ပအိုဝ်ႏတအိုဝ်ႏ

အဝ်ႏ ဝီခီပီးဒီးယား ကို

ပအိုဝ်ႏတအိုဝ်ႏ လိတ်လိုႏထွာတမူအရေꩻ၊ မဉ်ႏရက်မွေးပအိုဝ်ႏနဝ်ꩻ အဝ်ႏလိုႏပင်ႏထိုနီလိတ်[မွဉ်းဖျင် | မွဉ်းဖျင်အရွီးခိုႏ]

ကမ္ဘာႏလောင်းယို မဉ်ဟဲ့ꩻအွဉ်ႏထွာခန်း လိုꩻမျိုꩻနုဲင်းမုဲင်ꩻတယဝ်း ဝွေꩻနဝ်ꩻ အလိုꩻမျိုꩻအသက်သွီႏဖြွီꩻကထွာဒါႏ လိုꩻမျိုꩻလိတ်လုဲင်ꩻ၊ လိုꩻမျိုꩻငဝ်းငွါ၊ လိုꩻမျိုꩻအကွဉ်ကꩻ မဉ်ႏတအဲဉ်ထဝ်းနဝ်ꩻ ထွာခန်းစွဉ်ႏလိုꩻမျိုꩻခေါခေါလဲ့ ကွပ်စွဉ်ႏဝွေꩻလိုꩻမျိုꩻ အငင်းကမ်းငင်းဆွတ်ꩻ တအဝ်ႏတဝ်းတဲင် ဝွေꩻလိုꩻမျိုꩻအီႏခွေါင်တဉ်ႏညဆွာꩻရေꩻယို အတခြွော့တဉ်ႏနွောင်ꩻတဝ်းသွူ။

နဝ်ꩻမꩻ လိတ်လုဲင်ꩻငဝ်းငွါ တအဝ်ႏတဝ်းလိုꩻမျိုꩻယို အဗွိုန်ထိုꩻနုဲင်း အငင်းဆွတ်ꩻတအဝ်ႏတဝ်း သတ္တဝါႏတဲင် မဉ်ႏထွိုင်ႏလွေꩻနွောင်ꩻခန်းထာꩻလဲ့ အတတွိုႏညာꩻလꩻတဝ်း၊ တဆင်ႏဆင်ႏ အဝ်ႏခြို့ꩻထွိုင်ႏဗော့ꩻယွဲးယွဲး လိတ်လုဲင်ꩻအဲဉ်ထဝ်းလိုꩻမျိုꩻနဝ်ꩻ အတတဉ်ႏခြွော့နွောင်ꩻတဝ်းလဲ့ လိတ်လုဲင်ꩻကအဝ်ႏဒါႏ လိုꩻမျိုꩻနဝ်ꩻ အတဉ်ႏခြွော့နွောင်ꩻသေႏသေႏ ဒေါ့ꩻရိုꩻနွောင်ꩻနေဟောင်း၊ မဉ်ႏရိုꩻတဉ်ႏခြွော့နွောင်ꩻလဲ့ မဉ်ႏတွိုႏအခေႏနေႏ အခိန်ႏခါႏအဝ်ႏနုဲင်းမုဲင်ꩻနဝ်ꩻမꩻ အီႏတဉ်ႏခြွော့နွောင်ꩻ။ မဉ်ႏရိုꩻတဉ်ႏခြွော့နွောင်ꩻတဝ်းလဲ့ မဉ်ႏတွိုႏအခေႏနေႏနုဲင်းမုဲင်ꩻ၊ အခိန်ႏခါႏအဝ်ႏနုဲင်းမုဲင်ꩻနဝ်ꩻ လိုꩻမျိုꩻလိတ်လုဲင်ꩻငဝ်းငွါ အဝ်ႏဒျာႏလဲ့ တတဉ်ႏခြွော့နွောင်ꩻတဝ်းဗာႏအကျောင်ꩻနဝ်ꩻ။ ရီးသွတ်ꩻအနေႏ လိတ်လုဲင်ꩻအဝ်ႏဒျာႏ တဉ်ႏခြွော့ဒျာႏ အခေႏနေႏမျိုꩻနဝ်ꩻ-

  • ၁။ လိုꩻကထိန်ꩻသိမ်ꩻ လိုꩻမျိုꩻနဝ်ꩻ လိတ်လုဲင်ꩻသားယို ဒါႏသေနာႏဗာႏ ဝွေꩻအလိုꩻမျိုꩻလိတ်လုဲင်ꩻထွူ ပတ်သဲစ်တွမ်ႏ ဝွေꩻလိုꩻမျိုꩻလိတ်လုဲင်ꩻယို ဝွေꩻအဝ်ႏလိုႏထောင်ထွား မာꩻဗာႏသေႏသေႏ၊ လိတ်လုဲင်ꩻချို့ꩻယွင်ꩻချက်၊ လိတ်လုဲင်ꩻတွမ်ႏလိုꩻမျိုꩻငဝ်းငွါယို လွောက်ꩻဖက်မု အဝ်ႏတအဝ်ႏတဝ်း လိုႏအပ်ချက်၊ ကအဝ်ႏထွာနေဒါႏ နီလိတ်လုဲင်ꩻယို အလွေꩻအသဲင်ꩻ ပွိုင်းဝွို့သေန်ႏလျောႏမု အဝ်ႏတအဝ်ႏတဝ်းအချက်၊ လိုꩻမဉ်မာꩻ ပင်ႏထိုလိတ်လုဲင်ꩻရေꩻ သꩻဓာတ်အဝ်ႏတဲင် ရုဲင်ꩻတသွိုးမု တအွဉ်ႏဆွိုးတဝ်း ခွုမ်မာꩻသွုပ်သွုပ်ဒါႏအချက်။
  • ၂။ လိတ်လုဲင်ꩻထိန်ꩻသိမ်ꩻသားအစွိုꩻနဝ်ꩻ အဝ်ႏထိန်ꩻသိမ်ꩻဒျာႏ၊ အဝ်ႏရုဲင်ꩻတသွိုးဒျာႏ၊ ကောကသွဉ်ထူႏသား၊ ကောကထူႏသွုံꩻသားဖုံႏလဲ့ အဝ်ႏဒျာႏ၊ ကအီႏသွဉ်ဗာႏ ထူႏသွုံꩻဗာႏလဲ့ ယိုꩻယိုꩻမာꩻမာꩻဒျာႏ၊ လိတ်ဖြုံႏအငဝ်းထန်ႏဖုံႏယိုလဲ့ စွို့ꩻစွို့ꩻမဲဉ်ႏမဲဉ်ႏဒျာႏ၊ ဟောꩻခရာႏ မတ်ခရာႏ လိတ်အုပ်လိတ်စောင်ႏဖုံႏလဲ့ အဝ်ႏပြန်ꩻပြော်ꩻဒျာႏ၊ လိုꩻယွဲးသီးအတာႏ ကအီႏသွဉ်ထူႏဗာႏလဲ့ သꩻဝင်ႏစာꩻခရာႏယို အဝ်ႏဒျာႏ စတဲင်နုဲင်းနဝ်ꩻဖုံႏ မဉ်ႏအဝ်ႏဒျာႏမꩻ အသက်အီႏမွန်ဗန်ညဆွာꩻနွောင်ꩻနဝ်ꩻသွူ။

နုဲင်းယိုခါ နီပအိုဝ်ႏလိတ်လုဲင်ꩻကို အခေႏနေႏ အဝ်ႏလဲဉ်းနုဲင်းမုဲင်ꩻဟောင်း၊ အချက်(၁)ကို ကပါဒါႏ"လိုꩻကထိန်ꩻသိမ်ꩻ လိုꩻမျိုꩻလိတ်လုဲင်ꩻသားယို ဒါႏသေနာႏဗာႏ ဝွေꩻအလိုꩻမျိုꩻလိတ်လုဲင်ꩻထွူ ပတ်သဲစ်တွမ်ႏ လိုꩻမျိုꩻလိတ်လုဲင်ꩻယို အဝ်ႏထောင်ထွားဗာႏသေႏသေႏ"ယိုဖုံႏနဝ်ꩻ မဉ်ႏထွား နီပအိုဝ်ႏလိတ်ယေန်ႏနဝ်ꩻ အဝ်ႏထွာအဝ်ႏပါလဲဉ်းနဲ့ဟောင်း၊ ထူႏတာႏဝွန်ႏလဲဉ်းလိတ်လုဲင်ꩻထာꩻမာꩻ (လိုꩻမျိုꩻအရွီးအခိုႏထာꩻမာꩻ)၊ လိုꩻမျိုꩻအသက်သွီႏဖြွီꩻ ထာꩻမာꩻတဲင် နေးအဂုဏ်ႏ ထူႏအမိဉ်ꩻနဝ်ꩻ အဝ်ႏလိုႏမာꩻတဝ်းသွူ။ တွိုႏထောင်ထွားလိတ်လုဲင်ꩻရေꩻနဝ်ꩻ ခွုမ်မာꩻမု သမ်းအဲဉ်ထဝ်း၊ အဝ်ႏလိုႏထွာတဝ်းသွူ၊ ထူႏတာႏဝွန်ႏလဲဉ်းသွူတဲင် လိတ်လုဲင်ꩻယို အဝ်ႏဗာႏနုဲင်းမုဲင်ꩻ၊ ထွာသင်ꩻနုဲင်းမုဲင်ꩻနဝ်ꩻ ရုဲင်းရုဲင်းဟန်ဟန် အဝ်ႏလိုႏခွုမ်မာꩻလွေꩻငါႏနဝ်ꩻသွူ။ လိတ်ယေန်ႏအရေꩻယို အဝ်ႏလိုႏမာꩻလဲဉ်းသွူ သမ်းငမ်းဗာႏဒျာႏ လိုꩻတဖြာꩻတစွိုꩻတဲင် မာꩻထွာတဝ်း၊ မာꩻဗွုန်ႏတဝ်းနဝ်ꩻလဲ့ ထွာသင်ꩻတဝ်းသွူ၊ လိတ်ယေန်ႏအရေꩻယိုနဝ်ꩻ တပွိုင်းဝွို့ဗာႏတဝ်းပါꩻမုဲင်ꩻမုဲင်ꩻတဲ့ လိုꩻအဖြာꩻမုဲင်ꩻ မဉ်ႏဖေႏမာꩻတဝ်းနဝ်ꩻ မာꩻဗာႏတဝ်း၊ လိုꩻအစွိုꩻမုဲင်ꩻ မဉ်ႏဖေႏမာꩻမꩻ မာꩻဗာႏနဝ်ꩻလဲ့ ထွာသင်ꩻတဝ်းသွူ၊ ပေါ့ရိုꩻသွူ ပအိုဝ်ႏလိတ်လုဲင်ꩻတွမ်ႏ ယေန်ႏငဲးရေꩻထာꩻမာꩻယို ထွာအထိုသွတ်ꩻသွူ။ ပအိုဝ်ႏကို ကအဝ်ႏလွဉ်ဒါႏ အစွိုꩻမန်ႏသမျယို အဝ်ႏဗာႏပအိုဝ်ႏလိတ်ယေန်ႏအစွိုꩻဆꩻလနဝ်ꩻသွူ၊ ထွာမုဲင်ꩻနဲးတဲင် ခွုင်းကားတဲင် ပအိုဝ်ႏအစွိုꩻမန်ႏသမျယို အဝ်ႏဒေါ့ꩻအဝ်ႏသွုံꩻ၊ အဝ်ႏတဲမ်း၊ အဝ်ႏကွဉ်ကꩻ ပအိုဝ်ႏလိတ်လုဲင်ꩻ၊ ငဝ်းငွါ၊ ကွဉ်ကꩻတွော့ꩻနဝ်ꩻသွူ။ နဲင်ႏငံႏရေꩻအစွိုꩻဒျာႏတွော့ꩻ လွဉ်ဒေါ့ꩻလိတ်လုဲင်ꩻနဝ်ꩻ မာꩻနုဲင်းယိုဟုဲင်း၊ မာꩻနုဲင်းနဝ်ꩻဟုဲင်း၊ မာꩻမွုန်းနုဲင်းယိုဟုဲင်း-စတဲင် ရဲးကန်ႏကွက်လိတ်လုဲင်ꩻအရေꩻ တလꩻတဝ်းနဝ်ꩻသွူ။

ကွပ်တမုဲင်ꩻနဲးတဲင် လိတ်လုဲင်ꩻသားယိုနဝ်ꩻ အခိန်ႏဗွေ အဝ်ႏထောင်ထွား သုတေသနလိတ်လုဲင်ꩻအရေꩻတဲင် ပေါ့လိတ်လုဲင်ꩻအရေꩻနဝ်ꩻ ဝွေꩻထွာပညာႏသျင်ႏနဝ်ꩻသွူ၊ နဝ်ꩻလꩻ လိုꩻကအဝ်ႏမာꩻဒျာႏ နဲင်ႏငံႏရေꩻသားလဲ့ ထွာဒျာႏနဲင်ႏငံႏရေꩻသားတဲင် လိတ်လုဲင်ꩻအရေꩻကိုနဝ်ꩻ ခွုမ်မာꩻလွဉ်ꩻဗာႏ နဲင်ႏငံႏရေꩻသား ထာꩻမဉ်ထွာနဝ်ꩻ ထွာတဝ်း။ နဝ်ꩻမꩻ နဲင်ႏငံႏရေꩻသားကဒေါ့ꩻရိုꩻတွိုင်ꩻဒျာႏ "မာꩻမွုန်းနုဲင်းယို၊ မာꩻနုဲင်းယိုနဝ်ꩻ လိတ်မဲဉ်ႏတဝ်း၊ လိတ်မဲဉ်ႏနဝ်ꩻ နုဲင်းယိုဒျာႏ"နဲင်းငဝ်းယိုစားဖုံႏနဝ်ꩻ လိတ်ယေန်ႏသားတဖြာꩻ မဉ်ႏကျင်ႏလယ်ႏကျင်ႏလဲပ်မွေး၊ မဉ်ႏထောင်ထွား သုတေသနမွေး လိတ်လုဲင်ꩻရေꩻနဝ်ꩻ အမဲဉ်ႏအမဲဉ်ႏတွိုင်ꩻယို ဒေါ့ꩻရုဲင်းမာꩻရုဲင်းဗာႏသွူ။ တွိုႏယိုနဝ်ꩻ လိတ်လုဲင်ꩻပညာႏသျင်ႏသီး လဲင်ꩻဒေါ့ꩻယီးနယ်နေးသွူလဲ့ မွေးလွိုႏလွိုႏ၊ မွေးတဝ်းလွိုႏလွိုႏ၊ လိတ်လုဲင်ꩻအရေꩻသားလိုꩻစွိုꩻ တမွေးတဝ်း မဉ်ႏဒေါ့ꩻလွဉ်လဲ့ ဆွတ်ꩻလွိုႏလွိုႏ၊ မာꩻလွိုႏလွိုႏ၊ နမ်းလိတ်လုဲင်ꩻသားအရေꩻ၊ နမ်းထာꩻမာꩻဒျာႏသွူလဲ့ တပဲင်ႏချာꩻနွောင်ꩻတဝ်းနဝ်ꩻက နီပအိုဝ်ႏလိတ်လုဲင်ꩻ ထင်ႏထိုဖဲ့ꩻယို အယွိုက်ꩻထိုꩻအီဒါႏနဝ်ꩻသွူ။

မဉ်ႏထွားနုဲင်းယင်းဒါႏ လိတ်လုဲင်ꩻချို့ꩻယွင်ꩻချက်ဖုံႏ၊ လိတ်လုဲင်ꩻတွမ်ႏငဝ်းငွါ လွောက်ꩻဖက်မုဖုံႏ၊ လိတ်ဖြုံႏကထွာလွဉ်ဒါႏ သဘောꩻသဘာဝ သေန်ႏလျောႏမု အဝ်ႏတအဝ်ႏတဝ်းဖုံႏနဝ်ꩻလဲ့ အဝ်ႏလိုႏထောင်ထွားငါႏသွူ၊ သမ်းအဝ်ႏရိုꩻ ပင်ႏထိုလိတ်လုဲင်ꩻအရေꩻလဲ့ တွိုႏလိတ်ဖြုံႏ အငဝ်းသေန်ႏလျောႏမုꩻ အဝ်ႏတအဝ်ႏတဝ်း၊ လိုမ်းတလိုမ်းတဝ်းနဝ်ꩻ အဝ်ႏထီႏဗာႏ အဝ်ႏဒျာႏတွိုင်ꩻတွိုင်ꩻသွူ၊ လွေꩻပင်ႏထို အဖဲ့ꩻမုဲင်ꩻအခဝ်မုဲင်ꩻကရိုꩻနဝ်ꩻ အဝ်ႏလိုႏယူႏစဉ်ꩻစာꩻချာငါႏသွူ။ နုဲင်းယိုခါ လိတ်စောင်ႏကိုဖုံႏတရိုꩻတဝ်း၊ တဲမ်းလိတ်ဆရာႏသီးဖုံႏ ကအဝ်ႏသွုံꩻဒါႏ လိတ်ဖြုံႏဖုံႏ အတဗွိုန်တဝ်းဝင်ꩻနဝ်ꩻ အဝ်ႏထီႏဗာႏနဝ်ꩻသွူ၊ နုဲင်းဒျာႏဆꩻလယိုဖုံႏနဝ်ꩻသွူ။

  • တဆုဲင်ꩻ ဝဟွဲး မသွတ်ꩻ မုဲင်ပက်ꩻငါ=တွမ်ႏ ယိုတဖြုံႏ (တွမ်ႏ) အေလျာ တဆုဲင်ꩻ ငေါꩻလ မသွတ်ꩻ မုဲင်ပက်ꩻငါ=တောမ်ႏ ယိုနီဖြုံႏနဝ်ꩻ အဖြုံႏမုဲင်ꩻလိတ်ဖြုံႏ (တောမ်ႏ)အငဝ်းမဲဉ်ႏတနꩻလွဝင်ꩻ၊ အဖြုံႏမုဲင်ꩻနဝ်ꩻ လိတ်ဖြုံႏအလွေꩻအသဲင်ꩻ အထွာအလွဉ်မဲဉ်ႏနဝ်ꩻ လိတ်ယေန်ႏတာႏဝွန်ႏကအဝ်ႏဒါႏ လိတ်ယေန်ႏအစွိုꩻယို အဝ်ႏလိုႏထောင်ထွားတွော့ꩻ အဝ်ႏလိုႏအွဉ်ႏထွော့လွေꩻလဲဉ်းသွူ။

လိတ်ယေန်ႏအနေႏ ထောင်ထွားသွူတွော့ꩻ အမဲဉ်ႏတွိုင်ꩻ ထူႏသွုံꩻခွင်ꩻ၊ အွဉ်ႏထွော့ခွင်ꩻ မဉ်ႏတအဝ်ႏတဝ်း၊ မဉ်ႏအဝ်ႏနာႏခံႏဗာႏဒွိုန်းက လိုꩻတဖြာꩻငဝ်း၊ လိုꩻတစွိုꩻငဝ်းနဝ်ꩻ နီပအိုဝ်ႏလိတ်ယေန်ႏယို အွဉ်ႏစွဉ်ႏလဲ့ အဝ်ႏခြေင်လွုမ်ꩻအမဉ်ꩻသွူ၊ ထွာဒျာႏ အခရာႏတပေါႏထန်ႏတဝ်းအစွိုꩻသွူ။ နုဲင်းလိတ်ဖြုံႏကီယိုဖုံႏအကို မဉ်ႏထောင်ထွားနေး ပအိုဝ်ႏသရ (၁၆)ဖြုံႏအကိုနဝ်ꩻ တွမ်ႏ=ယိုတဖြုံႏနဝ်ꩻ အ အာ၊ အိ အီ၊ အု အူ၊ အေ့ အေ၊ အဲ့ အဲ၊ အုဲင့် အုဲင်၊ အော့ အော်၊ အို့ အို-ယိုဖုံႏအကို ထွာအဝ်ႏဗော့ꩻတဝ်း သရတဖြုံႏနဝ်ꩻသွူ။ ကွဲးတွော့ꩻ မဉ်ႏထွားနေးလိတ်မွူးတွယ်ꩻနဝ်ꩻ တွပ် တွပ်ꩻ တွမ် တွမ်ꩻ တွမ်း တွမ်ႏ အဝ်ႏလွဉ်နုဲင်းယိုသွူ။ အွိုးလိတ်မွူးစောင်ႏကိုနဝ်ꩻ သမ်းအဝ်ႏတဲမ်းခါꩻ မုဲင်ကီလိတ်ဖြုံႏ ကထန်ႏဒါႏအငဝ်းယို (မ်-မသွတ်ꩻကထန်ႏဒါႏအငဝ်းနဝ်ꩻ အွဉ်ႏဗွိုန်ပီဝင်ꩻ)နုဲင်းနဝ်ꩻသွူ။

ထွိုင်းထွားချာ နီသွဉ်းသီး ပအိုဝ်ႏလိတ်ဖြုံႏနဝ်ꩻ လွံꩻ-လွမ် ယိုနီဖြုံႏနဝ်ꩻ အငဝ်းအွဉ်ႏထန်ႏဗွိုန်လꩻနေဟောင်း၊ မဉ်ႏထွားအဖြုံႏရီး (လွံꩻ ယိုမဉ်ႏသုံꩻနဝ်ꩻ ထီလွံꩻထီလျား)၊ ထွိုင်ႏတွိုႏအဖြုံႏဆုဲင်ꩻ(လွမ် ယို မဉ်ႏသုံꩻနဝ်ꩻ ဒဲဉ်လွမ်)အဝ်ႏနုဲင်းနဝ်ꩻသွူ။ မဉ်ႏထွားယင်း လိတ်ဖြုံႏလောင်ႏလင်ဖုံႏဒျာႏတဲ့နဝ်ꩻ သွံ-သွမ် ယိုနီဖြုံႏလဲ့ အငဝ်းအွဉ်ႏထန်ႏဗွိုန်ဝင်ꩻလꩻနေဟောင်း၊ မဉ်ႏထွားအဖြုံႏရီး (သွံ နဝ်= တာ နီ သွံ) အဝ်ႏထီႏဗာႏဒျာႏနုဲင်းနဝ်ꩻ၊ (သွမ် တွော့ꩻ= တာ နီ သွမ်)နဝ်ꩻ ထီႏဗာႏနဝ်ꩻသွူ။ မဉ်ႏနုဲင်းယင်း သွမ်ꩻနဝ်ꩻလဲ့ (သွမ်ꩻ နဝ်ꩻ-တာ နီ သွမ်ꩻ)နဝ်ꩻ တထီႏဗာႏတဝ်း၊ အဝ်ႏထီႏဗာႏအာဒျာႏ (သွမ်ꩻ နဝ်ꩻ ဒဲဉ်သွမ်ꩻ)အီႏထွာဒျာႏနုဲင်းနဝ်ꩻ၊ အဝ်ႏထီႏဗာႏဒျာႏနုဲင်းနဝ်ꩻဖုံႏသွူ။ မဉ်ႏတွိုႏယင်း တောမ်ႏ-ယိုတဖြုံႏနဝ်ꩻ အ အာ၊ အိ အီ၊ အု အူ၊ အေ့ အေ၊ အဲ့ အဲ၊ အုဲင့် အုဲင်၊ အော့ အော်၊ အို့ အို-ယိုဖုံႏအကို ထွာ(အော့ အော)သရယိုနီဖြုံႏနဝ်ꩻသွူ။ အဝ်ႏ(အော့ အော)သရယို လုဲင်ႏသော့ꩻ(တ)ဗီးတဲင် ထွာလွဉ်(တော)နဝ်ꩻသွူ၊ အဝ်ႏတောယို အွဉ်ႏတွယ်ꩻယင်း(မ်)သွတ်ꩻတဲင် ထွာလွဉ်(တော+မ်=တောမ်)နဝ်ꩻအကို ပအိုဝ်ႏငဝ်းစဲဉ်ႏအလꩻ (နီ လစ်ꩻ သူခါ အမုဲင်ပါ) တောပ် တောပ်ꩻ တောမ် တောမ်ꩻ တောမ်း တောမ်ႏ ယိုအတွိုင်ꩻ တောမ်ႏလိတ်ဖြုံႏယို ထွာလွဉ်ဗာႏ ရိုꩻနုဲင်းနဝ်ꩻတွော့ꩻ သုံꩻနုဲင်းနဝ်ꩻသားတဲ့ အဝ်ႏနဝ်ꩻသွူ။ ကီယိုဖုံႏအကို (လွံꩻ၊ သွံ)လိတ်ဖြုံႏယိုဖုံႏနဝ်ꩻလဲ့ သရ(၁၆)ဖြုံႏအကို ထီႏမော့ꩻတပါသော့ꩻတဝ်းနေနေသွူ၊ ယဟန်ႏသား လိုꩻကထောင်ထွား လိတ်တောမ်ႏသရသားနဝ်ꩻ အဝ်ႏသရမာꩻထွာလွဉ်ထွူ အွဉ်ႏတွယ်ꩻယင်းဗီးတွော့ꩻ အငဝ်းကထန်ႏနွောင်ꩻဒါႏ(သွံ၊ လွံꩻ)ယို အဝ်ႏဒျာႏ (သိုမ်၊ လိုမ်ꩻ)ရိုꩻနုဲင်းနဝ်ꩻတွော့ꩻ သုံꩻနုဲင်းနဝ်ꩻသားတဲ့ အဝ်ႏထီႏဗာႏနဝ်ꩻသွူ။ (သိုမ်၊ လိုမ်ꩻ)ယို သရ(၁၆)ဖြုံႏအကို အဝ်ႏ(အို)သရယိုတဲင် မဉ်ႏအွဉ်ႏတွယ်ꩻတွမ်ႏယင်း (မ်-မသွတ်ꩻ)နဝ်ꩻ အီႏထွာထန်ႏလွဉ် (အို+မ်=အိုမ်)နဝ်ꩻမꩻ (သိုမ်၊ လိုမ်ꩻ)အငဝ်းယို စွို့ꩻမဲဉ်ႏလွဉ်ယင်း ရိုꩻနုဲင်းနဝ်ꩻတွော့ꩻ သုံꩻနုဲင်းနဝ်ꩻသားတဲ့ အဝ်ႏထီႏဗာႏနဝ်ꩻသွူ။ နဝ်ꩻမꩻ နီပအိုဝ်ႏလိတ်ဖြုံႏဖုံႏ ကတဗက်တဗွိုလွဉ်ဗာႏနုဲင်းယိုနဝ်ꩻ ဒဲဉ်(လောမ်)(သွမ်/သောမ်)စာ၊ လောင်ꩻ(သွမ်ꩻ/သောမ်ꩻ)၊ ဗွူ(သွမ်း/သောမ်း)၊ အရောင်ႏ(သွမ်ႏ/သောမ်ႏ)၊ နီ(တွံႏ/တွမ်ႏ/တောမ်ႏ)သီ၊ (လွံꩻ/လိုပ်ꩻ)ခြံသား၊ အုံ(ကွံ/ကိုမ်)၊ ထီ(လွံꩻ/လိုမ်ꩻ)၊ (ထွံး/ထိုမ်း)ပနား၊ လိုမ်း(ကွံႏ/ကိုမ်ႏ)လိတ်ဖြုံႏယိုဖုံႏနဝ်ꩻ ကထွာပအိုဝ်ႏလိတ်လုဲင်ꩻဆဲင်ႏရာꩻအစွိုꩻ ဗဟိုႏသံဃာႏအစွိုꩻတဲ့နဝ်ꩻ၊ ပအိုဝ်ႏလိတ်ယေန်ႏအစွိုꩻတဲ့နဝ်ꩻ ထောင်ထွားထွူတွော့ꩻ အဝ်ႏလိုႏအွဉ်ႏထွော့လွေꩻဖေႏငါႏလဲဉ်းသွူ။

ပအိုဝ်ႏတစွိုးခွိုꩻလွုမ်းလိတ်လုဲင်ꩻအရေꩻယို ဖေႏတာႏဝွန်ႏလဲဉ်းသွူ လိတ်လုဲင်ꩻဆဲင်ႏရာꩻ ဗဟိုႏသံႏဃာႏအစွိုꩻ၊ ပအိုဝ်ႏလိတ်ယေန်ႏအစွိုꩻဖုံႏက အစွိုꩻထာꩻမာꩻ တာႏဝွန်ႏအတွိုင်ꩻ ဝင်ꩻထောင်ထွားခွုမ်မာꩻလဲဉ်းသွူ၊ မဉ်ႏအဝ်ႏလွေꩻနာႏခံႏဗာႏတေားဒျာႏ လိတ်လုဲင်ꩻခရာႏတမုဲင်ꩻမုဲင်ꩻ တသေနာႏတဝ်း တီဖိုးသားငဝ်းနဝ်ꩻ ကအွဉ်ႏဒါႏဆဲင်ႏရာꩻအစွိုꩻဖုံႏယို အခရာႏအီႏပေါႏဗာႏ တယိုꩻတဝ်းကရိုꩻနဝ်ꩻ မဉ်ႏတွိုႏအပတ်ငါသူꩻ မဲ့ꩻခွေသွဉ်းမူႏ အီႏဆွေꩻနွေꩻဒင်ႏပျꩻသွုပ်လွေꩻယင်းသွူ။

မဉ်ႏရက်မွေးပအိုႏ အဝ်ႏလိုႏပင်ႏထိုနီလိတ်(၂)[မွဉ်းဖျင် | မွဉ်းဖျင်အရွီးခိုႏ]

ခွေသွဉ်းမူႏနဝ်ꩻ တဲမ်းကျင်ႏလယ်ႏငါႏ လိတ်ပအိုဝ်ႏနုဲင်းနဝ်ꩻလဲ့ တမွေးတဝ်း၊ ကွဲးတွော့ꩻ ခွေသွဉ်းမူႏထာꩻယူႏဖုံႏ ကမဉ်တဲမ်းထန်ႏနဝ်ꩻ အဝ်ႏနေနေသွူ၊ လိတ်ပအိုႏလဲ့ ဒါႏငါႏလဲ့တမွေးတဝ်း၊ ခြပ်လိတ်ရဲဉ်ႏဖုံႏလဲ့ တဒါႏတဝ်း၊ တူႏတူႏတေတေ ထီးထီးထွော့ထွော့ တကြွꩻတကြိꩻတန်ဒျာႏကရိုꩻနဝ်ꩻ ခွေသွဉ်းမူႏဝွန်ႏခံႏဒျာႏသွူ။ ကွဲးတွော့ꩻ လာကလဲန်း ခမ်းသားငဝ်းလိတ်သေသင်ꩻ အမုဲင်(၃)၊အစဲန်ႏ(၁၄)ကထွိုင်ႏထန်ႏလွဉ်၊ ခွေသွဉ်းမူႏ ကထွိုင်ႏထီႏထွားချာ ခွေသွဉ်းမူႏလိတ်မူနဝ်ꩻ ခြွူႏမွဉ်းသား(အယ်ဒီတာ)စွိုꩻသီး ခြွူႏမွဉ်းလွုမ်းချောꩻတွော့ꩻ ဟောꩻတဲ့ဟဝ်လဲန်းသွူ၊ တဲမ်းဖိုတဝ်းရောမ်ဖြုဲင်ꩻတဲင် ထွိုင်ႏထီႏဗာႏပါနုဲင်းနဝ်ꩻနဝ်ꩻ ခွေသွဉ်းမူႏ အီႏတဲမ်းထဲင်းလိတ်ယို အာႏအဝ်ႏအီမွေးစွဉ်ႏသွူ။ ခွန်သန်ꩻအောင်ႏတဲ့ အဝ်ႏဒေါ့ꩻဖိုခွေသွဉ်းမူႏ "တဲမ်းလိတ်နဝ်ꩻ တယပ်ꩻငါႏတဝ်း၊ ဗွိုန်နုဲင်းကထွာတမျိုꩻမျိုꩻခိန်ႏယို နီကဒေါ့ꩻနယ်ဝင်ꩻနဝ်ꩻအတွိုင်ꩻ တဲမ်းလင်ꩻဗော့ꩻနုဲင်းနဝ်ꩻ၊ မဉ်ႏညမဲ့ꩻ ကျင်ꩻလွဉ်ဒျာႏတဲ့၊ နီပအိုႏကို သမဲင်ꩻသက်သေႏဖုံႏ ကအဝ်ႏဗာႏတဝ်း၊ ကထိုꩻမားဗာႏနဝ်ꩻ ကွပ်တဲမ်းမုဲင်သားအဲန်ထဝ်း၊ ကွပ်တဲမ်းလိတ်သားဆေ့ꩻခြေားတဲ့ပါပါ၊ နဝ်ꩻမꩻ သွဉ်တဲမ်းအအာလိတ်ဟုဲင်း"တဲ့ ခွေသွဉ်းမူႏလဲ့ အဝ်ႏသွဉ်တဲမ်းစံꩻလွေꩻခန်းဒျာႏသွူ။

နဝ်ꩻမꩻ ယိုနဝ်ꩻ သွဉ်းမူႏမဉ်ဆွေꩻနွေꩻလွေꩻယင်း လာကလဲန်းအသွုပ်၊ မဉ်ႏနုဲးမန်းငဝ်းနဝ်ꩻ "စာပေမရှိသောလူမျိုးသည် ကျောရိုးမရှိသော သတ္တဝါနှင့်တူသည်"အခရာႏယိုသွူ။ လွိုတဲင် လိတ်လုဲꩻငဝ်းငွါ တအဝ်ႏတဝ်းလိုꩻမျိုꩻယို အဗွိုန်ထိုꩻနုဲင်းအငင်းဆွတ်ꩻ တအဝ်ႏတဝ်း သတ္တဝါႏတဲင် မဉ်ႏထွိုင်ႏလွေꩻနွောင်ꩻခန်းထာꩻလဲ့ အတတွိုႏညာꩻလꩻတဝ်း၊ တဆင်ႏဆင်ႏ အဝ်ႏခြိုꩻထွိုင်ႏဗော့ꩻယွဲးယွဲး။ လိတ်လုဲင်ꩻအဲန်ထဝ်းလိုꩻမျိုꩻနဝ်ꩻ အတတဉ်ႏခြွော့နွောင်ꩻတဝ်းလဲ့ လိတ်လုဲꩻကအဝ်ႏဒါႏ လိုꩻမျိုꩻနဝ်ꩻ အတဉ်ႏခြွော့နွောင်ꩻသေႏသေႏ ဒေါ့ꩻရိုꩻနွောင်ꩻနေဟောင်း၊ မဉ်ႏရိုꩻတဉ်ႏခြွော့နွောင်ꩻလဲ့ မဉ်ႏတွိုႏအခေႏအနေႏ အခိန်ႏခါႏအဝ်ႏနုဲင်းမုဲင်ꩻနဝ်ꩻမꩻ အီႏတဉ်ႏခြွော့နွောင်ꩻ။ မဉ်ႏရိုꩻ တဉ်ႏခြွော့နွောင်ꩻတဝ်းလဲ့ မဉ်ႏတွိုႏအခေႏနေႏနုဲင်းမုဲင်ꩻ၊ အခိန်ႏခါႏအဝ်ႏနုဲင်းမုဲင်ꩻနဝ်ꩻ လိုꩻမျိုꩻလိတ်လုဲꩻငဝ်းငွါအဝ်ႏဒျာႏလဲ့ တတဉ်ႏခြွော့နွောင်ꩻတဝ်းဗာႏအကျောင်ꩻနဝ်ꩻ။

ဒုတိယအခြွိုက်အနေႏ လိတ်လုဲꩻအဝ်ႏဒျာႏ တဉ်ႏခြွော့ဗာႏအခေႏနေႏနဝ်ꩻ-

  • ၁။ လိုꩻကထိန်ꩻသိမ်ꩻ လိုꩻမျိုꩻလိတ်လုဲꩻသားယို ဒါႏသေနာႏတဝ်း ဝွေꩻအလိုꩻမျိုꩻလိတ်လုဲꩻထွူ ပတ်သဲစ်တွမ်ႏ ဝွေꩻအလိုꩻမျိုꩻလိတ်လုဲꩻလဲ့ ဝွေꩻတထောင်ထွားဖိုတဝ်း၊ လိတ်လုဲꩻချို့ꩻယွင်ꩻချက်ဖုံႏ၊ လိတ်လုဲꩻတွမ်ႏငဝ်းငွါ လွောက်ꩻဖက်မု အဝ်ႏတအဝ်ႏတဝ်းဖုံႏ၊ လိုႏအပ်ချက်ဖုံႏ ဟန်ႏသနီꩻ နီလိတ်လုဲꩻ အလွေꩻအသဲင်ꩻငါတဲ့ ပွိုင်းဝွို့တွမ်ႏ သေန်ႏလျောႏမု အဝ်ႏတအဝ်ႏတဝ်း တသေနာႏတဝ်း၊ လိတ်လုဲင်ꩻရေꩻရာႏ အဝ်ႏလိုႏပင်ႏထိုကျောင်ꩻလဲ့ တသေတဝ်း၊ ရုဲင်ꩻတသွိုးမုငါလဲ့ တအဲန်ထဝ်း၊ နမ်းတွမ်ႏနမ်းချာဒျာႏဖုံႏလဲ့ အလိုꩻမျိုꩻလိတ်ချာတဲ့ တဒါႏတဝ်းအခိန်ႏ။
  • ၂။ ထိန်ꩻသိမ်ꩻလိတ်လုဲꩻသား လိုꩻစွိုꩻနဝ်ꩻ ကတွိုးထိန်ꩻသိမ်ꩻလိတ်အာႏပေႏ၊ နမ်းတွမ်ႏနမ်းချာ ဒါႏတဝ်းသွူတကာႏတဝ်း ကေားထူႏသုံꩻသား၊ ကေားသွဉ်ထူႏသားဖုံႏအဲန်ထဝ်း၊ လိတ်လုဲင်ꩻလဲ့ ပြုဲင်ပြုဲင်ပြီပြီ လီလီလာလာ အီႏဟောꩻဗာႏ အီႏထွားဗာႏနုဲင်းမုဲင်ꩻသေတဝ်း၊ ကေားဖတ်သားတဲ့ သꩻကွဲးလွꩻလွꩻ၊ သွဉ်တဲ့ သမ်းယပ်ꩻယပ်ꩻယိပ်ꩻယိပ်ꩻ၊ လိတ်ဖြုံႏတွမ်ႏအငဝ်းဖုံႏလဲ့ စွို့ꩻမဲန်ႏတဝ်းဝင်ꩻတဲင် လိုꩻယွဲးသီးအတာႏ အီႏဟောꩻဗာႏတဲ့ သꩻယပ်ꩻ၊ အီႏသွဉ်ဗာႏတဲ့ သꩻယပ်ꩻ-စတဲင် သꩻဝင်ႏစာꩻခရာႏတအဝ်ႏတဝ်းအခိန်ႏ။

နုဲင်းယိုခါ နီပအိုႏလိတ်ꩻလုဲꩻအကို အခေႏနေႏနဝ်ꩻ ထွားလိတ်ပရိသတ်သီး ထီႏနုဲင်းမုဲင်ꩻဟောင်း၊ လိတ်လုဲင်ꩻတဉ်ႏခွေါင်အီတာႏ ကထွာလိတ်ယေန်ႏယို တာႏဝွန်ႏကေႏဒျာႏဟောင်း၊ လိတ်လုဲꩻတဉ်ႏခွေါင်အီတဝ်းအတာႏ ကလဲန်းလာ အချက်(၁)ကို တာႏဝွန်ႏချို့ꩻယွင်ꩻယွမ်ꩻထိုꩻဟောင်း၊ ယိုအကို အချက်(၃)အလꩻ တာႏဝွန်ႏကေႏဗွေတောဒျာႏဟောင်း- နဝ်ꩻထွူ နုဲင်းယင်းအချက်(၄)လဲ့ꩻနဝ်ꩻ၊ နီပအိုႏယိုခါ အခေႏနေႏ အဝ်ႏတွိုႏလဲန်းနုဲင်းနဝ်ꩻသွူ။ ကွပ်တမုဲင်ꩻဟောင်းနဲးတဲင် နီပအိုႏလိတ်ယိုခါနဝ်ꩻ ခွေတဲမ်းဒျာႏတစွိုး နာꩻတဲမ်းဒျာႏတမျိုꩻတဲင် ကထွာဒါႏထွားလိတ်သားနဝ်ꩻ ဟောꩻတဒါႏတဝ်းဒွုမ်၊ တသေနာႏတဝ်းဒွုမ်သွူ။ လိတ်လုဲꩻ ကအဝ်ႏတဗက်တဗွိုဗာႏနုဲင်းယိုနဝ်ꩻ ရိုꩻဗာႏလိတ်လုဲꩻရေꩻရာႏဆဲင်ႏရာꩻသား အွဉ်ႏထွော့ပဲင်ႏခွင်ꩻ၊ ဆုံꩻဖျတ်ပဲင်ႏခွင်ꩻ ကအဝ်ႏဒါႏ လိတ်ယေန်ႏစွိုꩻယို အဝ်ႏလိုႏမာꩻနဝ်ꩻသွူ။ ယိုခါ ပအိုႏကို လိတ်စောင်ႏဖုံႏနဝ်ꩻ အဝ်ႏထန်ႏအာဒျာႏလဲ့ မဉ်ႏထွားတဖွူꩻကိုလဲ့တမျိုꩻ၊ မဉ်ႏဟောꩻယင်းတစောင်ႏကိုလဲ့တစား၊ လိုꩻယွဲးသီးအတာႏ ဟောꩻလိတ်စောင်ႏယို အီႏဒါႏလꩻအီသွူ လိတ်ပအိုႏလဲ့ ထွိုင်ႏဟောꩻယင်းတစောင်ႏနဝ်ꩻ သမ်းအဝ်ႏဒျာႏတမျိုꩻတဲင် လိုꩻယွဲးသီးအတာႏ ဟောꩻလိတ်တဲ့ သꩻလွꩻလွဉ်လို့ထိုꩻဗာႏသွူ။

မဉ်ႏသွဉ်ခိန်ႏနဝ်ꩻ တမျိုꩻ၊ မဉ်ႏထုမ်ႏထွားလိတ်စောင်ႏကိုနဝ်ꩻ သမ်းအဝ်ႏဒျာႏတမျိုꩻတဲင် မာꩻနုဲင်းမုဲင်ꩻမဉ်သွဉ် နီလိတ်ပအိုႏဟောင်းနဝ်ꩻ စာႏနာႏဗဲင်းမွိုင် ပအိုႏလိတ်ယေန်ႏအစွိုꩻဟွေး- မဉ်ႏအဝ်ႏလွေꩻဗော့ꩻနုဲင်းယိုနဝ်ꩻ အဗွိုန်ပီထိုꩻနုဲင်းအချက်(၄)နဝ်ꩻတဲင် လိတ်လုဲꩻအဝ်ႏဒျာႏလဲ့ မဲ့ꩻဗွိုန်ထိုꩻပါꩻလိတ်လုဲꩻတအဲန်ထဝ်းသွူ။ ကထွာဗာႏနုဲင်းယိုအကျောင်ꩻတရာꩻနဝ်ꩻ ကွပ်နီပအိုႏလိတ်လုဲꩻတွမ်ႏယေန်ႏငဲးသား တဆုံꩻဖျတ်အွဉ်ႏထွော့တဝ်းတွော့ꩻသွူ။ မဉ်ႏဒေါ့ꩻမဉ်ႏဆွေꩻနွေꩻလဲ့ "လိတ်လုဲင်ꩻနဝ်ꩻ မဲ့ꩻသံႏဃာႏမာꩻဒျာႏ-တဲ့"လိတ်လုဲꩻတွမ်ႏယေန်ႏငဲးသားထာꩻမာꩻနဝ်ꩻ အုံပွေါးတေားဒျာႏဝင်ꩻမာꩻသွူ၊ မဉ်ႏထွားယင်း သံႏဃာႏဖဲ့ꩻလဲ့ လိတ်လုဲꩻနဝ်ꩻ မာꩻခွင်ꩻအဝ်ႏဒျာႏ မာꩻခွင်ꩻကအဝ်ႏဒါႏသားအလောင်းတဲ့။

နီပအိုႏလိတ်လုဲꩻဒျာႏ နီမဉ်ႏတမာꩻတဝ်းယိုခါ၊ နီမဉ်ႏတဖြွမ်းတဝ်း၊ နီမဉ်ႏတမာꩻဗူႏတဝ်းနဝ်ꩻ အီႏမာꩻမုဲင်ꩻခါ၊ ပါꩻမုဲင်ꩻအီႏမာꩻဖေႏ နုဲင်းယိုခါ သမ်းရိုꩻမွုန်းတဝ်း အီႏအွဉ်ႏထွော့လိတ်မူ၊ အီႏဆုံꩻဖျတ်လိတ်မွူး နီပအိုႏအချင်ꩻချင်ꩻ ပအိုႏလိုꩻမျိုꩻကိုလဲ့ ပအိုႏလိတ်လုဲင်ꩻတွမ်ႏယေန်ႏငဲးရေꩻအစွိုꩻ အဝ်ႏခမုဲင်ꩻဗူႏဟောင်း၊ မဉ်ႏရိုꩻအဝ်ႏနီဗူႏနဝ်ꩻ မဉ်ခံႏနေဟောင်း၊ မဉ်ခံႏတဝ်းကွေးနဝ်ꩻ။ မဉ်ႏရိုꩻအဝ်ႏနီဗူႏနဝ်ꩻ မဉ်ခံႏတဝ်းက ဒေါ့ꩻယိုꩻယိုꩻရိုꩻဒွေါင်ႏဒွေါင်ႏ အဝ်ႏတဗူႏပဉ်သွူ၊ အဝ်ႏနီဗူႏနဝ်ꩻ လိုꩻမျိုꩻလင်မဉ်ႏဟွုန်တဲ့ မဉ်ꩻတအွီႏတဝ်းဒျာႏရင်ꩻ။ လိတ်လုဲꩻတွမ်ႏယေန်ႏငဲးရေꩻအစွိုꩻ အဝ်ႏတဗူႏမဉ်ႏရိုꩻလဲ့ ဖူးဝေးပအိုႏခမ်းကောင် ဖူးဝေးပအိုႏခမ်းဒေါမ်သီး နီဖဲ့ꩻနီခဝ် ကအဝ်ႏခွုမ်ကအဝ်ႏသုံꩻဒါႏလိတ်နဝ်ꩻ တမျိုꩻချင်ႏ၊ တစွိုးချင်ꩻ၊ တမူချင်ႏ မွေးနေဟောင်း။

ရွုမ်ꩻနီဖြုံႏ၊ ရွုမ်ꩻနီထွောင်း ကအဝ်ႏသုံꩻဒါႏလိတ်ယို တမူချင်ႏ တမျိုꩻချင်ႏ မဉ်ႏတမွေးတဝ်းနဝ်ꩻ လိတ်လုဲင်ꩻယေန်ႏငဲးရေꩻယို တွမ်ႏမူအဝ်ႏနီဗာႏ၊ တွမ်ႏကအဝ်ႏထွာနီဗူႏနဝ်ꩻ ဗွိုန်ပီဝင်ꩻသွူ။ နုဲင်းယိုခါ ပအိုႏကို ကွပ်လိတ်လုဲꩻတွမ်ႏယေန်ႏငဲးရေꩻ အဝ်ႏနီစွိုꩻ အဝ်ႏနီဗူႏတဲင် လိတ်တဲ့ ထွာအဝ်ႏနီစွိုး အဝ်ႏနီမူနဝ်ꩻသွူ။ လိတ်ကအဝ်ႏ နီစွိုးနီမူနုဲင်းယိုနဝ်ꩻ ဖေႏကထွာတမူချင်ႏ အဝ်ႏလိုႏအွဉ်ႏခြွဉ်း အွဉ်ႏဗူႏလဲန်းသွူ။ နီလိတ်မဉ်ႏအဝ်ႏညီꩻဝင်ꩻ တမူချင်ႏဒျာႏမꩻ နီပအိုႏဖုံႏယို သꩻအီႏအဝ်ႏညီꩻနွောင်ꩻဝင်ꩻ တသွီႏချင်ႏတယာႏချင်ႏသွူ။ ကွပ်စွဉ်ႏနီလိတ်ယို တအဝ်ႏတဝ်း တမူချင်ႏတဲင် ဗော့ꩻလိတ်မူယိုသားလဲ့ သꩻဗွို့ꩻလိတ်မူယို၊ ဗော့ꩻလိတ်မူနဝ်ꩻသားလဲ့ သꩻဗွို့ꩻဒျာႏ လိတ်မူနဝ်ꩻသွူ။ ကွပ်စွဉ်ႏ သꩻဗော့ꩻယို သꩻဗွို့ꩻနဝ်ꩻအသဲင်ႏဖုံႏယို အဝ်ႏတဲင် အခိန်ႏတရွေꩻတဝ်း နီပအိုႏယို ကွပ်သꩻစွယ်ꩻဖုံႏနဝ်ꩻ ထွာအီဒါႏ ထာꩻပြုဲင်လီနဝ်ꩻသွူ။

ပအိုႏလိုꩻမျိုꩻယို အဝ်ႏဖြောꩻပေါင်ꩻသိန်ႏနီသိုမ်ဆီနဝ်ꩻ အကျိုꩻအကျောင်ꩻယိုစားလဲ့ အလွိုးထီႏထွꩻနွောင်ꩻဒျာႏသွူ။ မဉ်ႏထွားထောင်ဒျာႏ နုဲင်းလိတ်ဖုံႏလဲ့ တကွာႏအာ တကွာႏညာꩻတဝ်း၊ အကွာႏဒျာႏကွို့ꩻဆေ့ꩻဆေ့ꩻပေႏလွုမ်ꩻလဲ့ တအုဲႏအဝ်ႏဆွိုင်ꩻနွောင်ꩻတဝ်းနဝ်ꩻ အပါႏလိုꩻမဉ်အွဉ်ႏဆွိုင်ꩻတဝ်းနဲ့၊ အပါႏပအိုႏခမ်းသား တမဉ်ထွာတဝ်းနဲ့၊ အပါႏအွဉ်ငါသားညမ်းတွော့ꩻနဲ့ မလွော်တွော့ꩻ ဝင်ꩻအဝ်ႏအထန်ႏခွုမ်ပဆိုးဒျာႏနဲ့။ ပအိုႏကို လိုꩻကမာꩻဒါႏ လိုꩻမျိုꩻအရေꩻ စွိုးခွိုꩻအရေꩻသားဖုံႏလဲ့ သီအဝ်ႏမာꩻဒါႏ "ပအိုႏစွိုးခွိုꩻအရေꩻ"ကရိုꩻနဝ်ꩻ "နုဲင်းမုဲင်ꩻစားဟောင်း"။ သီအတာႏ ကေပ်ꩻရွဉ်မꩻ ဟဲ့ꩻ"စွိုးခွိုꩻအရေꩻ"နဲ့၊ သီအတာႏ လꩻခင်ႏလမ်းမႏ ဟဲ့ꩻ"စွိုးခွိုꩻအရေꩻ"နဲ့၊ သီအတာႏ လꩻအာႏဏာႏမꩻ ဟဲ့ꩻ"စွိုးခွိုꩻအရေꩻ"နဲ့၊ သီအတာႏ လꩻမာꩻခွင်ꩻမ ဟဲ့ꩻ"စွိုးခွိုꩻအရေꩻ"နဲ့၊ သီအတာႏ ထူႏမဉ်ꩻတာႏတဲ့ ထွာလဲန်း"စွိုးခွိုꩻအရေꩻ"နဲ့၊

တွိုႏစွိုးခွိုꩻရေꩻ အစဲစ်အမဲန်ႏနဝ်ꩻ ထင်းတေားဒျာႏ တမုဲင်ꩻအရေꩻဟောင်း-။ နုဲင်းတဲမ်းလိတ်သား ခွေသွဉ်းမူႏကထင်းနဝ်ꩻ လိုꩻမျိုꩻတမျိုꩻအရေꩻကိုယို အရေꩻတန်လွိုထဲင်း လိတ်လုဲꩻအရေꩻနဝ်ꩻ ရမော့တအဲန်ထဝ်းသွူ [၁]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. နင်ꩻမူႏခမ်းဒေါမ်၊ ခမ်းသားငဝ်းအမုဲင်(၃)၊ အစဲဉ်ႏ(၁၄/၁၅) မဲ့ငါ-၆