တခမ်းလွုမ်းချွစ်

"တခမ်းလွုမ်းချွစ် အတွိုက်ꩻအခꩻအွဉ်ႏဆွိုးရေꩻတွမ်ႏ ညိမ်ꩻချမ်ꩻရေꩻ"

• ၁။ ခမ်းပေါင်ꩻဗူႏသမ္မတမြန်မာခမ်းယိုနောဝ်ꩻ နေင်ႏ ၁၉၄၈-ဗာႏ၊ အောဝ်ႏကုလာꩻဗွာ(အင်္ဂလိပ်)စူခြဲမ်ဆꩻလ လွစ်ထန်ႏလွေꩻတဲင် ထွာလွဉ်လွစ်တခြင် ခမ်းထီတဖြုံႏနောဝ်ꩻသွူ၊ လꩻလွဉ်လွစ်တခြင်ရိုꩻကီလဲ့ ကဖျော်သွိုတွမ်ႏဝွေꩻနောဝ်ꩻ ခမ်းကိုစဲ့ꩻပွယ်ꩻနောဝ်ꩻသွူ၊ လွစ်တခြင်တလꩻထွူ(၂)လာ၊ ၁၉၄၈-ဗာႏ၊ မတ်လာ(၂၈)နီꩻနောဝ်ꩻ မန်းခမ်းကွန်မြူနစ်ပါတီ (အလံနီ)လွိုဆန်လွေꩻ(ဖဆပလ)အစိုႏရတဲင် ခမ်းကိုစဲ့ꩻပွယ်ꩻယို မေႏခိုးစစွဉ်ႏနောဝ်ꩻကိုသွူ။

နေင်ႏ ၁၉၄၉-ဗာႏ၊ လာဒီဇင်ဘာ(၁၁)နီꩻ၊ ပအိုဝ်ႏလိုꩻမျိုꩻယို အုံအောဝ်ႏလွေꩻဗာႏ ပဒေႏသရာဇ်စနစ်၊ ကွီဒျာႏဒီမိုကရေစီ အခွင်ꩻအရေꩻနုဲင်းနောဝ်ꩻသွူ၊ မန်းခမ်းကိုကအောဝ်ႏဒါႏ လိုꩻမျိုꩻစုခမ်းရင်ꩻသားဖုံႏတဲ့ ခမ်းအရေꩻထီအရေꩻအလောင်း ရေႏမိုးချက်ထာꩻမဲဉ်လꩻဖုံႏ တဗွိုန်ပီတောဝ်းလွဝင်ꩻနောဝ်ꩻသွူ၊ ပအိုဝ်ႏအစ ခမ်းကိုကအောဝ်ႏဒါႏ ခင်၊ စောက်ꩻဗွာ၊ စောက်ꩻတနျာႏ၊ ချင်ꩻ၊ ရခဲင်ႏ နေးထူႏတွမ်ႏစူခွုမ် စူစံႏတဲင် တွူႏတရန်လွေꩻ မန်းခမ်းအစိုႏရနုဲင်းနောဝ်ꩻသွူ။ တခမ်းလွုမ်းချွစ် အတွိုက်ꩻအခꩻယို ယံကအွဉ်ႏဆွိုး၊ ယံကထွာလꩻညိမ်ꩻချမ်ꩻရေꩻယို ခေတ်အဆွိုက်ဆွိုက် အစိုႏရအစွိုꩻစွိုꩻ အောဝ်ႏမာꩻလွေꩻ ပငါပရာꩻနုဲင်းနောဝ်ꩻသွူ၊ (ဖဆပလ)အစိုႏရဝွန်ႏတန်ချွုတ် ဦးနုသီးနောဝ်ꩻ ခွုမ်စံႏလွေꩻ စူခွုမ်စူစံႏတွမ်ႏ ဒီမိုကရေစီယို ပြောင်ꩻလုဲင်ႏဝင်ꩻ အွဉ်ႏထွော့လွေꩻမူတဗာႏနောဝ်ꩻသွူ၊ မူနောဝ်ꩻ တဗာႏအောဝ်ႏတဲင် ထင်ႏတွိုႏလွေꩻ နေင်ႏ ၁၉၅၈-ဗာႏ၊ ပအိုဝ်ႏစွိုးခွိုꩻခေါင်းဆောင်တန် ဝွန်ႏတန်ဦးလှဖေ အွဉ်ကတူႏတဲင် ဝေင်ꩻတောင်ႏကီꩻ(၂၁၂)တပ်ကိုနောဝ်ꩻ မာꩻလွေꩻဗာႏဒွိုန်း စူခွုမ်စူစံႏတွမ်ႏ ဒီမိုကရေစီပြောင်ꩻလုဲင်ႏဝင်ꩻ၊ မာꩻလွေꩻဒွိုန်း ညိမ်ꩻချမ်ꩻရေꩻပွယ်ꩻတန်တဖြုံႏနုဲင်းနောဝ်ꩻသွူ။

လိုꩻမျိုꩻအလောင်ႏအလင်တဲ့ အောဝ်ႏမာꩻဒျာႏရိုꩻကီလဲ့ အောင်ႏမျင်ႏတဖူꩻတထောင်သွုပ်ဗာႏလို့တောဝ်းနောဝ်ꩻသွူ၊ ၁၉၆၂-ဗာႏ၊ မတ်လာ(၂)နီꩻနောဝ်ꩻ ခမ်းထီအာႏဏာႏအောဝ်ႏ (ဖဆပလ)အစိုႏရခွန် ဝွန်ႏတန်ချွုတ်ဦးနုစူကိုနောဝ်ꩻ ဗိုလ်ချုပ်တန်နေဝင်း ထူႏသိမ်ꩻထိုꩻခန်းဒျာႏတဲင် စူခွုမ်စူစံႏတွမ်ႏ ဒီမိုကရေစီပြောင်ꩻလုဲင်ႏဝင်ꩻကရိုꩻနောဝ်ꩻ ကုဲင်ပြင်ꩻခွိုန်ꩻချာလို့ခန်းဒျာႏနောဝ်ꩻသွူ၊ ထင်ႏတွိုႏလွေꩻ ဦးနေဝင်း စဲ့ꩻအစိုႏရနောဝ်ꩻတဲ့ ဒေါ့ꩻရီဆွေꩻနွေꩻလွေꩻတွမ်ႏ ကအောဝ်ႏတွူႏတရန်လွေꩻဒါႏ အစိုႏရခမ်းရင်ꩻသား စူခွုမ်စူစံႏအစွိုꩻနုဲင်းနောဝ်ꩻသွူ။ ဦးနေဝင်း အွဉ်ႏထွော့လွေꩻ"မူ"နောဝ်ꩻ စွဉ်ꩻပယ်ႏလွေꩻဗာႏ စူခွုမ်စူစံႏနောဝ်ꩻထွူမꩻ ဒေါ့ꩻရီဆွေꩻနွေꩻသွုပ်လွေꩻလꩻ ခမ်းအရေꩻ ထီအရေꩻနုဲင်းနောဝ်ꩻသွူ၊ နေင်ႏ ၁၉၆၃-ဗာႏ၊ လာဇွန်ကို တခမ်းလွုမ်းညိမ်ꩻချမ်ꩻရေꩻ ဖေႏကလꩻဗာႏရိုꩻနုဲင်းနောဝ်ꩻတဲင် ဒေါ့ꩻရီလွေꩻ စူခွုမ်စူစံႏ(ခမ်းရင်ꩻသား)လက်ခံႏတောဝ်းတဲင် ကုဲင်ပြင်ꩻချာဒျာႏနုဲင်းနောဝ်ꩻသွူ။

• ၂။ နေင်ႏ ၁၉၈၈-ဗာႏ (မဆလ)ခေတ်ကထွိုင်ႏလို့တဲင် နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့ (နဝတ)စိုးနောဝ်ꩻတဲ့ ဖစ်ဟဲ့ꩻလိုꩻမျိုꩻစု စူခွုမ်စူစံႏ တွူႏတရန်သားဖုံႏတဲင် ဒေါ့ꩻရီလွေꩻခမ်းကိုညိမ်ꩻချမ်ꩻရေꩻ အခရာႏ၊ အတွိုက်ꩻအခꩻ အွဉ်ႏဆွိုးခရာႏဖုံႏတဲင် စူခွုမ်စူစံႏကအောဝ်ႏဒါႏ လိုꩻမျိုꩻစွိုꩻယို နေးထူႏလက်ခံႏလွဉ် (၁၇)စွိုꩻဗွေဗွေနောဝ်ꩻသွူ၊ (၁၇)စွိုꩻအကိုနောဝ်ꩻ ပအိုဝ်ႏစွိုးခွိုꩻအစွိုꩻ (P.N.O)တဲ့ နေးတွမ်ႏတွမ်ႏ အထူꩻဒေႏသ(၆)မဉ်ꩻတဲင် ခမ်းအရေꩻ၊ ထီအရေꩻ၊ စီꩻပွာꩻရေꩻ၊ ပညာႏရေꩻ၊ ခြွိုင်ႏသန်ꩻ၊ တဖူꩻတထာစတဲင် လွိုင်ႏကွိုန်ꩻသာႏယာႏရေꩻထာꩻမာꩻ မန်ႏသမျ ခွိုင်းစူခြဲမ်ကထွꩻ အထူꩻဒေႏသ(၆)ကိုကအောဝ်ႏဒါႏ မွိုးဖါလူထု အလိုႏဆန္ဒအောဝ်ႏအောဝ်ႏသမျ အောဝ်ႏကျိုꩻစာꩻဆောင်ႏရွက် တွိုႏဒျာႏဗꩻဟန်ႏသနီꩻနုဲင်းနောဝ်ꩻသွူ။

စူခွုမ်စူစံႏအောဝ်ႏ ခမ်းရင်ꩻသားအလောင်ႏအလင်နောဝ်ꩻ တွိုက်ꩻခꩻခွိုန်ꩻချာတဲင် ညိမ်ꩻချမ်ꩻရေꩻကုဲင်ပြင်ꩻချာနောဝ်ꩻသွူ၊ စဲ့ꩻအစိုႏရစိုး မူဝါဒတဖူꩻရဲဉ်ႏနောဝ်ꩻ ခမ်းရင်ꩻသား စူခွုမ်စူစံႏသားအစွိုꩻ ထူႏလွေꩻညိမ်ꩻချမ်ꩻရေꩻမဉ်ႏထွူနောဝ်ꩻ ခမ်းရေꩻ၊ ထီရေꩻထာꩻမာꩻယို မာꩻသွုပ်လွေꩻစွိုးခွိုꩻညီႏလာႏခံႏနုဲင်းနောဝ်ꩻသွူ၊ စူခွုမ်စူစံႏယို မဉ်ႏမဲဉ်ခွုမ်စံႏစွူစွူရိုꩻလဲ့ မာꩻလွေꩻခမ်းသားစဲ့ꩻ(မဉ်ႏတမွေးတောဝ်း) အုံလွေꩻခမ်းကူထီနားစဲ့ꩻတပ်မတောႏနုဲင်းနောဝ်ꩻသွူ။

ပအိုဝ်ႏလိုꩻမျိုꩻကအောဝ်ႏဗာႏတွမ်ႏ နမ်းပဲင်ႏအုပ်ချွုတ်ခွင်ꩻလꩻဒေႏသ သွံဝေင်ꩻနယ်ႏယိုနောဝ်ꩻ ပအိုဝ်ႏစွိုးခွိုꩻအစွိုꩻ (P.N.O)တွူႏတရန် ရုဲင်ꩻတသွိုးဆꩻငါတဲင် လꩻလွဉ်ဗာႏ ပအိုဝ်ႏခမ်း ပအိုဝ်ႏထီနုဲင်းနောဝ်ꩻသွူ။ စဲ့ꩻအစိုႏရစိုးတဲ့ တခမ်းလွုမ်းချွစ် အတွိုက်ꩻအခꩻ အွဉ်ႏဆွိုးလွေꩻယို ကုဲင်ပြင်ꩻခွိုန်ꩻချာဒျာႏတဲင် အောင်ႏမျင်ႏတဖူꩻ ထောင်သွတ်ꩻလွေꩻတလꩻတောဝ်းနုဲင်းနောဝ်ꩻသွူ။

• ၃။ နေင်ႏ ၂၀၁၀-ဗာႏ၊ ၂၀၀၈-ဗာႏ ထွို့ꩻဗူႏပွုံႏအခေႏခံႏဥပဒေႏအလꩻ လွိုက်ရွေꩻပွယ်ꩻနောဝ်ꩻ (ပြည်ထောင်စုကြံ့ခိုင်ရေးနှင့်ဖွံ့ဖြိုးရေးအသင်း)နွောင်ꩻအာလဲဉ်းဝင်ꩻတဲင် ဦးသိန်းစိန်နောဝ်ꩻ ခမ်းပေါင်ꩻဗူႏသမ္မတ မြန်မာခမ်းယို ထွာလွေꩻခန်း အတန်သွတ်ꩻသမ္မတနောဝ်ꩻသွူ၊ သမ္မတဦးသိန်းစိန်ယိုနောဝ်ꩻ တခမ်းလွုမ်းချွစ် အတွိုက်ꩻအခꩻ အွဉ်ႏဆွိုးလွေꩻဖေႏကလꩻညိမ်ꩻချမ်ꩻရေꩻထာꩻမာꩻရဲဉ်ႏယံအောင်ႏလꩻ ရိုꩻနုဲင်းနောဝ်ꩻတဲင် နေင်ႏ ၂၀၁၁-ဗာႏ၊ လာဩဂုတ်(၁၈)နီꩻနောဝ်ꩻ ညိမ်ꩻချမ်ꩻရေꩻအနမ်းအခြုံ ဖေႏကပေါႏ ဟဲ့ꩻစလွေꩻပွယ်ꩻမော့ꩻခွဲနုဲင်းနောဝ်ꩻသွူ။ အောဝ်ႏနောဝ်ꩻမꩻ ထွို့ꩻဗူႏလွေꩻ အစွုမ်ꩻအစွိုꩻနုဲင်းဆꩻလယိုနောဝ်ꩻသွူ။

ကအီႏဒေါ့ꩻခြိꩻလွေꩻဖေႏ ညိမ်ꩻချမ်ꩻရေꩻခမ်းပေါင်ꩻဗူႏ အရန်းအစွိုꩻနောဝ်ꩻ ဦးအောင်မင်းတွမ်ႏ ဦးအောင်သောင်းသီး နီဖြာꩻနောဝ်ꩻသွူ။ ကအီႏဒေါ့ꩻခြိꩻလွေꩻဖေႏ ခမ်းပေါင်ꩻဗူႏအရန်း ဗဟိုႏအစွိုꩻနောဝ်ꩻ (ဥက္ကဋ္ဌ)သမ္မတဦးသိန်းစိန်တွမ်ႏ အစွိုꩻနွို့(၁၁)ဖြာꩻနောဝ်ꩻသွူ၊ (Union Peace Coordionation Center UPCC)အောဝ်ႏကုဲင်ထဲင်းတစွိုꩻနောဝ်ꩻ ခမ်းပေါင်ꩻဗူႏညိမ်ꩻချမ်ꩻရေꩻထာꩻမာꩻကောႏမတီႏနောဝ်ꩻသွူ၊ ထာꩻမာꩻကောႏမတီႏဥက္ကဋ္ဌနောဝ်ꩻ ဒုတိယသမ္မတဒေါက်တာစိုင်းမောက်ခမ်း(ဒု-ဥက္ကဋ္ဌ)နောဝ်ꩻ ဗိုလ်ချပ်တန်စိုးဝင်း၊ ဒု-ဥက္ကဋ္ဌ(၂)နောဝ်ꩻ ဦးအောင်မင်း၊ ဒု-ဥက္ကဋ္ဌ(၃)နောဝ်ꩻ ဦးသိန်းဇော်တွမ်ႏအစွိုꩻနွို့ (၅၂)ဖြာꩻနုဲင်းနောဝ်ꩻသွူ။ ဌာႏနမဉ်ꩻနောဝ်ꩻ ဟဲ့ꩻဖန်လွေꩻ "မြန်မာ့ငြိမ်းချမ်းရေးဗဟိုဌာန"နုဲင်းနောဝ်ꩻသွူ။ (MPC-Myanmar Peace Center)သမ္မတဦးသိန်းစိန် ကအောဝ်ႏဒေါ့ꩻရီလွေꩻ စူခွုမ်စူစံႏခမ်းရင်ꩻသားအစွိုꩻ (Ethmic Armed Orgarazations EAOS)ဖုံႏနောဝ်ꩻ လို့လို့အောဝ်ႏလွဗꩻ (၁၆)စွိုꩻနောဝ်ꩻသွူ၊ ထွာလွေꩻဒျာႏ ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ (UNFC) United Nationalities Federal Comiccil နောဝ်ꩻသွူ၊ (UNFC) အရေꩻတန်အစီꩻအဝွေꩻယိုတဲ့ နေင်ႏ ၂၀၁၃-ဗာႏ၊ လာအောက်တိုဘာ (၇/၉)နီꩻနောဝ်ꩻ (၁၆)စွိုꩻလွုမ်းယို တခမ်းလွုမ်းချွစ်အတွိုက်ꩻအခꩻ အွဉ်ႏဆွိုးလွေꩻသဖော်ꩻတူႏလိတ်မုဲင် (NCA- Nationwide Ceasefire Agreament)ယိုအလောင်း သဖော်ꩻတူႏထူႏဖေႏ ကတဲမ်းထွို့ꩻနွောင်ꩻစူမုဲင်ꩻ ပငါပရာꩻ အုံလင်ꩻလွေꩻပွယ်ꩻမော့ꩻခွဲးနုဲင်းနောဝ်ꩻသွူ။

နေင်ႏ ၂၀၁၅-ဗာႏ၊ မတ်လာ(၃၁)နီꩻနောဝ်ꩻ တခမ်းလွုမ်းချွစ် အတွိုက်ꩻအခꩻ အွဉ်ႏဆွိုးရေꩻမူစီꩻကန်ꩻကျမ်ꩻယို အစိုႏရဖဲ့ꩻတွမ်ႏ စူခွုမ်စူစံႏခမ်းရင်ꩻသားအစွိုꩻ သဖော်ꩻတူႏတဲင် ထွို့ꩻဗူႏလွေꩻ စူမုဲင်နုဲင်းနောဝ်ꩻသွူ။ နေင်ႏ ၂၀၁၅-ဗာႏ၊ လာအောက်တိုဘာ(၁၅)နီꩻနောဝ်ꩻ စူခွုမ်စူစံႏ ခမ်းရင်ꩻသားအစွိုꩻ(၈)စွိုꩻယို တဲမ်းထွို့ꩻတခမ်းလွုမ်းချွစ် အတွိုက်ꩻအခꩻ အွဉ်ႏဆွိုးရေꩻသဖော်ꩻတူႏလိတ်ချုပ် (NCA)နုဲင်းနောဝ်ꩻသွူ၊ အောဝ်ႏ(၁၆)စွိုꩻရိုꩻလဲ့ အစွိုꩻကတဲမ်းထွို့ꩻမွေးစူမုဲင် အောဝ်ႏဒျာႏ(၈)စွိုꩻဒျာႏနုဲင်းနောဝ်ꩻသွူ။ ခမ်းပေါင်ꩻဗူႏသမ္မတမန်းခမ်းအစိုႏရဖဲ့ꩻနောဝ်ꩻ-

• ၁။ ဦးသိန်းစိန် သမ္မတ၊ ခမ်းပေါင်ꩻဗူႏသမ္မတမြန်မာခမ်းနဲင်ႏငံႏတောႏ
• ၂။ ဒေါက်တာစိုင်းမောက်ခမ်း၊ ဒုတိယသမ္မတ၊ ခမ်းပေါင်ꩻဗူႏသမ္မတမြန်မာခမ်းနဲင်ႏငံႏတောႏ
• ၃။ ဦးဉာဏ်ထွန်း၊ ဒုတိယသမ္မတ၊ ခမ်းပေါင်ꩻဗူႏသမ္မတမြန်မာခမ်းနဲင်ႏငံႏတောႏ
• ၄။ သူရဦးရွှေမန်း၊ အစွိုꩻနွို့၊ ခမ်းပေါင်ꩻဗူႏညိမ်ꩻချမ်ꩻရေꩻဖောႏထန်ႏအနမ်းအခြုံ ဗဟိုႏကောႏမတီႏ
• ၅။ ဦးခင်အောင်မြင့်၊ အစွိုꩻနွို့၊ ခမ်းပေါင်ꩻဗူႏညိမ်ꩻချမ်ꩻရေꩻဖောႏထန်ႏအနမ်းအခြုံ ဗဟိုႏကောႏမတီႏ
• ၆။ ဗိုလ်ချုပ်မှူးကြီးမင်းအောင်လှိုင်၊ တပ်မတောႏစဲ့ꩻဖဲ့ꩻ အကဲႏအတန်
• ၇။ ဒု-ဗိုလ်မှူးချုပ်ကြီးစိုးဝင်း၊ တပ်မတောႏဖဲ့ꩻ အကဲႏအတန်
• ၈။ ဦးအောင်မင်း၊ ခမ်းပေါင်ꩻဗူႏဝွန်ႏတန်၊ ဒု-ဥက္ကဋ္ဌ၊ ခမ်းပေါင်ꩻဗူႏညိမ်ꩻချမ်ꩻရေꩻဖောႏထန်ႏအနမ်းအခြုံ ဗဟိုႏကောႏမတီႏ
• ၉။ ဦးသိန်းဇော်၊ ဥက္ကဋ္ဌ၊ ခမ်းရင်ꩻသားအရေꩻအရာႏ ခမ်းသားလွတ်တောႏ ဒု-ဥက္ကဋ္ဌ၊ ခမ်းပေါင်ꩻဗူႏညိမ်ꩻချမ်ꩻရေꩻဖောႏထန်ႏအနမ်းအခြုံ ဗဟိုႏကောႏမတီႏ

စူခွုမ်စံႏခမ်းရင်ꩻသားအစွိုꩻ-

• ၁။ စောက်ꩻဗွာစွိုးခွိုꩻလွောင်ႏဗူႏရေꩻ (KNU) ဗိုလ်ချုပ်ကြီး မူထူးစေးဖိုး၊ ဥက္ကဋ္ဌ၊ ဗိုလ်ချုပ်ကြီးစောဂျော်နီ၊ စစ်ဦးစီးချုပ်။ ပဒိုစောကွယ်ထူးဝင်း၊ အထွေထွေအတွင်းရေးမှူး။
• ၂။ စောက်ꩻဗွာစွိုးခွိုꩻလွောင်ႏဗူႏရေꩻ/စောက်ꩻဗွာလွစ်ထန်ႏရေꩻတပ်မတောႏ (ညိမ်ꩻချမ်ꩻရေꩻကောင်စီ) KNU/KNLA-PC၊ ဗိုလ်ချုပ်ကြီးစောထိန်မောင်၊ ဥက္ကဋ္ဌ၊ ဗိုလ်ချုပ်စောရင်နု၊ စစ်ထောက်ချုပ်၊ စောနေစိုးမြ စစ်ရေးချုပ်။
• ၃။ ချင်ꩻစွိုꩻခွိုꩻတပ်အွဉ်ငါ (CNF)

ပူးနန်လျန်ထန်၊ ဥက္ကဋ္ဌ၊ ပူးဇင်ကျုံး၊ အထွေထွေအတွင်းရေးမှူးချုပ်၊ ဗိုလ်မှူးချုပ်ဟရန်သင်ထိုက်၊ စစ်ဦးစီးချုပ်။

• ၄။ စွဲကမ်းဒီမိုရေစီစောက်ꩻဗွာတပ်မတောႏ (DKB) ဒု-ဗိုလ်ချုပ်ကြီး စောလားပွယ်၊ စဲ့ꩻဖဲ့ꩻအကဲႏအတန်၊ ဗိုလ်ချုပ်စောဖိုးရွှေ ဒု-စဲ့ꩻဖဲ့ꩻအကဲႏအတန်၊ ဗိုလ်မှူးစောစိန်ဝင်း စဲ့ꩻရေꩻအကဲႏအတန်။
• ၅။ ပအိုဝ်ႏစွိုးခွိုꩻလွစ်ထန်ႏရေꩻအစွိုꩻချုပ် (PNLO) ခွန်မြင့်ထွန်း၊ ဥက္ကဋ္ဌ၊ ဗိုလ်မှူးခွန်သူရိန် စဲ့ꩻရေꩻအကဲႏအတန်၊ ဗိုလ်မှူးတန်ခွန်ဥက္ကာ၊ နာယက။
• ၆။ တခမ်းလွုမ်းဒီမိုကရက်တစ်တပ်အွဉ်ငါကျောင်ꩻသားစွိုꩻ (ABSDF) ရဲဘော်သံခဲ၊ ဥက္ကဋ္ဌ၊ ရဲဘော်မျိုးဝင်း ဒုတိယဥက္ကဋ္ဌ၊ ရဲဘော်ရဲထွဋ် အွဉ်အကိုရေꩻ(စဲ့ꩻကော်မရှင်)။
• ၇။ ရခဲင်ႏခမ်းလွစ်ထန်ႏရေꩻပါတီ (ALP) နိုင်းစိုးနိုင်အောင် ဒု-ဥက္ကဋ္ဌ၊ ဗိုလ်မှူးချုပ်နိုင်ထွန်းလင်း စဲ့ꩻဖဲ့ꩻအကဲႏအတန်၊ စောမြရာဇာလင်း ဗဟိုႏကောႏမတီႏ။
• ၈။ တယ်ႏထောင်ႏခွိုန်ꩻချာဖြောဝ်ꩻခမ်းကောင်စီ (RCSS) ဒု-ဗိုလ်မှူးတန်ယွက်စစ် ဥက္ကဋ္ဌ၊ ဗိုလ်မှူးချုပ်ဘောင်ခေး စဲ့ꩻဖဲ့ꩻအကဲႏအတန်၊ ဗိုလ်မှူးတန်စိုင်းလဲ အွဉ်အကိုရေꩻ(၂)။
• ၄။ တခမ်းလွုမ်းချွစ် အတွိုက်ꩻအခꩻ အွဉ်ႏဆွိုးသဖော်ꩻတူႏလိတ်ချုပ်အစွိုꩻ (NCA)နောဝ်ꩻ ခမ်းပေါင်ꩻဗူႏညိမ်ꩻချမ်ꩻရေꩻထာꩻမာꩻယို မာꩻသွုပ်ဖေႏအဆင်ႏကပြေႏ ထွို့ꩻဗူႏလွေꩻယင်းအစွိုꩻ နုဲင်းဆꩻလယိုနောဝ်ꩻသွူ။
  • (၁) တခမ်းလွုမ်းချွစ်အတွိုက်ꩻအခꩻ အွဉ်ႏဆွိုးရေꩻ သဖော်ꩻတူႏလိတ်ချွုတ် ဖောႏလွေꩻအနမ်းအခြုံ သင်ꩻရာꩻအစီꩻအဝွေꩻ (JICM-Joint Iamplementatio Coordination Meeting)
  • (၂) တွိုက်ꩻခꩻအွဉ်ႏဆွိုးရေꩻဆဲင်ႏရာꩻ အုံထွားခွုမ်စံႏကောႏမတီႏ (Joint Ceasefcre Manitoring Commette JMC)

ခမ်းပေါင်ꩻဗူႏအရန်းကိုနောဝ်ꩻ- နဲင်ႏငံႏတောႏအစိုႏရဖဲ့ꩻ အဖြာꩻပေါင်ꩻ(၁၀)၊ စူခွုမ်စူစံႏခမ်းရင်ꩻသားအစွိုꩻ အဖြာꩻပေါင်ꩻ(၁၀)၊ နီဖဲ့ꩻကယွုမ်းအံႏဒါႏရပ်မွိုးရပ်ဖါ အဖြာꩻပေါင်ꩻ(၆)၊ တဖဲ့ꩻနောဝ်ꩻ (၃)ဖြာꩻ။ ခမ်းနယ်ႏအရန်းကိုနောဝ်ꩻ- နဲင်ႏငံႏတောႏအစိုႏရဖဲ့ꩻ အဖြာꩻပေါင်ꩻ(၅)၊ စူခွုမ်စူစံႏခမ်းရင်ꩻသားအစွိုꩻ အဖြာꩻပေါင်ꩻ(၅)၊ နီဖဲ့ꩻကယွုမ်းအံႏဒါႏ ရပ်မွိုးရပ်ဖါ အဖြာꩻပေါင်ꩻ(၄)။ ဒေသန္တရအရန်းကိုနောဝ်ꩻ- နဲင်ႏငံႏတောႏအစိုႏရဖဲ့ꩻ အဖြာꩻပေါင်ꩻ(၃)၊ စူခွုမ်စူစံႏခမ်းရင်ꩻသားအစွိုꩻ အဖြာꩻပေါင်ꩻ(၃)၊ နီဖဲ့ꩻကယွုမ်းအံႏဒါႏ ရပ်မွိုးရပ်ဖါ အဖြာꩻပေါင်ꩻ(၂)။ ထွို့ꩻဗူႏထွူ (JICM)ထွူနောဝ်ꩻ ထွို့ꩻဗူႏလွေꩻယင်း ခမ်းပေါင်ꩻဗူႏညိမ်ꩻချမ်ꩻရေꩻဆွေꩻနွေꩻတာႏ ခွုမ်စံႏညီꩻကောႏမတီႏ (UPDJ Union Peace Dialogue Joint Commette)။ အစိုႏရလွတ်တောႏတပ်မတောႏ အဖြာꩻပေါင်ꩻ(၁၆)၊ စူခွုမ်စူစံႏခမ်းရင်ꩻသားအစွိုꩻ အဖြာꩻပေါင်ꩻ(၁၆)၊ မဲကနွောင်ꩻဒါႏ လွိုက်ရွေꩻပွယ်ꩻနဲင်ႏငံႏရေꩻပါတီစွိုꩻ အဖြာꩻပေါင်ꩻ(၂၆)၊ ခြွဉ်းလို့ဝင်ꩻ အဖြာꩻပေါင်ꩻ(၄၈)။

အစိုႏရလွတ်တောႏတပ်မတောႏကိုနောဝ်ꩻ ပအိုဝ်ႏစွိုးခွိုꩻအစွိုꩻ (P.N.O)ပါတီ ဒုတိယဥက္ကဋ္ဌ၊ ဝေင်ꩻနယ်ႏပင်လောင်ꩻ၊ ခမ်းသားလွတ်တောႏနမ်းခြောင်ꩻတင် ဖြားခွန်မောင်သောင်း အောဝ်ႏပါသော့ꩻ (UPDJC)အစွိုꩻနွို့ကိုနောဝ်ꩻသွူ။ စူခွုမ်စူစံႏခမ်းရင်ꩻသားအစွိုꩻကိုနောဝ်ꩻ ပအိုဝ်ႏစွိုးခွိုꩻလွစ်ထန်ႏရေꩻအစွိုꩻ ဒု-ဥက္ကဋ္ဌ ခွန်မြင့်ထွန်း အောဝ်ႏပါသော့ꩻ (UPDJC)အွဉ်အကိုရေꩻ အစွိုꩻကိုနောဝ်ꩻသွူ။ နဲင်ႏငံႏရေꩻပါတီ (လွိုက်ရွေꩻပွယ်ꩻကနွောင်ꩻ) (၂)ပါတီအကိုနောဝ်ꩻ ပအိုဝ်ႏစွိုးခွိုꩻအစွိုꩻ (P.N.O)ပါတီ တွယ်ꩻဖက်အွဉ်အကိုရေꩻ(၂) ဖြားခွန်ထွန်းရွှေ အောဝ်ႏပါသော့ꩻ (UPDJC)အစွိုꩻနွို့ကိုတဖြာꩻနုဲင်းနောဝ်ꩻသွူ။

တခမ်းလွုမ်းချွစ် အတွိုက်ꩻအခꩻ အွဉ်ႏဆွိုးရေꩻတွမ်ႏ ညိမ်ꩻချမ်ꩻရေꩻ(၂)

၁။ အောဝ်ႏခမ်းပေါင်ꩻဗူႏ ညိမ်ꩻချမ်ꩻရေꩻ ခွုမ်စံႏညီꩻကောႏမတီႏ ထွို့ꩻဗူႏလွေꩻလဲဉ်း ကဒင်ႏပျꩻသေꩻ လာကရီးနောဝ်ꩻအတွိုင်ꩻ အစွိုꩻအဗူႏတန် သွံစွိုꩻယို အုံလင်ꩻညီꩻဝင်ꩻ ဗွိုန်ပီတြိဂံသွံနားတဲင် အစိုႏရအစွိုꩻအဗူႏကို ကအောဝ်ႏပါသော့ꩻဒါႏ အစွိုꩻဖုံႏနောဝ်ꩻ-

• (၁) အစိုႏရ
• (၂) လွတ်တောႏ
• (၃) စဲ့ꩻတပ်မတောႏ

ထွာဝွေꩻသီးသွံစွိုꩻနောဝ်ꩻသွူ၊ အောဝ်ႏကုဲင်ထဲင်းယင်း အစွိုꩻတန်တစွိုꩻနောဝ်ꩻ ခမ်းရင်ꩻသား တောႏလန်ႏရေꩻစူခွုမ်စူစံႏစွိုꩻနောဝ်ꩻသွူ။ ထွူထဲင်းယင်း အစွိုꩻတန်တစွိုꩻနောဝ်ꩻ ၂၀၁၅-ဗာႏ လွိုက်ရွေꩻပွယ်ꩻကို အနွောင်ꩻကလꩻဒါႏ ခမ်းရေꩻထီရေꩻအစွိုꩻ (နိုင်ငံရေးပါတီ)ဖုံႏနုဲင်းနောဝ်ꩻသွူ။ အထျꩻအောဝ်ႏဝွေꩻသီး သွံစွိုꩻယိုနောဝ်ꩻသွူ၊ ဝွေꩻသီးသွံစွိုꩻယို ဆွေꩻနွေꩻဆွုံꩻဖျတ် မဉ်ႏတထွူတောဝ်း၊ မဉ်ႏတလꩻတောဝ်း၊ ထာꩻထီႏမဉ်ႏတဗွိုန်တောဝ်းလွဝင်ꩻနောဝ်ꩻ ဒင်ႏနယ်ကီလွေꩻဗာႏ တခမ်းလွုမ်းချွစ် အတွိုက်ꩻအခꩻ အွဉ်ႏဆွိုးဖောႏလွေꩻအနမ်းအခြုံ ခြိꩻလွေꩻဖေႏပွယ်ꩻအုံကွံ (Joint Implemerntation Coordination Meeting-JICM)ကိုနုဲင်းနောဝ်ꩻသွူ။

ကျွꩻထင်ႏခွင်ꩻ ကအောဝ်ႏဒါႏအစွိုꩻဖုံႏတွမ်ႏ အဖြာꩻပေါင်ꩻနောဝ်ꩻ-

• (၁) အစိုႏရအစွိုꩻနမ်းခြောင်ꩻတင် (၁)ဖြာꩻ
• (၂) လွတ်တောႏနမ်းခြောင်ꩻတင်(၁)ဖြာꩻ
• (၃) စဲ့ꩻတပ်မတောႏနမ်းခြောင်ꩻတင် (၁)ဖြာꩻ
• (၄) စူခွုမ်စူစံႏနမ်းခြောင်ꩻတင် (၁)ဖြာꩻ

တောင်ꩻသေꩻ၊ ဖေႏကျံႏဉာဏ်ႏ စူခွုမ်စူစံႏ ခမ်းရင်ꩻသားစွိုꩻ တစွိုꩻယိုနောဝ်ꩻ ဟဲ့ꩻခွင်ꩻလꩻပုဂ္ဂိုလ်ႏ (၃)ဖြာꩻစီႏနုဲင်းနောဝ်ꩻသွူ၊ ပွုံႏမဲဉ်ႏ ပွယ်ꩻမော့ꩻခွဲးယို (၃)လာတလဲင်ႏနောဝ်ꩻသွူ၊ (JICM)အစွိုꩻယိုနောဝ်ꩻ မာꩻပဲင်ႏခွင်ꩻတွမ်ႏတာႏဝွန်ႏထူႏမုꩻယို အောဝ်ႏနုဲင်းဆꩻလယိုနောဝ်ꩻသွူ။ (၁) ခွုမ်စံႏညီꩻ အုံပွေါထွားအတွိုက်ꩻအခꩻ အွဉ်ႏဆွိုးလွေꩻကောႏမတီႏ (Joint Ceasefire Monitoring Coommitte JMC)ခွုမ်စံႏညီꩻ အုံပွေါထွား အတွိုက်ꩻအခꩻ အွဉ်ႏဆွိုးလွေꩻကောႏမတီႏယိုနောဝ်ꩻ အောဝ်ႏ(၃)ရန်းနောဝ်ꩻသွူ။ (၁) (၁) ခမ်းပေါင်ꩻဗူႏ ခွုမ်စံႏညီꩻအုံပွေါထွား အတွိုက်ꩻအခꩻ အွဉ်ႏဆွိုးလွေꩻကောႏမတီႏ (Union Joint Ceasefire Monitoring Committee JMC-U)ကို ကပါဒါႏ ပုဂ္ဂိုလ်ႏဖုံႏနောဝ်ꩻ ခမ်းပေါင်ꩻဗူႏအစိုႏရဖဲ့ꩻနောဝ်ꩻ အဖြာꩻပေါင်ꩻ (၁၀)ဖြာꩻ၊ နီဖဲ့ꩻအစွိုꩻ ကယွုမ်းအံႏဒါႏ ရပ်မွိုးရပ်ဖါနောဝ်ꩻ တဖဲ့ꩻ(၃)ဖြာꩻ စုခြွဉ်း(၆)ဖြာꩻ (JMC-U)ခမ်းပေါင်ꩻဗူႏအရန်းနောဝ်ꩻ အောဝ်ႏအဖြာꩻပေါင်ꩻ (၂၆)နုဲင်းနောဝ်ꩻသွူ။ (၁) (၂) ခမ်းနယ်ႏခွုမ်စံႏညီꩻ အုံပွေါထွားအတွိုက်ꩻအခꩻ အွဉ်ႏဆွိုးလွေꩻကောႏမတီႏ (State Joint Ceasefire Monitoring Committee JMC-S)ခမ်းနယ်ႏအရန်းယိုနောဝ်ꩻ အစိုႏရပါသော့ꩻ (၅)ဖြာꩻ၊ စူခွုမ်စူစံႏတောႏလန်ႏရေꩻသား (၅)ဖြာꩻ၊ နီဖဲ့ꩻကယွဒမ်းအံႏဒါႏ ရပ်မွိုးရပ်ဖါ တဖဲ့ꩻ(၂)ဖြာꩻစီႏနောဝ်ꩻသွူ၊ ကောႏမတီႏကို အောဝ်ႏပါသော့ꩻ အဖြာꩻပေါင်ꩻ(၁၄)ဖြာꩻနုဲင်းနောဝ်ꩻသွူ။

ဒေႏသအကို ခွုမ်စံႏညီꩻအတွိုက်ꩻအခꩻ အွဉ်ႏဆွိုးလွေꩻကောႏမတီႏ (Local Ceasefire Monitoring Committee JMCL)ကိုနောဝ်ꩻ အစိုႏရဖဲ့ꩻတွမ်ႏ စူခွုမ်စူစံႏတောႏလန်ႏရေꩻသားနောဝ်ꩻ တဖဲ့ꩻ(၃)ဖြာꩻစီႏ၊ နီဖဲ့ꩻကယွုမ်းအံႏဒါႏ ရပ်မွိုးရပ်ဖါနောဝ်ꩻ (၁)ဖြာꩻစီႏ၊ လို့လို့စင်စင် အစွိုꩻနောဝ်ꩻ ထွာ(၈)ဖြာꩻနုဲင်းနောဝ်ꩻသွူ။ (၁) (၃) (၁၅/၁၇/၁၀-၂၀၁၅)နီꩻနောဝ်ꩻ အောဝ်ႏပထမအလဲင်ႏ (JICM)ပွယ်ꩻမော့ꩻခွဲးယို ထွို့ꩻဗူႏလွေꩻဖေႏ (UPDJC- Union Peace Dilogoue Joint Committee)ဖုံႏနုဲင်းနောဝ်ꩻသွူ။ (UPDJC)ကိုနောဝ်ꩻ အစိုႏရဖဲ့ꩻ(၁၆)ဖြာꩻ၊ စူခွုမ်စူစံႏ ခမ်းရင်ꩻသား(၁၆)ဖြာꩻ၊ လွိုက်ရွေꩻပွယ်ꩻကိုကနွောင်ꩻဒါႏ ခမ်းအရေꩻထီအရေꩻ အစွိုꩻ(နိုင်ငံရေးပါတီ) (၁၆)ဖြာꩻ၊ လို့လို့ထွာလွေꩻ (၄၈)ဖြာꩻနုဲင်းနောဝ်ꩻသွူ၊ အောဝ်ႏအစွိုꩻတန်သွံစွိုꩻအကို ထွို့ꩻဗူႏလွေꩻယင်း အွဉ်အကိုရေꩻအစွိုꩻ တစွိုꩻယို(၅)ဖြာꩻနုဲင်းနောဝ်ꩻသွူ၊ မဉ်ႏဒေါ့ꩻယင်းတနယ်ꩻတဲ့ (UPDJC)ယိုနောဝ်ꩻ အထျꩻအောဝ်ႏဆွေꩻနွေꩻတွိုင်ႏပင်ႏဒေါ့ꩻရီလွေꩻ ခမ်းရေꩻထီရေꩻ(နဲင်ႏငံႏရေꩻ)ဖုံႏနုဲင်းနောဝ်ꩻသွူ၊ ကတွိုင်ႏပင်ႏဒေါ့ꩻရီလွေꩻ ခမ်းရေꩻထီရေꩻကိုယိုနောဝ်ꩻ အွဉ်ႏထွော့လွေꩻ ကဏ္ဍ(၅)ဗာႏနောဝ်ꩻသွူ၊ ကဏ္ဍ(၅)ဗာႏယိုနောဝ်ꩻ-

• (၁) ခမ်းရေꩻထီရေꩻ (နဲင်ႏငံႏရေꩻ)ကဏ္ဍ
• (၂) စီꩻပွာꩻရေꩻကဏ္ဍ
• (၃) လိုꩻမုꩻရေꩻကဏ္ဍ
• (၄) လုမ်းဗဉ်ႏရေꩻကဏ္ဍ
• (၅) ဟံႏယာႏတွမ်ႏ ဟံႏကိုကအောဝ်ႏဒါႏ သဘာဝလုံးသဲင်၊ ဘောႏ၊ ရွဉ်၊ ခံꩻ(သယံဇာတ)ကဏ္ဍတဲင် ကဏ္ဍတန်အောဝ်ႏ(၅)ဗာႏနောတ်ꩻသွူ၊ ကဏ္ဍတန်(၅)ဗာႏကိုနောဝ်ꩻ လုမ်းဗဉ်ႏရေꩻကဏ္ဍနောဝ်ꩻ တွိုင်ႏပင်ႏဆွေꩻနွေꩻဒေါ့ꩻရီဗာႏဒျာႏ ခမ်းပေါင်ꩻဗူႏအရန်းတဲင် ခမ်းနယ်ႏအရန်း၊ ဒေႏသအရန်း အရန်းဆꩻလဖဲ့ꩻယို ဆွေꩻနွေꩻတွိုင်ႏပင်ႏဒေါ့ꩻရီ တလꩻတောဝ်းနုဲင်းနောဝ်ꩻသွူ၊ ကဏ္ဍ(၅)ဗာႏကိုနောဝ်ꩻ အစွိုꩻတန်ကိုကထွာဒါႏ အွဉ်အကိုရေꩻတဖြာꩻယို ပါသော့ꩻ(၃)ဖြာꩻ၊ ကဏ္ဍ(၅)ဗာႏတဲင် အွဉ်အကိုရေꩻ(၁၅)ဖြာꩻနုဲင်းနောဝ်ꩻသွူ။

(၁) (၄) ကဏ္ဍတန်အောဝ်ႏ(၅)ဗာႏတဲင် ထာꩻမာꩻကောႏမတီႏတဲ့ အောဝ်ႏ(၅)စွိုးနောဝ်ꩻသွူ၊ သင်ꩻရာꩻကဏ္ဍအလွောက်ꩻ ထာꩻမာꩻကောႏမတီႏတဗာႏယို သင်ꩻရာꩻစွုမ်ꩻစွိုꩻဖုံႏ ပါသော့ꩻဗာႏနုဲင်းနောဝ်ꩻသွူ။ (၁) အစိုႏရ (စဲ့ꩻတပ်မတောႏ၊ လွတ်တောႏအစိုႏရ) (၂) စူခွုမ်စူစံႏ ခမ်းရင်ꩻသားအစွိုꩻ (၃) လွိုက်ရွေꩻပွယ်ꩻကို ကနွောင်ꩻဒါႏ ခမ်းရေꩻထီရေꩻသားအစွိုꩻ (နဲင်ႏငံႏရေꩻပါတီ)။ ကွပ်ပွိုးနောဝ်ꩻမꩻ ထာꩻမာꩻကောႏမတီႏတစွိုꩻယိုနောဝ်ꩻ အစွိုꩻနွို့တစွိုꩻယို (၄)ဖြာꩻ၊ သွံစွိုꩻနောဝ်ꩻ အောဝ်ႏ(၁၂)ဖြာꩻတွမ်ႏ အွဉ်အကိုရေꩻစွိုꩻ(၃)ဖြာꩻ ခြွဉ်းဝင်ꩻလို့လို့စင် အောဝ်ႏ(၁၅)ဖြာꩻနုဲင်းနောဝ်ꩻသွူ၊ လွိုက်ရွေꩻပွယ်ꩻနွောင်ꩻ ခမ်းရေꩻထီရေꩻ(နဲင်ႏငံႏရေꩻပါတီ)အနေႏ ထင်ႏခွင်ꩻကလꩻဒါႏ အဖြာꩻပေါင်ꩻနောဝ်ꩻ နဲင်ႏငံႏရေꩻပါတီတန်ကထွာဒါႏ အမျိုးသားဒီမိုကရေစီအဖွဲ့ချုပ်တွမ်ႏ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနောဝ်ꩻ ထင်ႏခွင်ꩻအောဝ်ႏ (၂)ဖြာꩻရိုꩻကီလဲ့ ထင်ႏတွိုင်ႏပါတီအလောင်ႏအလင်နောဝ်ꩻ ထင်ႏခွင်ꩻလꩻဒျာႏ(၁)ဖြာꩻစီႏလွုမ်ꩻနုဲင်းနောဝ်ꩻသွူ၊ နောဝ်ꩻမꩻတဲင် ကဏ္ဍတွိုင်ꩻကိုနောဝ်ꩻ ပါတီတွိုင်ꩻ တပါသော့ꩻနွောင်ꩻတောဝ်းနုဲင်းနောဝ်ꩻသွူ။ ၂။ ထာꩻမာꩻကောႏမတီႏမဉ်ႏထွူနောဝ်ꩻ ထွို့ꩻဗူႏအွဉ်ႏထွော့လွေꩻယင်း စွိုးခွိုꩻအရန်း(အမျိုးသားအဆင့်) ခမ်းရေꩻထီရေꩻပွယ်ꩻမော့ꩻခွဲးဖုံႏနုဲင်းနောဝ်ꩻသွူ၊ အင်းရွယ်ႏနုဲင်းမုဲင်ꩻကရိုꩻနောဝ်ꩻ ယ့ကပါလို့လို့နွောင်ꩻ ရိုꩻနုဲင်းနောဝ်ꩻတဲင် ခင်ႏယန်အရန်း မာꩻလွေꩻဖေႏစွိုးခွိုꩻအရန်း(အမျိုးသားအဆင့်) ခမ်းရေꩻထီရေꩻ ပွယ်ꩻမော့ꩻခွဲးနုဲင်းနောဝ်ꩻသွူ၊ အောဝ်ႏနောဝ်ꩻထွူမꩻ ယံကဒင်ႏသွင်ꩻတွိုႏလွေꩻဗꩻစွဉ်ႏ ခမ်းပေါင်ꩻဗူႏညိမ်ꩻချမ်ꩻရေꩻ ညီႏလာႏခံႏ(၂၁)ရျာꩻဗူႏ ပင်ႏလုံအစီꩻအဝွေꩻတန်ကို နုဲင်းနောဝ်ꩻသွူ။

စွိုးခွိုꩻအရန်း(အမျိုးသားအဆင့်) ခမ်းရေꩻထီရေꩻ ပွယ်ꩻမော့ꩻခွဲးယိုနောဝ်ꩻ အွဉ်ႏထွော့လွေꩻ အစွိုးအမျိုꩻ သွ့မျိုꩻသွံစွိုးနုဲင်းနောဝ်ꩻသွူႏ သွံစွိုးသွံမျိုꩻကရိုꩻနောဝ်ꩻ နုဲင်းဆꩻလယိုသွူ။ (၁) လိုꩻမျိုꩻအလွောက်ꩻ စွိုးခွိုꩻအရန်း ခမ်းအရေꩻထီအရေꩻ ပွယ်ꩻမော့ꩻခွဲ (၂) ဒေႏသအလွောက်ꩻ စွိုးခွိုꩻအရန်း ခမ်းရေꩻထီအရေꩻ ပွယ်ꩻမော့ꩻခွဲ (၃) အကျောင်ꩻခရာႏအလွောက်ꩻ စွိုးခွိုꩻအရန်း ခမ်းအရေꩻထီအရေꩻ ပွယ်ꩻမော့ꩻခွဲ။ အောဝ်ႏ (UPDJC)ယို အွဉ်ႏထွော့လွေꩻဖေႏ အချက်သွံချက်နုဲင်းဆꩻကီယိုနုဲင်းနောဝ်ꩻသွူ၊ စွိုးခွိုꩻအရန်း (အမျိုးသားအဆင့်) ခမ်းရေꩻထီရေꩻ ပွယ်ꩻမော့ꩻခွဲယို အောဝ်ႏ (UPDJC)ယို ခွုမ်စံႏလွေꩻတဲင် ထွို့ꩻလွေꩻဖေႏ ခမ်းနယ်ႏအရန်း ထိန်ꩻထွားရေꩻကောႏမတီႏ (ကြီးကြပ်ရေးကော်မတီ)နုဲင်းနောဝ်ꩻသွူ။

၃။ ကအီႏအွဉ်ဟို ဒိုနားဖေႏဒါႏ လိုꩻမျိုꩻအလွောက်ꩻ စွိုးခွိုꩻအရန်း ခမ်းရေꩻထီရေꩻ ပွယ်ꩻမော့ꩻခွဲ ဖေႏကထွာနွောင်ꩻနောဝ်ꩻ (NCA)အလꩻ ကတဲမ်းထွို့ꩻထွူလဲဉ်းဒါႏ စူမုဲင် စူခွုမ်စူစံႏအစွိုꩻတွမ်ႏ လွိုက်ရွေꩻပွယ်ꩻကို အနွောင်ꩻကလꩻဒါႏ ခမ်းရေꩻထီရေꩻအစွိုꩻ(နဲင်ႏငံႏရေꩻပါတီ)ဝွေꩻသီးဖုံႏနောဝ်ꩻ အွဉ်ဟိုဒိုနား မာꩻလွေꩻလꩻနုဲင်းနောဝ်ꩻသွူ၊ အောဝ်ႏကုဲင်ဒါႏ ဒေႏသအလွောက်ꩻ စွိုးခွိုꩻအရန်း ခမ်းရေꩻထီရေꩻ ပွယ်ꩻမော့ꩻခွဲဖေႏကထွာနွောင်ꩻနောဝ်ꩻ ဆဲင်ႏရာꩻခမ်းနယ်ႏအလွောက်ꩻ အစိုႏအရန်း ပွယ်ꩻမော့ꩻခွဲယိုနောဝ်ꩻ လူထုထံꩻသာꩻအစွိုꩻကထွာဒါႏ (CSO-NGO)အစွိုꩻယို အွဉ်ဟိုဒိုနား မာꩻလွေꩻဖေႏနုဲင်းနောဝ်ꩻသွူ၊ ဝွေꩻသီးကအွဉ်ဟို ဒိုနားဒါႏနောဝ်ꩻ တွိုင်ႏပင်ႏဆွေꩻနွေꩻဗာႏ လိုꩻမုꩻရေꩻအခန်ꩻကဏ္ဍလွုမ်ꩻနောဝ်ꩻသွူ၊ စီꩻပွါꩻရေꩻအခန်ꩻကဏ္ဍ၊ ဟံႏယာႏတွမ်ႏ သဘာဝအသောင်အရင်ꩻကိစ္စအလောင်ႏအလင် ခမ်းရေꩻထီရေꩻကိစ္စဖုံႏနောဝ်ꩻ ဆွေꩻနွေꩻတွိုင်ႏပင်ႏဒေါ့ꩻရီခွင်ꩻ တအဲဉ်ထောဝ်းနုဲင်းနောဝ်ꩻသွူ၊ အောဝ်ႏစွိုးခွိုꩻအရန်း လိုꩻမျိုꩻအလွောက်ꩻ ခမ်းရေꩻထီရေꩻ ဆွေꩻနွေꩻပွယ်ꩻတဲ့နောဝ်ꩻ၊ အောဝ်ႏဒေႏသအလွောက်ꩻ ခမ်းရေꩻထီရေꩻ ဆွေꩻနွေꩻပွယ်ꩻတဲ့နောဝ်ꩻ၊ အကျောင်ꩻခရာႏအလွောက်ꩻ ခမ်းရေꩻထီရေꩻ ဆွေꩻနွေꩻပွယ်ꩻတဲ့နောဝ်ꩻ ကလꩻလွဉ်ဒါႏ လိုꩻအမျာꩻထာꩻထီႏ သဖော်ꩻတရာꩻဖုံႏတဲင် ထိန်ꩻထွားလွဉ်ꩻအစွိုꩻနောဝ်ꩻ စုခြွဉ်းတဲင် ဒင်ႏကီလွေꩻဗာႏ (UPDJC)အွဉ်အကိုရေꩻအစွိုꩻထျꩻနုဲင်းနောဝ်ꩻသွူ။

နောဝ်ꩻထွူမꩻ အပ်လွေꩻသင်ꩻရာꩻ ထာꩻမာꩻကောႏမတီႏအစွိုꩻထွူတဲင် ကဆဲင်ႏဒါႏတွမ်ႏ ကဏ္ဍအလောင်ႏအလင်တဲ့ အပ်လွေꩻဗာႏကဏ္ဍအလောင်ႏအလင်နုဲင်းနောဝ်ꩻသွူ၊ ဥပမာႏ- အောဝ်ႏလွေꩻဆွေꩻနွေꩻ လိုꩻမုꩻရေꩻကဏ္ဍ၊ အဖြေႏနောဝ်ꩻ အောဝ်ႏဒျာႏစီꩻပွာꩻရေꩻကဏ္ဍကိုတဲင် အပ်လွေꩻဗာႏဒျာႏ စီꩻပွာꩻရေꩻကဏ္ဍနုဲင်းနောဝ်ꩻသွူ။ ၅။ အောဝ်ႏဆဲင်ႏရာꩻ ထာꩻမာꩻကောႏမတီႏစွိုꩻနောဝ်ꩻ အောဝ်ႏမွိုးဖါခမ်းသားအမျာꩻ ကဒင်ႏပျꩻလွဉ်ဒါႏ ကဏ္ဍအလွောက်ꩻနောဝ်ꩻ ကဗွိုန်ရာꩻဗွိုန်ရာꩻနောဝ်ꩻ တွိုင်ႏပင်ႏဆွေꩻနွေꩻစုခြွဉ်းထွူတဲင် ဒင်ႏနယ်လွေꩻဗာႏ (UPDJC)ပွယ်ꩻအုံကွံနုဲင်းနောဝ်ꩻသွူ၊ အောဝ်ႏ (UPDJC)နောဝ်ꩻ ထူႏလွေꩻအတီႏတဲင် ဒင်ႏပျꩻသွုပ်ငါလွဗꩻ (UPC)ကိုနုဲင်းနောဝ်ꩻသွူ၊ အောဝ်ႏ (UPC)နောဝ်ꩻ ကဏ္ဍအလွောက်ꩻ ဆွေꩻနွေꩻတွိုင်ႏပင်ႏဒေါ့ꩻရီတဲင် ဖေႏလွေꩻအဆုံꩻအဖျတ် ဒင်ႏသွင်ꩻငါလွေꩻ (Union Accord)ခမ်းပေါင်ꩻဗူႏလိတ်ချုပ်နုဲင်းနောဝ်ꩻသွူ၊ အွဉ်ႏထွာလွဗꩻခမ်းပေါင်ꩻဗူႏ လိတ်ချုပ်ထွူနောဝ်ꩻ (UPCJC)အစွိုꩻယို ဒင်ႏသွင်ꩻငါလွေꩻဗာႏ လွတ်တောႏနုဲင်းနောဝ်ꩻသွူ၊ အောဝ်ႏလွတ်တောႏယို ထူႏလွေꩻအတီႏတဲင် ခမ်းပေါင်ꩻဗူႏလိတ်ချုပ်ကို ကပါဒါႏအချက်ဖုံႏနောဝ်ꩻ ဖျင်ဆင်လွေꩻအီ ၂၀၀၈-ဗာႏ၊ ထွို့ꩻဗူႏပွုံႏအခေႏခံႏ ဥပဒေႏယို ဖျင်လွေꩻတလဲင်ႏတစိꩻစိꩻနောဝ်ꩻ တွိုႏလွေꩻဗာႏ ဒီမိုကရေစီဖက်ဒရယ်ခမ်းထိတဖြုံႏနုဲင်းနောဝ်ꩻသွူ၊ ၂၀၁၇-ဗာႏ၊ မေလာ(၂၄)နီꩻဗꩻတွိုႏလွေꩻ မေလာ(၂၉)နီꩻနောဝ်ꩻ မာꩻလွေꩻခမ်းပေါင်ꩻဗူႏ ညိမ်ꩻချမ်ꩻရေꩻညီႏလာႏခံႏ (၂၁)ရျာꩻဗူႏ ပင်ႏဒုံ ဒုတိယအလဲင်ႏ အစီꩻအဝွေꩻကိုနောဝ်ꩻ ခမ်းပေါင်ꩻဗူႏသဖော်ꩻတူႏ လိတ်ချုပ်တကွိုꩻတခေါဝ် လꩻလွေꩻအချက်ပေါင်ꩻ (၃၇)ချက်နုဲင်းနောဝ်ꩻသွူ။ ၂၀၁၈-ဗာႏ၊ လာဇူလိုင်(၁၁)နီꩻ ဗꩻတွိုႏ(၁၆)နီꩻ မꩻလွေꩻတတိယအလဲင်ႏ (၂၁)ရျာꩻဗူႏ ပင်ႏလုံညီႏလာႏခံႏအကို လꩻလွေꩻခမ်းပေါင်ꩻဗူႏ သဖော်ꩻတူႏလိတ်ချုပ် တကွို့ꩻတခေါဝ် အချက်ပေါင်ꩻ(၁၄)ချက်နောဝ်ꩻသွူ၊ ခမ်းပေါင်ꩻဗူႏ လိတ်ချုပ်ခြွဉ်းလို့ဝင်ꩻ အောဝ်ႏလဲဉ်း(၅၁)ချက်နုဲင်းနောဝ်ꩻသွူ။