ပအိုဝ်ႏလိုꩻမျိုꩻကပင်ꩻ

"ပအိုဝ်ႏလိုꩻမျိုꩻကပင်ꩻပူႏဇောႏသဲင်ꩻဗာႏ ဗုဒ္ဓသရီရဓာတ်တောႏသမဲင်ꩻအအဲဉ်ႏ" နွို့သမဲင်ꩻဘုရာꩻမွေႏတောႏကက္ကူႏ အသောကစေႏတီႏအကို ကအီႏပင်ꩻပူႏဇောႏသော့ꩻဒါႏ ဗုဒ္ဓသရီရဓာတ်တောႏနောဝ်ꩻ (ထွာဒျာႏဗွေႏမျတ်ဘုရာꩻဓာတ်တောႏစဲစ်စဲစ်နောဝ်ꩻသွူ။) ဒုံယာမကောလိယဟော်ခံꩻ ပင်ꩻပူႏဇောႏခွင်ꩻကလꩻဒါႏ ဓာတ်တောႏယဟန်ႏကို ဖေႏကလွေꩻပင်ꩻပူႏဇောႏနွောင်ꩻ သရီရဓာတ်တောႏ သီရိလင်္ကာႏခမ်းနောဝ်ꩻ ကလိုႏအပ်ဒါႏ နွို့ထန်ႏအီဝင်ꩻခမ်း လက်မတ်တွမ်ႏကိစ္စအလောင်ႏအလင်ဖုံႏယို ပအိုဝ်ႏစွိုးခွိုꩻအစွိုꩻချွုတ်(PNO)တွမ်ႏ Sri Asia Touriom ထူႏတာႏဝွန်ႏခွုမ်မာꩻလွေꩻနောဝ်ꩻသွူ။ ကအီႏလွေꩻပင်ꩻပူႏဇောႏဒါႏ ဗုဒ္ဓသရီရဓာတ်တောႏအစွိုꩻယို ဗွေႏဆရာႏတောႏ ဦးခန္တီဓဇတွမ်ႏ စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီသီး အွဉ်ငါတဲင် အောဝ်ႏဝေင်ꩻရန်ႏတကွုန်ႏထန်ႏလွေꩻ စင်္ကာပူခမ်း၊ ပါတွမ်ႏစင်္ကာပူခမ်း ရွှေကျောင်းဆရာႏတောႏတဲင် သွုပ်ထန်ႏလွေꩻ သီရိလင်္ကာႏခမ်းနောဝ်ꩻသွူ။ (၁၂-၁၂-၂၀၀၁)နီꩻနောဝ်ꩻ မာꩻလွေꩻဗုဒ္ဓသရီရဓာတ်တောႏ အပ်ဖေႏပူႏဇောႏပွယ်ꩻ အခန်ꩻအနာꩻ၊ အခန်ꩻအနာꩻကို သီရိလင်္ကာႏခမ်းကို ကအောဝ်ႏဒါႏ ဗွေႏဆရာႏတောႏတန်တွမ်ႏ နဲင်ႏငံႏတောႏအကဲႏအတန်ဖုံႏ ကျွꩻထင်ႏလွဉ်နောဝ်ꩻသွူ၊ နေင်ႏ ၁၃၆၃-ဗာႏ၊ လာတထိန်ႏလောင်း(၁၂)နီꩻ (၁၃-၁၂-၂၀၀၁)နီꩻနောဝ်ꩻ အောဝ်ႏသီရိလင်္ကာႏခမ်း ပင်ꩻသဲင်ꩻဗုဒ္ဓသရီရဿဓာတ်တောႏ စင်္ကာပူခမ်းနောဝ်ꩻသွူ။ (၁၅-၁၂-၂၀၀၁)နီꩻ မွူးရောဝ်ꩻခိုႏအခိန်ႏကို အောဝ်ႏစင်္ကာပူခမ်း ပင်ꩻသဲင်ꩻဝေင်ꩻရန်းတကွုန်ႏ ဗုဒ္ဓသရီရဓာတ်တောႏယို လွေꩻသတင်ꩻသွုံꩻယို့ꩻ ဝေင်ꩻရန်ႏကွုန်ႏကို ကအောဝ်ႏဒါႏ မင်းဓမ္မကွုံꩻလောင်း အဘယ လာဘမုနိဘုရာꩻကျောင်ꩻ ဆောင်ကိုနောဝ်ꩻသွူ။ နေင်ႏ ၁၃၆၃-ဗာႏ၊ ဒဲဉ်စေင်လာဆန်ꩻ(၁)နီꩻ (၁၆-၁၂-၂၀၀၁)နီꩻ အောဝ်ႏရန်ႏတကွုန်ႏပင်ꩻသဲင်ꩻ ဟုဲင်ꩻဟိုꩻ၊ အောဝ်ႏဟုဲင်ꩻဟိုꩻတရန်း ပင်ꩻသဲင်ꩻအင်းလေးဒေႏသ နမ်းပန်ႏအလိုတော်ပေါက် ဘုရာꩻကျောင်ꩻကိုနောဝ်ꩻသွူ။ (၂၂-၁၂-၂၀၀၁)နီꩻ အောဝ်ႏနမ်းပန်ႏ ပင်ꩻသဲင်ꩻညောင်ႏရွီႏ၊ ဝေင်ꩻတောင်ႏကီꩻ သဲင်ꩻသတင်ꩻသွုံꩻယို့ꩻ တောင်ႏကီꩻ မြို့လယ်ဓမ္မာရုံကိုနောဝ်ꩻသွူ။ နေင်ႏ ၁၃၆၃-ဗာႏ၊ ဒဲဉ်စေင်လာဆန်ꩻ(၈)နီꩻ (၂၃-၁၂-၂၀၀၁)တနင်ႏနွေႏနီꩻ မွူးရောဝ်ꩻခိုႏ (၆း၀၀)အခိန်ႏ အောဝ်ႏတောင်ႏကီꩻ ပင်ꩻသဲင်ꩻနောဝ်ကက္ကူႏ မွူးယာခိုႏ(၁၀း၄၅)မိနစ် ဗုဒ္ဓသရီရဓာတ်တောႏ တွိုႏသဲင်ꩻဘုရာꩻကက္ကူႏကို ကအောဝ်ႏဒါႏ အပရာဇိတပလ္လင်ႏတောႏမျတ်လောင်းကီနောဝ်ꩻသွူ။ (၂၂-၁၂-၂၀၀၁)နီꩻတွမ်ႏ (၂၃-၁၂-၂၀၀၁)နီꩻနောဝ်ꩻ နေးတွမ်ႏယေန်ႏငဲရေꩻ အကျူႏပဒေႏသာႏ ပအိုဝ်ႏဇာတ်သဘင်ႏဖုံႏတဲင် မာꩻလွေꩻ ပွယ်ꩻကွိုန်ꩻကွိုန်ꩻဟွိုင်ꩻဟွိုင်ꩻနောဝ်ꩻသွူ၊ ကပင်ꩻပူႏဇောႏလွေꩻဒါႏ ဗုဒ္ဓသရီရဓာတ်တောႏပွယ်ꩻယို ပအိုဝ်ႏတစွိုးခွိုꩻလွုမ်းအတာႏ လွုမ်ꩻတကာႏတောဝ်း ခွိုင်းကားတဲင် ဗုဒ္ဓဘာႏသာႏလိုꩻမျိုꩻအတာႏ ဘာႏသာႏရေꩻပွယ်ꩻဒျာႏနောဝ်ꩻသွူ။ အဖဲ့ꩻပေါင်ꩻစွုမ်ႏ စွဲကမ်းကူႏညီႏဖေႏကိုတွော့ꩻ ကမာꩻလွေꩻနွောင်ꩻပွယ်ꩻ ပင်ꩻသဲင်ꩻဗုဒ္ဓသရီရဓာတ်တောႏ မွေႏတောႏကက္ကူႏဘုရာꩻဝဲင်ꩻကိုယို အွဉ်ႏလွေꩻနွောင်ꩻပါစွဉ်ႏပွယ်ꩻတန် တဖြုံႏနောဝ်ꩻသွူ။ အောင်ႏအောင်ႏမျင်ႏမျင်ႏ ကမာꩻနွောင်ꩻဗာႏ ဗုဒ္ဓဿရီရဓာတ်တောႏ ပွယ်ꩻနုဲင်းယိုနောဝ်ꩻ ဗုဒ္ဓသာႏသနာႏနောႏ အစေန်ႏထာဝရ ဖေႏကလေတောင်ႏနွောင်ꩻအီအတာႏလဲ့နောဝ်ꩻ၊ ဗုဒ္ဓဘာႏသာႏလိုꩻမျိုꩻတွမ်ႏ ပအိုဝ်ႏခမ်းရင်ꩻသားဖုံႏအတာႏ ထူႏဂွုဏ်ႏဟောဝ်ငါႏအကျောင်ꩻ ပအိုဝ်ႏလိုꩻမျိုꩻကပင်ꩻပူႏဇောႏသဲင်ꩻဗာႏ ဗုဒ္ဓသရီရဓာတ်တောႏ သမဲင်ꩻအအဲဉ်ႏယို ခမ်းသားမွိုးဖါ ဖေႏကသေထွꩻနွောင်ꩻတဲင် တဲမ်းထန်ႏနယ်ဖေႏဗာႏ နုဲင်းယိုနောဝ်ꩻသွူ။ ထူႏကွိုꩻ= ပြည်ထောင်စုထဲကပအိုဝ်းလိတ်စောင်ႏ။ နမ်းသꩻနီပါꩻ ယံခွꩻသꩻဒျာႏတဲင်-