ပအိုဝ်ႏလိတ်မွူးတသာ

ပအိုဝ်ႏလိတ်မွူးတသာ "တောင်ႏကီꩻမူ"ပအိုဝ်ႏလိတ်လုဲင်ꩻတိုꩻတက်ရေꩻ "ဗဟိုႏသမဂ္ဂသင်္ဃာႏအစွိုꩻ"မဟာနာယက ဆရာႏတောႏ၊ ဂွိုင်ꩻချုပ်၊ ဂွိုင်ꩻအုပ်၊ ကျောင်ꩻနင်းပုဂ္ဂိုလ်ႏဗွေႏသီး သဖော်ꩻတူႏဆုံꩻဖျတ်လဲဉ်းထွူတဲင် ယံသွဉ်လွဝင်ꩻ စွုမ်ႏရပ် စွုမ်ႏဒုံ စွုမ်ႏဖြာꩻပငါပရာꩻအကျောင်ꩻ တမာနိုꩻဆောႏဟွိုန်ဗာႏနောဝ်ꩻသွူ။

လိတ်မေတ္တာႏရပ်ခံႏ လောဝ်းဟွိုန်ဗာႏ ပညာႏသျင်ႏသီး

နေးတွမ်ႏမေတ္တာႏ လောဝ်းဟွိုန်ထေ့ဗာႏ သင်္ဃာႏပညာႏသျင်ႏသီးဖုံႏထွူဩော။ ခွေသွဉ်း "ခွန်ထွန်းလှိုင်" ကခွုမ်စံႏ တယ်ႏထောင်ႏမာꩻလွေꩻဒါႏ နီပအိုဝ်ႏလိတ်လုဲင်ꩻ တိုꩻတက်စွစ်ꩻလီရေꩻယိုနောဝ်ꩻ လꩻလဲဉ်းနိန်ႏပေါင်ꩻ (၁၄)နိန်ႏလဲဉ်းသွူ၊ ကထေထန်ႏ လိတ်အုပ်အမျိုꩻမျိုꩻတွမ်ႏ လိတ်လုဲင်ꩻယေန်ႏငဲးရေꩻ အခေႏနေႏ၊ လိုꩻကဖတ်ထွားသားလောင်း အခေႏနေႏ၊ ကလဲဉ်းခိုႏချာ ယိုခါခဲ့ꩻတွင်ꩻ အနာႏဂတ်ဆငါ ကာလသွံပါꩻ ထွားချောင်ꩻစွစ်ꩻစွစ်ꩻထွူတဲင် ခွိုင်းတဲင်ကလိုင်ႏလွူꩻ ဖတ်ထွားခွုမ်မာꩻလွေꩻဗာႏ အခိန်ႏကာႏလအတွင်ꩻ နီပအိုဝ်ႏလိတ်လီꩻ လိတ်တသာ နီမျိုꩻအလောင်းယို ကထွိုင်ႏထွားဝွေႏဖန်ႏနောဝ်ꩻရာꩻ အတသာ ကဟောဝ်လဲဉ်းအလီꩻနောဝ်ꩻ ကထဲမ်သော့ꩻဒါႏ သင်္ကေတတွမ်ႏ ကဖꩻခွယ်ꩻထန်ႏဒါႏ ငေါဝ်းတငွါ လိတ်တဖြုံႏဖုံႏနောဝ်ꩻထွူ၊ အလီꩻကဟောဝ်လဲဉ်း အတသာနောဝ်ꩻ လိတ်ဖြုံႏယဟန်ႏကို တဲမ်းလဲ့ယိုꩻ၊ လိုꩻတွိုင်ꩻဖတ်လဲ့လꩻ၊ တဲမ်းသုံꩻတွယ်ꩻလွေꩻတွမ်ႏ အတသာလဲ့အောဝ်ႏ၊ ရော့ꩻသင်ꩻဒျာႏကိုလဲ့ အောဝ်ႏပါနောဝ်ꩻသွူ၊ လိတ်တသာကိုယို ထဲမ်-လုဲင်ႏသော့ꩻထဲင်း ခင်ႏလမ်းအောဝ်ႏနေဒွိုန်းကနေနေသွူ၊ ကွဲးတဲင်တွော့ꩻ ပတ်သဲစ်တွမ်ႏ ကလိုႏဖျင် ထဲမ်ဖုံႏစားနောဝ်ꩻ အသွဉ်သားတာႏဝွန်ႏတမွေးတောဝ်း၊ ပညာႏသျိ ပညာႏသျင်ႏ ပုဂ္ဂိုလ်ႏကဒါႏလျင်ႏလို့ဒါႏ နီပအိုဝ်ႏလိတ်လီꩻ လိတ်တသာ၊ ပအိုဝ်ႏငေါဝ်းငွါ အလွေꩻအသဲင်ꩻသားသီးဒျာႏနောဝ်ꩻမꩻ အီႏဖျင်ထဲမနွောင်ꩻ အင်္ဂါႏလက္ခဏာႏအောဝ်ႏတဲင် မီႏအုံပွေါဒွိုန်းက လိတ်လုဲင်ꩻအက္ခရာႏပြဲ့ꩻစုံႏတဉ်ႏခွေါင်နောဝ်ꩻ အခိန်ႏလို့ခြေင်ဗော့ꩻလွုမ်ꩻနောဝ်ꩻသွူ၊ ပွိုးနောဝ်ꩻမꩻ ယိုခါတွင်ꩻနောဝ်ꩻ ပငါပရာꩻ ယံကသွဉ်လွေꩻဗော့ꩻဒွိုန်းက ကအောဝ်ႏအတွိုင်ꩻယိုအကျောင်ꩻ မေတ္တာႏရပ်ခံႏ လောဝ်းဟွိုန်ထေ့ဗာႏ ပညာႏသျိ ပညာႏသျင်ႏသီးဖုံႏနောဝ်ꩻသွူဩော။

ပအိုဝ်ႏမျိုꩻရက်-ခွန်ထွန်းလှိုင်၊ ၁၃၄၀-ဗွေနေင်ႏ၊ ဒဲဉ်သီႏလာ နျꩻထန်ႏပဉ္စမအလဲင်ႏ အုပ်ပေါင်ꩻ (၅၀၀၀)၊ အငိုꩻ (၃)ဗီႏ၊ ပအိုဝ်ႏလိတ်နျꩻစက်၊ ဝိန်ꩻတောင်ႏကီꩻ။