ခွန်တန်ဗိမ္ဗိသာရ

"လိတ်ဗွောင်မဲ့နား-ဟောဝ်ဟော်ꩻထွား အမုဲင်(၂)"

နီဗွေႏဘုရာꩻတွမ်ႏ တပဲ့ꩻရဟန်ꩻဖုံႏ ဖျော်လွဉ်ဝေင်ꩻရာႏဇဂျိုဟ်ႏ အုံသတင်ꩻသွုံꩻ ခြုံႏမွူးတန်ဆလ၊ လိုꩻအာမရမက လွဉ်ဝုဲင်ႏလွ နီဗွေႏဘုရာꩻ၊ ခွန်တန်ဗိမ္ဗိသာရ လောဝ်းဗွေႏဘုရာꩻနုဲင်းယို-

"ဘုရာꩻဗွေႏမျတ် ဗွေႏဩ -

၁။ ခွေသွဉ်း ခါးလားကထွာခွန်နဝ်ꩻ "ခွေမဉ်ႏထွာဗာႏခွန်နဝ်ꩻ ယံဟောဝ်ငါႏဟွေး" ကော့ꩻမောင်ꩻဖိုနုဲင်းနဝ်ꩻ၊ ယိုခါ ထွာဗာႏလဲဉ်းခွန်၊ ဆန္ဒဗွေလဲဉ်း။

၂။ ခွေမဉ်ႏထွာထွူခွန်နဝ်ꩻ "ဗွေႏဘုရာꩻ မဉ်ႏကျွꩻလွဉ်နောဝ်ꩻ ယံဟောဝ်ငါႏဟွေး" ကော့ꩻမောင်ꩻဖိုနုဲင်းနဝ်ꩻ၊ ယိုခါ ဗွေႏဘုရာꩻကျွꩻလဲဉ်း၊ ဆန္ဒဗွေလဲဉ်း။

၃။ "ခွေမဉ်ႏလွေꩻထေ့ မဉ်ႏတရေ့ဆယ်ꩻကပ်ဗာႏ ဗွေႏဘုရာꩻနဝ်ꩻ ယံဟောဝ်ငါႏဟွေး"ကော့ꩻမောင်ꩻဖိုနုဲင်းနဝ်ꩻ၊ ယိုခါ လွဉ်ထေ့ဗာႏလဲဉ်း ဗွေႏဘုရာꩻ၊ ဆယ်ꩻကပ်ဗာႏလဲဉ်း ဗွေႏဘုရာꩻ၊ ဆန္ဒဗွေလဲဉ်း။

၄။ "ဗွေႏဘုရာꩻ မဉ်ႏဟော်ꩻဖေႏခွေတရာꩻနဝ်ꩻ ယံဟောဝ်ငါႏဟွေး"ကော့ꩻမောင်ꩻဖိုနုဲင်းနောဝ်ꩻ၊ ယိုခါ ဗွေႏဘုရာꩻ ဟော်ꩻဖေႏလဲဉ်းတရာꩻ၊ ဆန္ဒဗွေလဲဉ်း။

၅။ "ဗွေႏဘုရာꩻ ကဟော်ꩻဖေႏဒါႏ တရာꩻယာႏယို ခွေမဉ်ႏသေနာႏနဝ်ꩻ ယံဟောဝ်ငါႏဟွေး" ကော့ꩻမောင်ꩻဖိုနုဲင်းနဝ်ꩻ၊ ယိုခါ ခွေသွဉ်းဆန္ဒဗွေလဲဉ်းသွူ ဗွေႏဩ" လောဝ်းနီဗွေႏဘုရာꩻ နုဲင်းနောဝ်ꩻသွူ။

နုဲင်းမွူးရောဝ်ꩻ ပင်ꩻသွုံꩻသွမ်ꩻဟော်ကို၊ သွုံꩻသွမ်ꩻထွူ အီႏနာႏသွူတရာꩻ၊ ခွန်တန်စဉ်ꩻစာꩻယူႏနုဲင်းယို- "ခွေဝေဠုဝွန်ႏဥယျာဉ်ႏခြံသူꩻနဝ်ꩻ တွမ်ႏဒုံတဲ့ တဗော့ꩻငါႏတဝ်း၊ တညာꩻငါႏတဝ်း၊ တဖူꩻလွေꩻသဲင်ꩻတဲ့ရော့ꩻဒျာႏ၊ လိုꩻကမဉ်လွေꩻဝုဲင်ႏဘုရာꩻသားတာႏတဲ့ လွေꩻသဲင်ꩻယိုꩻဒျာႏ၊ မွူးယာခိုႏတဲ့ တွမ်ႏလိုꩻလမ်း တရော်ꩻရယ်ꩻတဝ်း၊ မွူးဟာခိုႏတဲ့ လိုꩻငေါဝ်းယေန်ဒျာႏ၊ ဟွုန်တဝ်း လိုꩻဝေင်ꩻလိုꩻဒုံရောင်ထာꩻ၊ နွုမ်ꩻတဝ်းလိုꩻသီးဖုံႏအလွီး၊ အုံဗဉ်ႏဗဉ်ႏဗꩻဗꩻထာꩻ (အားထွုတ်တေ့ꩻတရာꩻ)ဟောဝ်ငါႏ၊ ဗွေႏဘုရာꩻ' ဗွေႏသံဃာႏသီး အုံသတင်ꩻသွုံꩻသော့ꩻ ရော့ꩻဟောဝ်မွေးစွဉ်ႏထာꩻ၊ ခွေဝေဠုဝွန်ႏဥယျာဉ်ႏသူꩻ ခွေမဉ်ႏလူႏဗာႏ ဗွေႏဘုရာꩻအွဉ်ငါ ပါတွမ်ႏသံဃာႏနဝ်ꩻ ယံဟောဝ်ငါႏမွော့ဟွေး"ယူႏစွေးတေ့ꩻနုဲင်းနဝ်ꩻ။

ယူႏနုဲင်းနောဝ်ꩻထွူတွော့ꩻ ခွန်တန်ဗိမ္ဗိသာရနောဝ်ꩻ ထူႏထီဆျာꩻတာႏ လောဝ်းစွဉ်ႏဒျာႏ နီဗွေႏဘုရာꩻနုဲင်းယို- "ဩဗွေႏ - ခွေသွဉ်း ဝေဠုဝွန်ႏဥယျာဉ်ႏခြံသူꩻနောဝ်ꩻ အဝ်ႏလူႏဒျာႏဗွေႏဘုရာꩻ တွမ်ႏဗွေႏသံဃာႏသီး ဗွေႏဩ" လောဝ်းနုဲင်းနဝ်ꩻထွူတဲင် နီဗွေႏဘုရာꩻတဲ့ လက်ခံႏ၊ ဟော်ꩻဖေႏကျောင်ꩻကျိုꩻ၊ လူꩻလိုꩻယံလꩻပီပီ ဆျာꩻထီဖန်းဖေႏ ကုသိုလ်ႏနောဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ မဟာခန္ဓက)