမ်းသားစုမ်ႏဖြာꩻနဝ်ꩻ တာႏဝွန်ႏအဝ်ႏငါႏနဝ်ꩻသွူ။ နဝ်ꩻမ ခမ်းသားစုမ်ႏဖြာꩻယို ခမ်းထီအတာႏ လွိုက်ရွေꩻဗာႏတာႏဝွန်ႏအဝ်ႏတဲင် အွဉ်ႏအရေꩻ အဝ်ႏလိုႏလွေꩻသော့ꩻဖေႏငါႏမဲးသွူ။ အနီꩻယိုနဝ်ꩻ လွေꩻသွို့ꩻ၊ လွေꩻခြံ၊ လွေꩻဆေꩻ ဖြေꩻစာဖုံႏ အွဉ်ႏကုဲင်ယို့ꩻထွူ လွစ်ဟင်ꩻအွဉ်ႏတဝ်း လွေꩻစဝ်းစဝ်းတွော့ꩻ အဝ်ႏလိုႏလွေꩻသော့ꩻငါႏ တန်ꩻဖိုꩻအဝ်ႏမဲးတဗီႏယိုနဝ်ꩻသွူ။ လွေꩻတဝ်းသွို့ꩻခြံတွော့ꩻ ထာꩻမာꩻမဉ်ႏကုဲင်နဝ်ꩻ တနီꩻလုမ်ꩻသွူ၊ လွေꩻတဝ်းဆေꩻ ဖြေꩻစာတဝ်းတွော့ꩻ စီꩻပွါꩻမဉ်ႏလွစ်ထန်ႏနဝ်ꩻ တနီꩻလုမ်ꩻသွူ။ ကွဲးတွော့ꩻ ခမ်းထီရေꩻရာႏ ခမ်းထီတာႏ လွိုက်ရွေꩻပွယ်ꩻအနီꩻယိုအကို နီနမ်းမဉ်ႏတပါတဝ်းနဝ်ꩻ တထွာတဝ်းသွူ၊ နီနမ်းဖေႏကပါနဝ်ꩻ အဝ်ႏလိုႏကျိုꩻစာꩻငါႏဝင်ꩻသွူ၊ ကွပ်နီနမ်းတပါတဝ်းတဲင် လိုꩻဟဝ်အတာႏ မဲးတဗီႏသုမ်ꩻထိုꩻတွော့ꩻ မဉ်ႏလဲဉ်းထိုꩻစနစ်ကုဲင်လိုꩻစူကိုနဝ်ꩻ စနစ်ကုဲင်တံႏယို အီႏခံႏဗာႏ ငတ်ꩻနေင်ႏနဝ်ꩻသွူ။ မန်းခမ်းနဝ်ꩻ ခုမ်မာꩻခမ်းသားအတာႏ နမ်းခြောင်ꩻယို သက်တန်ꩻတသွုပ်နဝ်ꩻ ငတ်ꩻနေင်ႏနဝ်ꩻသွူ၊ နဝ်ꩻမꩻ ငတ်ꩻနေင်ႏတလဲင်ႏယို မာꩻလွေꩻဗာႏ ခမ်းသားနမ်းခြောင်ꩻ အပြောင်ꩻအလုဲင်ႏနဝ်ꩻသွူ၊ မဉ်ႏမာꩻလွေꩻသွူ ခမ်းသားနမ်းခြောင်ꩻ ငတ်ꩻနေင်ႏတလဲင်ႏယို ကထွာခမ်းသားသီးနဝ်ꩻ လွိုက်ရွေꩻဗာႏနဝ်ꩻသွူ။ တယ်ႏစွဉ်ႏ နဲင်ႏငံႏတောႏသမ္မတ ဗꩻလင်ꩻတဝေင်ꩻနယ်ႏစီႏ ခမ်းနယ်ႏလွတ်တောႏ လိုꩻပုဂ္ဂိုလ်ႏဖုံႏစားယိုနဝ်ꩻ အဝ်ႏခမ်းသားသီးလွိုက်ရွေꩻတွော့ꩻ ပေါႏထန်ႏလွဉ်ဒျာႏနဝ်ꩻသွူ။ နဝ်ꩻမꩻ ခမ်းရေꩻထီရေꩻ လွိုက်ရွေꩻခမ်းသားနမ်းခြောင်ꩻအနီꩻယို ခမ်းသားတွိုင်ꩻ အဝ်ႏလိုႏပါဝင်ႏငါႏသွူ၊ လွိုက်ရွေꩻပွဲꩻနုဲင်းယိုအကို ခမ်းသားတဖြာꩻစီႏ မဉ်ႏတပါဝင်ႏသော့ꩻတဗာႏတဝ်းနဝ်ꩻ အခွင်ꩻအရေꩻသုမ်ꩻငါႏသွူ။ ကလꩻလဲဉ်းသွူ လွိုက်ရွေꩻခွင်ꩻ သော့ꩻမဲးခွင်ꩻနုဲင်းယိုအကို မဉ်ႏတသုံꩻဒါႏတဝ်း၊ မဉ်ႏတသော့ꩻတဝ်း၊ မဉ်ႏလွေꩻလွိုက်ရွေꩻတဝ်းနဝ်ꩻ အထန်ႏလွဉ်ဒါႏ နမ်းခြောင်ꩻအထီအသွီႏအဲဉ်ထဝ်းနဝ်ꩻသွူ၊ မဉ်ႏထန်ႏလွဉ်ဒျာႏ နမ်းခြောင်ꩻအထီအသွီႏအဲဉ်ထဝ်းနဝ်ꩻ ခမ်းထီအတာႏ ထင်ႏထိုပြွိုင်မွိုင်မု အဲဉ်ထဝ်းနဝ်ꩻသွူ။ ခမ်းထီထင်ႏထိုပြွူႏဖြိုမုအဲဉ်ထဝ်းတဲင် ကထွာခမ်းသားသီးနဝ်ꩻ အုံအဝ်ႏဗာႏဆင်ꩻရယ်ꩻ၊ အံႏအွꩻဗာႏဆင်ꩻရယ်ꩻ၊ ခမ်းသားအတာႏ ခြွိုင်ႏသန်ꩻရေꩻ၊ ပညာႏရေꩻ လိုမ်းကိုမ်ႏမု လꩻဗာႏတဝ်းနဝ်ꩻသွူ။ ခမ်းတန်သား ခမ်းယဟန်ႏဖုံႏနဝ်ꩻ ကျင်ꩻသုံꩻဒီမိုကရေစီစနစ်တွော့ꩻ ကမာꩻလွေꩻလွိုက်ရွေꩻပွယ်ꩻယို ကထွာခမ်းသားနဝ်ꩻ သေနာႏတဲင် အွဉ်ႏရေꩻမွေးစွဉ်ႏ အွဉ်ႏကုဲင်ထာꩻမာꩻ၊ အွဉ်ႏကုဲင်စီꩻပွါꩻတွော့ꩻ အနီꩻနဝ်ꩻတနီꩻအတာႏ အခိန်ႏယို ဖေႏလွေꩻဒျာႏ ခမ်းထီအတာႏနဝ်ꩻသွူ။ နုဲင်းယင်းကာႏလယိုခါကျာꩻနဝ်ꩻ လွိုက်ရွေꩻပွယ်ꩻယို မန်းခမ်းအတာႏ အဝ်ႏမာꩻလွေꩻဒျာႏ မန်းခမ်းကိုလဲ့ နုဲင်းကထွာဒါႏ လိုꩻမန်းခမ်း ကလွေꩻဖျော်ဒါႏ ခမ်းလင်သားအတာႏနဝ်ꩻ ဖေႏနေးဗာႏတွမ်ႏ ဖေႏကျိုႏရီးမဲးစနစ်နဝ်ꩻသွူ။ ဝွေꩻသီးဖုံႏနဝ်ꩻ လိုꩻမန်းခမ်းသားဒျာႏတဲင် မန်းခမ်းကို ကအီႏလွိုက်ရွေꩻဒါႏ ခမ်းသားနမ်းခြောင်ꩻ လွိုက်ရွေꩻပွယ်ꩻယို မဉ်ပါဝင်ႏရောင်၊ မဉ်ဖေႏသော့ꩻရောင်လွမွေးစွဉ်ႏ မဲးဖုံႏနဝ်ꩻသွူ၊ ခမ်းထီအတာႏ ကမာꩻလွိုက်ရွေꩻပွယ်ꩻယို သော့ꩻမဲးအခွင်ꩻအရေꩻနဝ်ꩻ တမဉ်ခံႏသုမ်ꩻလွတဝ်းနဝ်ꩻသွူ။ နဝ်ꩻမꩻ နုဲင်းကတွိုႏလွေꩻဒါႏ စင်ကာပူကိုသားဖုံႏ၊ ထုဲင်ꩻခမ်းကိုသားဖုံႏ၊ ကိုးရီးယားခမ်းကိုသားဖုံႏ၊ အမေႏရိကန်ႏခမ်းကိုသားဖုံႏ စတဲင်နဝ်ꩻ လွေꩻဖေႏကျိုႏရီးဗာႏမဲး မန်းခမ်းသံရုံးကိုနဝ်ꩻသွူ။ ယခမ်းခမ်းကိုနဝ်ꩻ ကအုံဒါႏရပ်တွမ်ႏ ကအီႏလွေꩻဖေႏဒါႏမဲး အွိုးမန်းခမ်းသံရုံးရုမ်ꩻယို အဝ်ႏခါႏညာꩻစွဉ်ႏ မဲင်ႏပေါင်ꩻအရေင်တဲင် လွေꩻဗေင်ႏပွေါးဗာႏနေးနဝ်ꩻသွူ။ ခမ်းထီအတာႏ အီႏဖေႏသဲင်ꩻချာဗာႏမဲးနဝ်ꩻ ဗေင်ႏပွေါးဗာႏရီး၊ ခံႏလွစ်စွဉ်ႏခမုဲင်ꩻမုဲင်ꩻ၊ ယဖြာꩻနဝ်ꩻ အုံပွေါးတနွောင်းဗာႏ ယာခိုးကိုပနီꩻနီꩻတဲင် သီးမူꩻဝꩻနေးစွဉ်ႏ၊ နဝ်ꩻမꩻ ခမ်းရေꩻထီရေꩻ လွိုက်ရွေꩻပွယ်ꩻယို အွဉ်ႏအရေꩻလွေꩻသော့ꩻသွော့မဲးနဝ်ꩻ ခမ်းသားငဝ်းလိတ်သေသင်ꩻ တဲက်တွန်ꩻတမာလွေꩻဗာႏ ပအိုဝ်ႏခမ်းသားသီးသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခြွူႏမွဉ်းသားစွိုꩻ
  2. ခမ်းသားငဝ်း အမုဲင်(၃)၊ အစဲဉ်ႏ(၂၄)