ပဖြားဒုံစီꩻကန်ꩻ
၁။ ကဒင်ႏဗာႏ ပဖြားဒုံယိုနောဝ်ꩻ ဒုံစီꩻကန်ꩻ ယံတိဉ်ႏခွေါင်တဲင် လိုꩻအမျာꩻ ထွဉ်ႏထိန်ꩻသိမ်ꩻထွားတီဆွူနော၊ ဒုံစီꩻကန်ꩻ ကအောဝ်ႏအတွိုင်ꩻ ကထွာပဖြားဒုံနဝ်ꩻ စွို့ꩻစွို့ꩻစွဉ်ႏဉ်ႏ ယံကနာႏခံႏ မာꩻလွဉ်ꩻဆောင်ႏရွက်ဗာႏ၊ မာꩻလွိုမာꩻဆန် လွိုဒုံစီꩻကန်ꩻလꩻတဝ်းနော။ ၂။ ဒုံဆကီယို အရေꩻမီႏပေါႏပေါက်တဲင် အရေꩻမီႏတန်နဝ်ꩻ ယံကလွေꩻဒေါ့ꩻဟွုန်မွိုင်င် နယ်ႏသား ခရဲင်ႏသားနော၊ မီႏဒေါ့ꩻဟွုန်တောဝ်းလဲ့ ထွာဒျာႏ ပဖြားဒုံတာႏဝွန်ႏနော။ ၃။ ကဒင်ႏသေꩻ ပဖြားဒုံယိုနောဝ်ꩻ တာႏဝွန်ႏအံႏမွေးတောဝ်းနော၊ တာႏဝွန်ႏထံႏဖေႏဗာႏ ဒုံကိစ္စ၊ တာႏဝွန်ႏထံႏ ဒုံမုꩻဒွါႏနော၊ ဒုံကိစ္စ ဒုံတာႏဝွန်ႏနောဝ်ꩻ ထံႏနွောင်ꩻတောဝ်း၊ ထွာတောတာႏဝွန်ႏအံႏနောဝ်ꩻ ဟောဝ်တောဝ်းနော၊ ကျိုꩻစာꩻဆောင်ႏရွက်ကေႏကေႏ ဒုံတာႏဝွန်ႏနော။ "နယ်ႏသားတာႏဝွန်ႏ ၄-ပါꩻ" (၁) ဝင်ꩻကအွဉ်နယ်ႏသား တဖြာꩻနောဝ်ꩻ နယ်ႏကိုယို အထွာနှဲးမုဲꩻတွမ်ႏပဖြားဒုံ ယံကဆွေꩻနွေꩻရီရွောင်ဗာႏလွဝင်ꩻ၊ အမုꩻပေႏတန်ကိစ္စ ယံကသေဗာႏ တာႏဝွန်ႏထာꩻမာꩻ ပငါပရာꩻနော။ (၂) ပဖြားဒုံ ထာꩻမာꩻမီႏတမွေးတောဝ်း ကထွာနယ်ႏသား ဖျင်ဖေႏဗာႏ တွမ်ႏငေါဝ်းအွီႏငွါသာႏ၊ လိုꩻဒုံကဒေါ့ꩻဒါႏအတွိုင်ꩻ မွေးတမွေးတောဝ်း တွမ်ႏနယ်ႏသား၊ တွမ်ႏပဖြား တွမ်ႏလိုꩻဒုံအမျာꩻ ဒေါ့ꩻရီဆွေꩻနွေꩻလွဝင်ꩻ ယံကသေစဲင်း ကျောင်ꩻလံꩻခရာႏ ပရင်ꩻပရာꩻ သွံဖဲ့ꩻလို့နော။ (၃) နယ်ႏကို အမုꩻဟောဝ်တွမ်ႏအမုꩻကုဲ ကဆုံꩻဖျတ်ခါꩻထွူ တွမ်ႏနယ်ႏသား တွမ်ႏပါဖြားဒုံ တွမ်ႏအမျာꩻလိုꩻဒုံနောဝ်ꩻ သွံဦꩻသွံဖဲ့ꩻ သဖော်ꩻတူႏညီႏအတွိုင်ꩻ ယံကဒင်ႏငါတောဗာႏ ခရဲင်ႏသားထျꩻနော၊ ဟိန်ဖြားဒုံအမျာꩻယို ထာꩻမာꩻမီႏတမွေးတောဝ်းလဲ့ နေးတွမ်ႏငေါဝ်းအွီႏငွါသာႏ ယံကဒေါ့ꩻရီဗာႏတဲင် ဖျင်စွို့ꩻစွို့ꩻဗာႏ အမုꩻကိစ္စဖုံႏနော။ (၄) ကအွဉ်ဗာႏ ပဖြားဒုံလဲ့နောဝ်ꩻ၊ နယ်ႏသားလဲ့နောဝ်ꩻ ခရဲင်ႏဗဟိုႏလဲ့နောဝ်ꩻ အအံႏတာႏဝွန်ႏခြေင်င်မွေးတောဝ်းနော၊ မာꩻဖေႏဗာႏ ဆောင်ႏရွက်ဖေႏဗာႏ အမျာꩻတာႏဝွန်ႏနော၊ ကွဲးကားတဲင် အမျာꩻမီႏဖေႏ မီႏထောက်ဟို့ꩻတာႏနောဝ်ꩻမꩻ ထံႏဖေႏအမျာꩻတာႏဝွန်ႏနဝ်ꩻနွောင်ꩻ၊ အမျာꩻတာႏဝွန်ႏနောဝ်ꩻ သမ်းထံႏနွောင်ꩻတောဝ်း၊ အမျာꩻရွဉ်ခါ သမ်းကေပ်ꩻအံႏနောဝ်ꩻ ဟောဝ်မာꩻထွိုက်သင်ꩻတောဝ်းနော၊ အမျာꩻတာႏဝွန်ႏနောဝ်ꩻ ဝင်ꩻထံႏဖေႏကျလဲဉ်းဒျာႏထွူ၊ ကထွာအမျာꩻ သမ်းတဖေႏနွောင်ꩻတောဝ်း ဝင်ꩻဟို့ꩻတာႏနောဝ်ꩻ ဝင်ꩻအီႏအံႏထာꩻမှဲꩻ၊ ကထွာလိုꩻတန်လဲ့ ဆောင်ႏရွက်ကေႏကေႏဖေႏဗာႏ အရပ်သားတာႏဝွန်ႏ၊ အရပ်သားလဲ့ ကထွာနီလိုꩻတန် ကအုပ်ထိန်ꩻဖေႏ နီဒုက္ခမုꩻနောဝ်ꩻ ကောထိန်ꩻသား မီႏကေပ်ꩻခွယ်ꩻလဲ့ အွဉ်ႏသꩻစေႏတနာႏဟောဝ်ဝ် သော့ꩻဗာႏလွဝင်ꩻနော။[၁][၂][၃]