ဂွုဏ်ႏအကျောင်ꩻ

"ဂွုဏ်ႏအကျောင်ꩻ" ယိုနဝ်ꩻ အီႏတဲမ်းနယ်လွေꩻ ဂွုဏ်ႏအကျောင်ꩻသွူ။ ဂွုဏ်ႏကရိုꩻဒါႏငဝ်းယိုနဝ်ꩻ အဝ်ႏပါဠိငဝ်း "ဂုဏ"ယို ကြုဲင်ꩻလွဉ်တဲင် ထွာပါဠိကုဲင်ငဝ်းမျိုꩻသွူ။ "ဂုဏ"ကရိုꩻဒါႏပါဠိငဝ်းယို မီႏပြန်ႏဗာႏအဓိပ္ပါယ်ႏပအိုဝ်ႏနဝ်ꩻ "ကေꩻဇူꩻ"အဓိပ္ပါယ်ႏလꩻနုဲင်းနဝ်ꩻသွူ။ "ကေꩻဇူꩻ"ကရိုꩻဒါႏငဝ်းယို မီႏဗွောင်နယ်ထဲင်းဗာႏ အဓိပ္ပါယ်ႏတမျိုꩻနဝ်ꩻ "အစွန်ꩻအထီ"အဓိပ္ပါယ်ႏလꩻနုဲင်းနဝ်ꩻသွူ။ နီလိုꩻသီးယိုနဝ်ꩻ "အဂွုဏ်ႏ"၊ တနယ်ꩻ "အကေꩻဇူꩻ"၊ တနယ်ꩻ "အစွန်ꩻထီ"အဝ်ႏလွဉ်းလွဉ်းသွူ။ ကွာႏလေႏကြွို့ꩻ ဆေ့ꩻတွမ်ႏအာနုဲင်းနဝ်ꩻလွုမ်ꩻသွူ။ ဂွုဏ်ႏကေꩻဇူꩻ၊ စွန်ꩻထီယိုသိုမ်မျိုꩻနဝ်ꩻ အဟဲ့ꩻမာꩻဗွိုန်တဝ်းလဲ့ အနမ်းလꩻနဝ်ꩻ ဗွိုန်ဗွိုန်ဒျာႏလွဝင်ꩻသွူ။ လောကလိုꩻခမ်းယို ဂွုဏ်ႏကေꩻဇူꩻ ကတန်အာလွိုဝင်ꩻနဝ်ꩻ ဗွေႏဘုရာꩻသွူ။ ဗွေႏဘုရာꩻအဂွုဏ်ႏကေꩻဇူꩻနဝ်ꩻ တရာꩻဝင်ႏ ထင်ႏထင်ႏသျာꩻသျာꩻနဝ်ꩻ အဝ်ႏ(၉)ပါꩻရိုꩻနဝ်ꩻလဲ့ ဝွေꩻဗွေႏတဟောꩻနယ်တဝ်း ဂွုဏ်ႏကေꩻဇူꩻမျိုꩻနဝ်ꩻ အဝ်ႏအာတန်နေဒွိုန်းသွူ။ မျက်မောက်ဘဝ ခေတ်ကာႏလယိုခါ နီလိုꩻသီး ကအွဉ်ႏတန်ႏဖိုꩻဒါႏ ဂွုဏ်ႏမျိုꩻနဝ်ꩻ ဇာႏတိခွိုꩻမျိုꩻဂွုဏ်ႏ၊ သီႏလနမ်းကျင်ꩻဂွုဏ်ႏ၊ ရိုꩻသာꩻစွို့ꩻစွဉ်ႏမုဂွုဏ်ႏ-စတဲင်နုဲင်းယိုဖုံႏသွူ။ ဂွုဏ်ႏအမျိုꩻမျိုꩻဖုံႏယို ကအီႏဗွေစွုမ်ႏလုမ်းကုမ်ႏဒါႏလိုꩻနဝ်ꩻ ဆေ့ꩻခြောလွုမ်ꩻသွူ။ ဂွုဏ်ႏယိုဖုံႏအကို ဇာႏတိခွိုꩻမျိုꩻဂွုဏ်ႏတွမ်ႏ လောင်းလွိုးယောင်ꩻဆင်ꩻဂွုဏ်ႏနဝ်ꩻ ဆဲင်ႏဒျာႏတွမ်ႏစိုးရီးပန်အွဉ် ကမာꩻသေꩻခါꩻဒါႏ ကုသိုလ်ႏ (ပုဗ္ဗေစ ကတပုညတာ)တဲင် နေးတွမ်ႏကံႏ၊ ဉာဏ်ႏ၊ ဝီရိယ ဘဝယိုခါနဝ်ꩻ အီႏလꩻဗာႏ တယိုꩻတဝ်းသွူ။ ပညာႏထာꩻသေဂွုဏ်ႏ၊ ဥစ္စာႏပစ္စေꩻဂွုဏ်ႏယိုနီမျိုꩻနဝ်ꩻ လိုꩻသီးမဉ်လꩻလွေꩻဝင်ꩻ ပငါပရာꩻလဲ့ နေးတွမ်ႏအနယ်ꩻစွို့ꩻစွိုꩻစွဉ်ႏစွဉ်ႏ အနယ်ꩻရိုꩻရိုꩻသာꩻသာꩻတွော့ꩻ ကအီႏကျိုꩻစꩻစုရွမ်လွဝင်ꩻနဝ်ꩻ ဆေ့ꩻခြေားလွုမ်ꩻသွူ။ ကျိုꩻစာꩻတွိုင်ꩻလဲ့ ကမဲဉ်ထွာအတွိုင်ꩻ တထွာနွောင်ꩻကြွို့ꩻတဝ်း၊ စအီႏစွို့ꩻစွို့ꩻတရွို့ꩻ၊ စအီႏမဲဉ်ႏမဲဉ်ႏ တလဲဉ်ႏထိုꩻဒျာႏသွူ။ လိုꩻယဟန်ႏနဝ်ꩻ ဖေႏကလꩻလွဉ် ဥစ္စာႏပစ္စေꩻယို နေးတွမ်ႏအနယ်ꩻ မာꩻစွို့ꩻစွဉ်ႏတဝ်း၊ တရိုꩻသာꩻတဝ်းတဲင် ဖူးဝေးသေနာႏတဝ်း၊ မွိုးဖါသေနာႏတဝ်း၊ ဆရာႏသမာꩻ သေနာႏတဝ်း၊ ရော့ꩻလိန်ႏလဲ့လိန်ႏ၊ ရော့ꩻလဲဉ်လဲ့လဲဉ်၊ ရော့ꩻချာႏလဲ့ ချာႏစွဉ်ႏဒျာႏသွူ။ လိုꩻယဟန်ႏနဝ်ꩻ လꩻငါရွဉ်မဉ်ႏထွူ ပွိုင်းဝွို့တွမ်ႏ တလွစ်ကင်ꩻတဝ်း ဥပဒေႏယို ထာꩻငမ်းအဲဉ်ထဝ်းဒွုမ်၊ ထာꩻဝင်ꩻသꩻအဲဉ်ထဝ်းဒွုမ်၊ ဝင်ꩻအီႏင ဝင်ꩻအီႏရိုꩻလဲ့ ယူႏဒွုမ်၊ ဖြေꩻစာကူꩻကားစွဉ်ႏဒျာႏသွူ။ လိုꩻယဟန်ႏနဝ်ꩻ ကုသိုလ်ႏကံႏလီꩻလဲ့ပါ၊ ကုသိုလ်ႏကံႏတသာလဲ့ ဖေႏအာႏဉာဏ်ႏ၊ ဝီရိယဒျာႏလဲ့ လိုမ်းကိုမ်ႏတွော့ꩻ ပစ္စေꩻဥစ္စာႏဂွုဏ်ႏ အဝ်ႏရိုꩻနုဲင်းနဝ်ꩻလဲ့ အကျိုꩻအဝ်ႏအဝ်ႏ သံးတသွုံꩻတဝ်း၊ လူႏတန်ꩻတဝ်း၊ အံႏအွꩻမွန်းပျောႏဒျာႏတွမ်ႏ ငတ်ꩻပါꩻအာႏရွုဏ်ႏ ကာႏမဂွုဏ်ႏတရာꩻတဲင် ထွာဒျာႏ အကုသိုလ်ႏဆာႏ၊ ပစ္စေꩻဥစ္စာႏအဖိုꩻ တတန်ႏတဝ်းစားသွူ။ လိုꩻယဟန်ႏနဝ်ꩻ ကထိုမ်ႏကရွမ်ခါꩻနဝ်ꩻ တရာꩻနဲ့ တရာꩻတဝ်းနဲ့ လဲင်ꩻသေနာႏဒွုမ် 'လꩻငါမဉ်ႏထွူ'လဲင်ꩻတဝင်ꩻသꩻဒွုမ်ဝင်ꩻလဲ့ ထွိုင်ႏလꩻထွူနဝ်ꩻ အကျိုꩻအဝ်ႏအဝ်ႏ သွုံꩻတဒါႏတဝ်းတွော့ꩻ ထွိုင်ႏသီနဝ်ꩻ ပိုလီꩻဆꩻချာ လဲင်ꩻမာႏအီနေးစွဉ်ႏလွဝင်ꩻ၊ ကွပ်မွိုးဖါရွဉ်ခံꩻတဲင် ပိုလီꩻဆꩻချာ မဲ့ငါမေတ္တာႏ ကုဲင်ဗာႏနေးစွဉ်ႏလွဝင်ꩻလဲ့ အဝ်ႏဟွုန်ပြုံႏပြင်ႏထာꩻသွူ။ ကွပ်ပစ္စေꩻဥစ္စာႏအရေꩻတဲင် ကထွာခွန်ကွဉ်လိုꩻတန်သီးလဲ့ လက်ခံႏနေးထူႏရွဉ် လာခꩻလာတာႏရိုꩻရိုꩻသာꩻသာꩻလွုမ်ꩻ တကာႏတဝ်း၊ လက်ခံႏနေးထူႏပါရွဉ်မွဉ် ရွဉ်တံႏ၊ ရွဉ်အခွဉ်ႏဖုံႏတွော့ꩻ မဉ်ꩻတကုဲင်ဗာႏ၊ ခံႏဗာႏဝင်ꩻဒေါ့ꩻဝင်ꩻရိုꩻ၊ မဲ့ငါပေႏ တရေႏလင်ꩻဗာႏသွူ။ ဂွုဏ်ႏအမျိုꩻမျိုꩻအကိုယို ပစ္စေꩻဥစ္စာႏဂွုဏ်ႏယိုနဝ်ꩻ လိုꩻမဲဉ်လꩻလွိုဝင်ꩻအတွိုင်ꩻ ကထွိုင်ႏလꩻလွဉ်သွူ ရွဉ်ထွိုင်ႏလွိုင်ႏသွူနဝ်ꩻ ရွဉ်တွမ်ႏရွဉ်ယားချာအဗွေႏတွော့ꩻ နမ်းကျင်ꩻသီႏလကုဲင်ထိုꩻ၊ ရောႏဂါႏဝွေႏဒနာႏ တွိုႏလွဉ်တွော့ꩻ သက်ဒွေါင်ႏထိုꩻဗာႏလဲ့ အဝ်ႏဟွုန်အာတန်ဒျာႏသွူ။ တွိုႏတန်ႏဖိုꩻကတန်ဒါႏ အထီကထွူႏဒါႏ သီႏလနမ်းကျင်ꩻဂွုဏ်ႏ၊ ရိုꩻသာꩻစွို့ꩻစွဉ်ႏမုꩻဂွုဏ်ႏနဝ်ꩻ လိုꩻသီးတပေါႏမဲဉ်လꩻတဝ်း၊ တအွဉ်ႏငါႏတဝ်းအရေꩻ ကဲဉ်းအာအာသွူ။ ကအီႏလꩻဗာႏဂွုဏ်ႏ ယိုနီပါꩻနဝ်ꩻ အနီꩻအရင်ꩻလဲ့ တပေါႏလို့အာငါႏတဝ်း နုဲင်းဂွုဏ်ႏအလင်လဲ့ လိုꩻသီးကဲဉ်းအာအာ တအွဉ်ႏတဝ်းတန်ႏဖိုꩻသွူ။ လိုꩻသီးခေတ်ယိုခါနဝ်ꩻ နမ်းကျင်ꩻသီႏလဂွုဏ်ႏ၊ ရိုꩻသာꩻစွို့ꩻစွဉ်ႏမုဂွုဏ်ႏယို ကွပ်တအွဉ်ႏတဝ်းတန်ႏဖိုꩻ ဖေႏကအဝ်ႏလဲ့ တကျိုꩻစာꩻလွတဝ်းနဝ်ꩻမꩻ လိုꩻမျိုꩻတွိုင်ꩻ၊ ဒုံတွိုင်ꩻရပ်တွိုင်ꩻ၊ နွောင်ꩻဟံႏ ခမ်းထီတွိုင်ꩻနဝ်ꩻ ဒုစရဲက်ထာꩻမာꩻသားအာတဲင် ခင်ႏလံးတလိုႏကွုန်ꩻတဝ်း၊ အချုတ်ကို ထောင်ႏကိုဖုံႏနဝ်ꩻ လိုꩻအဝ်ႏကွုန်ꩻဗာႏနဝ်ꩻသွူ။ ဇာႏတိခွိုꩻမျိုꩻဂွုဏ်ႏ၊ လောင်းလွိုးယောင်ꩻဆင်ꩻဂွုဏ်ႏ၊ ပညာႏထာꩻသေဂွုဏ်ႏ၊ ဥစ္စာႏပစ္စေꩻဂွုဏ်ႏ၊ သီႏလနမ်းကျင်ꩻဂွုဏ်ႏ၊ ရိုꩻသာꩻစွို့ꩻစွဉ်ႏမုꩻဂွုဏ်ႏကရိုꩻဒါႏ ဂွုဏ်ႏအမျိုꩻမျိုꩻဖုံႏယိုနဝ်ꩻ အဝ်ႏထွိုက်အဝ်ႏသင်ꩻ၊ လိုႏထွိုက်လိုႏသင်ꩻဒျာႏလွဉ်းလွဉ်းလဲ့ မီႏစဲစ်ဆေꩻ တွက်ထွားဂွုဏ်ႏတမျိုꩻစီႏ အထီအသွီႏအတန်ႏဖိုꩻနဝ်ꩻ သီႏလနမ်းကျင်ꩻဂွုဏ်ႏစွို့ꩻစွဉ်ႏ ရိုꩻသာꩻမုꩻဂွုဏ်ႏယိုနီမျိုꩻနဝ်ꩻ တန်ႏဖိုꩻတန်ထိုလဲဉ်း ဂွုဏ်ႏအလင်သွူ။ ကွပ်နဝ်ꩻမꩻ ဂွုဏ်ႏအလင်နဝ်ꩻ အဝ်ႏတယဝ်း၊ အဝ်ႏတဝ်းတယဝ်း ဂွုဏ်ႏယိုနီမျိုꩻနဝ်ꩻ အဝ်ႏမꩻ ထွာလိုꩻဂွုဏ်ႏတန် ထွာလိုꩻတန်ႏဖိုꩻတန်သွူ။