နျာႏဗောင်းလင်ꩻ
နျာႏဗောင်းလင်ꩻရောႏဂါႏယိုနဝ်ꩻ မန်းဟဲ့ꩻ"လိပ်ခေါင်း"ရောႏဂါႏသွူ။ ကဟဲ့ꩻဗာႏ"လိပ်ခေါင်း"ရောႏဂါႏနဝ်ꩻ လဲ့ꩻဖူꩻငွါတကီ ကအဝ်ႏဒါႏ ဖြေ့တန်(အူမကြီး)ယန်ꩻလင်ꩻဖြဲန်လင်ꩻလဲ့ꩻဖူꩻငွါ နုဲင်းကြေ့ꩻကတူႏ၊ ကဖြဲန်ထန်ႏဒါႏ အခြုံနဝ်ꩻတွော့ꩻ ဟဲ့ꩻဗာႏလိပ်ခေါင်းရောႏဂါႏသွူ။ ပအိုဝ်ႏနဝ်ꩻ မီႏပြန်ႏ"ကြေ့ꩻကတူႏရောႏဂါႏ"နုဲင်းနဝ်ꩻ အဝ်ႏလꩻဒျာႏလဲ့ နာႏတဟဝ်တဝ်း၊ တတလေ့တဝ်းတွော့ꩻ ပြန်ႏဗာႏနျာႏဗောင်းလင်ꩻရောႏဂါႏနုဲင်းနဝ်ꩻသွူ။ နျာႏဗောင်းလင်ꩻရောႏဂါႏယိုနဝ်ꩻ ကဲန်းအာအာ ထွာဒျာႏလိုꩻသက်ရွယ်ႏတန်ဖုံႏ၊ လိုꩻပေႏနဝ်ꩻ ထွာကြွို့ꩻတဝ်းသွူ။
နျာႏဗောင်ႏလင်ꩻရောႏဂါႏ ကထွာဗာႏယိုနဝ်ꩻ ကဲန်းအာအာ တဲႏစဟို့ꩻတကဲစ်ꩻရောႏဂါႏသွူ။ ထွာဟို့ꩻတကဲစ်ꩻရောႏဂါႏနဝ်ꩻ အဝ်ႏမဲန်အေႏထာꩻလဲ့ အေႏနဝ်ꩻ သံးတလင်ꩻယိုꩻယိုꩻတဝ်း၊ လင်ꩻအာဒျာႏ အအောက်ꩻယုဲင်လဲင်ႏစိꩻစိꩻ၊ သံးအဝ်ႏခြꩻတွဗာ့ꩻ ကွဲးဆွောန်ဆွောန်နဝ်ꩻ နျာႏဗောင်းလင်ꩻထိုꩻတေားသွူ။ နဝ်ꩻလွုမ်ꩻတကာႏတဝ်း လိုꩻရုဲင်ꩻတသွိုး (လှုပ်ရှားမှု)မုဆေ့ꩻ၊ လိုꩻကအုံစွူအာငါႏထာꩻ၊ ရုမ်ꩻသားဖုံႏ၊ ဆဲင်ႏသားဖုံႏလဲ့နဝ်ꩻ၊ ဟို့ꩻတလွေꩻဟဝ်တဝ်း လိုꩻဓာတ်ချုက်အာဖုံႏလဲ့နဝ်ꩻ ဖြေ့တန်ကင်ဆာရောႏဂါႏ၊ အွꩻအာငါႏဒဝ်၊ အံႏအာငါႏ အရသာႏလျားမျိုꩻဖုံႏလဲ့နဝ်ꩻ ကုဲင်းထွာနျာႏဗောင်းရောႏဂါႏသွူ။ လိုꩻမူႏပိုမွိုး အဝ်ႏနမ်းလောင်းတွင်ꩻနဝ်ꩻလဲ့ ကုဲင်းထွာဒါႏနေနေသွူ။
နျာႏဗောင်းလင်ꩻရောႏဂါႏယိုနဝ်ꩻ လင်ꩻအကို၊ လင်ꩻအထန်ႏ (အတွင်းလိပ်၊ အပြင်လိပ်) အဝ်ႏ ၂-မျိုꩻသွူ။ တဖြဲန်လင်ꩻတဝ်းဒွိုန်း လဲ့ꩻဖူꩻငွါ အထန်ႏဖဲ့ꩻတွော့ꩻ ဟဲ့ꩻလင်ꩻအကိုသွူ။ ထွာစနဝ်ꩻ တလိုမ်ꩻလာꩻမွိုင်မွိုင်တဝ်းတွော့ꩻ ကွဲးညည ကဖြဲန်လင်ꩻဒါႏ လဲ့ꩻဖူꩻငွါနဝ်ꩻ ဟဲ့ꩻအလင်ꩻအထန်ႏသွူ။ လိုꩻကထွာဒါႏ နျာႏဗောင်းရောႏဂါႏနဝ်ꩻ လင်ꩻအကိုတယဝ်း၊ လင်ꩻအထန်ႏတယဝ်း ထိုꩻလယ်ႏထာꩻယပ်ꩻငါႏ၊ လဲ့ꩻဖူꩻငွါအဲန်ႏထိုꩻ၊ ထိုꩻလယ်ႏထာꩻလဲ့ သွီႏကုဲင်းပါလင်ꩻသွူ။ နျာႏဗောင်းလင်ꩻရောႏဂါႏယို ကတခုဲင်ႏထွာတန်ငါႏတဝ်းဒွိုန်းနဝ်ꩻ တလင်ꩻသေႏသေႏတဝ်း၊ မီႏထိုꩻလယ်ႏထာꩻမꩻ ဖြဲန်လင်ꩻလဲ့ မီႏထွာတန်သွူနဝ်ꩻ အဝ်ႏဖြဲန်ထန်ႏစွဉ်ႏသေႏသေႏသွူ။ ကဖြဲန်ထန်ႏသေႏသေႏနဝ်ꩻ အုံအဝ်ႏထာꩻယပ်ꩻခုဲင်ႏငါႏ၊ အုံထာꩻတဟဝ်တဝ်း၊ ခွမ်ꩻလာꩻကအဝ်ႏတနꩻဒါႏ လဲ့ꩻဖူꩻငွါနဝ်ꩻ အဝ်ႏစိုႏစွဉ်ႏသေႏသေႏသွူ။ လိုꩻနျာႏဗွောင်းကလင်ꩻသေႏသေႏယိုနဝ်ꩻ ဝင်ꩻခိုႏဝင်ꩻငါ ဝင်ꩻရပ်ဝင်ꩻရာႏ၊ တပွယ်ꩻတလံꩻလဲ့ တမဲန်လွေꩻတဝ်းဒွုမ်သွူ။ နျာႏဗောင်းလင်ꩻရောႏဂါႏယိုနဝ်ꩻ တထွာယိုꩻယိုꩻတဝ်း အသက်အန္တရာယ်ႏလဲ့ ထိုꩻလယ်ႏထာꩻယပ်ꩻ၊ အုံအဝ်ႏထာꩻယပ်ꩻ ယူႏပက်ငါႏတဲင် လိုႏလိုမ်ꩻလာꩻမွိုင်မွိုင်သွူ။
ခေတ်ယိုခါနဝ်ꩻ နျာႏဗောင်းလင်ꩻရောႏဂါႏယို လိုမ်ꩻလာꩻနယ်ꩻအဝ်ႏအမျိုꩻမျိုꩻ၊ ဖြဲ့ꩻနေးတသီႏယုံႏ တသီႏခန်ꩻလဲ့အဝ်ႏ၊ အွဉ်ႏစဲးနေးတသီႏထီလဲ့အဝ်ႏ၊ ခꩻနေးတွမ်ႏကောႏယာꩻကွင်ꩻ(သရေကွင်း)လဲ့အဝ်ႏ၊ သူႏနေးတသီႏ အံႏနေးတသီႏလဲ့အဝ်ႏသွူ။ နျာႏဗောင်းလင်ꩻရောႏဂါႏယိုနဝ်ꩻ တဖြဲန်လင်ꩻတဝ်းဒွိုန်းလဲ့ꩻဖူꩻငွါလဲ့ ပေါႏမဲန်ထွာ (ထွာစ)သွူနဝ်ꩻ အလက္ခဏာႏပျꩻလွဉ်ဒျာႏသွူ။ နျာႏဗောင်းလင်ꩻရောႏဂါႏ လက္ခဏာႏနဝ်ꩻ ခင်ႏလောင်ꩻဖုံႏ တသာႏဖြွီꩻဖုံႏ ခြေင်းလွဉ်၊ အဲင်ႏလွဉ်၊ ငင်းဒေင်ဆွုမ်ႏ၊ ငင်းဒေင်တသာႏဖြွီꩻဖုံႏခြေင်းလွဉ်၊ တအော့ꩻထွူႏ၊ တအော့ꩻခြေင်းလွဉ်၊ ကတူႏပအွုမ်လွဉ်၊ သꩻအောင်လျား၊ သꩻတအွစ်ꩻလွဉ်ဒါႏသွူ။ ပေါႏခမ်းအွုမ်ႏထာꩻခွꩻနဝ်ꩻ ဆာပိုႏအဲင်ႏပိုႏလွဉ်သွူ။ ဆင်ႏဆင်ႏမဲန်လွေꩻတအိန်ႏသွူ။ နဝ်ꩻလွုမ်ꩻတကာႏတဝ်း ပေါႏထွာည ထွာတန်သွူနဝ်ꩻ နမ်းတဗာႏလုမ်း တထွောင်းတဝ်းလဲ့ တထွောင်း ပသꩻဒါႏ၊ ဒီႏလွဉ်ပွစ်ꩻလွဉ်ဒါႏ၊ နမ်းတဗာႏလုမ်း တထွောင်းတဝ်းတထွောင်း ဆာအဲင်ႏဒါႏ၊ ကတူႏပအွုမ်၊ သꩻအောင်လျား၊ သီးမူꩻဒါႏ၊ သွီႏယာႏလဲ့ တရေꩻတဝ်း၊ ဖြေင်းတညိုႏထိုꩻဒါႏသွူ။
နျာႏဗောင်းလင်ꩻရောႏဂါႏ လိုမ်ꩻလာꩻနယ်ꩻဖုံႏ[မွဉ်းဖျင် | မွဉ်းဖျင်အရွီးခိုႏ]
- ၁။ တသီႏနျာႏဗောင်းလင်ꩻနယ်ꩻနဝ်ꩻ ထော့ꩻယာႏ (အယာႏခြေင်ခြေင် အဗဲ့ꩻအခေါက်ပါတဝ်း) အယာႏခဉ်ႏ ၁ဝိ၊ တယံꩻရာႏ (ထူႏထိုꩻထွူအခူꩻ) အယာႏခဉ်ႏ ၁ဝိ၊ ယိုနီမျိုꩻနဝ်ꩻ ဖေႏကအွီႏသော့ꩻတွမ်ႏ အမီႏအမက်ꩻဖုံႏတွော့ꩻ ဒွိုႏအံႏဟန်ႏအို၊ အံႏလို့လို့ဖေႏ တလဲင်ႏချင်ꩻနဝ်ꩻ ဟဝ်သွူ။ ဒွိုႏအံႏတလဲင်ႏ မီႏဟဝ်တဝ်းတဲ့ ဒွိုႏအံႏ ၂-၃လဲင်ႏသွူ။
- ၂။ နျာႏဗောင်းလင်ꩻရောႏဂါႏ တသီႏနယ်ꩻ ထဲင်းတနယ်ꩻနဝ်ꩻ ခွေးတောက်လာႏဆား စူတဆုတ်ꩻတွမ်ႏ ဆျာဒီႏတဖြုံႏ ကျော်ညီꩻသွူတဝင်ꩻတွော့ꩻ အံႏသွော့တွမ်ႏဒဲန်တလဲင်ႏချင်ꩻနေား၊ သွီႏမီႏထန်ႏဆေ့ꩻနေ ထွာစဖုံႏနဝ်ꩻ အံႏတလဲင်ႏငါလဲ့ ထိုꩻမားဒျာႏ၊ အမီႏထွာတန်လဲန်းနဝ်ꩻ အံႏဗာႏနီသိုမ်လဲင်ႏသွူ။ ဟဝ်ဗာႏအမဲန်ႏသွူ။
- ၃။ တသီႏနျာႏဗောင်းလင်ꩻ ထဲင်းတနယ်ꩻနဝ်ꩻ ခြွူအွꩻအာအာ ကဝ်ႏစံကာꩻရွီးနဝ်ꩻ ဟဝ်ဒျာႏ ရိုꩻနဝ်ꩻသွူ။ ကဝ်ႏစံကာꩻရွီးနဝ်ꩻ ခါႏငါႏ ဟို့ꩻလဲ့ပနဲန်ႏသွူ။ ကဝ်ႏစံကာꩻရွီးခြွူထီယိုနဝ်ꩻ ဆွတ်ꩻဆွုမ်ႏယော့ꩻရောႏဂါႏ၊ ယော့ꩻဖော်ꩻရောႏဂါႏဖုံႏနဝ်ꩻ ဟဝ်အီသွူ။
- ၄။ နျာႏဗောင်းလင်ꩻရောႏဂါႏ တသီႏနယ်ꩻ ထဲင်းတနယ်ꩻနဝ်ꩻ နမ်ႏရိုပ်ꩻတန်(ကုန်းထိကရုန်း)၊ ထိကရုန်းဆူးပေါက်)ယို ကဉ်ႏအလာပသကြောင်းထွူတွော့ꩻ မာꩻပဲစ်ꩻစေ့ꩻအထီ၊ ကလꩻဒါႏ နမ်ႏရိုပ်ꩻသတ္တုထီယို စိုပ်ꩻတွမ်ႏဖုဲင်တွော့ꩻ သူႏဖေႏသွော့နေား၊ သူႏတလဲင်ႏနီလဲင်ႏငါလဲ့ နျာႏဗောင်းလင်ꩻနဝ်ꩻ ထင်ႏချာဒျာႏရိုꩻနဝ်ꩻသွူ။
- ၅။ နျာႏဗောင်းလင်ꩻတသီးနယ်ꩻ ထဲင်းတနယ်ꩻနဝ်ꩻ နမ်ႏရိုပ်ꩻဒျာႏနေနေ၊ နမ်ႏရိုပ်ꩻမွူးပဉ္စငတ်ꩻပါꩻယို အွဉ်ႏသဲင်ထောင်းဖွန်ႏသွူတွော့ꩻ အံႏသွော့တွမ်ႏဖိုးနဲန်းထီစဲစ်စဲစ်နေား၊ အံႏတလဲင်ႏနဝ်ꩻ စေားနေင်းထီနွိုး ၂-စေား၊ အံႏဖေႏသွော့ တနီꩻ ၂-လဲင်ႏ၊ မွူးရဝ်ꩻခိုႏတလဲင်ႏ၊ မွူးဟာခိုႏတလဲင်ႏနေား၊ မဲ့ꩻဟဝ်ဒျာႏ။
- ၆။ နျာႏဗောင်းလင်ꩻရောႏဂါႏ တသီႏနယ်ꩻထဲင်းနယ်ꩻနဝ်ꩻ မူသွူ သက္ကရင်ꩻတန်(သက်ရင်းကြီး)ရွီးတွော့ꩻ ကလꩻဒါႏမူထီ တစေားအံႏဟန်ႏအိုယို၊ သော့ꩻတွမ်ႏတသာႏ တတွာမောက်ကြဲင်ႏခူꩻရပ်နဝ်ꩻတွော့ꩻ အံႏဖေႏသွော့ တနီꩻ ၂-၃လဲင်ႏနေား၊ နျာႏဗောင်းလင်ꩻလွုမ်ꩻတကာႏတဝ်း တအော့ꩻထွူႏ၊ ငွဉ်ꩻခြေင်း၊ အဟွီအညောင်ꩻဖုံႏလဲ့ ဟဝ်အီပါသွူ။
- ၇။ တသီႏနျာႏဗောင်းလင်ꩻနယ်ꩻ ထဲင်းတနယ်ꩻနဝ်ꩻ မိဉ်ႏမော့ꩻမိဉ်ႏလꩻဒါႏ သေခင်ႏမီႏနဝ်ꩻ မူတွမ်ႏနံးမန်ꩻမောက်ꩻအွန်တွော့ꩻ သူႏဖေႏခွိုꩻခွိုꩻနဝ်ꩻလဲ့ ဟဝ်ငါႏရိုꩻနဝ်ꩻသွူ။ ခေတ်ယိုခါနဝ်ꩻ သေခြေားလဲန်းတဲင် သေခင်ႏမီႏနဝ်ꩻ ဟံးပေါင်းယပ်ꩻနေနေသွူ။ သေလေားသားမီႏအဝ်ႏနဝ်ꩻ အကုဲင်းကျာႏထိုꩻအသေခင်ႏမီႏသွူ။
- ၈။ နျာႏဗောင်းလင်ꩻ တသီႏနယ်ꩻ ထဲင်းတနယ်ꩻနဝ်ꩻ ယမ်းဖြေꩻ (ရှားစောင်းလက်ပပ်)ယို ကျာႏထိုꩻအပီအထန်ႏ ထူႏအထီယုဲင်အကိုနဝ်ꩻတွော့ꩻ ရှားစောင်းလက်ပပ်ထီ တစေားအံႏဟန်ႏအိုယို တွမ်ႏတောင်းလျက်ꩻထန်ꩻတလုံꩻ၊ တသာႏဆေ့ꩻဆေ့ꩻ ကွယ်နွတ်ꩻရောꩻတဝင်ꩻတဲင် အံႏဖေႏသွော့ တနီꩻ ၂-လဲင်ႏနေား၊ ယမ်းဖြေꩻယို တွမ်ႏအပီသွယ်ꩻဗွိုဗွို ခြွူတွမ်ႏတောင်းလျက်ꩻထန်ꩻတွော့ꩻ အွꩻဖေႏတနီꩻ ၂-လဲင်ႏ၊ တလဲင်ႏတစောအံႏဟန်ႏအိုနဝ်ꩻလဲ့ လꩻဒျာႏ၊ ဟဝ်ဒျာႏနေနေသွူ။
- ၉။ တသီႏနျာႏဗောင်းလင်ꩻနယ်ꩻ ထဲင်းတနယ်ꩻနဝ်ꩻ ဖက်ꩻဗိုႏဒီႏဗန်ဗန်တန်တန် တဒီႏနီဒီႏယို သွယ်ꩻဗွိုဗွို ထောင်းပဲစ်ꩻသွူ ဆိုမ်ႏကြောင်းကြောင်းကိုတွော့ꩻ စေ့ꩻအထီ၊ ကလꩻဒါႏ ဖက်ꩻဗိုႏဒီႏထီ တစေားအံႏဟန်ႏအိုယို သော့ꩻတွမ်ႏတသာႏသိကျာꩻဆေ့ꩻဆေ့ꩻတွော့ꩻ အွꩻဖေႏတနီꩻတလဲင်ႏနဝ်ꩻ ပေါႏမွူးနီꩻတဆီမာꩻငါနဝ်ꩻ ဟဝ်လွဉ်ဒျာႏသွူ။ အွဉ်ႏပနဲန်ႏနဲန်ႏပါဗာႏဟို့ꩻသွူ။
- ၁၀။ တသီႏနျာႏဗောင်းလင်ꩻနယ်ꩻ ထဲင်းတနယ်ꩻနဝ် ဝန်ဆင်စွဲႏ (ဆင်စွယ်ဂမုန်း) အယာႏခဉ်ႏ ၅ိ-ယို သွယ်ꩻဗွိုဗွိုသွူတွော့ꩻ တွမ်ႏထော့ꩻဘာႏ (အယာႏခြေင်ခြေင်) အယာႏခဉ်ႏ ၁၅ိ ဒွိုႏအံႏညီꩻတဝင်ꩻသွူ။
ဒွိုႏနယ်ꩻနဝ်ꩻ အေင် ၂ိ၊ ပခေါ် ၂ိ၊ ဖက်ꩻဗိုႏ ၂ိ၊ နံးမန်ꩻ ၅ိ၊ တွမ်ႏဝန်ဆင်စွဲႏကျာႏသွယ်ꩻထွူနဝ်ꩻ ဒွိုႏငိုးညီꩻအွဉ်သွော့တဝင်ꩻ၊ ဝန်ဆင်စွဲႏနဝ်ꩻ ဖူးသွူမꩻ ကွဲးသော့ꩻငါႏထော့ꩻယာႏ၊ သော့ꩻထွူထော့ꩻယာႏတဲ့ ထော့ꩻယာႏဖေႏကဖူးနဝ်ꩻ သော့ꩻထီဆေ့ꩻဆေ့ꩻ၊ ဒွိုႏသံးဗာႏထဲင်းတလဲင်ႏသွူ။ ပေါႏထော့ꩻယာႏဖူးလဲ့ အံႏလꩻလဲန်းသွူ။ ဟန်ႏအိုယိုနဝ်ꩻ အီႏတနီꩻတာႏလွုမ်ꩻ၊ ဒွိုႏနုဲင်းယိုအတွိုင်ꩻ အံႏတရွေးဝင်ꩻ (၃)နီꩻငါနဝ်ꩻ ဟဝ်လွဉ်ဒျာႏသွူ။
- ၁၁။ နျာႏဗောင်းလင်ꩻ ဖေႏကဟဝ် တသီႏနယ်ꩻ ထဲင်းတနယ်ꩻနဝ်ꩻ နမ်ႏရိုပ်ꩻတန်(ကုန်းထိကရုန်း)ပဉ္စငတ်ꩻပါꩻယို အွဉ်ႏသဲင်ဗုံမေႏ မေႏကထွာဖါႏတွော့ꩻ ပေါႏထွာလို့သွူဖါႏလဲ့ သော့ꩻခါꩻပလဲင်ꩻကို၊ ဖျောႏတွမ်ႏနံးမန်ꩻမောက်ꩻအွန်၊ ဖျောႏဟံးအောက်ꩻအောက်ꩻတွော့ꩻ သူႏဖေႏသွော့ တနီꩻ ၂-လဲင်ႏနေား၊ နမ်ႏရိုပ်ꩻတန် ပဉ္စငတ်ꩻပါꩻခြွူထီ ဟံးလိုမ်ꩻလိုမ်ꩻယိုလဲ့ အွဉ်ႏတအွိုဖေႏသွော့ တနီꩻ ၂-လဲင်ႏနေား၊ မဲ့ꩻဟဝ်လွဉ်ဒျာႏသွူ။
- ၁၂။ နျာႏဗောင်းလင်ꩻ တသီႏနယ်ꩻနဝ်ꩻ လုံးဆျာႏ ၁ိ၊ သိန္ဓော်ꩻ ၁ိ၊ တခြွူ (သစ်ဆိမ့်) ရာႏခူꩻပါတဝ်း ၁ိ၊ တယံꩻတန်ရာႏ (အခူꩻပါတဝ်း) ၂ိ၊ တယံꩻပေႏရာႏ (အခူꩻပါလဲ့လꩻဒျာႏ) ၂ိ၊ ပဆျာႏလာႏဖြား ၂ိ၊ မောက်ကြဲင်ႏလာႏ ၂ိ၊ တလာꩻရာႏ (အခူꩻပါတဝ်း)၂ိ ယို ၈-မျိုꩻနဝ်ꩻ အွဉ်ႏသဲင်မာꩻဖွန်ႏညီꩻတဝင်ꩻတွော့ꩻ အံႏဖေႏသွော့ တလဲင်ႏတစေားနေင်းထီနွိုး၊ မွူးရဝ်ꩻခိုႏတလဲင်ႏ၊ မွူးဟာခိုႏတလဲင်ႏ၊ တနီꩻ ၂-လဲင်ႏနေား၊ ဟို့ꩻလဲ့လွေꩻဟဝ်၊ ရောႏဂါႏလဲ့ ထိုꩻမားဟဝ်ထိုꩻဒျာႏသွူ။
တယံꩻတန်နဝ်ꩻ မန်းဟဲ့ꩻ"ဖန်ခါးသီး"၊ တယံꩻပေႏနဝ်ꩻ မန်းဟဲ့ꩻ"ကြဇုသီး"သွူ။ မိဉ်ႏဖြေꩻနေး ပရတသီႏဆဲင်ႏနဝ်ꩻ အွဉ်ႏဒေါ့ꩻ "ဖန်ခါးသီး၊ ကြဇုသီး"နုဲင်းနဝ်ꩻမꩻ ဝင်ꩻသေနာႏသွူ။
- ၁၃။ တသီႏနျာႏဗောင်းလင်ꩻနယ်ꩻ ထဲင်းတနယ်ꩻနဝ်ꩻ ဝန်ဆင်စွဲႏယို သွယ်ꩻဆားဆားတွော့ꩻ တွမ်ႏထော့ꩻယာႏ (အယာႏခြေင်ခြေင်) ဒွိုႏရော်ꩻသွူတဝင်ꩻတဲင် ခွိုင်းကအံႏနွောင်ꩻ အံႏဖေႏတနီꩻ တလဲင်ႏငါနဝ်ꩻ ၃-နီꩻမာꩻငါ (အံႏသိုမ်လဲင်ႏ)လဲ့ နျာႏဗောင်းလင်ꩻရောႏဂါႏ ဟဝ်ဒျာႏနေနေသွူ။
- ၁၄။ လိုꩻနျာႏဗောင်းလင်ꩻသားနဝ်ꩻ အွဉ်ႏဆွော့ꩻဟို့ꩻလꩻတဝ်း၊ အံႏဗာႏတသီႏဟို့ꩻပနဲန်ႏ၊ အွဉ်ႏပနဲန်ႏသေႏသေႏဗာႏဟို့ꩻသွူ။ တသီႏဟို့ꩻပနဲန်ႏကရိုꩻနဝ်ꩻ ပွေꩻကဲင်ꩻ၊ တာႏသေ့ꩻခင်ႏ၊ သေင်ႏထရူးစီႏ၊ မုတ်ခါးကပါဒါႏ တသီႏမျိုꩻဖုံႏသွူ။[၁]
အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]
- ↑ ခွန်ကုဝေ-မုဲင်းကောင်၊ ခမ်းသားငဝ်း (အမုဲင်-၆၊ အစဲဉ်ႏ-၅၂)