ပအိုဝ်ႏစွိုးမူႏသီး

"ပအိုဝ်ႏစွိုးမူႏသီး စွိုးခွိုꩻရေꩻအွဉ်ငါအခန်ꩻကဏ္ဍကို အဝ်ႏလိုႏထင်ႏငါ ပါဝင်ႏလွဉ်အာအာ" လိုꩻမူႏတဲ့ ထွာနွောင်ꩻခမ်းထီသမ္မတ၊ လိုꩻမူႏတဲ့ ထွာနွောင်ꩻစဲ့ꩻကတူႏအွဉ်ငါ၊ လိုꩻမူႏတဲ့ ထွာနွောင်ꩻလွတ်တောႏဥက္ကဋ္ဌ၊ လိုꩻမူႏတဲ့ ထွာနွောင်ꩻဝွန်ႏတန်ချွုတ်၊ လိုꩻမူႏသီးတဲ့ လိုꩻမူႏသီးအစွန်ꩻ အဝ်ႏနေနေကရိုꩻနဝ်ꩻ အရေꩻတန်အွဉ်ငါ ခင်ႏလမ်းနုဲင်းကီယို ကမ္ဘာႏလောင်း လိုꩻမူႏသီး အဝ်ႏခုမ်စံႏ ထူႏတာႏဝွန်ႏဖိုနဝ်ꩻ သမဲင်ꩻအဝ်ႏနဝ်ꩻသွူ။ ပအိုဝ်ႏစွိုးခွိုꩻ၊ ပအိုဝ်ႏလိုꩻမျိုꩻကိုယို ဗꩻတွိုႏဟန်ႏသနီꩻ အီႏအွဉ်ႏရေꩻဖေႏ ပအိုဝ်ႏမူႏသီး အခန်ꩻကဏ္ဍ၊ အီႏဖေႏအွဉ်ႏအွဉ်ငါ စွိုးမူႏသီးအခန်ꩻကဏ္ဍ တအဝ်ႏတဝ်းနဝ်ꩻ ထီႏဗာႏနဝ်ꩻသွူ။ တယ်ႏစွဉ်ႏပွိုင်းလဲင်ႏစခါ ဗꩻလွဉ်ဟန်ႏသနီꩻခါ အိုပ်ထိန်ꩻမꩻဖေႏဝင်ꩻ ဖြားဒုံတဲ့နဝ်ꩻ၊ အိုပ်ထိန်ꩻ အွိုင်ႏအရန်းကိုတဲ့နဝ်ꩻ၊ အိုပ်ထိန်ꩻ ဝေင်ꩻနယ်ႏအရန်းကိုတဲ့နဝ်ꩻ ကဲဉ်းအာအာနဝ်ꩻ အဝ်ႏဒျာႏစွိုးခွိုသီးခုမ်မာꩻနဝ်ꩻသွူ၊ စွိုးမူႏသီး အီႏခုမ်မာꩻနဝ်ꩻ တအဝ်ႏကြွို့ꩻတဝ်း၊ ပအိုဝ်ႏစွိုးမူႏသီး အီႏအွဉ်ငါနဝ်ꩻ တထီႏကြွို့ꩻတဝ်းနဝ်ꩻသွူ။ ကွပ်ယိုတွော့ꩻ ကွပ်နဝ်ꩻတွော့ꩻ မာꩻထွာဗာႏတဝ်း အခေႏနေႏရိုꩻနုဲင်းနဝ်ꩻလဲ့ ကမ္ဘာႏလောင်း ခမ်းထီယဟန်ႏကိုဖုံႏနဝ်ꩻ ကျုံႏတွမ်ႏခေတ်စနစ်အမျိုꩻမျိုꩻတဲင် လိုꩻမူႏသီး ခံႏယပ်ꩻခံႏဖေႏဆပ်အွဉ်ငါ အခန်ꩻကဏ္ဍကိုသား အဝ်ႏအာတန်နဝ်ꩻသွူ။ ကလဲဉ်းခိုႏချာနဝ်ꩻ စွိုးမူႏသီးအွဉ်ငါ အခန်ꩻကဏ္ဍကို တပါနွောင်ꩻတဝ်းလဲ့ ခေတ်ဟန်ႏသနီꩻယိုနဝ်ꩻ ထွာကျင်ꩻသုံꩻလွဉ်လဲဉ်း ဒီမိုကရေစီခေတ်၊ လွတ်တောႏနဲင်ႏငံႏရေꩻခေတ်တဲင် ပအိုဝ်ႏစွိုးမူႏနွို့ခုမ်မာꩻ အခန်ꩻကဏ္ဍ၊ ပအိုဝ်ႏစွိုးမူႏသီး ထန်ႏငါဖေႏ ပအိုဝ်ႏစွိုးခွိုꩻသီးနမ်းခြောင်ꩻ အခန်ꩻကဏ္ဍဖုံႏယို အဝ်ႏလိုႏနွို့ခုမ်မာꩻနဝ်ꩻသွူ။ နဝ်ꩻမꩻ "ဆျာမွူးအူႏ ထာꩻတလေတဝ်း"ကရိုꩻဒါႏထာꩻယူႏယို အဝ်ႏလိုႏလက်ခံႏထူႏသင်ꩻတဝ်းဒွုမ်သွူ၊ "လိုꩻမူႏစူယို ဒူꩻတသွိုးနွောင်ꩻတွေလုမ်ꩻမွေးတဝ်း၊ တရွူꩻကမ္ဘာႏတဲ့ တသွိုးနွောင်ꩻ"ပအိုဝ်ႏစွိုးမူႏသီး ခံႏထူႏသင်ꩻလဲဉ်းနုဲင်းနဝ်ꩻသွူ။ "လိုꩻမူႏဒျာႏကွို့ꩻလုမ်ꩻ"တွမ်ႏဒျာႏ ထာꩻတွက်ထီႏပေႏ ထာꩻသွင်ꩻဖွီ စွိုးမူႏသီးအလောင်းနဝ်ꩻ ပအိုဝ်ႏလိုꩻမျိုꩻကိုယို နုဲင်းနေးစွဉ်ႏ ထုံꩻစံႏတဗာႏနဝ်ꩻသွူ၊ စွိုးမူႏသီးတဲ့ စွိုးမူႏသီးအစွန်ꩻထီ အဝ်ႏနေနေတဲင် ထီႏပေႏသွင်ꩻဖွီနဝ်ꩻ အဝ်ႏလိုႏထွာသင်ꩻတဝ်းဒွုမ်၊ အဝ်ႏလိုႏအွဉ်ႏရေꩻ၊ အဝ်ႏလိုႏဖေႏအွဉ်ငါ ခင်ႏလမ်းဖုံႏနဝ်ꩻသွူ။ ကထွာဒါႏ အသောင်အရင်ꩻဖုံႏယိုတဲ့နဝ်ꩻ၊ ကထွာဒါႏ စွိုးခိုသီးဖုံႏတဲ့နဝ်ꩻ ထွိုင်ႏထီႏပေႏ သွင်ꩻဖွီငါႏသေႏသေႏနုဲင်းနဝ်ꩻတဲင် ကထွာစွိုးမူႏသီးသူꩻနဝ်ꩻ အဒါႏဒျာႏ၊ အယံဒျာႏလဲ့ အနမ်းတွမ်ႏအနမ်း ထာꩻယုမ်းအံႏချာနမ်း အဝ်ႏတဝ်းဒွုမ် တဗွေတဝ်းဒွုမ်နဝ်ꩻသွူ။ အဝ်ႏမာꩻဒါႏဒျာႏလဲ့ ကွပ်ယုမ်းအံႏချာနမ်း တအဝ်ႏတဝ်းတဲင် တထွိုင်ႏမာꩻဗွုန်ႏတဝ်းဒွုမ်၊ တအွဉ်ငါဗွုန်ႏတဝ်းဒွုမ် တွိုႏလွဉ်ဗာႏ အရန်းနဝ်ꩻသွူ။ နုဲင်းယိုခါ ပအိုဝ်ႏလိုꩻမျိုꩻလွတ်တောႏနမ်းခြောင်ꩻကို ပအိုဝ်ႏစွိုးမူႏသီး ပါဝင်ႏသော့ꩻ တအဝ်ႏတဝ်းဒွုန်း၊ နုဲင်းယိုခါ မန်းခမ်းနုဲင်ႏငံႏရေꩻအုံကိုမ်ပွယ်ꩻ ခမ်းခြွဉ်းဗူႏ ညိမ်ꩻချံꩻရေꩻညီႏလာႏခံႏပွယ်ꩻကို ပအိုဝ်ႏစွိုးမူႏသီး ပါဝင်ႏသော့ꩻ အခန်ꩻကဏ္ဍဆေ့ꩻနေကငါႏဒွုန်းနဝ်ꩻသွူ၊ ပအိုဝ်ႏစွိုးမူႏလွတ်တောႏနမ်းခြောင်ꩻ ဖေႏကအဝ်ႏ စွိုးမူႏသီးအဝ်ႏလိုႏနွို့ထူႏခင်ႏလမ်းနဝ်ꩻသွူ၊ ဖေႏကနွို့ထူႏခုမ်မာꩻနွောင်ꩻနဝ်ꩻ ကထွာပအိုဝ်ႏစွိုးခိုသီး အဝ်ႏလိုႏစွဲးပမ်း၊ အဝ်ႏလိုႏဖေႏခင်ႏလမ်းနဝ်ꩻသွူ။ ယိုခါ မန်းခမ်းထီကို ဒေါ်အောင်ဆန်းစုကြည့် ထင်ႏထွာနွောင်ꩻ မန်းခမ်းထီအတွိုင်ႏပင်ႏခံႏပုဂ္ဂိုလ်ႏယို လိုꩻမူႏဒျာႏ၊ ဗွိုန်နုဲင်းနဝ်ꩻနေနေ အမေႏရိကန်ႏခမ်း မိဉ်ꩻတန်ဝေင်ꩻ(၅၀)အကိုပါ အတ္တလန္တာဝေင်ꩻ(မြို့တော်ဝန်)ယို အဖဲ့ꩻဖဲ့ꩻအခဝ်ခဝ် ထဲ့ဖွိုႏလို့ ရွဉ်သုံႏပုံႏတာႏလိုမ်းတဝ်းတဲင် နုက်ထန်ႏဗာႏလို့ အစိုႏရဝွန်ႏထမ်ꩻ အခေႏနေႏကိုနဝ်ꩻ ၂၀၀၁-ဗာႏနေင်ႏ ရှာလီဖရန်ကလင်နွို့ခေးအောင်ႏနွောင်ႏထွူ ခုမ်မာꩻလွေꩻဖေႏတဲင် အဖဲ့ꩻဖဲ့ꩻထင်ႏထိုလွေꩻလꩻချာယင်းနဝ်ꩻသွူ။ အဝ်ႏနဝ်ꩻတဲင် ထွိုင်ႏတွိုႏ ၂၀၀၅-နဝ်ꩻ နွို့ခေးယင်း အောင်ႏနွောင်ꩻသွုပ်ယင်း ထွာခုမ်မာꩻထေင်းထံႏလွေꩻဗာႏ သက်တန်ꩻနီသွုပ် ဗꩻတွိုႏလွဉ် ၂၀၁၀-ဗာႏနဝ်ꩻသွူ။ အစ္စနဲင်ႏငံႏ လွတ်တောႏဥက္ကဋ္ဌခင်ႏလမ်းယို နင်ႏဒါလီယာ အစ်ဇစ်နဝ်ꩻ ခုမ်မာꩻထူႏဝွန်ႏလွေꩻဖေႏ တယ်ႏ ၂၀၀၆-ဗာႏနဝ်ꩻသွူ၊ ၂၀၀၇-ဗာႏကိုနဝ်ꩻ အစ္စရေးသမ္မတ မိုရှီကတ်ဇက် ထူႏခွင်ꩻသိုမ်လာတဲင် နင်ႏဒါလီယာအစ်ဇစ် ခုမ်မာꩻထူႏတာႏဝွန်ႏဖေႏယို့ꩻ အစ္စရေးသမ္မတနဝ်ꩻသွူ။ ဂျပန်နဲင်ႏငံႏ ကာႏကွယ်ႏရေꩻဝွန်ႏတန်အရာႏခင်ႏလမ်းတွမ်ႏ အသောင်ရင်ꩻရေꩻရာႏဝွန်ႏတန်ခင်ႏလမ်းဖုံႏယို နင်ႏယူရီကိုကိုအိကိနဝ်ꩻ ထူႏတာႏဝွန်ႏထေင်းထံႏလွေꩻဖေႏ တယ်ႏ ၂၀၀၅-ဗꩻလွေꩻ ၂၀၀၇-နဝ်ꩻသွူ၊ အဝ်ႏနဝ်ꩻတဲင် ထူႏတာႏဝွန်ႏလွေꩻပါယင်း ခမ်းထီလိုမ်းဗဉ်ႏရေꩻ(နုဲင်ငံတောလုံခြုံရေး)ဖေႏကျံႏဉာဏ်ႏပုဂ္ဂိုလ်ႏနဝ်ꩻသွူ။ ပအိုဝ်ႏစွိုးမူႏသီးလဲ့ အွဉ်ငါအခန်ꩻကဏ္ဍကို အဝ်ႏလိုႏထန်ႏငါ၊ အဝ်ႏလိုႏထင်ႏငါငါႏလဲဉ်း ပအိုဝ်ႏစွိုးခွိုꩻအတာႏသွူ။