နေင်ႏ၁၃၈၀
နေင်ႏ ၁၃၈၀-ဗာႏ၊ ဝါႏခေါင်ႏလာလောင်း(၈)နီꩻ (၃-၉-၂၀၁၈)၊ မွူးနီꩻ-တနင်ꩻလာႏ ပအိုဝ်ႏစွိုးခွိုꩻအဖဲ့ꩻပေါင်ꩻစွုမ်ႏလွိုင်ႏကွိုန်ꩻသာႏယာႏရေꩻဒဲဉ်သီႏဗွေကွင်ꩻ-ဟော်တန်အကို ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ)တွမ်ႏ ဒေႏသပေါင်ꩻစွုမ်ႏ၊ အစွိုꩻပေါင်ꩻစွုမ်ႏ၊ ဝေင်ꩻနယ်ႏပေါင်ꩻစွုမ်ႏ နေင်ႏခွပ်မော့ꩻခွဲပွယ်ꩻ မတ်တန်ꩻ မွူးနီꩻ- နေင်ႏ၁၃၈၀-ဗာႏ၊ ဝါႏခေါင်ႏလာလောင်း(၈)နီꩻ(၃-၉-၂၀၁၈)၊ မွူးနီꩻ-တနင်္လာႏ။ အခိန်ႏ-တယ်ႏစမွူးရောဝ်ꩻခိုႏ(၁၀း၀၀)နားရီႏ ဗꩻလင်ꩻ မွူးဟာ(၆း၂၀)နားရီႏ။ ခင်ႏလမ်း-ပအိုဝ်ႏစွိုးခွိုꩻအဖဲ့ꩻပေါင်ꩻစွုမ်ႏလွိုင်ႏကွိုန်ꩻသာႏယာႏရေꩻဒဲဉ်သီႏဗွေကွင်ꩻ-ဟော်တန်အကို၊ အခြပ်အရဲဉ်ႏသား- ခွန်တင်အောင်၊ ခွန်စင်ဟန်၊ ဒင်ႏမတ်တန်ꩻသား-ခွန်ဝေးမောင်ႏ၊ ဖစ်ထေ့ပုဂ္ဂိုလ်ႏ-(၁၄၅)ဖြာꩻ၊ ကျွꩻထင်ႏပုဂ္ဂိုလ်ႏ(၁၃၄)ဖြာꩻ။ အခြပ်အရဲဉ်ႏ(ပထမပဲင်ꩻ)၊ ၁။ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ)ဥက္ကဋ္ဌတန် ဖြားတန်ခွန်ဝင်းကို ဒေါ့ꩻလွေꩻဖေႏအဗွောင်ငေါဝ်းငွါနုဲင်းယိုသွူ။ (က) လိတ်လုဲင်ꩻယေန်ႏငဲရေꩻအစွိုꩻယို တယ်ႏလွေꩻဒုံ/ အွိုင်ႏ/ ဝေင်ꩻနယ်ႏဖုံႏနောဝ်ꩻ တိဉ်ႏတိဉ်ႏခွေါင်ခွေါင် ဖေႏကဖွဲ့မွဉ်းဖျင်လွေꩻဖေႏ။ (ခ) ပအိုဝ်ႏလိုꩻအဖြာꩻပေါင်ꩻ(လူဦးရေစစ်တမ်း)ယို နဲင်ႏငံႏတောႏကကွီလွဉ်ဒါႏနောဝ်ꩻ ပအိုဝ်ႏလိုꩻမျိုꩻ အဖြာꩻပေါင်ꩻ အစဲစ်အမဲဉ်ႏ ဖေႏကဒင်ႏသွင်ꩻနွောင်ꩻအီအတာႏ တဲပ်တဲပ်နဲပ်နဲပ် ဖေႏကအောဝ်ႏ ဗွောင်ထွူသွဉ်တန်ꩻတဲင် ယံတွမ်ထူႏလွေꩻဖေႏ။ (ဂ) စွိုးခွိုꩻခြွိုင်းခြိုꩻအွဉ်ႏနယ်တွိုက်ယို ကရေႏမာꩻလွေꩻဒါႏ ပင်တခွါꩻကောင်ရွေꩻကိုနောဝ်ꩻ ယိုခါအခေႏအနေႏအလꩻ အီႏမာꩻလွေꩻချာယင်းဒျာႏ ဒဲဉ်သီႏဗွေကွင်ꩻကိုတဲင် အနမ်းအခြုံဖေႏကပေါႏထန်ႏနွောင်ꩻ ယံလွောင်ႏဗူႏလွေꩻဖေႏ ကောႏမတီႏသွူ။ (ဃ) ကရီးခါ ကရေႏမာꩻလွေꩻဒါႏ ပင်တခွါꩻဒုံကောင်ရွေꩻ ခြွိုင်းခြိုꩻအွဉ်ႏနယ်တွိုက်သူꩻနောဝ်ꩻ ကွီကူႏညီႏလူႏခံႏလွေꩻဗာႏဖို ခမ်းသားအမျာꩻ တလမ်း(၅၀၀)တဲင် လꩻလွေꩻဗာႏဖို(၅၄)သိန်ꩻဒျာႏသွူ။ (င) ဝေင်ꩻနယ်ႏစွုမ်ႏ၊ ဒေႏသစွုမ်ႏ၊ အစွိုꩻပေါင်ꩻစွုမ်ႏ ကမော့ꩻခွဲဗာႏဝင်ꩻ နုဲင်းဟန်ႏသနီꩻယိုနောဝ်ꩻ အခိန်ႏဒွေါင်ႏဒွေါင်ႏအကို ယံဒင်ႏပျꩻဆွေꩻနွေꩻလွေꩻသွော့ဝင်ꩻအကျောင်ꩻ ဒေါ့ꩻလွေꩻအဗွောင်ငေါဝ်းငွါနုဲင်းယိုသွူ။ ၂။ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ)ကောႏမတီႏအစွိုꩻနွို့ သုတေသနမှူး ဖြားခွန်ရာမ ဒေါ့ꩻဒင်ႏပျꩻနယ်လွေꩻနုဲင်းယိုသွူ။ (က) နဲင်ႏငံႏတောႏအစိုႏရနောဝ်ꩻ ပွိုင်းဝွို့တွမ်ႏခမ်းရင်ꩻသားအခွင်ꩻအရေꩻမူအလꩻ ခွိုꩻနွယ်ႏပအိုဝ်ႏ လိတ်လုဲင်ꩻယေန်ႏငဲရေꩻ ကလꩻလွဉ်ဒါႏ ရုဲင်ꩻတသွိုးခွင်ꩻ မာꩻပဲင်ႏခွင်ꩻ မှတ်ပုံတင်ယိုနောဝ်ꩻ ဟွိုန်ဟောဝ်သꩻရေꩻငါႏသွူ။ (ခ) ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ ကအောဝ်ႏရုဲင်ꩻတသွိုးဒါႏ ဝေင်ꩻနယ်ႏဖုံႏနောဝ်ꩻ အထူးဒေသ(၆)ကို (၁၉)ဝေင်ꩻနယ်ႏ ပါတွမ်ႏပဂိုꩻတွိုင်ႏ၊ မဲင်ꩻခမ်း၊ စောက်ꩻတနျာႏခမ်း၊ စောက်ꩻဗွာခမ်းကိုဖုံႏသွူ။ ပအိုဝ်ႏလိတ်လုဲင်ꩻယိုနောဝ်ꩻ ပေါႏထာꩻယိုခါမွေးတောဝ်း၊ နေင်ႏပေါင်ꩻအာလဲဉ်းတဲင် လိတ်ပအိုဝ်ႏယို အောဝ်ႏဒျာႏအိန္ဒိယခမ်း ဗြဟ္မီအက္ခရာႏကို ထွာပေါႏလွဉ်၊ ထွာလွဉ်ပျူ၊ တွိုႏလွဉ်ပေါက္ကံႏသွူ။ ပအိုဝ်ႏယိုနောဝ်ꩻ မွန်ဂိုလွိုက်ခွိုꩻ တိဗက်ပျူနွယ်ႏဒျာႏအကျောင်ꩻ၊ ပျူကရီးခါတဲ့ ငေါဝ်း(၈)ရန်း၊ ပအိုဝ်ႏယိုခါတဲ့ ငေါဝ်းအောဝ်ႏ(၈)ရန်း ပီလို့ဝင်ꩻအကျောင်ꩻတွမ်ႏ (၁၁၆၁) ဂိဟိစာရိတ္တကျမ်ꩻယို ဗွေႏဆရာႏတောႏမွိုင်ꩻပျိုꩻ တဲမ်းသေꩻခါꩻရီးဝင်ꩻအကျောင်ꩻ၊ ပျူလိုꩻမျိုꩻယို ထိုꩻမားလဲဉ်းတဲ့ ပျူလိတ်ကျောက်စာနောဝ်ꩻ တထိုꩻမားတောဝ်း၊ ဗꩻတွိုႏယိုခါ အောဝ်ႏဒျာႏနောဝ်ꩻသွူ။ ပျူလိုꩻမျိုꩻကသွုံꩻဒါႏငေါဝ်းနောဝ်ꩻ ဗွိုန်ပီဒျာႏ နီပအိုဝ်ႏငေါဝ်းသွူ။ ၃။ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ)ရွုမ်ꩻတာႏဝွန်ႏခံႏ ဖြားခွန်ကျောႏခမ်း ဒေါ့ꩻလွေꩻဖေႏငေါဝ်းနုဲင်းယိုသွူ။ (က) နဲင်ႏငံႏတောႏကကွီလွဉ်ဒါႏ ပအိုဝ်ႏလိုꩻအဖြာꩻပေါင်ꩻ(ပအိုဝ်းလူဦးရေစစ်တမ်း)နောဝ်ꩻ ပအိုဝ်ႏလိုꩻအဖြာꩻပေါင်ꩻ အစဲစ်အမဲဉ်ႏဖေႏကလꩻ ဖေႏကသေ အချက်ဗွေဗွေ ဖေႏကလꩻနောဝ်ꩻ အောဝ်ႏလိုႏတွမ်ထူႏသွူ။ (ခ) ကအီႏတွမ်ထူႏလွေꩻဒါႏ လိုꩻအဖြာꩻပေါင်ꩻယို ဖေႏကတဲပ် ဖေႏကသေႏချာႏနောဝ်ꩻ ကောတွမ်ထူႏသားယို အောဝ်ႏလိုႏဗွောင်လွေꩻဖေႏနေးသွဉ်တန်ꩻ တွမ်ထူႏလိုꩻဦးရေစာႏရင်ꩻနယ်ꩻ၊ မိဉ်ႏဗွောင်သွဉ်တန်ꩻနောဝ်ꩻ ဗဟိုႏ/ဝေင်ꩻနယ်ႏ ယံဗွောင်လွေꩻနွောင်ꩻသွဉ်တန်ꩻအကျောင်ꩻ။ (ဂ) မိဉ်ႏတွမ်လိုꩻစာႏရင်ꩻနောဝ်ꩻ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ အီႏတွမ်ထူႏတဲင် ရပ်ရာႏဒေႏသအစွိုꩻအဗူႏဖုံႏတဲ့ ယံစွဲကမ်းကူႏညီႏလွေꩻဖေႏသွော့အကျောင်ꩻ ဒေါ့ꩻဒင်ႏသွင်ꩻလွေꩻနုဲင်းနောဝ်ꩻသွူ။ ၄။ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ) ဗဟိုႏကောႏမတီႏ ထွို့ꩻဗူႏရေꩻကယ်ႏ ဖြားခွန်ပညာႏ ဒေါ့ꩻလွေꩻဖေႏနုဲင်းယိုသွူ။ (က)နီပအိုဝ်ႏဒေႏသကို ယိုမာꩻငါ မိဉ်ႏမာꩻလွေꩻဒါႏ ပွယ်ꩻမော့ꩻခွဲတရိုꩻတောဝ်း၊ သွဉ်လိတ်တရိုꩻတဝ်း ဗွောင်သွဉ်တန်ꩻတရိုꩻတောဝ်းနောဝ်ꩻ ယံခံႏနွမ်ꩻရီးရီးသွော့ အလံႏတောႏတွမ်ႏ ရွစ်လွေꩻရီးရီး စွိုးခွိုꩻငေါဝ်းသချင်ꩻ။ (ခ) ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻဖုံႏနောဝ်ꩻ ဝေင်ꩻနယ်ႏယဖြုံႏဖြုံႏ တယ်ႏစတွမ်ႏအွိုင်ႏဖုံႏယို ရုဲင်ꩻတသွိုးမုꩻ အာႏပေႏငါႏတဲင် အာႏရꩻတောဝ်းငါႏ၊ ပအိုဝ်ႏနမ်းပဲင်ႏအုပ်ချုပ်ခွင်ꩻလꩻ ဝေင်ꩻနယ်ႏဖုံႏနောဝ်ꩻ အရေꩻတန်ငါႏသွူ။ (ဂ) ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ ဝေင်ꩻနယ်ႏပေါင်ꩻစွုမ်ႏဖုံႏယို မွန်ဗန်ရေꩻ ဖေႏကအောဝ်ႏတဲ့နောဝ်ꩻ၊ အနာႏဂတ် ကအီႏခွုမ်မာꩻလွေꩻထာꩻမာꩻယို ဖေႏကယိုꩻတဲ့နောဝ်ꩻ အောဝ်ႏလိုႏဒင်ႏမွဉ်းဖျင်တသာချာယင်း အွိုင်ႏအစွိုꩻ၊ တေင်ꩻနယ်ႏအစွိုꩻဖုံႏသွူ။ (ဃ) မိဉ်ႏဖျင်ချာဒါႏ အွိုင်ႏ/ဝေင်ꩻနယ်ႏဖုံႏနောဝ်ꩻ ဗဟိုႏကဖေႏအပ်လင်ꩻဒါႏမူအတွိုင်ꩻ ယံမွဉ်းဖျင်သွော့ဝင်ꩻ၊ အွိုင်ႏစွိုꩻအကိုနောဝ်ꩻ အွိုင်ႏကိုကအောဝ်ႏအုံဒါႏ ဒုံဖုံႏ ကားကအောဝ်ႏ အွိုင်ႏအစွိုꩻနွို့အကို တဒုံနီဖြာꩻသွံဖြာꩻ ဖေႏကပါသော့ꩻနောဝ်ꩻ သော့ꩻဖေႏဗာႏ၊ မိဉ်ႏဖွဲ့မွဉ်းဖျင်သာ ဝေင်ꩻနယ်ႏနောဝ်ꩻတဲ့ အွိုင်ႏဥက္ကဋ္ဌတွမ်ႏ အွဉ်အကိုရေꩻပုဂ္ဂိုလ်ႏနောဝ်ꩻ ယံသော့ꩻဖေႏဝေင်ꩻနယ်ႏ အစွိုꩻနွို့အကိုသွူ။ (င) ဝေင်ꩻနယ်ႏယဖြုံႏဖြုံႏနောဝ်ꩻ ထီႏထွꩻလွေꩻဗာႏ ဥက္ကဋ္ဌနမ်း ရုဲင်ꩻတသွိုးမုꩻယို အာႏပေႏငါႏတဲင် နမ်းထာꩻမာꩻအာတွော့ꩻ ရုဲင်ꩻတသွိုးနွောင်ꩻတောဝ်းတဲ့ ယံဖေႏအပ်လင်ꩻသွော့ တာႏဝွန်ႏခံႏဆလ ကထွာဒါႏ ဒု-ဥက္ကဋ္ဌ၊ အွဉ်အကိုရေꩻအစွိုꩻဖုံႏတဲင် ဖေႏကရုဲင်ꩻတသွိုးနွောင်ꩻနောဝ်ꩻ ဒု-ဥက္ကဋ္ဌအလောင်းယို ဥက္ကဋ္ဌအနေႏ နွန်ႏအာႏဖေႏလင်ꩻသွော့အကျောင်ꩻ ဒေါ့ꩻဒင်ႏသွင်ꩻလွေꩻဖေႏနုဲင်းနောဝ်ꩻသွူ။ ၅။ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ)အွဉ်အကိုရေꩻချုပ် ဖြားခွန်မောင်မောင်ထွန်း ဒေါ့ꩻလွေꩻဖေႏနုဲင်းယိုသွူ။ (က) ၂၀၁၇/၂၀၁၈ ကထေထန်ႏဒါႏ ပက္ခဒိန်ႏအဖွူꩻပေါင်ꩻဆေ့ꩻအာ၊ စာဗာႏအဖွူꩻပေါင်ꩻဆေ့ꩻအာ၊ ဖေႏလွေꩻဗာႏလက်ဆောင်ႏ အဖွူꩻပေါင်ꩻဆေ့ꩻအာ၊ လꩻရွဉ်/သွုံꩻစွယ်ꩻရွဉ်၊ အောဝ်ႏကုဲင်ရွဉ်ဖုံႏ ဒင်ႏသွင်ꩻလွေꩻနယ်ဖေႏသွူ။ (ခ) ပက္ခဒိန်ႏအလောင်းယို ဖေႏကထွာမွိုန်း ကျောႏညာႏသဘော်ꩻ အင်းရေႏမိုးချက်ယို ထွူႏထွူႏတွုမ်တွုမ်ဖေႏကအောဝ်ႏဗာႏ၊ အမျာꩻတာႏအကျိုꩻ အောဝ်ႏနဲ့ အောဝ်ႏတောဝ်းနဲ့ ထွားဗာႏ၊ ပက္ခဒိန်ႏအလောင်း ရွုတ်/ပွုံႏဖုံႏယို စွုမ်ႏနေင်ႏနေင်ႏ ပြောင်ꩻလုဲင်ႏမုꩻအောဝ်ႏဗာႏအတွိုင်ꩻ ပအိုဝ်ႏဒေႏသကို ကအောဝ်ႏဒါႏ သမဲင်ꩻစေႏတီႏ၊ ကျောင်ꩻဖုံႏစတဲင် အစွိုꩻရုဲင်ꩻတသွိုးမုꩻပွုံႏဖုံႏစားယို ဖေႏကပါသော့ꩻနောဝ်ꩻ အီႏထေလွေꩻချာယင်းဒျာႏအကျောင်ꩻ ဒေါ့ꩻလွေꩻနုဲင်းနောဝ်ꩻသွူ။ အခြပ်အရဲဉ်ႏ(ဒုတိယပဲင်ႏ) ၆။ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ ဝေင်ꩻလွယ်ကောႏ(စောက်ꩻတနျာႏ)ခမ်း ဥက္ကဋ္ဌဖြားခွန်ဟန်ဇော် ဒေါ့ꩻဒင်ႏပျꩻနုဲင်းယိုသွူ။ (က) လွယ်ကောႏ(စောက်ꩻတနျာႏခမ်း) ပအိုဝ်ႏဒုံပေါင်ꩻ(၆၀)၊ လိုꩻအဖြာꩻပေါင်ꩻ(၁၃၀၀၀)လွို၊ ကျောင်ꩻပေ့ꩻခိန်ႏ ဗွောင်လိတ်ပအိုဝ်ႏသွဉ်တန်ꩻနောဝ်ꩻ လိတ်သွဉ်ဆရာႏလွုမ်းကွံႏတဝ်း၊ သွဉ်ဗာႏစွုမ်ႏတဝ်း၊ ဟန်ႏနေင်ႏသွဉ်လိတ်ပအိုဝ်ႏအဖြာꩻပေါင်ꩻ (၁၂၅၆)ဖြာꩻသွူ။ [၁][၂]