ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသ လွူးဖွာꩻမွူးနီꩻ
"ပအိုဝ်ႏလꩻနမ်းပဲင်ႏဒေႏသ လွူးဖွာꩻမွူးနီꩻ" နီပအိုဝ်ႏလိုꩻမျိုꩻ ခမ်းထီကသူႏရံꩻ၊ ဟော်နန်ꩻကထိုꩻမား၊ လိုꩻမျိုꩻကမော့ꩻလွဉ် ထာꩻခိုးလျား အရန်းရန်းနောဝ်ꩻ တယ်ႏမဟာႏသက္ကရာဇ် ၄၁၉-ခွန်တန်မနုဟာႏစိုး မာꩻလွဉ်ယို နေင်ႏပေါင်ꩻတရေင်ဗော့ꩻဗော့ꩻအကို မော့ꩻလွဉ်အတိဒုက္ခ ဘဝယပ်ꩻခုဲင်ႏပေါင်ꩻစွုမ်ႏတဲင် နီဖါဖြားသီးပွိုင်းလဲင်ႏခါ ထွိုင်ႏအွဉ်ငါတောႏလန်ႏယင်းနောဝ်ꩻမꩻ ယိုခါ လꩻလွဉ်ချာ ဟံႏနယ်ႏဧရိယာႏ ခင်ႏလမ်းအုံတာႏ တစူးတစိꩻပေႏနောဝ်ꩻသွူ။ ခွေသွဉ်းတဲမ်းလိတ်သား ဟော်ꩻထွားဗာႏ "မောင်းမွူးခံꩻ"လိတ်လွီးလယ်ႏ အမုဲင်(၇၂) လိတ်မဲ့ငါ(၂၃)ကို အထူꩻဒေႏသ(၆) ပအိုဝ်ႏစွိုးခွိုꩻခမ်းထီကောႏမတီႏစွိုꩻ ကတဲမ်းဒါႏ လိတ်ဖေႏသေ ခမ်းသားမွိုးဖါအကိုနောဝ်ꩻ ဧပြီလာ(၇)နီꩻယို အွဉ်ႏထွော့လွေꩻသေꩻခါꩻ "ပအိုဝ်ႏလꩻနမ်းပဲင်ႏဒေႏသ လွူးဖွာꩻမွူးနီꩻ"အကျောင်ꩻ နေင်ႏ ၂၀၁၉-ဗာႏ၊ လာဧပြီ(၇)နီꩻနောဝ်ꩻ ပထမလဲင်ႏ မာꩻလွေꩻလဲဉ်း ဒေႏသအွဉ်ငါကဲႏရွုမ်ꩻဟော်တန်၊ ဝေင်ꩻဟိုပုံꩻကို သေထွꩻဗာႏနုဲင်းနောဝ်ꩻတဲင် ဟွိုန်သꩻရေꩻငါႏ မရေႏမရာႏနောဝ်ꩻသွူဩ။
ခွေသွဉ်း ထွိုင်ႏနပ်ထွားစဲင်းစဲ့ခွိုန်ꩻချာယင်း ဧပြီလာ(၇)နီꩻနောဝ်ꩻ ဝေင်ꩻရန်ႏကွုန်ႏ ကျိုက္ကဆံကွင်ꩻကို နဲင်ႏငံႏတောႏအစိုႏရ ကမာꩻဒါႏ စွိုးခွိုꩻညီႏလာႏခံႏအကို အနီꩻယိုနောဝ်ꩻ နီသွဉ်းသီးဖြားတန် ဘုရာꩻတကာႏ စင်ꩻဖါအောင်ႏခမ်းထီ ကွီထင်ႏဒင်ႏပျꩻနယ်နီꩻဒျာႏ၊ လꩻနီꩻမွေးတောဝ်း၊ တယ်ႏသန္ဓေႏနီꩻဒျာႏ၊ လွူးဖွာꩻမွူးနီꩻမွေးတောဝ်း၊ ထွိုင်ႏတွိုႏဧပြီ (၂၉)နီꩻမꩻ တပ်မတောႏကာႏကွယ်ႏရေꩻကဲႏတန်လွိုသွတ်ꩻ ပိုႏကဲႏတန်သန်းရွှေတဲမ်းထိုꩻဖေႏစူမုဲင် နေးတွမ်ႏကေႏညာႏချက်အမုဲင် ၇/၂၀၀၈ တွော့ꩻ ပအိုဝ်ႏတာႏ လꩻလွေꩻဗာႏ လꩻပဲင်ႏဒေႏသနောဝ်ꩻသွူ။ နီပအိုဝ်ႏလꩻပဲင်ႏဒေႏသ လွူးဖွာꩻမွူးနီꩻယို မဉ်ႏအွဉ်ႏထွော့ဒျာႏ ဧပြီလာ(၂၉)နီꩻမꩻ လွိုရမွေးဟောင်း-ယူႏနုဲင်းနောဝ်ꩻတဲင် တဲမ်းဖေႏကျံႏဉာဏ်ႏလွေꩻဗာႏနောဝ်ꩻသွူဩ။ နေင်ႏပေါင်ꩻတရေင်ဗော့ꩻဗော့ꩻခါႏ နီပအိုဝ်ႏဘဝ အောဝ်ႏခံသော့ꩻဗာႏငါႏ ထာꩻခေ့ꩻကရစ်ꩻကိုနောဝ်ꩻ ၂၀၀၈-ဗာႏ၊ ဧပြီ (၂၉)နီꩻယိုမꩻ အာႏရုဏ်ႏလေဗွာ စငါပြဲဉ်ထန်ႏလွဉ်စစချာယင်းတဲင် နီပအိုဝ်ႏလွူးနမ်းကမ်းကြို အုံဒင်ႏသော့ꩻတာႏ တတွာယိုပေႏနောဝ်ꩻ ခြေင်ႏကမ္ဘာႏ ဖေႏကထိုꩻမားချာလꩻပုဲင်ႏဒွုမ်နောဝ်ꩻ ပအိုဝ်ႏစွုမ်ႏပါꩻ/ဖြာꩻ ထူႏပွုံႏတာႏခြေင်းခြေင်းဝင်ꩻ ပငါပရာꩻမꩻ အီႏခွꩻသꩻငိမ်ꩻချံꩻလွေꩻနွောင်ꩻနောဝ်ꩻသွူ။ ရက်ခွိုꩻပအိုဝ်ႏပိုစွုမ်ႏပါꩻပါꩻ/ဖြာꩻဖြာꩻသီး စွုမ်ႏနေင်ႏနေင်ႏ မဉ်ႏတွိုႏလွဉ်သွူ နီပအိုဝ်ႏလꩻပဲင်ႏဒေႏသ လွူးဖွာꩻမွူးနီꩻနောဝ်ꩻ သွိုန်ႏဖူꩻသꩻကို ရေႏထိုထို၊ ရက်ချာမွေးမွေးသွော့ ပအိုဝ်ႏတဲင် သမဲင်ꩻဖေႏကတွင်ႏ အောဝ်ႏလိုႏအွဉ်ႏကုဲင်သေꩻဖေႏ ပိုလီꩻတာႏ ထွုံꩻစံႏယံယံတဗာႏနောဝ်ꩻသွူ။ ထွုံꩻစံႏယံတဗာႏ ဖေႏကအောဝ်ႏကုဲင်သေꩻနောဝ်ꩻ လိုꩻသေလိုꩻဒါႏ ပညာႏတန်သားသီးဖုံႏ အောဝ်ႏလိုႏထုမ်ႏ၊ အောဝ်ႏလိုႏယူႏတွေꩻသေꩻခါꩻ ဟောဝ်ဟောဝ်ငါႏဝင်ꩻ ပငါပရာꩻနောဝ်ꩻသွူ။
နီပအိုဝ်ႏလꩻပဲင်ႏဒေႏသ လွူးဖွာꩻမွူးနီꩻယို မူႏမူႏခိုခို ဖေႏကသေယူႏလꩻ၊ ဖေႏကသေအွဉ်ႏဒါႏတန်ႏဖိုꩻ၊ စွုမ်းစွုမ်းသွိုꩻသွိုꩻ သွိုန်ႏဖူꩻသꩻကို ဖေႏကအောဝ်ႏလွဝင်ꩻ ပငါပရာꩻနောဝ်ꩻ အီႏမာꩻဖေႏဗာႏနုဲင်းမုဲင်ꩻ၊ စွိုးခွိုꩻတာႏ ခြေင်ႏကမ္ဘာႏ မဉ်ꩻဖေႏကအွီႏလွီးဖေႏကဟွမ်စွစ်ꩻတိုးနောဝ်ꩻ အီႏမာꩻဗာႏနုဲင်းမုဲင်ꩻဟောဝ်ဟောင်းကရိုꩻနောဝ်ꩻ- ခွိုꩻစုပ်တသာ ပိုလီꩻဟောဝ်ရတနာႏဖုံႏ တစုပ်ထွူတစုပ် ဖေႏကသေထူႏဒါႏ စွိုးခွိုꩻပွုံႏတာႏတဲ့နောဝ်ꩻ၊ ဖေႏကထွားနုဲင်းလွဉ်ꩻဒါႏ အာႏဇာႏနီႏယံ နီဖါဖြားတန်သီး ပွိုင်းလဲင်ႏခါတဲ့နောဝ်ꩻ၊ ဖေႏကသေပင်ႏတသွောင်းထိုဒါႏ စွိုးခွိုꩻဂွုဏ်ႏအင်္ဂါႏ သိက္ခာႏတဲ့နောဝ်ꩻ၊ ဖေႏကသေထိန်ꩻထွားရဲပ်တီ တဉ်ႏတဉ်ႏခွေါင်ခွေါင်လွေꩻနွောင်ꩻ စွိုးခွိုꩻဘာႏသာႏတဲ့နောဝ်ꩻ ယိုခါကာႏ နီအီႏပွိုင်ဆင်ရဲဉ်ꩻသေꩻခါꩻဖေႏဗာႏနုဲင်းမုဲင်ꩻကရိုꩻနောဝ်ꩻ အောဝ်ႏလိုႏယူႏကောဝ်းလွေꩻဟောဝ်ဟောဝ်ဖေႏငါႏနောဝ်ꩻသွူ။ နီဖါဖြားတန်သီး ပွိုင်းလဲင်ႏခါ အွဉ်ငါတွူႏတရန်လွေꩻဖေႏ တရန်းထွူတရန်းတဲင် ယိုခါ လꩻလွေꩻဗာႏ "လꩻပဲင်ႏဒေႏသ"အရန်း၊ ယိုမာꩻငါ လိုꩻသေလိုꩻဒါႏ ပိုလီꩻဟောဝ်ရတနာႏဖုံႏ လိုႏထွားနုဲင်းလွဉ်ꩻငါႏ အာႏဇာႏနီႏယံ နီဖြားတန်သီး ခင်ႏကာတဲင် ဖေႏကလꩻလွေꩻဗာႏလုဲင်ႏ "ခမ်းထီ"နောဝ်ꩻ နက်ယံယံ၊ မူထင်ထင်သွော့စွန်ꩻပငါပရာꩻတဲင် တွူႏတရန်ႏပွုံႏတာႏကိုသွော့ဝင်ꩻ ဖြာꩻဖဲ့ꩻဖဲ့ꩻအကျောင်ꩻ မဉ်ဖေႏသတိꩻ တမာဟွိုန်ငါႏနုဲင်းနောဝ်ꩻသွူ။ နေးတွမ်ႏ သꩻလွောင်ႏဗူႏ၊ နမ်းလွောင်ႏဗူႏ ပငါပရာꩻတဲင် ပအိုဝ်ႏခိုမူႏသီးဖုံႏ နွို့ထူႏကိုသွော့ ခွိုꩻပွုံႏတာႏ၊ နွောင်ꩻရာꩻအာႏ၊ ဒါႏရာꩻကို ထီႏထိုထိုထွားဆွာꩻဆွာꩻ၊ ထွိုင်ႏခွုမ်မာꩻ၊ ယံရာꩻဖဲ့ꩻ ခမ်းထီဒဲ့ꩻ ဆို့ꩻဟော်နန်ꩻ၊ ခေါ်မွိုန်းဝင်ꩻ ပꩻမွိုန်းတောဝ်း၊ သွီႏတဲ့ꩻခေါဝ်းအုံရောဝ်းညီꩻ၊ ဆွန်ꩻထင်ႏညီꩻစွီႏဝင်ꩻစူ၊ ယူႏခူခူထွားစဲင်းစဲင်း၊ ကထွူလဲဉ်းကွပ်မာႏန၊ စူꩻအတ္တမာႏဆုံးဝစ်ꩻ၊ ခေ့ꩻကရစ်ꩻနီလိုꩻမျိုꩻ၊ ခမ်းထီတဲ့ ထိုꩻမားဖို၊ ပအိုဝ်ႏပိုယူႏလꩻဝင်ꩻ၊ သွိုန်ႏသꩻပီ လွောင်ႏလွောင်ႏဗူႏ၊ ထွိုင်ႏကွီးဆို့ꩻခန်းဟော်နန်ꩻအကျောင်ꩻ တမာလဝ်းဗာႏသွူ။
မဉ်ဖေႏကျံႏဉာဏ်ႏ- ပအိုဝ်ႏလꩻပဲင်ႏဒေႏသ လွူးဖွာꩻမွူးနီꩻယို ပအိုဝ်ႏခိုမူႏစွုမ်ႏပါꩻပါꩻ/ဖြာꩻဖြာꩻ၊ စွုမ်ႏဒုံစွုမ်ႏဆောင်ႏ၊ စွုမ်ႏနယ်ႏ၊ စွုမ်ႏလမ်း၊ စွုမ်ႏခမ်း၊ စွုမ်ႏဝေင်ꩻနယ်ႏဖုံႏနောဝ်ꩻ အောဝ်ႏလိုႏမာꩻဖေႏငါႏ ပွယ်ꩻထူႏဂွုဏ်ႏ ပအိုဝ်ႏလꩻပဲင်ႏဒေႏသ လွူးဖွာꩻမွူးနီꩻအနေႏတွော့ꩻ လိုႏမာꩻဖေႏ ပွယ်ꩻတဲမ်းပြဲင်ႏဝင်ꩻ သမဲင်ꩻနဲ့၊ ပွယ်ꩻကန်းတော့ꩻ ဖြားဒုံလိုꩻတန်နဲ့၊ လိုꩻယံတရုဲင်ရျူထင်သားနဲ့၊ အွဉ်ငါယံ တဲမ်းယံ/ရွစ်ယံ၊ ဖေႏကျံႏဉာဏ်ႏယံသားဖုံႏနဲ့ စတဲင်နုဲင်းနောဝ်ꩻဖုံႏနောဝ်ꩻ ရယံဟောင်း တဲမ်းဖေႏကျ့ႏဉာဏ်ႏဗာႏနုဲင်းနောဝ်ꩻသွူဩ။ နမ်းသꩻနီပါꩻ ယံချံꩻသာႏ စွုမ်ႏပါꩻပါꩻ စွုမ်ႏဖြာꩻဖြာꩻ သေထူႏသွော့ ခွိုꩻပွုံႏတာႏ ပငါပရာꩻနော။[၁][၂]