ထာꩻစာအမ်ႏလိုꩻ
ထာꩻစာအမ်ႏလိုꩻ (အိန်းကလေတ်: Human trafficking) (မန်း: လူကုန်ကူးခြင်း) ကရိုꩻနောဝ်ꩻ ထွာ ထာꩻမာꩻလဲန်အမ်ႏလိုꩻအာ၊ အော်ဝင်ꩻ၊ ထွောန်ႏမာꩻနွိုင်ႏစေꩻဝင်ꩻ ထာꩻမာꩻသွူ။ မဉ်ႏတမာꩻဖေႏတောဝ်းနောဝ်ꩻ ဝါးထန်ႏဝင်ꩻလမ်း တောဝ်းလဲ့ ဝါးထန်ႏထိုꩻ ခမ်းထီထွူ ဖေႏဆေ့ꩻ ထာꩻမာꩻအာႏရဲင်ꩻငိုꩻတဲ့နောဝ်ꩻ၊ အမ်ႏပွောတ်တန်မွေးမုဲင်းဝင်ꩻတဲ့နောဝ်ꩻ၊ ဖေႏတောဝ်းဝင်ꩻ မာꩻထာꩻမာꩻတာႏ အာႏရဲင်ꩻငိုꩻတဲ့နောဝ်ꩻ ကစဒါႏ မာꩻအာညမားဝင်ꩻ နုဲင်းနောဝ်ꩻသွူ။ ထာꩻယိုနောဝ်ꩻ ထွာ ထာꩻမာꩻဖြေꩻစာလိုꩻ တောဝ်းတဲ့ လိုꩻဖုံႏယို ဝွေသီးအွောန်ႏသꩻဝင်ꩻ ထာꩻဖြေꩻစာခရာႏ၊ ထိုꩻထွာ သွောန်းသယ်ႏ ထာꩻမာꩻလက္ခဏာႏ (မန်း- ကျွန်စနစ်၏ သွင်ပြင်လက္ခဏာ) ဖဲ့ꩻရာတဲင် ခမ်းထီအတာႏ ထွာ ထာꩻတတရာꩻတောဝ်ႏသွူ။ လိုꩻ ဝင်ꩻကစာအမ်ႏခါꩻဖုံႏနောဝ်ꩻ ထွာထိုꩻ မဲးဖြဲးတဲ့အောဝ်ႏ၊ ဝင်ꩻထွောန်ႏအမ်ႏမွိုက်တဲ့အောဝ်ႏ၊ (ဝင်ꩻစွိုင်သေꩻခါꩻတွမ်ႏ လိတ်စွိုင်စာချုပ် တောဝ်းလဲ့ သွောန်းသယ်ႏ အောဝ်ႏလိုႏဖေႏချာဝင်ꩻရွောန်(ရွဉ်)အောဝ်ႏ) တွမ်ႏယင်း သွောန်းသယ်ႏဖဝ ပါꩻထွောန်ႏမာꩻနှိုင်ႏ အဓမ္မထာꩻမာꩻတဲ့အောဝ်ႏ အောဝ်ႏနေးအစားစားသွူ။ ထူႏလွူးဝင်ꩻယောဝ်း၊ မဉ်မာꩻတစွိုးစွိုးတွော့ꩻ စာအမ်ႏလိုꩻပေႏလွူးစဖုံႏ၊ စာအမ်ႏ လိုꩻပေႏဆားဖုံႏယိုကဲႏ ဝင်ꩻသော့ꩻခါꩻ ထာꩻစာအမ်ႏလိုꩻကို။ ပါလာမို ထာꩻမာꩻရဲန်ႏ တွမ်ႏယင်း ကျင်ꩻဝတ္တရာꩻ ကရိုꩻဒါႏ ထာꩻကအီးရဲးပေ့ꩻ ယားဆုမ်ႏထိုꩻ ထာꩻစာအမ်ႏလိုꩻဖုံႏ၊ စာအမ်ႏလိုꩻမူႏတွမ်ႏ လိုꩻပေႏဖုံႏယို ထွာ ခင်ႏလမ်းဌာနတန် တအွောန်ႏခါꩻတောဝ်း ခမ်းအာသားအစွိုꩻအဗူႏ ကရဲန်ꩻဒါႏ ပွယ်ꩻအုံကွံ မော့ꩻခွဲးဒေါ့ꩻရီဝင်ꩻသွူ။
ကုလသမဂ္ဂ ကအွောန်ႏသေခါꩻဒါႏ ထာꩻစာအမ်ႏလိုꩻ အဓိပ္ပယ်ႏနောဝ်ꩻ "အင်းပွောတ်အမ်ႏဝင်ꩻတွော့ꩻ လောက်ꩻဝင်ꩻ တောဝ်းတဲ့ နေးထူႏလိုꩻအာအာႏ မာꩻ တောဝ်းတဲ့ ထွောန်ႏမာꩻနွိုင်ႏစေꩻဝင်ꩻထာꩻ၊ ဟဲ့ꩻအော်ညာꩻဝင်ꩻ၊ လဲန်အမ်ႏဝင်ꩻ၊ မာꩻအီတရွို့ꩻအာႏဏာႏ တောဝ်းတဲ့ မာꩻဆေ့ꩻခြေားထိုꩻ ဝင်ꩻအာႏရဲင်ꩻတစှိုးစှိုး တောဝ်းတဲ့ လိုꩻတဖြာꩻဖြာꩻ ဖေႏကပါငီꩻတာႏ ဖေႏရှောန်(ရွဉ်)ရဲးဝင်ꩻ တောဝ်းတဲ့ ဖေႏယောဝ်းဝင်ꩻတစှိုးစှိုး တောဝ်းတဲ့ ထူႏယောဝ်းထာꩻတစှိုးစှိုးထှူတှော့ꩻ ဟဲ့ꩻလꩻအီ လိုတသာ၊ ဒင်ႏပသာဝင်ꩻ၊ ကြုဲင်းတေားဝင်ꩻ၊ ဖေႏအုံနို့ꩻ အုံဗဉ်ႏထာꩻ တောဝ်းတဲ့ ဟဲ့ꩻဟောဝ်ခါꩻ(မန်း - လက်ခံထားခြင်း) လိုꩻ" ဖုံႏယို အရိုꩻ ထာꩻစာအမ်ႏလိုꩻ နုဲင်းနောဝ်ꩻသှူဩ။
အရန်း ၁Trafficking and Violence Protection Act (TVPA) ခမ်းထီ ထူႏနာႏငေါဝ်းဖေႏဗွေဗွေ ထာꩻဖြေꩻစာလိုꩻ တွမ်ႏ ရဲးကမ်းထာꩻ အဲက်ဥပဒေသီး အဖှိုႏသွတ်ꩻ ထာꩻအှောန်ႏထော့)
အရန်း ၂(ကအီးနာႏငေါဝ်း (TVPA) တာႏ ကမာꩻလွေꩻထာꩻ စူခြောင်ꩻအောဝ်ႏ)
အရန်း ၃ (ကအီးနာႏငေါဝ်း (TVPA) တာႏ မာꩻခါꩻထာꩻခြောင်ꩻ အဲန်တောဝ်း) စူခြောင်ꩻ လိတ်ခြောင်ꩻအဲန်တောဝ်း