ငေါဝ်းအကျိုꩻထွာ ၄-မျိုꩻ

"သုဘာသိတသုတ် (ငေါဝ်းအကျိုꩻထွာ-ငွါအကျိုꩻအဝ်ႏ ၄-မျိုꩻ)"

အတွင်ꩻနဝ်ꩻခါ ဗွေႏဘုရာꩻဟော်ꩻဖေႏ ရဟန်ꩻသီးဖုံႏနုဲင်းယို- "ရဟန်ꩻသီးဖုံႏဟွေး- အင်္ဂါႏလစ်ꩻပါꩻ ကဗွေဒါႏငေါဝ်းနဝ်ꩻ 'ဟဲ့ꩻငေါဝ်းဟောဝ်၊ ဟဲ့ꩻငေါဝ်းဒေါ့ꩻထွိုက်'၊ ငေါဝ်းနဝ်ꩻနဝ်ꩻ ငေါဝ်းဟောဝ်တောဝ်းမွေးတဝ်း၊ အပဲစ်တဲ့အဲဉ်ထဝ်း၊ ပညာႏသားတဲ့ တသဲ့သွမ်ꩻတောဝ်းနောဝ်ꩻသွူ။ ၄-ပါꩻကရိုꩻနဝ်ꩻ- ၁။ သုဘာသိတ - ဒေါ့ꩻဒျာႏ ငေါဝ်းဟောဝ်မျိုꩻလွုမ်ꩻ၊ ငေါဝ်းကုဲင်နဝ်ꩻ ဒေါ့ꩻတဝ်း၊ ၂။ ဓမ္မ - ဒေါ့ꩻဒျာႏ ငေါဝ်းတရာꩻလွုမ်ꩻ၊ တတရာꩻတဝ်းနဝ်ꩻ ဒေါ့ꩻတဝ်း၊ ၃။ ပိယ - ဒေါ့ꩻဒျာႏ ငေါဝ်းအွီႏငွါသာႏလွုမ်ꩻ၊ ငေါဝ်းခါႏငေါဝ်းလျားနဝ်ꩻ ဒေါ့ꩻတဝ်း၊ ၄။ သစ္စ - ဒေါ့ꩻဒျာႏ ငေါဝ်းမွေးငွါမဲဉ်ႏလွုမ်ꩻ၊ ငေါဝ်းလဲဉ်နဝ်ꩻ ဒေါ့ꩻတဝ်း။ ရဟန်ꩻသီးဖုံႏဟွေး- ငေါဝ်းယို ၄-မျိုꩻနဝ်ꩻ ဟဲ့ꩻငေါဝ်းဟောဝ်၊ ဟဲ့ꩻငေါဝ်းတရာꩻ၊ ဟဲ့ꩻငေါဝ်းအွီႏ၊ ဟဲ့ꩻငေါဝ်းမွေး၊ ဟောဝ်ဒေါ့ꩻငေါဝ်းယိုလစ်ꩻငွါ၊ ပေါႏဒေါ့ꩻငေါဝ်းယို လစ်ꩻငွါနဝ်ꩻ အပဲစ်အဲဉ်ထဝ်း၊ ပညာႏသားတဲ့ သဲ့ꩻသွမ်ꩻတောဝ်း၊ ရဟန်ꩻသီးဖုံႏဟွေး- ၁။ ပေါႏဒေါ့ꩻငေါဝ်းဟောဝ်မျိုꩻနောဝ်ꩻ ထွာပထမငေါဝ်းမျတ်၊ ၂။ ပေါႏဒေါ့ꩻငေါဝ်းတရာꩻနောဝ်ꩻ ထွာဒုတိယငေါဝ်းမျတ်၊ ၃။ ပေါႏဒေါ့ꩻငေါဝ်းအွီႏငွါသာႏနောဝ်ꩻ ထွာတတိယငေါဝ်းမျတ်၊ ၄။ ပေါႏဒေါ့ꩻငေါဝ်းမွေးမဲဉ်ႏနောဝ်ꩻ ထွာစတုတ္ထငေါဝ်းမျတ် နောဝ်ꩻသွူ။ ရဟန်ꩻသီးဖုံႏဟွေး- ၁။ ငေါဝ်းကုဲင်နောဝ်ꩻ ဒေါꩻ့မွုန်းလာꩻလာꩻလုဲင်း၊ ပေါႏဒေါ့ꩻ ငေါဝ်းကုဲင်နဝ်ꩻ ထွာပထမငေါဝ်းယွုတ်၊ ၂။ ငေါဝ်းတတရာꩻတောဝ်းနောဝ်ꩻ ဒေါ့ꩻမွုန်းလာꩻလာꩻဟုဲင်း၊ ပေါႏဒေါ့ꩻ ငေါဝ်းတရာꩻတောဝ်းနောဝ်ꩻ ထွာဒုတိယငေါဝ်းယွုတ်၊ ၃။ ငေါဝ်းခါႏ ငေါဝ်းလျားနောဝ်ꩻ ဒေါ့ꩻမွုန်းလာꩻလာꩻလုဲင်း၊ ပေါႏဒေါ့ꩻ ငေါဝ်းခါႏ ငေါဝ်းလျားနောဝ်ꩻ ထွာတတိယငေါဝ်းယွုတ်၊ ၄။ ငေါဝ်းလိန်ႏ ငေါဝ်းလဲဉ်နဝ်ꩻ ဒေါ့ꩻမွုန်းလာꩻလာꩻဟုဲင်း၊ ပေါႏဒေါ့ꩻ ငေါဝ်ႏလိန်ႏ ငေါဝ်းလဲဉ်နောဝ်ꩻ ထွာစတုတ္ထငေါဝ်းယွုတ်" ဗွေႏဘုရာꩻ မိန်းနုဲင်းနောဝ်ꩻသွူ။ တွိုႏနောဝ်ꩻခါ ဗွေႏဝင်္ဂီသ လောဝ်းဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ၁။ ဒေါ့ꩻငေါဝ်းဟောဝ်မျိုꩻနောဝ်ꩻ နီတဲ့ ခိုးလျားဗာႏတောဝ်း၊ ဝင်ꩻတဲ့ ခိုးလျားဗာႏတောဝ်း ဗွေႏဩ။ ၂။ ဒေါ့ꩻငေါဝ်းတရာꩻနဝ်ꩻ နီတဲ့ ချမ်ꩻသာႏ၊ ဝင်ꩻတဲ့ ချမ်ꩻသာႏ၊ နီတဲ့ ဒုက္ခတဝ်း၊ ဝင်ꩻတဲ့ ဒုက္ခတောဝ်း ဗွေႏဩ။ ၃။ ဒေါ့ꩻငေါဝ်းအွီႏနောဝ်ꩻ ဝင်ꩻရက်နီ၊ နီလွꩻထီႏတောဝ်းဝင်ꩻ၊ ဝင်ꩻလွꩻထီႏတဝ်းနီ ဗွေႏဩ။ ၄။ ဒေါ့ꩻငေါဝ်းမွေးမဲဉ်ႏနဝ်ꩻ သူႏတောႏကောင်ꩻသီးကျွိုက်၊ သူႏတောႏကောင်ꩻသီး ဒေါ့ꩻလွဉ်ꩻသေႏသေႏ ငေါဝ်းမွေးငွါမဲဉ်ႏနောဝ်ꩻသွူ ဗွေႏဩ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ သုဘာသိတသုတ်)