ပအိုဝ်ႏငေါဝ်းစဲစ်

ပအိုဝ်ႏငေါဝ်းစဲစ်ငွါမဲဉ်ႏ သွုံꩻမဲဉ်ႏမဲဉ်ႏ

ဗွေႏသျင်ႏဗွေႏစင်ꩻ ခွန်/နင်ꩻရက်ခွိုꩻပအိုဝ်ႏစွိုꩻသီးဖုံႏဟွေး- ခွေသွဉ်းထာꩻထီႏထာꩻသေ မဉ်စေပျꩻနယ်စံꩻငါႏ လိတ်လုဲင်ꩻခရာႏပေႏ ဆေ့ꩻဆေ့ꩻငါသွူ။ ဖူးဝေးမွိုးဖါသီး မဉ်ႏတဲမ်းပအိုဝ်ႏလိတ်လုဲင်ꩻ ရွမ်ဖြုဲင်ꩻ ဝတ္ထု ကဗျာ ရုတ်တယွို့ဖုံႏလဲ့နဝ်ꩻ၊ ငဝ်းသချင်ꩻဖုံႏလဲ့နဝ်ꩻ၊ ဒုံဆောင်ႏရပ်ရာႏ စတဲင်အမဉ်ꩻဖုံႏလဲ့နဝ်ꩻ တဲမ်းနေးဒျာႏပအိုဝ်ႏထုံꩻ သုံꩻနေးသွော့ ပအိုဝ်ႏငဝ်းစဲစ်ငွါစဲဉ်ႏ မဲဉ်ႏမဲဉ်ႏနဝ်ꩻမꩻ ထွားဟော်ꩻသားဒါႏစဲင်းချာ နီလိတ်၊ သေစဲင်းချာနီငဝ်းငွါတဲင် ငဝ်းတရီ အထီပြာမျိုꩻ အီႏထိုꩻမားဗာႏသွူ။

ဆရာႏတဲမ်းလိတ်ယဟန်ႏနဝ်ꩻ ပအိုဝ်ႏတခဝ် မန်းတကွို့ꩻ ထွို့ꩻငီꩻတဲမ်းရော်ꩻရယ်ꩻဝင်ꩻတဲင် ထွားဟော်ꩻသားသူꩻ ထွာတေားဒျာႏ ပအိုဝ်ႏတခဝ် မန်းတကွို့ꩻသွူ၊ တဲမ်းလိတ်သား ကဉ်းအာအာနဝ်ꩻ အဝ်ႏမန်းဘာႏသာႏပြန်ႏလွဉ်လွဝင်ꩻ ပအိုဝ်ႏငွါတဲင် ဆꩻချာတွမ်ႏဆꩻငါ၊ ချာငါတဗူႏတဗန်ႏ တမဲဉ်ႏတဝ်းလွဝင်ꩻသွူ၊ နုဲင်းလိတ်ယပုဒ်ပုဒ်နဝ်ꩻ ထွားဟော်ꩻသွူ နီသွံပြန်ႏ ကီလတဗန်ႏဒွို့၊ ကတူႏခင်ႏမာႏ၊ တသေနာႏစဲင်းတဝ်း အဓိပ္ပါယ်ႏသွူ။ နီလိုꩻသီး ထာꩻသေထာꩻဒါႏ ဉာဏ်ႏပညာႏယို တဖြာꩻတွမ်ႏတဖြာꩻ ဗွိုန်ပီတဝ်းလွဝင်ꩻတဲင် နီထာꩻသေထာꩻဒါႏလဲ့ မဲဉ်အွဉ်ႏသေဒါႏပါ၊ ပါꩻထာꩻသေထာꩻဒါႏလဲ့ မဲဉ်အွဉ်ႏသေဒါႏနီမꩻ နီလိုꩻချင်ꩻချင်ꩻ သေဗွိုန်ဗွိုန်ဒါႏနုဲင်းနုဲင်း၊ ထီႏလုဲင်ꩻလိတ် သေထွꩻခေတ်သွူ၊ အမာႏဖေႏကပါမွိုန်းဝင်ꩻတဲင် ခလားကအွဉ်ႏသေ ဒါႏရီးရီးပါꩻ၊ နီနမ်းမဉ်ႏသေဒါႏရီးရီးနဝ်ꩻ အပဲစ်ကင်ꩻ အမင်ꩻလွစ် ပြွစ်ꩻပြေဟဝ်တဲင် ပါꩻမဉ်ႏထွားတဲ့ချော်ꩻ၊ ဝင်ꩻမဉ်ႏဟော်ꩻတဲ့ သေစဲင်းဒါႏထဲင်း နီလိတ်လုဲင်ꩻ နီငဝ်းငွါသွူ။

ကွပ်နဝ်ꩻမꩻ သျင်ႏစင်ꩻ/ခွန်နင်ꩻသီး ခလားကအီႏတဲမ်း ပအိုဝ်ႏလိတ်လုဲင်ꩻနဝ်ꩻ ထွားအာအာရီးသွော့ "ပအိုဝ်ႏလိတ်မွူးစောင်ႏ၊ ဗွေႏဗွန်ကောဝိဒ (သီႏသဲင်ႏ) လိတ်စောင်ႏ ကားကအဝ်ႏ၊ ဖြားတန် အောင်ႏခမ်းထီငဝ်းငွါဩဝါဒ၊ ခွန်အာကာ၊ ခွန်ကုဝေ-စတဲင် ကထွာဒါႏ ပအိုဝ်ႏပညာႏသျင်ႏ ပညာႏအဝ်ႏသား ကားကအဝ်ႏဒါႏ လိတ်စောင်ႏ"ဖုံႏယိုနေား။ တဲမ်းလိတ်သားဖုံႏလဲ့ ဝင်ꩻထွားဖေႏကချော်ꩻ ပါꩻဟော်ꩻယံကပြေ ထေရဲင်ꩻထေအာႏ စေႏတနာႏတွမ်ႏ သꩻရက်ခွိုꩻဗွေဗွတဲင် ကျိုꩻစာꩻတဲမ်း၊ ကျိုꩻစာꩻမုဲင်သွော့၊ တဲမ်းလိတ်နယ်ꩻ လိတ်စီꩻကန်ꩻဖုံႏ သေလွောက်ꩻနာႏလွသွော့၊ တဲမ်းစွို့ꩻစွို့ꩻ ထွို့ꩻယံယံဒျာႏဝင်ꩻဖုံႏနေား၊ တဲမ်းမဉ်ႏထွူ ဟော်ꩻထွားချာဗဲင်း အပြန်ႏတဆီ၊ အွဉ်ႏထွားပါက ပါꩻကဒါႏထဲင်းနီ တဖြာꩻနီဖြာꩻထွူမꩻ ကွဲးသော့ꩻပသာလွဉ်လိတ်မူ၊ ကွဲးထေဝင်ꩻ လိတ်စောင်ႏဖုံႏနေား။ ပအိုဝ်ႏလိတ်စောင်ႏ ကားကအဝ်ႏ အစောင်ႏမုဲင်ꩻတရိုꩻတဝ်း ကေားကထွာဒါႏ အွဉ်ငါသားဖုံႏ နွို့အစွိုꩻသားဖုံႏလဲ့ တွမ်ႏစေႏတနာႏဗွို့ꩻဗွို့ꩻ ထွို့ꩻသꩻဆွာꩻဆွာꩻ ကျိုꩻစာꩻဝင်ꩻတွော့ꩻ ရွမ်ဖြုဲင်ꩻ ဝတ္ထု ကဗျာ-စတဲင် လိတ်မူမဉ်ႏလွဉ်နဝ်ꩻ ဖျင်ဖေႏရော့ꩻရော့ꩻသွော့နီငဝ်း၊ ပြန်ႏလဝ်းတဲ့ꩻတဲ့ နီငွါနေား၊ လိတ်မူယဟန်ႏ အမဲဉ်ႏဆေ့ꩻ အမာႏအာ ဖျင်မဉ်ႏခိꩻတဝ်း ပယ်ႏစဝ်းစဝ်း၊ လွိုက်ဒျာႏသွဗာ့ လိတ်မူအထီဒွိုန်၊ လိတ်မူမဲဉ်ႏစွို့ꩻနီငဝ်းယာႏ၊ လိတ်မူလွောက်ꩻနာႏစီꩻကန်ꩻဖုံႏနေား၊ ကေားကထွာဒါႏ တွယ်ႏနျꩻလိတ်သားဖုံႏလဲ့ သꩻရက်ခွိုꩻဗွေ ထေစေႏတနာႏ အမာႏယံကကွယ်ႏ ကျိုꩻစာꩻတွယ်ႏနျꩻဒျာႏဝင်ꩻဖုံႏနေား။ ငဝ်းသချင်ꩻယိုနဝ်ꩻ လိုꩻတွိုင်ꩻစွုမ်ႏဖြာꩻ နီနာꩻရွစ်လွ နာႏလွဝင်ꩻတဲင် ကေားကထွာဒါႏ တဲမ်းငဝ်းသချင်ꩻသား၊ ရွစ်ငဝ်းသချင်ꩻသားဖုံႏလဲ့ စူꩻယိုꩻမွိုန်းဝင်ꩻငဝ်း၊ တဲမ်းမွိုန်းဝင်ꩻငွါ၊ တဲမ်းချာဒျာႏနီငဝ်းစဲစ်၊ ရွစ်ခချာဒျာႏနီငဝ်းယာႏ နီငွါထီမꩻ ပအိုဝ်ႏစွုမ်ႏဖြာꩻ ငဝ်းရော်ꩻရယ်ꩻ သꩻတကြိုႏ၊ ပအိုဝ်ႏပြာ၊ ပအိုဝ်ႏတခါႏ မန်းတကွို့ꩻဖုံႏ အီႏထိုꩻမားဗာႏသွူ။ နုဲင်းဖြဝ်ꩻသူꩻ ဒေါ့ꩻငဝ်းငွါတရျာꩻပဉ်ယဝ်း မန်းငဝ်းပါကြွို့ꩻတဝ်း၊ တွိုႏနီပအိုဝ်ႏနဝ်ꩻ ဒေါ့ꩻငဝ်းလစ်ꩻငတ်ꩻငွါငါလဲ့ မန်းငဝ်းအဝ်ႏပါသော့ꩻလဲဉ်း တငွါနီငွါ၊ ကဉ်ꩻစာꩻခရာႏ မွေးတဝ်းဒွုမ်၊ ထွာဒျာႏ ဖျင်ခရာႏတဲင် ဖျင်ခန်းဝင်ꩻဖုံႏနေား။ ဗွေႏသင်္ဃာႏသီး မဉ်ႏဖန် ကျောင်ꩻမဉ်ꩻ၊ ဖရာꩻမဉ်ꩻ၊ စေႏတီႏမဉ်ꩻလဲ့နဝ်ꩻ၊ မွိုးဖါသီး မဉ်ႏဖန်ပိုမဉ်ꩻလဲ့နဝ်ꩻ၊ ပွိုင်ႏရာꩻလိုꩻတန်သီး မဉ်ႏဖန်လမ်းမဉ်ꩻ ဇရွပ်မဉ်ꩻ တဖူꩻမဉ်ꩻ ရပ်ပင်ႏ(ရပ်ကွက်)မဉ်ꩻ ဒုံမဉ်ꩻ အွိုင်ႏမဉ်ꩻ ဝေင်ꩻမဉ်ꩻဖုံႏလဲ့နဝ်ꩻ ဖန်ပအိုဝ်ႏ ဟဲ့ꩻပအိုဝ်ႏ၊ တဲမ်းပအိုဝ်ႏ၊ မုဲင်ပအိုဝ်ႏဒျာႏဝင်ꩻဖုံႏနေား၊ မဉ်ႏဒေါ့ꩻလို့လို့နဝ်ꩻ အံႏတဲ့ပအိုဝ်ႏ၊ အွꩻတဲ့ပအိုဝ်ႏ၊ သာတလီꩻငါတဲ့ သာပအိုဝ်ႏနေးစွဉ်ႏဒျာႏဝင်ꩻ ပငါပရာꩻနေား။

• = ပအိုဝ်ႏငဝ်းစဲစ် သုံꩻမဲဉ်ႏမဲဉ်ႏ၊ ပအိုဝ်ႏငဝ်းစဲဉ်ႏ တဲမ်းဒေါ့ꩻခါꩻ။
  • တဗန်ႏချာငါ ယံထိုꩻမား၊ အဝ်ႏလိုႏဟော်ꩻထွား လိတ်မွူးစောင်ႏ။
• = ရက်ခွိုꩻသွိုန်ႏသꩻ အွဉ်ဝင်ꩻလွူး၊ လိတ်လုဲင်ꩻလိတ်မွူး ထွားအာအာ။
  • တွမ်ႏစေႏတနာႏဗွာ တဲမ်းကျိုꩻစာꩻ၊ မဉ်ႏမဲဉ်ႏမꩻရာꩻ ပအိုဝ်ႏစဲစ်။
• = တဲမ်းစွို့ꩻစွို့ꩻ ထွို့ꩻထဲင်းထဲင်း၊ တဲမ်းသားမဉ်ႏမာႏ၊ ထွားသားမာႏ၊ ကုဲင်ဒါႏနီလိတ်လုဲင်ꩻ။
  • ဒေါ့ꩻခွိုꩻခွို့ꩻ ရိုꩻမဲဉ်ႏမဲဉ်ႏ၊ ဒေါ့ꩻသားမဉ်ႏမာႏ၊ သုံꩻသားအီႏမာႏ ကုဲင်ဒါႏနီငဝ်းတုဲင်။
• = နီလိတ်နီလုဲင်ꩻ ဟဝ်နုဲင်းမုဲင်ꩻ၊ အဝ်ႏလိုႏဖျင်၊ ယံနုဲင်းမုဲင်ꩻ အဝ်ႏလိုႏတဲမ်း။
  • နီငဝ်းနီထီ ဟဝ်ယံမုဲင်ꩻအီ အဝ်ႏလိုႏဒေါ့ꩻ၊ ဆွော့ꩻမုဲင်ꩻရာꩻ အဝ်ႏလိုႏရိုꩻ။
• = နဝ်ꩻမꩻ သျင်ႏစင်ꩻ/ခွန်နင်ꩻရက်ခွိုꩻ၊ နီလိုꩻမျိုꩻသီး ပအိုဝ်ႏငဝ်းစဲစ်ငွါစဲဉ်ႏ သုံꩻမဲဉ်ႏမဲဉ်ႏနေား။