ခွိုꩻသွုပ်ပွုံႏတာႏ(၂)

အဝ်ႏ ဝီခီပီးဒီးယား ကို

"ခွိုꩻစုပ်တသာလိုꩻယွဲးတွမ်ႏ သမဲင်ꩻဖေႏပွုံႏတာႏ(၂)" ပေါႏသဲင်ꩻကွုတ်ထွာလဲဉ်းလိုꩻပိုတဖြာꩻနောဝ်ꩻ ပွုံႏတာႏ(တာႏဝွန်ႏ)ယို အောဝ်ႏဒင်ႏထွူလဲဉ်းပြေင်လောင်း ပငါပရာꩻ၊ တဖြာꩻဖြာꩻ ဖင်းလဲ့ꩻတလွစ်တောဝ်းဒျာႏရင်ꩻရင်ꩻသွူ။ ကွုတ်ထွာလိုꩻပိုတဲင် လိုꩻအလောင်းယို ပွုံႏတာႏအောဝ်ႏအတွိုင်ꩻ ပွုံႏတာႏကေႏကေႏ ကမာꩻဖေႏဒါႏလိုꩻသားနောဝ်ꩻ ထွာလိုꩻပွုံႏတာႏကေႏနောဝ်ꩻမꩻ ကွုတ်ထွာလိုလꩻနုဲင်းနုဲင်းလဲ့ ထွာဗာႏလိုꩻကွိုင်ႏတန်ႏ(တန်ႏဖိုꩻ)အောဝ်ႏငါႏနောဝ်ꩻသွူ။ ယဟန်ႏသား ထွာကီလိုꩻလဲ့ ထာꩻသူႏသေအဲဉ်ထောဝ်း၊ ဉာဏ်ႏဆေ့ꩻခြောငါႏတဲင် "ယိုနောဝ်ꩻနီမွိုး၊ ယိုနောဝ်ꩻနီဖါ၊ ယိုနောဝ်ꩻ နီဖူးဝေးခွိုꩻနွယ်ႏ၊ ယိုနောဝ်ꩻ နီလိုꩻမျိုꩻ၊ ယိုနောဝ်ꩻ နီဘာႏသာႏ"စတဲင်နုဲင်းနောဝ်ꩻပေႏငါလဲ့ တသေတောဝ်း၊ ကွပ်သေတောဝ်းတွော့ꩻ ဝွေꩻခွိုꩻနွယ်ႏ၊ ဝွေꩻလိုꩻမျိုꩻဘာႏသာႏအလောင်းနောဝ်ꩻ တထိန်ꩻထွားတောဝ်း၊ ကွပ်ထိန်ꩻထွားတောဝ်းတဲင် ဝွေꩻခွိုꩻနွယ်ႏဘာႏသာႏ ထိုꩻမားဒါႏနောဝ်ꩻသွူႏ ခေတ်(IT)မီဒီယာဒို့တခြိုလဲဉ်းယိုတဗာႏနောဝ်ꩻ နီလိုꩻယွဲးဖုံႏ အောဝ်ႏထင်းတန်ငါငါလွေꩻဒျာႏ ဝင်ꩻပညာႏ၊ ဝင်ꩻဘာႏသာႏခွိုꩻနွယ်ႏတဲင် ဗွိုန်နုဲင်းဒေႏ တထီႏဖိုတောဝ်းထီပုတ်ꩻတွော့ꩻ အောဝ်ႏထင်းလဲဉ်း ပင်ႏလယ်ႏတန်အတွိုင်ꩻ ထီႏစွော့ꩻဗော့ꩻ ဝင်ꩻမာꩻဒါႏ လမ်းအွတ်ꩻတွိုက်နီရန်းလဲ့ အောဝ်ႏထင်းလဲဉ်း အတိုꩻတက်တမွိုꩻထာꩻနောဝ်ꩻသွူ။ နီပအိုဝ်ႏ ခွိုꩻစုပ်တသာလိုꩻယွဲးဖုံႏ မဉ်ႏအောဝ်ႏလွေꩻစွူစွူဗော့ꩻ အပွုံႏယိုနောဝ်ꩻ တညတောဝ်း ရျာꩻခေါင်ꩻတဗာႏကိုယို မဲ့ꩻနီခွိုꩻနွယ်ႏ ထိုꩻမားဒါႏနောဝ်ꩻသွူ။ ထီႏတောႏပါꩻရွဉ်အာ ထင်းတန်ငါငါဝင်ꩻလိုꩻမျိုꩻဘာႏသာႏတွော့ꩻ လွေꩻငါငါအုံငါငါ၊ ကွုတ်တသဉ်ငါငါဗော့ꩻ ဝင်ꩻလိုꩻမျိုꩻဘာႏသာႏခြွေငါ၊ အုံဗာႏဟောဝ်ငါ၊ နီလိုꩻမျိုꩻဘာႏသာႏ မဉ်ထွာမုဲင်ꩻထွာ ကဲဉ်းအာအာ တွိုႏလဲဉ်းနုဲင်းနောဝ်ꩻတဲင် အနာႏဂတ်ကို နီစွိုးခွိုꩻလိုꩻမျိုꩻယို သꩻထွူႏခရာႏတန်နောဝ်ꩻသွူ။ "မဉ်ႏအုံဒုံကိုရပ်ကိုနောဝ်ꩻ လုပ်ꩻမာꩻဗာႏခုဲင်ႏငါႏ၊ ချံꩻသာႏဒါႏပဲတောဝ်း၊ လွေꩻဝင်ꩻခမ်း ထုမ်ႏဝင်ꩻခမ်းကိုမꩻ ချံꩻသာႏယိုꩻ၊ ဗꩻယိုꩻ"ရိုꩻနုဲင်းနောဝ်ꩻတဲင် ထန်ႏလွေꩻဝင်ꩻခမ်းဝင်ꩻထီ၊ တောႏလမ်းတောႏပါႏငါငါ၊ ကွုတ်တသဉ်လို့ ဝင်ꩻလိုꩻမျိုꩻဘာႏသာႏ၊ နီခွိုꩻပအိုဝ်ႏအစွိုးအခြွီ သွတ်ꩻဝုဲင်ꩻထံထိုꩻလို့ဒျာႏ ပဉ်စုပ်စုပ်နောဝ်ꩻသွူ။ မဉ်ႏလွေꩻပွုံႏယိုနောဝ်ꩻ နီပအိုဝ်ႏခွိုꩻစုပ်တသာလိုꩻယွဲးဖုံႏ အီႏခွုမ်စံႏမာꩻလွေꩻနုဲင်းမုဲင်ꩻ၊ ပွုံႏတာႏအီႏထူႏလွေꩻဗာႏအနယ်ꩻမုဲင်ꩻ၊ လိုꩻယွဲးစွုမ်ႏဖြာꩻအလောင်း ဖေႏကသေထူႏပွုံႏတာႏချာဒါႏ စွိုးခွိုꩻလိုꩻမျိုꩻအလောင်းနောဝ်ꩻ အီႏမာꩻဗာႏနုဲင်းမုဲင်ꩻကရိုꩻနောဝ်ꩻ- အွိုးဒုံကိုတော်ꩻကို ထာꩻခြာကို မဲ့နားကအောဝ်ႏခေ့ꩻတအွိုနေကဒွိုန်းဒါႏ နီဖူးမူႏပေႏ ဖူးခိုပေႏ ယဟန်ႏသားနောဝ်ꩻ မဲ့နားဖေႏကလေအီအတာႏ လိုꩻကသေကဒါႏပညာႏ ကအောဝ်ႏလဲဉ်းသားဖုံႏ အီႏသဲင်ꩻထူႏပွုံႏတာႏဖေႏနွောင်ꩻ အမျိုꩻမုဲင်ꩻ၊ အီႏလွောင်ႏဗူႏထွို့ꩻစွီႏ ဟဲ့ꩻအွဉ်လွေꩻဖေႏဗာႏနုဲင်းမုဲင်ꩻကရိုꩻနောဝ်ꩻလဲ့ အောဝ်ႏလိုႏယူႏပါဒါႏဒါႏဖေႏကိုငါႏနောဝ်ꩻသွူ။ လိုꩻကျောင်ꩻယွဲ၊ လိုꩻလမ်းယွဲ၊ မူႏယွဲခိုယွဲဖုံႏ စွုမ်ႏပါꩻပါꩻ စွုမ်ႏဖြာꩻဖြာꩻအလောင်း ဖေႏကသေထူႏဒါႏ စွိုးခွိုꩻပွုံႏတာႏ၊ ဖေႏကသေရက်ချာဒါႏ စွိုးခွိုꩻလိုꩻမျိုꩻ၊ ဖေႏကသေထိန်ꩻထွားလွေꩻနွောင်ꩻ ခွိုꩻနွယ်ႏဘာႏသာႏနောဝ်ꩻ ကထွာဒါႏ ခွိုꩻစုပ်တသာလိုꩻယွဲစွုမ်ꩻစွိုꩻဖုံႏ အီႏမာꩻဖေႏနုဲင်းမုဲင်ꩻ၊ အီႏထူႏပွုံႏတာႏနွောင်ꩻ တတွာမုဲင်ꩻကရိုꩻနောဝ်ꩻ- ခွိုꩻစုပ်တွန်ရီးဖုံႏ ဘဝအောဝ်ႏသော့ꩻထာꩻခေ့ꩻကရစ်ꩻကိုမွေးတဲ့ နီခွိုꩻနွယ်ႏပအိုဝ်ႏ ဖေႏကထိုꩻမားဗာႏပုဲင်ႏအတာႏ တဒုမ်ထူႏလူႏလုဲင်ႏဖေႏဝင်ꩻ၊ တအွိုခို့ꩻလူႏလုဲင်ႏဖေႏဝင်ꩻတဲင် လိုꩻမျိုꩻတထိုꩻမားဗာႏတောဝ်း ဗꩻတွိုႏထံလဲဉ်း ဟန်ႏသနီꩻယိုသွူ။ ဘဝအောဝ်ႏသော့ꩻလဲဉ်း ထာꩻလေရောင်ႏကို ခွိုꩻစုပ်တသာလိုꩻယွဲစုပ်ယိုမꩻ အီႏခံႏဗာႏ လိုꩻမျိုꩻဘာႏသာႏ ထိုꩻမားထိုꩻနောဝ်ꩻ သမဲင်ꩻရွိုင်ꩻငါႏနောဝ်ꩻသွူ။ ခေတ်အသွုပ်သွုပ်ကို ခံႏရင်ꩻခါꩻနေး လိုꩻအနီꩻအရင်ꩻ၊ ရွဉ်ခံꩻအနီꩻအရင်ꩻ၊ ယမ်ꩻတောင်ꩻတသီးအနီꩻအရင်ꩻ၊ သွီႏသက်တသိုꩻအနီꩻအရင်ꩻတဲင် ကွီလွဉ်ဖေႏလဲဉ်းသွူ နီပအိုဝ်ႏခင်ႏလမ်းအုံတာႏ ဟံႏယာႏနယ်ႏပယ်ႏလဲ့ လိုꩻထာꩻယူႏမာႏ မိစ္ဆာႏသꩻဗွို့ꩻ သွီႏတစွိုꩻတောဝ်းသား အောဝ်ႏယားစံႏအံႏလွဉ်ဒျာႏ နီဟံႏယာႏသွို့ꩻခြံ လမ်းခင်လမ်းနမ်းဖုံႏယိုနောဝ်ꩻ ခွိုꩻစုပ်တသာလိုꩻယွဲဖုံႏ အီႏထူႏပွုံႏတာႏ ရဲးလွေꩻဗာႏနုဲင်းမုဲင်ꩻကရိုꩻနောဝ်ꩻလဲ့ အောဝ်ႏလိုႏယူႏဒါႏဒါႏငါႏလဲဉ်းသွူဝင်ꩻနောဝ်ꩻသွူ။ တဲမ်းလိတ်သားလိုꩻယွဲ ခွေသွဉ်းတဖြာꩻအနေႏ ကမဲဉ်ဖေႏသေငါႏနောဝ်ꩻ- (၁) ဖေင်ꩻဖင်ꩻယာမား ကအောဝ်ႏယားငါႏ နီစွိုးခွိုꩻလိုꩻမျိုꩻယို နီအီႏတွိုက်ꩻကုဲင်ဗာႏတွမ်ႏအနယ်ꩻမုဲင်ꩻ။ (၂) နီပအိုဝ်ႏစွုမ်ႏဖြာꩻ ဖေႏကသေရက်ချာဒါႏ စွိုးခွိုꩻလိုꩻမျိုꩻဘာႏသာႏနောဝ်ꩻ နီအီႏဖေႏသေဗာႏ သဖော်ꩻတရာꩻနုဲင်းမုဲင်ꩻ။ (၃) နီပအိုဝ်ႏမဲ့နားဖေႏကလေ ထာꩻသေဖေႏကလုမ်းနမ်း ပငါပရာꩻနောဝ်ꩻ နီအီႏမာꩻဖေႏဗာႏနုဲင်းမုဲင်ꩻ။ (၄) ပအိုဝ်ႏကအောဝ်ႏခံႏဗာႏငါႏ ဝင်ꩻအံႏဆျာႏ၊ ဝင်ꩻတေက်ꩻနျꩻ ဝင်ꩻထင်းဖွီထီႏပေႏဖုံႏယို နီအီႏမာꩻဖေႏဗာႏနုဲင်းမုဲင်ꩻ။ (၅) ပအိုဝ်ႏဘဝပျဿနာႏ အယပ်ꩻအခုဲင်ႏဖုံႏယို ဖေႏကဖြေႏသျင်ꩻနွောင်ꩻနောဝ်ꩻ အီႏမာꩻဗာႏနုဲင်းမုဲင်ꩻ။ (၆) လိုꩻယွဲစွုမ်ႏဒုံဒုံ ဖေႏကသေထူႏပွုံႏတာႏနွောင်ꩻချာ ဒုံဆောင်ႏပွုံႏတာႏဖုံႏ၊ ဖေႏကသေထိန်ꩻသိမ်ꩻနွောင်ꩻချာ စွိုးခွိုꩻလိုꩻမျိုꩻရန်ႏသူႏ အန္တရာယ်ႏဖုံႏနောဝ်ꩻ အီႏမာꩻဗာႏနုဲင်းမုဲင်ꩻ။ (၇) ပအိုဝ်ႏပေႏတော်ꩻကို ကအောဝ်ႏလွင်ꩻထာꩻ ဒုံခြင်ꩻခါႏ တသွဉ်ထူႏနွောင်ꩻတောဝ်း ပညာႏသားဖုံႏ၊ ဒါႏသွူပညာႏ ထာꩻမာꩻတအောဝ်ႏတောဝ်းသားဖုံႏ၊ ကတောႏလမ်းတောႏပါႏသွူ ကအွဉ်ႏကုဲင်တခြိုစောဝ်းတရတ်ချာဒါႏဝင်ꩻသားဖုံႏယို နီအီႏမာꩻဖေႏဗာႏနုဲင်းမုဲင်ꩻ။ (၈) ပအိုဝ်ႏလိုꩻသေလိုꩻဒါႏစွုမ်ꩻစွိုꩻ (ပအိုဝ်းပညာရှင်အဖွဲ့) ပအိုဝ်ႏထူႏခွုမ်မာꩻလိတ်လုဲင်ꩻသားစွိုꩻ (ပအိုဝ်းစာပေလုပ်သားအဖွဲ့)၊ ပအိုဝ်ႏထောင်ထွားထုမ်ႏလွူꩻသမဲင်ꩻသားစွုမ်ꩻစွိုꩻ (ပအိုဝ်းသမိုင်းသုတေသနအဖွဲ့)စတဲင် အစွုမ်ꩻစွိုꩻဖုံႏ ဖေႏကအောဝ်ႏစဲင်းစဲင်းစဲ့စဲ့ မွန်မွန်ဗန်ဗန်လွေꩻနောဝ်ꩻ ခွိုꩻစုပ်တသာလိုꩻယွဲဖုံႏ အီႏမာꩻဗာႏနုဲင်းမုဲင်ꩻ။ (၉) နီပအိုဝ်ႏဖေႏကအောဝ်ႏတသွိုန်ႏချင်ႏ၊ တသꩻချင်ႏ၊ တသွီႏချင်ႏ၊ တယာႏချင်ႏ ခွꩻတရျားရျား လျားပီပီ ဆင်ႏရန်းကီလ ဖေႏကခွယ်ꩻမွိုန်းဝင်ꩻနောဝ်ꩻ အီႏခွုမ်စံႏလွေꩻဗာႏနုဲင်းမုဲင်ꩻကရိုꩻနောဝ်ꩻ-။ မဉ်ႏတဲမ်းထေလွေꩻဗာႏ အခရာႏပဉ်စွိုးစွိုးလဲ့ အာစွိုးအာဒေါဝ်ႏငါႏတဲင် ကီယိုကွတ်ꩻဆင်ႏ မဉ်ႏခွုမ်စံႏနွောင်ꩻဒါႏငါနောဝ်ꩻ အနာႏဂတ်ကို ခွိုꩻပအိုဝ်ႏနွယ်ႏ ခြေင်ႏကမ္ဘာႏ အောဝ်ႏတင်ႏတယ်ႏလွိုးဗန်လွေꩻတသေႏနွောင်ꩻဒျာႏနောဝ်ꩻသွူ။ ကွပ်ပွိုးနောဝ်ꩻမꩻ ခွိုꩻစုပ်တသာ ပအိုဝ်ႏလိုꩻယွဲသီးဖုံႏဟွေး- နီယို ကွုတ်ထွာလဲဉ်း ပအိုဝ်ႏပိုတဲင် ပအိုဝ်ႏအလောင်း ခွေပွုံႏတာႏ အောဝ်ႏဒင်ႏထွူလဲဉ်း တယ်ႏကလွူးလင်ꩻခါကာႏတွော့ꩻ နီပအိုဝ်ႏလိုꩻမျိုꩻ ဘာႏသာႏ ဖေႏကထိုꩻမားဗာႏမွိုန်း တွမ်ႏဝင်ꩻလိုꩻမျိုꩻ ဘာႏသာႏ အဆင်ႏရန်း တသွိုန်တန်ႏတူႏခွင်ꩻ ဖေႏကလꩻဗွိုန်ပီနွောင်ꩻနောဝ်ꩻ လွူးသွော့ဝင်ꩻ သꩻရက်ခွိုꩻတန်တန် သွီႏရုဲင်းထင် တလာလာတွော့ꩻ အွဉ်ႏဝင်ꩻထိန်ꩻထွား ထူႏကိုသွော့ဝင်ꩻ ခွိုꩻပအိုဝ်ႏပွုံႏတာႏ စွုမ်ႏပါꩻပါꩻ စွုမ်ႏဖြာꩻဖြာꩻအကျောင်ꩻ-။ နမ်းသꩻနီပါꩻ ယံချံꩻသာႏ၊ သေသွူ ခွိုꩻပွုံႏတာႏ ပငါပရာꩻတဲင် ခွိုꩻဘာႏသာႏ ယံထင်ႏထိုတသွောင်းနွောင်ꩻရေꩻနောဝ်ꩻ- ဆွန်ꩻစူစွီႏလွေꩻဝင်ꩻစူတွော့ꩻ ထင်ႏမော့ꩻခွဲခွိုꩻခွိုꩻခန်းဝင်ꩻ အွိုးပအိုဝ်ႏဟော်နန်ꩻလောင်းကီဟောင်း-တွမ်ႏမေတ္တာႏတဲင်-[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကံႏထွိုက်ရော့ꩻ(ပင်သာႏ)
  2. မောင်းမွူးခံꩻ အမုဲင်(၆၄)၊ မဲ့ငါ(၉)