တရာꩻနွုတ်ꩻပါꩻကျင်ꩻမာꩻ
"ဒုတိယနိဒ္ဒသသုတ် (တရာꩻနွုတ်ꩻပါꩻ ကျင်ꩻမာꩻ ၁၂-နေင်ႏ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ ကောသမ္ဗီႏခမ်း၊ ကျောင်ꩻဃောသိတာရုံကိုအတွင်ꩻ တွိုႏတရောဝ်ꩻ ဗွေႏအာႏနန္တာႏ အီႏလွေꩻတွုံꩻသွမ်ꩻ အခိန်ႏအဝ်ႏစောဝ်းငါႏနေတဲင် ဝွေꩻဗွေႏကျွꩻလွေꩻလယ်ႏမောဝ်ꩻ ပရိဗိုဇ်သီးကျောင်ꩻ။ ပရိဗိုဇ်သီးဖုံႏနဝ်ꩻ သꩻရောင်းသꩻရေꩻ နစ်နစ်သက်သက် စွော့ꩻတက်ဝွေꩻဗွေႏထွူခါ လောဝ်းပါနုဲင်းယို- "အကျင်ꩻကြောင်းစင် အကျင်ꩻမျတ်ယို ရဟန်ꩻအပါꩻမုဲင်ꩻတဲ့ယဝ်း ပေါႏကျင်ꩻဗွေဗွေ တဆီနီနေင်ႏနဝ်ꩻ (လꩻလဲဉ်း)၊ ရဟန်ꩻနဝ်ꩻနဝ်ꩻ တွိုႏဆုဲင်ꩻကျင်ꩻထဲင်း တဆီနီနေင်ႏလိုႏတဝ်း"လောဝ်းဗွေႏအာႏနန္တာႏနုဲင်းနဝ်ꩻ။ ဗွေႏအာႏနန္တာႏနဝ်ꩻ နစ်သက်တဲ့ တနစ်သက်တဝ်း၊ ရဲကန်ႏကွက်တဲ့ တရဲကန်ႏကွက်တဝ်း၊ "မွေး တမွေးတဝ်း မဲ့ꩻသဲင်ꩻလောဝ်းက ဗွေႏဘုရာꩻ"ယူႏတေ့ꩻခါꩻထွူခါ ကျွꩻငါတွုံꩻသွမ်ꩻ ဝေင်ꩻကောသမ္ဗီႏကိုနောဝ်ꩻသွူ။ သွုံꩻသွမ်ꩻယာထွူ- ဗွေႏအာႏနန္တာႏ လောဝ်းနယ်ဗွေႏဘုရာꩻထွူခါ ရီပါနုဲင်းယို- "နီသွဉ်းသီး ဓမ္မဝိနယ ဘုရာꩻသာႏသနာႏကိုယို အွဉ်ႏထွော့တွက်မတ် ပညတ်ခါꩻ နေင်ႏပေါင်ꩻခြေင်ခြေင်လွုမ်ꩻ နုဲင်းနဝ်ꩻနဝ်ꩻ ထွာနေဟောင်း ဗွေႏဩ" အာႏနန္တာႏ- ၁။ သာႏသနာႏကိုယို ရဟန်ꩻ(တပါꩻ)နဝ်ꩻ ကျင်ꩻသွုံꩻဆို့ꩻတဲႏ (သီႏလ၊ သမာႏဓိ၊ ပညာႏ) သိက္ခာႏ (ကိစ္စ)ယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း ကျင်ꩻသွုံꩻဆို့ꩻတဲႏ သိက္ခာႏ(ကိစ္စ)နောဝ်ꩻ။ ၂။ ထိုမ်ႏရီရွောင် ဆင်ႏချင်ႏတရာꩻ (ကိစ္စ)ဖုံႏယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း (ကိစ္စ)နောဝ်ꩻ။ ၃။ ပယ်ႏထိုꩻထာꩻမဉ်လꩻ အကုဲင်မျိုꩻ(ကိစ္စ)ယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း (ကိစ္စ)နောဝ်ꩻ။ ၄။ ထာꩻယေန်ယေန်ကို မဉ်အုံတပါꩻလွုမ်ꩻ (ကိစ္စ)ယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း (ကိစ္စ)နောဝ်ꩻ။ ၅။ ဖေႏနေးကလꩻတရာꩻ ကျိုꩻစာꩻမာꩻ (ကိစ္စ)ယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း (ကိစ္စ)နောဝ်ꩻ။ ၆။ သတိꩻဖေႏကခွေါင် ကသေမာꩻ (ကိစ္စ)ယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း (ကိစ္စ)နောဝ်ꩻ။ ၇။ သေဖြွဉ်ခန္ဓာႏခရာႏ၊ 'သမ္မာႏဒိဋ္ဌိ'ဝိပဿနာႏ ဉာဏ်ႏဖေႏကပေါႏထန်ႏ (ကိစ္စ)ယို သꩻထင်ယံကျ၊ 'ဆန္ဒ'အာႏတလာတန်၊ တွိုႏဆုဲင်ꩻဆုဲင်ꩻတဲ့ တဗွိုႏထိုꩻတဝ်း (ကိစ္စ)နောဝ်ꩻ။ တရာꩻဖုံႏယိုနွုတ်ꩻပါꩻ မဉ်ႏကျိုꩻစာꩻမွေးမွေး၊ မဉ်ႏကျိုꩻစာꩻလꩻလꩻ၊ မဉ်ႏကျိုꩻစာꩻဗꩻဗꩻ တဆီနီနေင်ႏလုမ်းလိုမ်းနဝ်ꩻ ရဟန်ꩻနဝ်ꩻနဝ်ꩻ တွိုႏဆုဲင်ꩻကျင်ꩻထဲင်းခရာႏလိုႏတဝ်း ရိုꩻထွိုက်ငေါဝ်းနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ဒုတိယနိဒ္ဒသသုတ်)[၁][၂]