နမ်းပဲင်ႏအုပ်ချုပ်
"နမ်းပဲင်ႏအုပ်ချုပ်ခွင်ꩻလꩻဒေႏသ ဒုံဆောင်ႏလွိုင်ႏကွိုန်ꩻရေꩻအတာႏ နဲင်ႏငံႏတောႏအစိုႏရ ချꩻလင်ꩻဖေႏရွဉ်တောင်ႏတာႏ ရွဉ်ဗီႏ(၁၀)ဘီလီယံလွို" ၂၀၁၃/၂၀၁၄-ရွဉ်ဘဏ္ဍာႏနေင်ႏအကို နမ်းပဲင်ႏအုပ်ချုပ်ခွင်ꩻလꩻဒေႏသ(၆)ထွောင်းတွက်တာႏ ကအီႏမာꩻလွေꩻဖေႏ ဒုံဆောင်ႏလွိုင်ႏကွိုန်ꩻရေꩻကိစ္စအတွက် နဲင်ႏငံႏတောႏအစိုႏရ ချꩻလင်ꩻဖေႏရွဉ်တောင်ႏတာႏ ရွဉ်ဗီႏ(၁၀)ဘီလီယံလွိုအကျောင်ꩻ လွူးမွီႏရေꩻ၊ ထီထာꩻမာꩻတွမ်ႏဒုံဆောင်ႏလွိုင်ႏကွိုန်ꩻရေꩻ(မွေးမြူရေး၊ ရေလုပ်ငန်းနှင့် ကျေးလက်ဖွံ့ဖြိုးရေးဝန်ကြီးဌာန ညွှန်ကြားရေးမှူး)အတန်အကဲႏ ဦးအောင်ဇံထွေး ဒေါ့ꩻလွေꩻဖေႏနေးနောဝ်ꩻသွူ။ ရွဉ်(၁၀)ဘီလီယံယိုနောဝ်ꩻ ကအီႏသွုံꩻလွေꩻတခမ်းလွုမ်း ဒုံဆောင်ႏလွိုင်ႏကွိုန်ꩻရေꩻအတာႏ ရွဉ်ဘဏ္ဍာႏဗီႏပေါင်ꩻ(၇၅)ဘီလီလံလွို(၇)ပွန်း (၁)ပွန်းအကျောင်ꩻ ဝွန်ႏတန်ဌာနနောဝ်ꩻတဗာႏ လိတ်ထေထန်ႏချက်အလꩻ သေထွꩻဗာႏသွူ။ ဖြောဝ်ꩻခမ်းကို ကအောဝ်ႏဒါႏ ပအိုဝ်ႏနမ်းပဲင်ႏအုပ်ချုပ်ခွင်ꩻဒေႏသ၊ တအင်း(ပလောင်)နမ်းပဲင်ႏအုပ်ချုပ်ခွင်ꩻဒေႏသ၊ ဓနုနမ်းပဲင်ႏအုပ်ချုပ်ခွင်ꩻလꩻဒေႏသ၊ ကိုးကန့်နမ်းပဲင်ႏအုပ်ချုပ်ခွင်ꩻလꩻဒေႏသ၊ ဝနမ်းပဲင်ႏအုပ်ချွုတ်ခွင်ꩻလꩻတွိုင်ႏဒေႏသ၊ စစ်ကိုင်းတွိုင်ႏဒေႏသတန်ကို ကအဝ်ႏဒါႏ နာဂနမ်းပဲင်ႏအုပ်ချွုတ်ခွင်ꩻလꩻဒေႏသဖုံႏအတွက် ကအီႏမာꩻလွေꩻဖေႏအီ တဖူꩻ၊ တထာ၊ ထီ၊ မေႏ၊ လမ်းပါႏတဲႏဆို့ꩻရေꩻတွမ်ႏ လွူးအီနမ်း အဆင်ႏဖေႏကပြေႏနောဝ်ꩻ အီႏသွုံꩻလွေꩻဖေႏ ရွဉ်ဗီႏပေါင်ꩻ(၁၀)ဘီလီယံအကျောင်ꩻ ဦးအောင်ဇံထွေး ဒေါ့ꩻလွေꩻနေးနောဝ်ꩻသွူ။ ခမ်းထီတဖြုံႏလွုမ်း ကအီႏသွုံꩻလွေꩻဒါႏ ဒုံဆောင်ႏလွိုင်ႏကွိုန်ꩻရေꩻ အသွုံꩻစရိပ် စုစုခြွဉ်း ၂၃-ရျာꩻခေါင်ꩻနောဝ်ꩻ ဖြောဝ်ꩻခမ်းကို ကအောဝ်ႏဒါႏ နမ်းပဲင်ႏအုပ်ချုပ်ခွင်ꩻလꩻဒေႏသ(၅)ထွောင်းနောဝ်ꩻ လꩻအာလဲဉ်းဝင်ꩻ၊ ဒုံဆောင်ႏလွိုင်ႏကွိုန်ꩻရေꩻ အသွုံꩻတရိပ် စုစုခြွဉ်း ၄-ဒသမ ၇-ရျာꩻခေါင်ꩻလွိုနောဝ်ꩻ စောက်ꩻတနျာႏ (ကရင်နီ)ခမ်းနယ်ႏ လꩻလွေꩻကရိုꩻနဝ်ꩻ ဝွန်ႏတန်ဌာႏနကို ဒေါ့ꩻခွင်ꩻအဝ်ႏသား ဒေါ့ꩻထန်ႏချက်အလꩻ သေထွꩻဗာႏနောဝ်ꩻသွူ။ ပဋိပက္ခကထွာဒါႏ ရခဲင်ႏခမ်းနယ်ႏအတာႏ ကအီႏမာꩻလွေꩻဖေႏဒါႏ ဒုံဆောင်ႏလွိုင်ႏကွိုန်ꩻရေꩻ ရွဉ်တောင်ႏတာႏနောဝ်ꩻ ရွဉ်ဗီႏပေါင်ꩻ(၄)ဘီလီယံလွိုတဲင် တွိုင်ႏဒေႏသတန်တွမ်ႏ ခမ်းနယ်ႏစုစုခြွဉ်း (၁၄)ထွောင်းတွမ်ႏ နမ်းပဲင်ႏအုပ်ချုပ်ခွင်ꩻလꩻဒေႏသဖုံႏအတွက် ဒုံဆောင်ႏလွိုင်ႏကွိုန်ꩻရေꩻအတာႏ ကအီႏသွုံꩻလွေꩻဒါႏရွဉ်နောဝ်ꩻ ဗီႏပေါင်ꩻ(၇၅၀၁၅)သန်းအကျောင်ꩻ ဝွန်ႏတန်ဌာႏန လိတ်ထေထန်ႏချက်အလꩻ သေထွꩻဗာႏနောဝ်ꩻသွူ။ [၁] [၂]