စေႏတီႏလစ်ဆူႏ

စေႏတီႏလစ်ꩻဆူႏ ဟောဝ်ပူႏစောႏ

လူႏပူႏစောႏထွိုက်ငါႏစေႏတီႏနဝ်ꩻ အောဝ်ႏလစ်ꩻဆူႏသွူ၊ ၁ . ဓာတုစေႏတီႏ ၊ ၂ ပရိဘောဂစေႏတီႏ ၊ ၃ ဓမ္မစေႏတီႏ ၊ ၄ ၊ ဥဒိဿစေႏတီႏ ၊ ယိုလစ်ꩻဆူႏသွူ၊

ဓာတုစေႏတီႏ လစ်ဆူႏအကို ဓာတုစေႏတီႏကရိုꩻနဝ်ꩻ ပရိနိဗ္ဗာန်ႏ ကကျွꩻထင်ႏထိုꩻလဲဉ်းဒါႏ ဗွေႏမျတ်ဘုရာꩻ ရုတ်ကလေတ်တောႏ ဖုံႏယို ကအေဝ်ႏကုဲင်ထိုꩻဒါႏ ဓာတ်တောႏဖုံႏယို ကဌာႏပနာႏသွော့ꩻဒါႏ စေႏတီႏကိုဖုံႏနဝ်ꩻ ဟဲ့ꩻ ဓာတုစေႏတီႏ နဲင်ႏနဝ်ႏသွူ။

ပရိဘောဂ စေႏတီႏ ကရိုꩻနဝ်ꩻ ဗွေႏမျတ်ဘုရာꩻ အသုံꩻဆောင်ႏဖုံႏ ကထွာဒါႏ ၊ သပိတ် ၊ သင်္ကန်ꩻ၊ စတွမ်ႏ ဗွေႏမျတ်ဘုရာꩻအသုံꩻဆောင်ႏဖုံႏ ကဌာႏပနာႏသွော့ꩻဒါႏစေႏတီႏနဝ်ꩻ ဟဲ့ꩻ ပရိဘောဂ စေႏတီႏ နဲင်ႏနဝ်ႏသွူ။

ဥဒ္ဒိဿ စေႏတီႏကရိုꩻနဝ်ꩻ ရေႏမတ်လွေꩻဗွေႏမျတ်ဘုရာꩻ ရုပ်ထုတောႏတဲင်၊ ကထုပူႏဇော်ႏဒျာႏ ပုံႏတောႏ ရုတ်ထုတောႏဖုံႏယို ဟဲ့ꩻ ဥဒ္ဒဿ စေႏတီႏနဲင်ႏနဝ်ꩻသွူ။

ဓမ္မစေႏတီႏ ကရိုꩻနဝ်ꩻ ဗွေႏမျတ်ဘုရာꩻကဟော်ꩻခါꩻဒါႏ၊ တရာꩻတောႏမျတ် နိကယ် ၅ ဖုံႏ ပိဠကတ် ၃ ဘုန်ႏ ဓမ္မက္ခန္တာႏ ၈၄၀၀ ဖုံႏယို ဟဲ့ꩻ ဓမ္မစေႏတီႏနုဲင်းနဝ်ꩻသွူ။

သမေစိတ္တေ သမံဖလံ နေႏတွမ်ႏစေႏတနာႏသွံပါꩻတဲင် မိဉ်ႏကီႏညိုႏရိုႏသေႏဗာႏ ဗွေႏမျတ်ဘုရာꩻ စေႏတီႏတောႏ လစ်ဆူႏနဝ်ꩻ ဗွိုန်ပီနဲင်ႏစွဉ်ႏ ကပူႏဇော်ႏဗာႏ ဗွေႏမျတ်ဘုရာꩻမွန်နဝ် ဗွိုန်ပီဝင်ꩻတဲင် အကျိုꩻတရာꩻနဝ်ꩻ အာမွေႏငါႏသွူ။

ပူႏဇော်ႏထဲင်းယင်းတမျိုꩻနဝ်ꩻ − ဂုဏ်ႏတောႏ ပူႏဇော်ႏနယ်ꩻသွူ ၊ ပူႏဇော်ႏဗာႏနဲင်းမုဲင်ꩻကရိုꩻနဝ်ꩻ ၊ နေးတွမ်ႏ ဘုရာꩻဂုဏ်ႏတောႏ ၉ ပါတဲင် သꩻကိုနဝ်ꩻရေႏမတ်လွေꩻ ဗွေႏမျတ်ဘုရာꩻ အရဟံ ဂုဏ်ႏတောႏတဲင် အရဟံ သမ္မာသမ္ဗုဒွေါ စတွမ်ႏ ဗွေႏမျတ်ဘုရာꩻဂုဏ်ႏတောႏတဲင် ၊ မဲဉ်ႏပူႏဇော်နဝ်ꩻ လꩻလွေꩻ အကျိုꩻတရာꩻအာငါႏသွူ။

အယံသွတ်ꩻပူႏဇော်ႏနယ်ꩻနဝ်ꩻ၊ ပူႏဇော်ႏနေႏတွမ်ႏ ဉာဏ်ႏတောႏနဝ်ꩻ အယံသွတ်သွူ၊ ပူႏဇော်ႏဗာႏနဲင်းမုဲင်ꩻကရိုꩻနဝ်ꩻ နေးတွမ်ႏ နီကလꩻလွဉ်ဒါႏ ခန္ဓာႏ၅ ပါꩻတန်ယိုနဝ်ꩻ ရုက်နမ်ႏ နီပါꩻ တန်ဖုံႏယိုနဝ်ꩻ တမဲꩻတောဝ်း အနိစ္စတန်ဒျာႏ မွော့ꩻနဲး မွော့ꩻနဲ ကရိုꩻဒါႏသံႏဝွေႏဂ တရာꩻယို ၊ မဉ်ႏအောဝ်ႏဗွို့ꩻတသေႏသေႏ နီထာꩻယူႏနဝ်ꩻ ဆင်ꩻရဲငါႏမွော့နယ်း ထာꩻဖြားဒုက္ခ၊ ထာꩻဆာဒုက္ခ၊ ထာꩻသီဒုက္ခ ဖုံႏယို တနီꩻတောဝ်းတဲ့တနီꩻ အီႏမွော့ꩻဗာႏမွော့ꩻနဲ ကရိုꩻဒါႏ သံႏဝွေႏဂတရာꩻယို၊ မဉ်ႏအောဝ်ႏတသေႏသေႏနဝ်ꩻ အာႏထုပ်ထွာတရာꩻ ၊ ထာꩻသယ်ႏခံႏလဲ့အာလွဉ် ၊ ထာꩻဝင်ꩻသꩻတဲ့ အောဝ်ႏလွဉ်တဲင် ၊ လောဘလဲ့ꩻ ဆေ့ꩻလွဉ်၊ ဒေါးသဆေ့ꩻလွဉ် ၊ မောဟ ခြꩻလွဉ်တဲင် အကုသိုလ်ႏတရာꩻ ကုသိုလ်ႏတရာꩻအီႏ ပွာꩻအာတဲင် အနန္တသဘော်ꩻတရာꩻယို ကွဲးသေနာႏလွဉ်တဲင် ထွာထွူလဲ့ကုဲင် ကုဲင်ထွာလဲ့ထွာ သဖော်ꩻတရာꩻဖုံႏယို ကွဲသေနာႏနာႏတဲင်၊ ဟောဝ်ကုဲင်သဘောꩻတရာꩻဖုံႏယို သေနာႏလွဉ်တဲင် ရှုမတ်စွုမ်ႏနီꩻဟာတဲင် အကျိုꩻတရာꩻနဝ်ꩻ လꩻအာထဲင်းက ကပူႏဇော်ႏနေးတွမ်ႏ ဂုဏ်ႏတောႏအလင်သွူ။

အကျိုꩻတရာꩻ

မဉ်ႏရိုႏသေႏ ကီႏညိုႏဗာႏဗွေႏမျတ်ဘုရာꩻနဝ်ꩻ လꩻလွ့အကျိုꩻနုဲင်းယိုသွူ။ ဗုဒ္ဓဿပူဇံ မဟာတေဇဝန္တော - မဉ်ႏရိုႏသေႏကီႏညိုႏဗာႏ ဗွေႏမျတ်ဘုရာꩻနဝ်ꩻတဲ့ နီကအောဝ်ႏထွာနေက ပုထုဇဉ်ႏသီးဘဝခိန်ႏတွင်ꩻကို၊ ခလားကလꩻနိဗ္ဗာန်ႏအခါႏလယ်ႏကိုခိန်ႏတွင်ꩻနဝ်ꩻ သဲင်ꩻထွာဗာႏလိုꩻလဲ့ အငိုꩻတန်ႏ တန်ႏခိုတန်မွေးငါႏ အကျိုꩻတရာꩻယို၊ နီတကာႏသီးအီႏလꩻဗာႏအမန်ႏသွူ။

ဓမ္မဿပူဇံ မဟာပညဝန္တော − မဂ်လစ်ꩻတန်ꩻ ဖိုႏလစ်ꩻတန်ꩻ ဆီပါပရိယတ် ဆီပါꩻတရာꩻဖုံႏယို ၊ မဉ်ႏပူႏဇော်ႏရိုႏသေႏဗာႏနဝ်ꩻ ခလားကလꩻနိဗ္ဗာန်ႏတွင်ꩻ ယို ဉာဏ်ႏပညာႏတန် မွေးငါႏလိုꩻအကျိုꩻတရာꩻယိုတပါꩻလဲ့ နီအီႏလꩻဗာႏသွူ၊ နဝ်ꩻသွူတကာႏတောဝ်း အပယ်ႏလစ်ꩻပါꩻလဲ့ တထဲ့နွောင်ꩻတောဝ်းဒွုမ်တဲင် လိုꩻချမ်ꩻသာႏ၊ လူꩻချမ်ꩻသာႏ ၊ နိဗ္ဗာန်ႏချမ်ꩻသာႏလဲ့ အီႏလꩻနွောင်ꩻနေနေသွူ၊

မဉ်ႏပူႏဇောႏဗာႏ ဗွေႏသံႏဃာႏနဝ်ꩻ လꩻလွေꩻအကျိုꩻတရာꩻ နဲင်းယိုသွူ၊ စွုမ်ႏနီꩻကအောဝ်ႏကီႏညိုႏခရာႏ၊ ဗွေႏမျတ်ဘုရာꩻ တပဲ့ꩻရဟန်ꩻသံႏဃာႏဖုံႏယို မဉ်ႏရိုႏသေႏကီႏညိုႏဗာႏနဝ်ꩻတဲ့၊ သံဃာသ ပူဇံမဟာ ဘောဂဝန္တော − အရိယာႏသံဃာႏ ၈ ပါꩻ ဗွေႏမျတ်ဘုရာꩻတပဲ့ꩻ ရဟန်ꩻသံႏဃာႏဖုံႏယို မဉ်ႏရိုႏသေႏကီႏညိုႏဗာႏနဝ်ꩻ ခလားကလꩻနိဗ္ဗာန်ႏတွင်ꩻ ရွဉ်ခံꩻဥစ္စာႏ လွိုင်ႏကွိုင်ꩻဒါႏလိုꩻ အကျိုꩻတရာꩻယိုနဝ်ꩻ နီအီႏလꩻဗာႏအမန်ႏသွူ။