ပိလောပိကတိဿမထေရ်ႏ

"ပိလောတိကတိဿမထေရ်ႏဝတ္ထု" ၁၄၃။ ဂါႏထာႏပြန်ႏပအိုဝ်ႏခြေင်ခြေင်- သေဟောဝ်နဝ်ꩻ ခံႏဗာႏတဝ်း ခွဉ်းရေးဗာႏ (ပယ်ႏထိုꩻဒါႏခွဉ်းရေး)နုဲင်းနဝ်ꩻနေနေ ပါꩻခိုမုဲင်ꩻတဲ့ယဝ်း ခံႏဗင်ႏတဝ်းထာꩻ (အားထွုတ်တရာꩻ) မဲ့ꩻအဝ်ႏသဒျာႏ၊ နေးတွမ်ႏထာꩻဝင်ꩻသꩻ ရဲလꩻထိုꩻထာꩻကျံႏကုဲင်၊ ပါꩻခိုနဝ်ꩻနဝ်ꩻ လောကကိုယို ခြောမရေႏမရာႏ၊ အဝ်ႏညာꩻညာꩻ တဖြာꩻဒျာႏသွူ။

၁၄၄။ ဂါႏထာႏပြန်ႏပအိုဝ်ႏခြေင်ခြေင်- သေဟောဝ်နဝ်ꩻ ပေါႏခွဉ်းရေး ဗာႏပသာႏတဲ့ နဲစ်လွေꩻမွိုင်စွဉ်ႏထာꩻ၊ ငမ်းငါးခွဉ်းရေး သꩻဝꩻမွေးစွဉ်ထာꩻ၊ ထွားနုဲင်းသေဟောဝ်နဝ်ꩻ၊ သီဖုံႏနောဝ်ꩻ၊ နဲစ်ပယ်ႏမွိုင်မွိုင်လꩻလွေသွော့ ကိလေႏသာႏဖုံႏနဝ်ꩻလုဲင်း၊ သꩻဝꩻသေငမ်းဒါႏ ကိလေႏသာႏဖုံႏနဝ်ꩻဟုဲင်း၊ ကုမ်ႏလုမ်ႏ(ပြဲ့ꩻစွုံႏ)လွသွော့ တွမ်ႏသဒ္ဓါႏယင်ကယ်ႏ၊ တွမ်ႏသီႏလယင်ကယ်ႏ၊ တွမ်ႏဝီရိယင်ကယ်ႏ၊ တွမ်ႏသမာဓိယင်ကယ်ႏ၊ တွမ်ႏထာꩻသေတရာꩻဆွုံꩻဖျတ်ထာꩻဖုံႏယင်ကယ်လုဲင်း၊ ဝိဇ္ဇာႏစရဏအဝ်ႏအဝ်ႏ၊ နေးတွမ်ႏသတိꩻဟောဝ်ဟောဝ်တဲင် ပယ်ႏလꩻလꩻလွသွော့၊ အာငါႏမရမကသံသရာႏ ဝွဋ်ဒုက္ခယိုဟုဲင်း။

ဟော်ꩻထွားသွဉ်ဗာႏ "ပိလောတိကတိဿမထရ်ႏ"ဝတ္ထုယိုတဲင် လꩻဗဟုသုတ၊ လꩻသတိꩻနုဲင်းယို"

၁။ ထီႏလိုꩻခြောဒုက္ခ ထာꩻကွီအံႏသားခန်းတဲ့ယဝ်း ထင်းဖွီလꩻတဝ်း၊ ဝွေꩻဖေႏကလွစ်လꩻ ထာꩻဒုက္ခနဝ်ꩻ မာꩻဖေႏဗာႏ-

၂။ ခွေကအံႏဗာႏဟောဝ် ခွေကကွဉ်ကꩻဗာႏဟောဝ်ယို တွမ်ႏခွေနမ်းအကျင်ꩻ တွမ်ခွေထာꩻမာꩻနဝ်ꩻ လွောက်ꩻဖက်ꩻနဲ့ လွောက်ꩻဖက်ꩻတဝ်းနဲ့ ယူႏချာ ဝွေႏဖန်ႏချာဗာႏ-

၃။ ဖေႏကထန်ႏတွမ်ႏ ထာꩻအံႏဟောဝ်၊ ကွဉ်ကꩻဟောဝ်နောဝ်ꩻ ကျင်ꩻဟောဝ်ဟောဝ်ဗာႏ၊ မာꩻကုဲင်းကုဲင်းဗာႏ-

၄။ ပေါႏတယူႏတဝ်း ထာꩻဒုက္ခ၊ ပေါႏတထူႏတဝ်း သံႏဝွေႏဂနဝ်ꩻ ထိန်ꩻသꩻလꩻတဝ်း၊ သꩻတရေင်ဒါႏ-

၅။ ပေါႏယူႏထာꩻဒုက္ခ၊ ပေါႏသံႏဝွေႏဂလꩻနဝ်ꩻ သꩻစွူ၊ ပေါႏသꩻစွူနဝ်ꩻ အားထွုတ်တရာꩻလꩻယိုꩻ-

၆။ နမ်းထာꩻထမုဲင်ꩻ၊ ဒေါ့ꩻထမုဲင်ꩻ၊ ယူႏထမုဲင်ꩻ နမ်းအသေချာသွတ်ꩻတဲင် နမ်းတွမ်ႏနမ်း မဉ်ႏဆွုံꩻမꩻချာနဝ်ꩻ အတွိုႏခြောင်ꩻသွတ်ꩻ၊ အဟောဝ်သွတ်ꩻ၊ လꩻယိုꩻတရာꩻ-စတဲင်နုဲင်းနဝ်ꩻ သေထွꩻ လꩻသတိꩻအာတန်သွူ။