ဒေါ့ꩻဟော်ꩻခရာႏ လိုႏသေနာႏ

ငဝ်းဟဝ်လစ်ꩻစွိုး

တရာꩻဟော်ꩻသား ပုဂ္ဂိုလ်ႏတွိုင်ꩻယို မဉ်ႏဒေါ့ꩻဒါႏတွိုင်ꩻ ငဝ်းဟဝ်နဝ်ꩻမꩻ ဟဲ့ꩻလိုꩻကျင်ႏလယ်ႏနုတ်မုꩻပညာႏနဝ်ꩻသွူ။ ပွိုးနဝ်ꩻမꩻ အင်္ဂ္ဂုတ္တိုရ်ႏကျမ်ꩻကို ကပါသော့ꩻဒါႏငဝ်းယို နီကဒေါ့ꩻဒါႏငဝ်းနဝ်ꩻ - (၁) သေအခိန်ႏခါႏ။ (၂) ဒေါ့ꩻငဝ်းမွေးငွါမဲဉ်ႏ။ (၃) ဒေါ့ꩻငဝ်းပနဲဉ်ႏနုညံꩻ။ (၄) ငဝ်းဒုစရဲက်တရာꩻကင်ꩻ အင်္ဂါႏအဝ်ႏယိုလစ်ꩻစွိုးသွူ။ နဝ်ꩻထွူတကာႏတဝ်း ပညာႏသျိစခါ ကဒေါ့ꩻသေꩻခါꩻဒါႏငဝ်းနဝ်ꩻလဲ့ ဒေါ့ꩻသေꩻခါငဝ်းလစ်ꩻစွိုးနေနေသွူ။ ငဝ်းလစ်ꩻစွိုးကရိုꩻနဝ်ꩻ - (၁) ငဝ်းဟဝ်၊ (၂) ငဝ်းရက်၊ (၃) ငဝ်းမဲဉ်ႏ၊ (၄) ငဝ်းကစပ်ဆွိုင်ꩻတွမ်ႏတရာꩻဖုံႏနဝ်ꩻသွူ။

ဒေါ့ꩻငဝ်းအပုံႏအနယ်ꩻ

လိုꩻတဖြာꩻ ကအီႏထင်ႏဒေါ့ꩻငဝ်း စင်ႏ'ခြေင်ႏလောင်းယို သဲစ်ကတွိုႏစင်ႏ'ခြေင်ႏလောင်းတဲင် ဒေါ့ꩻသင်ႏထာꩻ ခြဝ်သန်ဒါႏငဝ်းမျိုꩻနဝ်ꩻ ဟဲ့ꩻနွောင်ꩻတဝ်း လိုꩻဒေါ့ꩻထာꩻဒါႏနဝ်ꩻသွူ။ ဖေႏနေးကထွာနွောင်ꩻတရာꩻဟော်ꩻသားတဖြာꩻနဝ်ꩻ -(၁) ဒေါ့ꩻငဝ်းတွင်ꩻယို သꩻသွိုꩻသွိုꩻသွင်ႏသွင်ႏဗာႏ။ (၂) ဗဟုသုတလွိုင်ႏကွုန်ꩻအာဗာႏ။ (၃) ဒေါ့ꩻငဝ်းဖေႏကဖြွောင်ႏဖြီႏဗာႏ။ (၄) အခိန်ႏဖေႏကလို့ဆေ့ꩻဗာႏ။ (၅) ဒေါ့ꩻငဝ်းယို အနမ်းဖေႏကအဝ်ႏနဝ်ꩻ ထုမ်ႏတွမ်ရီး ယူႏရီးဗာႏအချက်အလျက်။ (၆) နမ်းအုံပုံႏအုံနယ်ꩻ အလွိုးအငုဲင်ꩻယိုလဲ့ ချင်းအွဉ်ႏဗာႏ။ ကအွဉ်ႏဗာႏအလွိုးအငုဲင်ꩻယိုနဝ်ꩻ - (က) ဖေႏနေးကစဲင်းနဲင်း အဓိပ္ပါယ်ႏအခရာႏ။ (ခ) သဘော်ꩻဖေႏကဗွောင်။ (ဂ) ငဝ်းအထီ ဖေႏနေးကထွူႏတဲင် အွဉ်ႏဗာႏနဝ်ꩻသွူ။

ဒေါ့ꩻငဝ်းယို အွဉ်ႏဗာႏတွမ်ႏအင်းရွယ်ႏချက်

ပရိသတ်အမျာꩻသီး သꩻဖေႏကဝင်ႏစာꩻလွဉ်နီငဝ်းနဝ်ꩻ နီကအီႏဒေါ့ꩻဟော်ꩻလွေꩻဒါႏငဝ်းယို အွဉ်ႏတွမ်ႏအင်းရွယ်ႏချက်တွော့ꩻ ပရိသတ်အမျာꩻသီးနဝ်ꩻ - ၁။ နာႏဗာႏနီငဝ်းတဲင် ယံဖေႏနေးဝင်ꩻသꩻကပျောႏ။ ၂။ နီငဝ်းယို ယံဖေႏနေး ဝင်ꩻမတ်သေꩻခါꩻကလꩻ။ ၃။ တရာꩻနာႏ ပရိသတ်သီး ဖေႏနေးကလꩻအီ ဗဟုသုတ။ ၄။ တရာꩻနာႏ ပရိသတ်သီး သဘော်ꩻဖေႏနေးကဗွောင်။ ၅။ ဟွုန်ဗာနီငဝ်းတဲင် တရာꩻနာႏပရိသတ်ဖုံႏ ယံဖေႏနေးကထွာလွဉ် နီအာႏရဲင်ꩻနဝ်ꩻ ထွားချင်းဒေါ့ꩻဗာႏနဝ်ꩻသွူ။

မဉ်ႏအွဉ်ႏနယ်ဗာႏ ဥပမာႏနဝ်ꩻ - (၁) လိုꩻကပျက်တယွို့ဒါႏထာꩻ လိုꩻပျောႏသွင်ႏတဖြာꩻနဝ်ꩻ နေးတွမ်ႏနမ်းပရိယာယ်ႏဉာဏ်ႏတဲင် ကပျက်တယွို့လွဉ်ဒါႏထာꩻယို အမျာꩻပရိသတ်သီးဖုံႏလဲ့ သꩻပျောႏသွင်ႏလွဉ်ဗာႏနဝ်ꩻသွူ။ (၂) လိုꩻတဖြာꩻနဝ်ꩻ ဝွေꩻကကျင်ႏဒါႏ ရာႏဇဝင်ႏသမဲင်ꩻ တစွိုးစွိုးယို မဉ်ႏဒေါ့ꩻဟော်ꩻခြုဲင်းနယ်ဖေႏ ကမ္ဘာႏရာႏဇဝင်ႏသမဲင်ꩻတရိုꩻတဝ်း၊ ခမ်းတခမ်းရာႏဇဝင်ႏသမဲင်ꩻတရိုꩻတဝ်း ငဝ်းစားယိုနဝ်ꩻ ထွာအီလိုꩻအမျာꩻသီး သေအီနွောင်ꩻ မတ်တောင်ꩻအီခရာႏဖုံႏနဝ်ꩻသွူ။ (၃) ပုဂ္ဂိုလ်ႏကကျင်ႏလယ်ႏဒါႏ သိပ္ပံပညာႏတရိုꩻတဝ်း၊ လောကုတ္တရာႏပညာႏတရိုꩻတဝ်း ဝွေꩻကကျင်ႏလယ်ႏဒါႏအမျိုꩻ မဉ်ႏဒေါ့ꩻခြုဲင်းနယ်ဖေႏဗာႏ ပရိသတ်အမျာꩻနဝ်ꩻ အမျာꩻကသေထွိုက်သေသင်ꩻဒါႏ ခွုမ်မာꩻဒေါ့ꩻဖြဝ်ႏ အုံအဝ်ႏပုံႏဖုံႏတဲင် ထွာအီအမျာꩻ ဗဟုသုတနဝ်ꩻသွူ။ (၄) ပအိုဝ်ႏလိတ်လုဲင်ꩻစွစ်ꩻလီတာႏ အစွိုꩻနွို့တဖြာꩻနဝ်ꩻ ပွိုင်းဝွို့တွမ်ႏ လိတ်ပအိုႏကိစ္စဖုံႏယို ဝွေꩻမဉ်ႏဒေါ့ꩻခြုဲင်းနယ်ဒါႏ "အင်းရွယ်ႏချက် ထာꩻမာꩻတဖူꩻရဲဉ်ႏအစွိုꩻဥပဒေႏ"တဲပ်တဲပ်နဲပ်နဲပ် အခရာႏဖုံႏယို ဝွေꩻနဝ်ꩻတဖြာꩻ သဘော်ꩻဗွောင်လွဉ်ဗာႏနဝ်ꩻသွူ။ (၅) ပအိုဝ်ႏလိတ်လုဲင်ꩻစွစ်ꩻလီတာႏ စီꩻကန်ꩻဥပဒေႏတရိုꩻတဝ်း၊ မဉ်ႏဒါႏလွဉ်နီလိတ်ယို လꩻလွဉ်အီအကျိုꩻနုဲင်းမုဲင်ꩻ၊ နီလိတ်ယို အရေꩻတန်တတွာမုဲင်ꩻ စစွဉ်ႏစားယိုဖုံႏ မဉ်ႏသေစဲင်းဗာႏ အခရာႏတဲင် ဝွေꩻမဉ်နွို့လွဉ်သော့ꩻသွူအစွိုꩻကိုတကာႏတဝ်း ထာꩻမာꩻလဲ့ ဝွေꩻမာꩻလွဉ်ဗာႏအမဲဉ်ႏနဝ်ꩻသွူ။ ပွိုးနဝ်ꩻမꩻ ယံဖေႏနေးဝင်ꩻထာꩻသေတရာꩻ ကအဝ်ႏလွဉ်၊ ယံဖေႏနေးဝင်ꩻသꩻကဝင်ႏစာꩻလွဉ် နီထာꩻမာꩻနဝ်ꩻ ဒေါ့ꩻဟော်ꩻခရာႏဖုံႏယို အရေꩻတန်ငါႏနဝ်ꩻသွူ။

ဒေါ့ꩻဟော်ꩻခရာႏ ကလိုႏအပ်ဒါႏအချက်ဖုံႏ

ပုဂ္ဂိုလ်ႏအပါꩻ/ဖြာꩻမုဲင်ꩻတရိုꩻတဝ်း ထင်ႏထွူစင်ႏခြေင်ႏလောင်းတဲင် ပွိုးစွဉ်ႏပရိသတ်စွူႏတွော့ꩻ သꩻတွမ်ႏခင်ႏလေင်း ကွဲးတနွော့ꩻဒါႏ၊ ထာꩻငမ်းလဲ့ ကွဲးပေါႏလွဉ်ဒါႏနဝ်ꩻသွူ။ ပရိသတ်သီးအခြာ ထာꩻငမ်းဖေႏကအဝ်ႏဗာႏမွုန်းတဝ်းနဝ်ꩻ ထုမ်ႏအံႏနေးတသီႏနဝ်ꩻ တမော့ꩻနွောင်ꩻတဝ်းဒျာႏရင်ꩻသွူ။ ကွဲးဒေါ့ꩻဟော်ꩻဗာႏအာအာလွဉ်မဲ့ꩻ သꩻတနွော့ꩻတွမ်ႏထာꩻငမ်းဖုံႏယို ထိုꩻမားလွဉ်ဒျာႏသွူ။ တရာꩻဟော်ꩻပုဂ္ဂိုလ်ႏသားတဖြာꩻ/ပါꩻယို ဖြောင်းဖြေꩻမဉ်ႏထွူႏနဝ်ꩻလဲ့ တဟဝ်တဝ်း၊ ဖြောင်းဖြေꩻကထွူႏဒါႏပုဂ္ဂိုလ်ႏနဝ်ꩻ တရာꩻဟော်ꩻသားတွမ်ႏရိုꩻမွုန်း လိုꩻသာမညတဖြာꩻ/ပါႏဖြောင်းဖြေꩻထွူႏတဲင် ကဒေါ့ꩻဒါႏငဝ်းနဝ်ꩻ ကောမဉ်နာႏသားလဲ့ အဲဉ်ထဝ်းနဝ်ꩻသွူ။

မိဉ်ႏမဲဉ်ထွာမွေး တရာꩻဟော်ꩻသားတဖြာꩻ/ပါꩻနဝ်ꩻ

သွဉ်ဒေါ့ꩻမွိုင်မွိုင်ကျင်ꩻသွော့ငဝ်း၊ ဖေႏနေးကမွိုင်ကျင်ꩻနဝ်ꩻ လိတ်အုပ်လိတ်စောင်ႏ အမျိုꩻမုဲင်ꩻတရိုꩻတဝ်း သွဉ်ဖတ်မွိုင်မွိုင်၊ သွဉ်ဟော်ꩻသန်သန်ဗာႏနဝ်ꩻသွူ။ နဝ်ꩻထွူတကာႏတဝ်း တရာꩻဟော်ꩻသားပုဂ္ဂိုလ်ႏတဖြာꩻ/ပါꩻယို ငဝ်းယို အရေꩻတန်နေနေသွူ။ အရေꩻတန်နုဲင်းမုဲင်ꩻဟောင်းတဲင် နီငဝ်းယို ကျောင်ꩻ၊ တရွပ်၊ လမ်းကို အထွောင်းမုဲင်ꩻလဲ့မရိုꩻ နီကဒေါ့ꩻဟော်ꩻဒါႏငဝ်းယို ဖေႏနေးပရိသတ်အမျာꩻသီး ကဟွုန်လို့ဗာႏနီငဝ်းနဝ်ꩻ ဒေါ့ꩻသန်သန်ဗာႏ၊ ဒေါ့ꩻဗွီႏငဝ်းနဝ်ꩻ ပရိသတ်သီး လွꩻထိုꩻဒါႏ၊ ပွိုးနဝ်ꩻမꩻ နီကဒေါ့ꩻငဝ်းယို ဗွီႏတခါႏ သန်တခါႏနဝ်ꩻလဲ့ တဟဝ်တဝ်း၊ ငဝ်းအလွေꩻအသဲင်ꩻယို တယ်ႏအထျꩻဗꩻအနာ အွဉ်ႏမဲဉ်ႏမဲဉ်ႏ၊ ညီႏညီႏလွေꩻဗာႏငဝ်းနဝ်ꩻသွူ။ ဒေါ့ꩻသန်တွိုင်ꩻလဲ့ ထွူတဝ်းဒွိုန်း၊ ငဝ်းတငွါတွမ်ႏတငွါယိုလဲ့သင်၊ နီငဝ်းအခရာႏယိုလဲ့သင် ဖေႏနေးအခရာႏကစဲင်းစဲင်း၊ ဖေႏနေးအခရာႏ ကဖြွောင်ႏဖြီႏလွေꩻနဝ်ꩻ အဝ်ႏလိုႏနေဒွိုန်းနဝ်ꩻသွူ။ တရာꩻဟော်ꩻပွယ်ꩻကိုတရိုꩻတဝ်း၊ ဒေါ့ꩻခေးဝင်ꩻငဝ်းကိုတရိုꩻတဝ်း ခါးလားနီကဒေါ့ꩻငဝ်းအခါႏ ခွမ်ꩻလာꩻ အကွဉ်အကꩻ (သင်္ကန်ꩻ)ယို ဖျင်ဟဝ်ရီးရီးဗာႏသွူ။ တွိုႏထင်ႏသွူ ပရိသတ်ဆꩻငါမꩻ ကွဲးဖျင်နဝ်ꩻ ထွားတရေꩻတဝ်းနဝ်ꩻသွူ။ နီကအီႏဒေါ့ꩻဟော်ꩻဒါႏထာꩻယို ဒေါ့ꩻဟော်ꩻမုဲင်ꩻကိုတရိုꩻတဝ်း - ၁။ ငဝ်းတယ်ႏအွဉ် (ပဏာမ)၊ ၂။ ဒေါ့ꩻနယ်လွေꩻရီး ကအီႏဒေါ့ꩻဟော်ꩻလွေꩻအချက်၊ ၃။ ဒေါ့ꩻခြုဲင်းနယ်လွေꩻဖေႏ ငဝ်းယာႏ၊ ၄။ ဖေႏပညာႏတချက်စီႏ၊ လိုႏဆောင်ႏ လိုႏသျောင်ႏကိစ္စ၊ ၅။ အွဉ်ႏထွူ ငဝ်းသွတ်ꩻသဝ်ꩻ (နိဂုံး)ယိုငတ်ꩻချက်နဝ်ꩻ အရေꩻတန် ထွာအထျꩻနဝ်ꩻသွူ။

တရာꩻဟော်ꩻပုဂ္ဂိုလ်ႏတဖြာꩻ အွဉ်ႏသတိꩻဗာႏအချက်

တရာꩻဟော်ꩻပုဂ္ဂိုလ်ႏသားနဝ်ꩻ ကအီႏဒေါ့ꩻဒါႏငဝ်းယို -

(၁) အမျာꩻအကျိုꩻလဲ့ ဖေႏကထွာဗာႏ၊

(၂) အမာႏလဲ့ ဖေႏနေးကဆေ့ꩻဗာႏ၊

(၃) ဝင်ꩻနာႏလဲ့ ဖေႏကဟဝ်ဗာႏ။

ပွိုးနဝ်ꩻမꩻ အချက်ဆꩻလယို အွဉ်ႏသတိꩻလွသွော့ဝင်ꩻဖုံႏ - ၁။ ဖျင်ဆင်မုꩻ မာꩻသေꩻခါꩻတဝ်း၊ မဉ်ႏတမွေးတဝ်းလဲ့ ဖျင်ဆင်မုꩻယံတဝ်း၊ ၂။ ဒေါ့ꩻထာꩻအင်းရွယ်ႏချက်ပါတဝ်း၊ ၃။ တကျင်ႏတဝ်းလဲ့ ဒေါ့ꩻနွိုင်ႏထာꩻ၊ ၄။ အံႏသွင်ꩻတဝ်းပရိသတ်၊ ၅။ ဒေါ့ꩻငဝ်းယို မဲဉ်ႏတနꩻတဝ်း တွမ်ပရိသတ်သီးနား၊ ၆။ ထွားလွိုသွူ ပရိသတ်သီး ကမော့ꩻတလူႏဒါႏ အယပ်ꩻအခုဲင်ႏ၊ ၇။ ဒေါ့ꩻလွꩻလေႏထာꩻ၊ ၈။ ဒေါ့ꩻဖြွောင်ႏဖြီႏတဝ်းငဝ်း၊ ၉။ ပရိသတ်အမျာꩻသီး သꩻကလွꩻအီဒါႏအချက်ဖုံႏ၊ ၁၀။ ပရိသတ်တကျွိုက်တဝ်းငဝ်းမျိုꩻ၊ ၁၁။ အွဉ်ႏတဝ်း သꩻတဖူႏဝေးရင်ꩻ၊ ၁၂။ ဒေါ့ꩻတန်လွဉ်ꩻငဝ်း၊ ၁၃။ သꩻဓာတ်ကထဲ့ဖွိုႏအီဒါႏငဝ်းမျိုꩻ၊ ၁၄။ နမ်းအကျောင်ꩻခရာႏ ပါအာလွဉ်ꩻငါႏ၊ ၁၅။ အမျာꩻတမာꩻလွဉ်ꩻနွောင်ꩻတဝ်း ထာꩻမာꩻအယပ်ꩻအခုဲင်ႏမျိုꩻ၊ ၁၆။ ဒေါ့ꩻပနဲဉ်ႏသွူငဝ်းတဲင် ဒေါ့ꩻသꩻပေႏထာꩻ၊ ၁၇။ အခင်ႏလမ်းမွေးတဝ်းကို အွဉ်ႏအွုမ်ႏလောင်ႏလွိုး၊ ၁၈။ ဝင်ꩻတွမ်ႏရိုꩻမွုန်း နမ်းလဲ့တမာꩻနွောင်ꩻတဝ်းအကို ဟဝ်နမ်းတာႏတွော့ꩻ ထွဉ်ႏဝင်ꩻမာꩻနွိုင်ႏ၊ ၁၉။ ဟော်ꩻတရာꩻတွင်ꩻ အွဉ်ႏစွူတဝ်းစူ (ခွုမ်ပဆိုးချာငါထာꩻ)၊ ၂၀။ နာႏတဟဝ်တဝ်း ငဝ်းဝွေႏဝက်မျိုꩻဖုံႏနဝ်ꩻသွူ။

တရာꩻဟော်ꩻပုဂ္ဂိုလ်ႏကျင်ꩻဝွတ်

(၁) ဟော်ꩻတရာꩻခိန်ႏအီႏတွိုႏလွဉ်တဲင် ခါးလားကထင်ႏခြေင်ႏလောင်း အုံထွိုင်ႏအခါႏ ခွမ်လာꩻအကွဉ်အကꩻယို ဖျင်ဟဝ်ရီးဗာႏ၊ မဉ်ႏတွိုႏပရိသတ်ဆငါမꩻ ကွဲဖျင်နဝ်ꩻ ရွိုင်ꩻစွိုင်ꩻငါႏသွူ။ (၂) အွဉ်ႏဗန်ဗန်လောင်ႏလွိုးတဲင် ယွုမ်းအံႏအာႏကွိုꩻထွူနမ်းတွော့ꩻ အုံထွိုင်ႏတနွောင်းနွောင်းသွော့။ (၃) သဲစ်ကတွိုႏထင်ႏခြေင်ႏလောင်းတြင် သဲစ်ကတွိုႏလဲ့ ဒေါ့ꩻထွူမွုန်းငဝ်း၊ ထွားခတ်ကယ်ꩻထွူ ပရိသတ်မꩻ ကွဲဟော်ꩻလွေꩻသွော့။ (၄) တယ်ႏစနီကဒေါ့ꩻငဝ်း ဗꩻတွိုႏစွဉ်ႏအထွူနဝ်ꩻလဲ့ ထွားပရိသတ်လွိုးတဲင် ဟော်ꩻလွေꩻသွော့၊ (ထွားတနွောင်း ထွားတရုတ်ꩻ ဆိမ်ꩻမဲ့နဝ်ꩻ ဟဝ်တဝ်း)။ (၅) ခါးလားကစငဝ်း ခမ်ႏနွမ်ꩻရီး ပရိသတ်နဝ်ꩻမဉ်ႏထွူမꩻ ဒေါ့ꩻသွော့ငဝ်းစွုမ်းသွိုꩻ (ငဝ်းစွော့ꩻတက်)။ (၆) သဲစ်ကဒေါ့ꩻငဝ်းလဲ့ ဒေါ့ꩻဆွော့ꩻဆွော့ꩻ (ဒေါ့ꩻပနဲဉ်ႏလွဉ်ꩻငါႏမွုန်းထာꩻ)။ (၇) ဒေါ့ꩻဟော်ꩻ အချက်တစွိုးမဉ်ႏထွူနဝ်ꩻ ပြောင်ꩻလုဲင်ႏပါသွော့ လောင်ႏလွိုးတွမ်ႏနမ်းအုံအဝ်ႏမုꩻ (အမူအရာ) မဉ်ႏအုံစွူစွူလွဉ်ꩻငါႏလဲ့ ပရိသတ်သꩻလွꩻဒါႏ။ (၈) နီကလိုႏဒေါ့ꩻငဝ်း မဉ်ႏသွတ်ꩻထွူတဲင် ဒေါ့ꩻသွုပ်ချာယင်းသွော့ နီကဒေါ့ꩻဒါႏ အချက်အလျက်ဖုံႏတွော့ꩻ ဒေါ့ꩻပါထဲင်းယင်း ငဝ်းစွုမ်းသွိုꩻတဲင် အွဉ်ႏသွတ်ꩻသွော့။

သျောင်ႏထဲင်းသွော့ယို

၁။ ဒေါ့ꩻဟော်ꩻတရာꩻအယံတွင်ꩻ ထောက်မာႏမာႏမွုန်း ငင်းဒေင် (ရွိုင်ꩻငါႏ) ၂။ ပိုႏမွုန်းတဝ်းစူ (ထွားတရေꩻတဝ်း) ၃။ ဟော်ꩻတရာꩻတွင်ꩻနဝ်ꩻ အွဉ်ႏတလွုန်းမွုန်းတဝ်းကီႏ (ခင်ႏ) ပီဗွိုန်ငါႏလိုꩻကျွား ၄။ ဝီသန်ငါႏမွုန်းတဝ်းနမ်း (ကျမ်ꩻထမ်ꩻ ရွိုင်ꩻစွိုင်ꩻငါႏ) ၅။ ဟော်ꩻတရာꩻတွင်ꩻနဝ်ꩻ ငသင်ႏမွုန်းတဝ်းထာꩻ (ပရိသတ်အံႏသွင်ꩻတဝ်းလိုꩻ) ၆။ ဟော်ꩻတရာꩻတွင်ꩻနဝ်ꩻ "နီယို ထာꩻဒေါ့ꩻလဲ့ သမ်းတဒါႏတဝ်း၊ ဝင်ꩻသမ်းထွဉ်ႏနွိုင်ႏတဲင် နွောင်ꩻတဝ်းဝင်ꩻတွော့ꩻ လွေꩻဗာႏ မာꩻဗာႏ"ငဝ်းစားယိုနဝ်ꩻ ဒေါ့ꩻမွုန်းတဝ်းလာꩻလာꩻ (ငဝ်းယိုနဝ်ꩻ ဗွိုန်ပီစွဉ်ႏ လိုꩻတန်ဆꩻကီသား နုဲင်းစွဉ်ႏမေတ္တာႏ ကရုဏာႏအဲဉ်ထဝ်းနဝ်ꩻသွူ။)

မာꩻဒျာႏ ဒေါ့ꩻဒျာႏသွော့နုဲင်းယို

၁။ အုံလင်ꩻတပန်းနေး၊ မဉ်ႏတမွေးတဝ်း အုံတဲင်ဒင်ႏနေး ပလ္လင်ႏလောင်း (ယိုနဝ်ꩻ လိုꩻကျောင်ꩻတာႏ)၊ လိုꩻလမ်းတာႏနဝ်ꩻ အုံထွိုင်ႏနေးသွော့ ၂။ မဉ်ႏအုံထွိုင်ႏနေးလဲ့ စူအွဉ်ႏဒျာႏသွော့ ဆငါဖဲ့ꩻ၊ မဉ်ႏတမွေးတဝ်းနဝ်ꩻ စူယိုဖွို့ꩻငါ ထောက်ငါဒျာႏသွော့ခုံႏ ၃။ ဟော်ꩻတရာꩻနဝ်ꩻ ဒေါ့ꩻမဉ်ႏတဒါႏတဝ်း၊ မဉ်ႏတမော့ꩻဖိုတဝ်း၊ မဉ်ႏတဟော်ꩻတဝ်းတဲင် တာႏဝွန်ႏမဉ်ႏတွိုႏလွဉ်နဝ်ꩻ ထာꩻမာꩻယို ထွာနီထာꩻမာꩻတဲင် တာႏဝွန်ႏအလꩻတွော့ꩻ ဒေါ့ꩻဗာႏ၊ လွေꩻဗာႏ၊ ထွိုင်ႏမာꩻဗာႏနုဲင်းနဝ်ꩻ။