စဲဉ်ႏစဲဉ်ႏဆက်ဆက်

အဝ်ႏ ဝီခီပီးဒီးယား ကို

စဲဉ်ႏစဲဉ်ႏဆက်ဆက် ပအိုဝ်ႏမူႏခိုခွန်နင်ꩻ စွုမ်ႏဖြာꩻအတာႏ လောကီꩻလောကုတ္တရာႏရေꩻရာႏ ယိုꩻယာႏထွုံꩻစံႏဓလေ့ဖုံႏ အစွိုꩻအင်းရွယ်ႏချက်[မွဉ်းဖျင် | မွဉ်းဖျင်အရွီးခိုႏ]

  • ၁။ လိုꩻမုရေꩻရာႏအမျိုꩻမျိုꩻ ယံဗွေခူꩻတသွောင်းလွဉ်။
  • ၂။ စွိုးခွိုꩻလိုꩻမျိုꩻ ယံတဉ်ႏခွေါင်အီ။
  • ၃။ အရွယ်ႏအလွောက်ꩻ ယံလꩻလွဉ် လောကီꩻလောကုတ္တရာႏအကျိုꩻစီꩻပွာꩻ။
  • ၄။ ဒုံတွိုင်ꩻ အာႏရဲင်ꩻအဗွေတဗာႏ ယံအောဝ်ႏမꩻတသေႏသေႏ။
  • ၅။ ဟီရိ၊ ဩတ္တပ္ပ လောကပါလတရာꩻ ယံထွန်ꩻကာꩻဗာႏ။

စေဗွောင်ခြုဲင်းနယ်လွေꩻယင်း ယိုꩻယာႏထွုံꩻစံႏဓလေ့အဓိပ္ပါယ်ႏ ဗွောင်နယ် အင်းရွယ်ႏချက် အဓိပ္ပါယ်ႏ

  • ၁။ လိုꩻမုရေꩻရာႏအမျိုꩻမျိုꩻ ယံဗွေခူꩻတသွောင်းလွဉ်ကရိုꩻနောဝ်ꩻ-

နီနာꩻပအိုဝ်ႏကိုယို ရပ်တာႏ၊ အွိုင်ႏတာႏ၊ နယ်ႏတာႏ၊ တစွိုးခွိုꩻလွုမ်းတာႏ၊ ဘာႏသာႏသာႏသနာႏတာႏ၊ ပညာႏ၊ လိုꩻမုရေꩻရာႏ ကထေင်ႏထံႏ ဆောင်ႏရွက်ဖေႏဒါႏ စေႏတနာႏဗွေႏပုဂ္ဂိုလ်ႏဖုံႏ အစွိုꩻဖုံႏလဲ့ ဆေ့ꩻခြေားငါႏ၊ ရွဉ်ပွုမ်ႏပစ္စေꩻလဲ့ အဲဉ်ထောဝ်းသွူ။ အရေꩻတန်စားယို အမျိုꩻမျိုꩻနောဝ်ꩻ ရပ်၊ အွိုင်ႏ၊ နယ်ႏ၊ တစွိုးခွိုꩻလွုမ်း အရန်းယိုလစ်ꩻ၇န်း အရန်းတွိုင်ꩻ အောဝ်ႏထဲ့ဖွိုႏနေဒွိုန်းကသွူ။ (ဥပမာႏ) နီနာꩻပအိုဝ်ႏကိုယို ကအောဝ်ႏသတင်ꩻသွုံꩻသမျဒါႏ (ရိုꩻဒွုမ်အလင်) နီကအောဝ်ႏကိုꩻကွယ်ႏဒျာႏ မျတ်လွိုယံငါႏ သမဲင်ꩻဝင်ႏ ဓာတ်တောႏမွေႏတောႏ စေႏတီႏဘုရာꩻဖုံႏဒျာႏမꩻတဲ့ နီတသေအွဉ်ႏတောဝ်းတန်ꩻဖိုꩻ၊ နေးရေꩻသားအဲဉ်ထောဝ်း၊ ဘုရာꩻနုဲင်းနုဲင်းလဲ့ ပီတောဝ်း မန်း မဲင်ꩻဘုရာꩻ (ခမ်းလင်လိုꩻမျိုꩻလင်ဘုရာꩻ) တမိုးသူႏငါႏသွူ။ လောကီꩻလောကုတ္တရာႏ ဒါႏစူဒါႏခင်ႏ၊ ဒါႏဝွေႏဖန်ႏ၊ ဒါႏဒေါ့ꩻဖြဝ်ႏသားလဲ့ အောဝ်ႏဆေ့ꩻငါႏနေဒွိုန်းကသွူ။ လိုꩻမျိုꩻစုရေꩻတမျိုꩻအတာႏ လိုႏအပ်သမျဒျာႏဖုံႏနဝ်ꩻ နမ်းတွမ်ႏနမ်း ဗွေခူꩻရေꩻတဲးဝါးတဝ်းသွူ။ နီနာꩻအကို ကောဒါႏသေသား မီႏပေါႏပေါက်ꩻစွော့ꩻဒါႏ ညာꩻညာꩻတဖြာꩻလဲ့ ပေါႏဒျာအႏနမ်းရင်ꩻ၊ ကူꩻလံꩻဖေႏအာႏ ပင်ႏထိုသားဆေ့ꩻငါႏတဲင် ထွာတောဝ်းထာꩻမာꩻသွူ။ ရပ်တွိုင်ꩻ၊ အွိုင်ႏတွိုင်ꩻ ရိုꩻဒွုမ်တွော့ꩻ ခွုန်းဝေင်ꩻနယ်ႏကိုငါလဲ့ ပေါင်ꩻဝင်ꩻ ဖန်ဆင်ꩻနွောင်ꩻလꩻတဝ်း လိတ်သွဉ်တွိုက်၊ ကမ္မဋ္ဌာန်ꩻတွိုက်၊ လောကီꩻပညာႏ အရန်းတလောင်ꩻ၊ အရန်းထိုလိတ်သွဉ်ကျောင်ꩻဖုံႏသွူ။ ခေးပြဲင်ႏလိုꩻလင်၊ စုပေါင်ꩻဖြေꩻစာကူꩻကားလွုပ်ꩻမာꩻတဲးဝါး၊ သွဉ်သင်တဲးဝါးအမျိုꩻမျိုꩻ၊ ကအီႏလွိုပိုႏထဲင်းဝင်ꩻလဲ့ ဆေ့ꩻငါႏသွူ။ နီသွံလစ်ꩻအွိုင်ႏ လွုပ်ꩻမာꩻအီနွောင်ꩻ ထီတွိုင်ꩻတန်၊ ထီကန်ႏတန်ဖုံႏငါတဲ့ သေစုပေါင်ꩻဖန်ဆင်ꩻလွတောဝ်းသွူ။

နီဒေႏသ နီနယ်ႏကို လေား ကာꩻ လွေꩻတွိုင်ꩻဖြွဉ် ဖင်းတွိုင်ꩻလꩻ တဖူꩻချော်ꩻတန်လုဲင်းလုဲင်းဖုံႏလဲ့ စုပေါင်ꩻဖန်ဆင်ꩻမုꩻ ဆေ့ꩻငါႏနေဒွိုန်းကသွူ။ လိုꩻဆင်ꩻရယ်ꩻ ကေားမဲဉ်ကူꩻကား၊ လွုပ်ꩻမာꩻ၊ မဲဉ်သွဉ်ပညာႏအတွက်တဲ့နောဝ်ꩻ ပစ္စေꩻ ပိုလီꩻ ခြွေႏရံႏခြေား၊ မွိုးဖြားဖါဖြားသီးတာႏလဲ့နောဝ်ꩻ ကူꩻလံꩻခရာႏ ဘဏ္ဍာႏအမျိုꩻမျိုꩻ စေႏတာႏဗွေႏပုဂ္ဂိုလ်ႏ အစွိုꩻဖုံႏလဲ့ အဲဉ်ထောဝ်းသွူ။ တဖြာꩻတွမ်ႏတဖြာꩻ ကယ်ႏဆယ်ႏပွေါးရဲပ်ကူဝင်ꩻ-ဗြဟ္မစိုရ်ႏတရာꩻ လိုꩻမုရေꩻရာႏအခန်ꩻကဏ္ဍယို အရန်းဖွိုႏတရွိုးနေဒွိုန်းကသွူ။ အာႏသန်ဗော့ꩻဒျာႏ တနမ်းတလမ်း အုံအောဝ်ႏအံႏအွꩻရေꩻ၊ တနမ်းတလမ်း ကနွောင်ꩻသမျအလွုပ်ꩻမာꩻ အဖြေꩻစာလွုမ်ꩻတဲင် ခေးပြဲင်ႏနွောင်ꩻတောဝ်း လိုꩻမျိုꩻလင်ဖုံႏ၊ ကစုပေါင်ꩻနေးဒါႏဝင်ꩻသားအာႏရဲင်ꩻသွူ။ မီႏသေဗော့ꩻ ထီႏဗော့ꩻ နမ်းတာႏ လမ်းတာႏလွုမ်ꩻနောဝ်ꩻ ဗဉ်ႏနွောင်ꩻတောဝ်း အစွိုးခွိုꩻလွုမ်း၊ သꩻစေႏတနာႏ အရန်းမီႏဖွိုႏနဝ်ꩻ အကျိုꩻတရာꩻလꩻဆေ့ꩻ တွမ်ႏတရာꩻသဖော်ꩻလဲ့ ကဲက်ညီႏနွောင်ꩻတဝ်းသွူ။ လိုꩻမျိုꩻလင် ခမ်းလင် ဘာႏသာႏလင်နောဝ်ꩻ ညီႏညွတ်လွဝင်ꩻ၊ ကူႏညီႏလွဝင်ꩻ၊ စုပေါင်ꩻလွဝင်ꩻဖုံႏတွော့ꩻ နေးတွမ်ႏကာꩻပေႏကာꩻတန်၊ ဆဲင်ႏပေႏဆဲင်ႏတန်အမျိုꩻမျိုꩻ ဗလီကျောင်ꩻ၊ တဆွူႏတဆုဲင်(မိဘမဲ့)ကျောင်ꩻ၊ မွိုးဖြားဖါဖြား အုံခွꩻခင်ႏလမ်း(ဘိုးဘွားရိပ်သာ)၊ ဝွေꩻသီးဘုရာꩻကျောင်ꩻအမျိုꩻမျိုꩻ၊ ဝွေꩻသီးလိုꩻမုꩻရေꩻရာႏ အလွောင်ႏအဗူႏအမျိုꩻမျိုꩻတဲင် အောဝ်ႏဒျာႏအွိုးမုဲင်ꩻကိုကို စုပေါင်ꩻတွူႏတရေ့လွဉ် နီနာꩻခြာ၊ ပလဲင်ꩻစွစ်ꩻစဲစ်ꩻကရိုꩻနောဝ်ꩻ မဲ့ဆလ အောဝ်ႏထီႏလွဒျာႏအတွိုင်ꩻသွူ။ [၁]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ပအိုဝ်ႏလိတ်လုဲင်ꩻစွစ်ꩻလီတာႏအစွိုꩻ၊ လိတ်လွီးသန်