နီသꩻရာႏခါႏ

အဝ်ႏ ဝီခီပီးဒီးယား ကို

"နီသꩻရာႏခါႏ မဲတဗာႏ" ကအီႏမာꩻလွေꩻဒါႏ ပွယ်ꩻလွိုက်ရွေꩻ "မဲ"မွူးနီꩻနောဝ်ꩻ အောဝ်ႏကုဲင်အနီꩻပဲင်ꩻလွုမ်ꩻ၊ တညငါႏတောဝ်းဒွုမ် အခိန်ႏကို နီကအီႏလွိုက် နီကအီႏဒင်ႏကီဒါႏ နီလိုꩻတန်အခွင်ꩻအရေꩻနောဝ်ꩻ အောဝ်ႏသော့ꩻဒျာႏ ခမ်းသားသီးစူကိုနောဝ်ꩻသွူ။ နီကအီႏလွိုက် နီကအီႏဖေႏဒါႏမဲနောဝ်ꩻ အီႏထွာလွဉ်နီလိုꩻတန်တဲင် လွိုက်ရွေꩻဒါႏဒါႏ ထောင်ထွားသေႏသေႏချာႏချာႏထွူမꩻ မဉ်ႏဖေႏနောဝ်ꩻ နီအတာႏ အကျိုꩻအီႏအောဝ်ႏအာနောဝ်ꩻသွူ။ ယိုခါနောဝ်ꩻ ပါတီအစွိုꩻမုဲင်ꩻတယောဝ်း အခွင်ꩻအရေꩻ အောဝ်ႏနုဲင်းနုဲင်းဝင်ꩻတဲင် ခွေလဲ့လွဉ်သွေꩻ၊ နာꩻလဲ့လွဉ်သွေꩻလွဝင်ꩻနောဝ်ꩻသွူ။ ပါတီယဟန်ႏနောဝ်ꩻ ယံဒျာႏအကျိုꩻဟော်ꩻလွုမ်ꩻတဲ့အောဝ်ႏ၊ ဖေႏကလꩻမဲတဲင် အီႏမာꩻဖေႏခမ်းသားမွိုးနုဲင်းယို ဖေႏကလꩻယိုယိုနောဝ်ꩻနောဝ်ꩻ မဲ့ꩻနီမာꩻဖေႏဒျာႏ ဒေါ့ꩻကီနုဲင်းနောဝ်ꩻလဲ့ အမွေးမွေးထာꩻမာꩻနောဝ်ꩻ သေႏချာႏမုꩻတအောဝ်ႏတောဝ်း၊ ခမ်းသားအကျိုꩻတာႏ မာꩻလဲ့တမာꩻဖိုတောဝ်းစားနောဝ်ꩻဖုံႏနောဝ်ꩻ ခမ်းသားမွိုးဖါသီး အောဝ်ႏလိုႏယူႏခူခူ၊ ထွားဒါႏဒါႏငါႏနောဝ်ꩻသွူ။ နီယိုနောဝ်ꩻ ပအိုဝ်ႏလိုꩻမျိုꩻတဲင် ပအိုဝ်ႏလိုꩻမျိုꩻ လိုႏအပ်ချက်အောဝ်ႏနုဲင်းမုဲင်ꩻ၊ သꩻမဲဉ်ထွာနုဲင်းမုဲင်ꩻကရိုꩻနောဝ်ꩻ ပအိုဝ်ႏလိုꩻမျိာꩻ လိုꩻတန်ချာဒျာႏမꩻ အသေနာႏသွတ်ꩻနောဝ်ꩻသွူ။ အောဝ်ႏလိုႏချက် အောဝ်ႏနုဲင်းမုဲင်ꩻ သေနာႏလွုမ်ꩻစားနောဝ်ꩻလဲ့ တလꩻတောဝ်းဒွိုန်း၊ ယိုခါ ခေတ်အခေႏနေႏအလꩻ မဉ်ႏထွာဒျာႏ နီအမတ်လိုꩻတန် မဉ်ႏနွို့လွေꩻနွောင်ꩻ လွတ်တောႏကိုနုဲင်းနောဝ်ꩻမꩻ မာꩻပဲင်ႏခွင်ꩻထာꩻမာꩻယို အီႏလꩻလွဉ်နောဝ်ꩻသွူ။ "လိုꩻတသဉ် မဲဉ်ဟောဝ်နုဲင်းမုဲင်ꩻဟောဝ် ထွꩻတောဝ်းမွိုးဖါယာႏ"ကရိုꩻဒါႏငေါဝ်းအတွိုင်ꩻ နီယိုအောဝ်ႏလိုႏယွုမ်းကြွို့ꩻကြꩻတောဝ်း လိုꩻတသဉ်ငေါဝ်းနောဝ်ꩻသွူ။ ငတ်ꩻနေင်ႏမꩻတလဲင်ႏ ပွယ်ꩻလွိုက်ရွေꩻအောဝ်ႏတဲင် ငတ်ꩻနေင်ႏအတောႏတွင်ꩻကို ကအီႏထွာဒါႏနီလိုꩻတန်နောတ်ꩻ နေးတွမ်ႏသꩻရက်စွိုးခွိုꩻ အဗွေတဗာႏတွော့ꩻ စဉ်ꩻစာꩻစဲင်းစဲင်းထွူမꩻ မဉ်ႏဖေႏမဲ့နောဝ်ꩻ မာႏတရွို့ꩻဒါႏတောဝ်းနောဝ်ꩻသွူ။ နီပအိုဝ်ႏအခွင်ꩻရေꩻနောဝ်ꩻ အောဝ်ႏသော့ꩻဒျာႏ နီပအိုဝ်ႏစူကို၊ မဉ်ႏယွုမ်ႏအံႏနုဲင်းနောဝ်ꩻလဲ့ အောဝ်ႏလိုႏဖေႏအာႏသော့ꩻချာဒျာႏ နီပအိုဝ်ႏအမုဲင်နဂါꩻနောဝ်ꩻသွူ။ အခိန်ႏယိုနောဝ်ꩻ ဝင်ꩻမဲဉ်လꩻ နီမဲတဲင် ငေါဝ်းအွီႏငွါသာႏ ကလွဉ်သွေꩻ၊ ကလွဉ်ဒေါ့ꩻဖေႏဒါႏနီနောဝ်ꩻ နုဲင်းစွဉ်ႏအီႏထင်ႏဗာႏစွဉ်ႏ နိဗ္ဗာန်ႏချမ်းယောင်ႏယောင်ႏ၊ နာႏတလေ့ꩻမွေးစွဉ်ႏရိုꩻလဲ့ အောဝ်ႏလိုႏယွုမ်းကြွို့ꩻတောဝ်းသွူ။ နုဲင်းမုဲင်ꩻမုဲင်ꩻဝယောဝ်း နီပအိုတွမ်ႏတွမ်ႏ နီပအိုဝ်ႏနမ်းတွမ်ႏနမ်း အခွင်ꩻအရေꩻယို နီဖန်ဆင်ꩻခွင်ꩻဖေႏကအောဝ်ႏချာဒျာႏနောဝ်ꩻ ယွုမ်းအံႏအာႏကွိုꩻဒျာႏသွော့ "နီခွိုꩻ နီလိုꩻမျိုꩻ၊ နီသွီႏ နီယာႏစဲစ်စဲစ်ကထွာဒါႏ မုဲင်တံႏဆိတ် 'နဂါꩻ"မꩻ နီအိုဝ်ႏအတွက်တာႏ ကအီႏဒဲင်ကာခီႏငါသူꩻနောဝ်ꩻ အဆင်ႏပြေႏပြေႏအီႏကာႏတွူႏတရန်လွေꩻနွောင်ꩻနောဝ်ꩻသွူ။ ကအီႏဆွုံꩻဖျတ်အွဉ်ႏထွော့ဖေႏဒါႏ နီပအိုဝ်ႏနမ်းမဲင်ႏအုပ်ချွုတ်ခွင်ꩻလꩻဒေႏသကိုလွုမ်ꩻတကာႏတောတ်း ခမ်းသားမွိုးဖါသီး၊ ကအောဝ်ႏကော့ꩻမောင်ꩻဒါႏ ဖေႏကလꩻပအိုဝ်ႏခမ်းထီကရိုꩻနောဝ်ꩻလဲ အထျꩻအောဝ်ႏဒျာႏ ခမ်းသားမွိုးဖါသီး ထာꩻဆွုံꩻဖျတ်စူမုဲင်အလောင်းနောဝ်ꩻသွူ။ နောဝ်ꩻမꩻ ခမ်းသားမွိုးဖါသီး မဉ်ႏပသာထင်ႏကီ၊ မဉ်ႏအွဉ်ႏထွော့၊ မဉ်ႏဒင်ႏမျောက်ဖေႏမꩻ အီႏထွာနွောင်ꩻ၊ အီႏလꩻနွောင်ꩻမာꩻပဲင်ႏခွင်ꩻနောဝ်ꩻသွူ။ မာꩻပဲင်ႏခွင်ꩻကရိုꩻနောဝ်ꩻ- "ခမ်းတာႏ""နမ်းတာႏ" အောဝ်ႏနီမျိုꩻတဲင် ယိုနောဝ်ꩻ အီႏထွာလွေꩻဒျာႏ "ခမ်းတာႏ"ဖူးဝေးမွိုးဖါသီး အကျိုꩻတရာꩻနောတ်ꩻမꩻ ခမ်းသားမွိုးဖါသီး "သꩻရာႏခါႏ မဲတဗာႏ"နောဝ်ꩻ ထွာအီနွောင်ꩻစွဉ်ႏ ခမ်းထီအကျိုꩻတရာꩻကရိုꩻနောဝ်ꩻ အွဉ်ႏဟွိုန်လွေꩻဗာႏနုဲင်းယိုသွူ။ [၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. အယ်ဒီတာ
  2. မောင်းမွူးခံꩻ အမုဲင်-၃၂