ပွိုင်းဝွို့တွမ်ႏ
"ပွိုင်းဝွို့တွမ်ႏသင်္ကျန်ႏဟိုပုံꩻတဲင်" နီမန်းနွောင်ꩻဟံႏကို ကအဝ်ႏအုံသော့ꩻဒါႏ ခမ်းရင်ꩻသားလိုꩻမျိုꩻဖုံႏနဝ်ꩻ ကဲဉ်းအာအာ ဗုဒ္ဓဘာႏသာႏဒျာႏသွူ။ ဗုဒ္ဓဘာႏသာႏလိုꩻမျိုꩻယို နေင်ႏတနေင်ႏမီႏလို့၊ နေင်ႏတသာမီႏကူꩻနဝ်ꩻ နဲင်ႏငန်ႏတောႏ အသိအမှတ်ကပျုဒါႏ ပေႏတင်ႏဆရာႏစွိုꩻ တွက်သေႏချောင်းသေႏချာႏဖေႏနေး သင်္ကျန်ႏလင်ꩻခိန်ႏ၊ ထင်ႏခိန်ႏတွော့ꩻ အွဉ်ႏထွော့လွေꩻဖေႏ အကျိုႏနီꩻ၊ အလင်ꩻနီꩻ၊ အကျပ်နီꩻ၊ အထင်ႏနီꩻ၊ နေင်ႏတသာဆန်ꩻနီꩻ နုဲင်းနဝ်ꩻသွူ။ နဝ်ꩻတွော့ꩻ "ကျိုႏ'လင်ꩻ'ကျပ်'ထင်ႏ ၄-နီꩻအကိုယိုနဝ်ꩻ တခမ်းလုမ်း၊ ဝေင်ꩻတွိုင်ꩻ ဒုံတွိုင်ꩻ ခွုမ်ဆိုးပျောႏလွဝင်ꩻထီဖုံႏသွူ။ ကခွုမ်ပဆိုးဆူလွဝင်ꩻ၊ ထောက်ꩻလွဝင်ꩻ၊ တဗာလွဝင်ꩻ၊ ဆဲစ်ꩻလွဝင်ꩻနုဲင်းယိုနဝ်ꩻ ထွာစွဉ်ႏဒျာႏ တခမ်းလုမ်း ထုံꩻစံႏယေန်ႏကေႏမုတမျိုꩻသွူ။ ကခွုမ်ဆိုးထီနုဲင်းယိုနဝ်ꩻ မာꩻနေးတွမ်ႏမဏ္ဍပ်ဖုံႏသွူ။ ခွုမ်ဆိုးထီမဏ္ဍပ်ယိုနဝ်ꩻ အစိုႏရဌာႏနဆဲင်ႏရာꩻမဏ္ဍပ်၊ အစွိုꩻအဗူႏမဏ္ဍပ်၊ ပုဂ္ဂလိကမဏ္ဍပ် အဝ်ႏသိုမ်မျိုꩻသိုမ်စားသွူ။ ဌာႏနဆဲင်ႏရာꩻမဏ္ဍပ်၊ အစွိုꩻအဗူႏမဏ္ဍပ်ဖုံႏနဝ်ꩻ ထွာမဏ္ဍပ်တန်၊ မဏ္ဍပ်တလောင်ꩻဖုံႏတဲင် ခွုမ်ဆိုးထီလွုမ်ꩻတကာႏတဝ်း ကျူႏပါထာꩻဖုံႏ၊ တချင်ꩻပါငဝ်းဖုံႏသွူ။ ယဟန်ႏနဝ်ꩻ တဲမ်းတွမ်ႏသံချပ်ကဗျာဖုံႏတဲင် လယ်ႏပျꩻနယ် ရွစ်နယ်မဏ္ဍပ်တန်ဆꩻငါ၊ လယ်ႏပျꩻနယ် ရွစ်နယ် ခမ်းသားထီသားဖုံႏသွူ။ သင်္ကျန်ႏတွင်ꩻနဝ်ꩻ လိုꩻကဝါႏသနာႏဒါႏ ဆူထီဖုံႏ၊ လိုꩻကမဲဉ်မွန်းပျောႏထာꩻဖုံႏနဝ်ꩻ တွမ်ႏကာꩻပဉ်ဆွိုင်ꩻဆွိုင်ꩻတဲင် လယ်ႏလွဝင်ꩻကိုဖုံႏ၊ လယ်ႏခံႏဝင်ꩻဆူထီ၊ လယ်ႏဆူဝင်ꩻထီဖုံႏသွူ။ ကလယ်ႏနုဲင်းယိုနဝ်ꩻ ပဉ်ဖုံႏပဉ်စွိုꩻ ကျူႏထာꩻ၊ တဗꩻစူ၊ တချင်ꩻငဝ်း၊ ရောင်ပျောႏလွထာꩻဖုံႏသွူ။ ကရောင်ကပျောႏ ကလယ်ႏနုဲင်းယိုနဝ်ꩻ အွꩻမွန်ꩻပါဒဝ်၊ အွꩻမွန်ꩻပါဘီယာဖုံႏတဲင် တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ ငဝ်းအာ၊ ထွာထာꩻရွို့ꩻထာꩻမာႏဖုံႏလဲ့ အဝ်ႏသွူ။ ကာꩻဖုံႏ၊ သဲင်ကယ်ဖုံႏလဲ့ ပွစ်လွဝင်ꩻ၊ တလူႏလွဝင်ꩻတဲင် လိုꩻကဆာလွဉ်ꩻ၊ ကသီလွဉ်ꩻလဲ့ အဝ်ႏပြုံႏပြင်ႏသွူ။ မီႏနုဲင်းသင်္ကျန်ႏတွင်ꩻ ဟန်ႏနေင်ႏ တီဗွီသတင်ꩻအလꩻ တခမ်းလုမ်းနဝ်ꩻ လိုꩻသီအဝ်ႏနေးအရျာꩻတန်ꩻ၊ ကဆာနဝ်ꩻ အရေင်တန်ꩻနေးစွဉ်ႏဒျာႏသွူ။ သင်္ကျန်ႏတွင်ꩻ အရွို့ꩻအမာႏ၊ အဆာအသီ ဖေႏကဆေ့ꩻနဝ်ꩻ ဝေင်ꩻကိုမဏ္ဍပ်တွိုင်ꩻ၊ ခင်ႏလံးတွိုင်ꩻ အွဉ်ႏချꩻပိုႏ၊ အွဉ်ႏပွေါးပိုႏဗာႏနေးစွဉ်ႏ ယယ်ꩻဖုံႏသွူ။ တသီႏယုံႏကိုလဲ့ ဆရာႏ ဆရာႏမူႏဖုံႏ၊ တသီႏဖုံႏ ဝီရိယခါꩻ၊ အွဉ်ႏခါꩻဗာႏ စုံႏစုံႏလင်ႏလင်ႏသွူ။ နဝ်ꩻတွော့ꩻ ပွိုင်းဝွို့တွမ်ႏ သင်္ကျန်ႏတွင်ꩻ နီသိုမ်လစ်ꩻနီꩻ ကပျောႏထာꩻနဝ်ꩻ ရွဉ်လို့ပလွိုႏလွိုႏတဝ်းသွူ။ တခမ်းလုမ်းအနေႏ သင်္ကျန်ႏတွင်ꩻ အလူႏအတန်ꩻပါတဝ်း ကလို့ရွဉ်ယို အလွိုးသိန်ႏပေါင်ꩻ အသောင်ꩻအသိန်ꩻတန်ꩻနေးသွူ။ ကွယ်ႏတွော့ꩻ နဲင်ႏငန်ႏတောႏအသိအမှတ်ပျု ထုံꩻစံႏယေန်ႏကေႏမုတမျိုꩻတဲင် အဟဝ်အကုဲင် စင်းဝွေႏဖန်ႏတဝ်းသွူ။ ပွိုင်းဝွို့တွမ်ႏ ဆူထီသင်္ကျန်ႏတွင်ꩻတဲင် ကမဲန်ဝွေႏဖန်ႏ၊ ကမဲန်ဖေႏကျံႏဉာဏ်ႏနဝ်ꩻ အဝ်ႏနုဲင်းယိုသွူ။ သင်္ကျန်ႏတွင်ꩻယို ဘာႏသာႏရေꩻ ဓလေ့ꩻထုံꩻစံႏအလꩻနဝ်ꩻ လူႏတန်ꩻဒါႏန၊ ကံကျင်ꩻသီႏလ၊ ပွါꩻဘာႏဝနာႏဖုံႏသွူ။ နဝ်ꩻလွုမ်ꩻတကာႏတဝ်း သင်္ကျန်ႏတွင်ꩻနဝ်ꩻ လူႏကန်းတော့ꩻလွ လိုꩻဖြားဖုံႏ၊ မွိုးဖါဖုံႏ၊ ဆရာႏသမာꩻဖုံႏသွူ။ ကမာꩻဒါႏ ကုသိုလ်ႏရေꩻနုဲင်းယိုနဝ်ꩻ တနေင်ႏအကိုယို မီႏရိုꩻအတန်သွတ်ꩻ၊ အလုဲင်းသွတ်ꩻ၊ အကွုန်ꩻသွတ်ꩻလဲ့ အဝ်ႏလꩻဒျာႏသွူ။ လိုꩻကမာꩻဒါႏ ကုသိုလ်ႏရေꩻ အစွိုးစွိုးဖုံႏယို အနောင်ႏအသျက် အတန်သွတ်ꩻနဝ်ꩻ ထီအန္တရာယ်ႏသွူ။ လိုꩻကဆူဒါႏထီ၊ ကထောက်ꩻဒါႏ ထီသင်္ကျန်ႏတွင်ꩻနဝ်ꩻ လိုꩻပေႏ၊ လိုꩻတလောင်ꩻ (လိုꩻယွဲး)၊ လိုꩻအတန်အရွယ်ႏသိုမ်မျိုꩻ ပါလို့ဒျာႏသွူ။ ကဆူထီယိုနဝ်ꩻ လိုꩻကျောင်ꩻလဲ့ တအဝ်ႏကုဲင်တဝ်း၊ လွေꩻလူꩻလွေꩻတန်ꩻ၊ လွေꩻကံလွေꩻကျင်ꩻ ထင်ႏကျောင်ꩻထင်ႏကန်ႏသားလဲ့ တအဝ်ႏကုဲင်တဝ်း၊ လိုꩻဖြားလိုꩻဆာလဲ့ တအဝ်ႏကုဲင်တဝ်း ဆူလို့ဆူစင်၊ ဆူထံဆူဒုံးနေးတဲင် ထီဆူယိုနဝ်ꩻ ထွာမွေးစွဉ်ႏ ဘာႏသာႏရေꩻ၊ လိုꩻမုꩻရေꩻအနောင်ႏအသျက်သွူ။ ခွန်ကုဝေနဝ်ꩻ သက်လဲ့တန်လဲဉ်း၊ ခြွိုင်ႏသန်ꩻရေꩻပေါ်ꩻဟဝ်တဝ်း၊ ငမ်းထီတဲင် သင်္ကျန်ႏတွင်ꩻနဝ်ꩻ ကန်းတော့ꩻကျောင်ꩻနောင်တောင်ꩻ တကျောင်ꩻလွုမ်ꩻ၊ အွိုးမုဲင်ꩻမုဲင်ꩻ လွေꩻဗွုန်ႏတဝ်း၊ အုံဒျာႏလံးစွုမ်ႏနီꩻနီꩻသွူ။ ခွန်ကုဝေလံးနဝ်ꩻ အဝ်ႏကျောင်ꩻနောင်တောင်ꩻ မုခ်ဦးဆꩻငါဒွမ်တဲင် သင်္ကျန်ႏတွင်ꩻ လိုꩻခမ်းလိုꩻထီ ကလွဉ်ကန်းတော့ꩻဒါႏ ကျောင်ꩻနောင်တောင်ꩻယို အဝ်ႏအုံပွေါးထွားဆွုမ်ႏ စွုမ်ႏနီꩻနီꩻသွူ။ ခေတ်ယိုခါနဝ်ꩻ ကာꩻခေတ်၊ သဲင်ကယ်ခေတ်တဲင် လွဉ်ခင်ႏနေးကဲန်းဆေ့ꩻဆေ့ꩻ၊ အဝ်ႏညာꩻညာꩻတဖြာꩻလွုမ်ꩻ၊ လွဉ်နေးတွမ်ႏကာꩻ တွမ်ႏသင်ကယ်ဒျာႏ ကဲန်းအာအာသွူ။ လိုꩻကလွဉ်ခင်ႏနေးနဝ်ꩻ ထီစဝ်ႏကြွို့ꩻတဝ်း၊ လိုꩻကလွဉ်တွမ်ႏကာꩻ တွမ်ႏသင်ကယ်နဝ်ꩻ ထီစဝ်ႏအာငါႏသွူ။ ခွန်ကုဝေ ထွိုင်ႏထီႏထီႏ ထင်ႏကျောင်ꩻသား စဝ်ႏနုဲင်းယိုနဝ်ꩻ စဉ်ꩻစာꩻယာႏစာႏနာႏနမ်းတဲင် သꩻတဟဝ်တဝ်း၊ သꩻတချံꩻသာႏတဝ်းသွူ။ ကစဝ်ႏထီနုဲင်းယိုနဝ်ꩻ မဉ်ႏထွာလိုꩻလံးဗော့ꩻနဝ်ꩻ ကန်းတော့ꩻထွူ နဲစ်သဲင်ꩻပြွတ်ယင်းလꩻလဲ့ လံးညာꩻသားနဝ်ꩻ ခံႏဗာႏဒျာႏအစဝ်ႏ၊ ခံႏဗာႏဒျာႏအခွꩻ တဖူꩻတလီးလုမ်းသွူ။ ခံႏအစဝ်ႏ ခံႏအခွꩻလဲ့ထွူတဝ်း အစဝ်ႏအခွꩻ၊ ခွꩻညငါႏတွော့ꩻ မဉ်ႏထွာတငါမွိုင် တဟွိုတဟဲ့ꩻ၊ နမ်းခိုးနမ်းလျားနဝ်ꩻ အီႏဒုက္ခဗာႏထဲင်းထဲင်း၊ ရွဉ်အီႏလို့လွဉ်ꩻထဲင်းတဲင် ထင်ႏကျောင်ꩻထိုမ်ႏကုသိုလ်ႏ မာꩻဒါႏနတွော့ꩻ ထွာတေားမော့ꩻတေားနုဲင်းယိုနဝ်ꩻ တဟဝ်တဝ်း၊ အသေန်ႏတဝ်း တစိꩻစိꩻသွူ။ နဝ်ꩻတွော့ꩻ သေနာႏတဝ်း ပါꩻမုဲင်ꩻမုဲင်ꩻတွော့ꩻ ကားကအဝ်ႏ တဗာလို့ထီနုဲင်းယိုနဝ်ꩻ ထုံꩻစံႏဟဝ်၊ ယေန်ႏကေႏမုတမျိုꩻအီႏရိုꩻဗာႏနုဲင်းနဝ်ꩻနဝ်ꩻ ယပ်ꩻခုဲင်ႏတန်ဒျာႏသွူ။ ဝေင်ꩻလင် ရပ်လင်နဝ်ꩻ သေတဝ်း၊ ပအိုဝ်ႏနမ်းပဲင်ႏအိုပ်ချုက်ခွင်ꩻလꩻဒေႏသ သိုမ်ဝေင်ꩻနယ်ႏ ဦးစီးမှူးရုမ်ꩻကအဝ်ႏဒါႏ ဝေင်ꩻဟိုပုံꩻယိုနဝ်ꩻ သင်္ကျန်ႏလင်ꩻ၊ ကျပ်၊ ထင်ႏ သိုမ်နီꩻလွုမ်ꩻမွေးတဝ်း အကျိုႏနီꩻလဲ့ တဗာလဲန်း၊ နေင်ႏတသာဆန်ꩻတနီꩻ နီနီꩻသွူလဲ့ အဝ်ႏတဗာဒျာႏသွူ။ ဟန်ႏနေင်ႏနဝ်ꩻ နေင်ႏတသာဆန်ꩻသိုမ်နီꩻသွူတဲ့ အဝ်ႏတဗာဒျာႏသွူ။ န၀်ꩻတွော့ꩻ ဟိုပုံꩻသားယိုနဝ်ꩻ သင်္ကျန်ႏတွင်ꩻ တဗာထီ မွူးနီꩻခန်ꩻတွိုင်ꩻအဲန်ထဝ်း၊ မဲန်တဗာခွိုင်းမုဲင်ꩻနီꩻလဲ့ တဗာအဝ်ႏလꩻဒျာႏ အဓိပ္ပါယ်ႏ တွိုႏထိုꩻနုဲင်းနဝ်ꩻသွူ။ ထွိုင်ႏထွာနုဲင်းယိုနဝ်ꩻ ဝေင်ꩻဟိုပုံꩻယို စီꩻကန်ꩻအခန်ꩻတွိုင်ꩻ တအဲန်ထဝ်းတဲင် တွမ်ႏခွန်ကွဉ်လိုꩻတန်တအဲန်ထဝ်းနဝ်ꩻ ဗွိုဗွိုန်ထိုꩻဒျာႏလွဝင်ꩻသွူ။ ခွန်ကုဝေ ကထီႏဗာႏတွမ်ႏမဲ့ ထင်ႏကျောင်ꩻသားယဟန်ႏနဝ်ꩻ ငမ်းငါႏဝင်ꩻတောစဝ်ႏတဲင် ပေါႏတွိုႏထီသားထျꩻလဲ့ "နီထင်ႏဒျာႏကျောင်ꩻ တဗာပုဲင်ႏနီဟုဲင်း"တောင်ꩻပြန်ႏနုဲင်းနဝ်ꩻလဲ့ တလꩻတဝ်း၊ အဝ်ႏတဗာဒျာႏနွိုင်ႏနွိုင်ႏသွူ။ ကတဗာထီနဝ်ꩻ တဗာတွမ်ႏထီဗွီႏ၊ ထီကောက်ꩻပေႏမွေးတဝ်း၊ တွမ်ႏထီဗုံꩻတဗာတဲင် ပေါႏဗာႏဟဝ်လိုꩻနဝ်ꩻ နမ်းတဗာႏလုမ်း စဝ်ႏလို့စွဉ်ႏဒျာႏသွူ။ ဝင်ꩻကတမဲန်ဖေႏတဗာတဝ်းလဲ့ တဗာနွိုင်ႏနွိုင်ႏဝင်ꩻတွော့ꩻ ဝင်ꩻမီႏစဝ်ႏနဝ်ꩻ ကေားတဗာသား သံးကေႏနပ်၊ သံးနေစ်သက်တဲင် သꩻကေႏနပ်၊ ကနေစ်သက်နုဲင်းယိုနဝ်ꩻ သꩻထာꩻမုဲင်ꩻ ကုသိုလ်ႏသꩻနဲ့၊ အကုသိုလ်ႏသꩻနဲ့-မီႏရီနဝ်ꩻ အကုသိုလ်ႏသꩻဒျာႏ ဖြေႏဗာႏနုဲင်းနဝ်ꩻသွူ။ သင်္ကျန်ႏတွင်ꩻ ကတဗာထီပျောႏထာꩻတွမ်ႏ ထင်ႏကျောင်ꩻမာꩻကုသိုလ်ႏနဝ်ꩻ အခိန်ႏတနꩻထိုꩻတဝင်ꩻတဲင် ယိုနီမျိုꩻဖေႏကတွမ်ႏရော်ꩻပုဲင်ႏလွဝင်ꩻနဝ်ꩻ ဆဲင်ႏရာꩻခွန်ကွဉ် လိုꩻတန်သီး အဝ်ႏလိုႏစဉ်ꩻစာꩻဖေႏလဲန်းသွူ။ တခမ်းလုမ်းအနေႏနဝ်ꩻ နီအာႏဏာႏ တတွိုႏတဝ်းလဲ့ ပအိုဝ်ႏနမ်းပဲင်ႏ အိုပ်ချုက်ခွင်ꩻလꩻဒေႏသ သိုမ်ဝေင်ꩻနယ်ႏကိုနဝ်ꩻ အဝ်ႏလိုႏစဉ်ꩻစာꩻဖေႏလဲန်းသွူ။ စီꩻကန်ꩻတအဲန်ထဝ်း လိုꩻမျိုꩻ၊ စီꩻကန်ꩻတအဲန်ထဝ်းဒုံဝေင်ꩻ၊ စီꩻကန်ꩻတအဲန်ထဝ်း ဒေႏသရပ်ရာႏနဝ်ꩻ တယံတဝ်းသွူ။ နဝ်ꩻတွော့ꩻ ကထွာခွန်ကွဉ်လိုꩻတန်သီးနဝ်ꩻ ထီႏဗာႏ ဟော်ꩻဗာႏ ခွန်ကုဝေ ရွမ်ဖြုဲင်ꩻယိုတဲင် တွိုႏနေင်ႏဆုဲင်ꩻဆုဲင်ꩻဖုံႏ မီႏမဲန်မာꩻစီꩻကန်ꩻနဝ်ꩻ အဝ်ႏလိုႏအုံနောင်အာႏကွိုꩻပါ ခွေသွဉ်းကတဲမ်းနယ်ဒါႏ အချက်နုဲင်းဆလယိုဖုံႏသွူ။ "သင်္ကျန်ႏတါင်ꩻ ဆူထီပျောႏထာꩻ စီꩻကန်ꩻချက်ဖုံႏ" ၁။ ကဆူတဗာထီ သင်္ကျန်ႏတွင်ꩻနဝ်ꩻ ပေါႏလွိုအလင်ꩻနီꩻ၊ အကျပ်နီꩻ၊ အထင်ႏနီꩻနဝ်ꩻ တဗာလꩻတဝ်း။ ၂။ သင်္ကျန်ႏလင်ꩻ'ကျပ်'ထင်ႏ သိုမ်နီꩻအကိုယိုလဲ့ မွူးရဝ်ꩻခိုႏ ခါးလားနားရီႏတဆီကဒုံႏ၊ မွူးဟာခိုႏ လစ်ꩻနားရီႏမာꩻငါနဝ်ꩻ တဗာလꩻတဝ်း။ ၃။ သင်္ကျန်ႏလင်ꩻ'ကျပ်'ထင်ႏ သိုမ်နီꩻအကိုယိုလဲ့ ပေါႏလွိုတဲင် ပြည်ထောင်စုလမ်းမ တဖူꩻတန်ဝေင်ꩻကဲန်နဝ်ꩻ တဗာလꩻတဝ်း၊ ရပ်ကွက်ကို တဖူꩻပေႏကိုဖုံႏနဝ်ꩻ တဗာလꩻတဝ်း။ ၄။ လိုꩻကျောင်ꩻ' လိုꩻဖြား' လိုꩻဆာဖုံႏနဝ်ꩻ မဲန်အနီꩻမုဲင်ꩻမုဲင်ꩻ၊ မဲန်မုဲင်ꩻကိုကို တဗာလꩻတဝ်း။ ၅။ စီꩻကန်ꩻချက်နုဲင်းယိုဖုံႏနဝ်ꩻ ခါးလားသင်္ကျန်ႏကတွိုႏနဝ်ꩻ တွယ်ႏနျꩻလိတ် အွဉ်ႏဒပ်ꩻနေးတရိုꩻတဝ်း၊ ဆောႏနေးတွမ်ႏအော်လန်တရိုꩻတဝ်း၊ နီစွိုးလို့လို့တရိုꩻတဝ်း ကျောႏညာႏအွဉ်ႏဟွုန်ဗာႏ ရပ်ကွက်လိုꩻတန်ဖုံႏနဝ်ꩻလဲ့ ဖေႏသေ အွဉ်ႏဟွုန်အွဉ်ခေါ်ခေါ်ဗာႏ။ ၆။ စီꩻကန်ꩻချက်ဖုံႏယို လွောက်ꩻနာႏ တလွောက်ꩻနာႏတဝ်းနဝ်ꩻ ဖေႏကသေ ယယ်ꩻကာꩻဖုံႏနဝ်ꩻ လယ်ႏထွားဗာႏ စွုမ်ႏဖဲ့ꩻစွုမ်ႏခဝ်။ ၇။ မီႏမော့ꩻမီႏထီꩻ လိုꩻတလွောက်ꩻနာႏတဝ်း စီꩻကန်ꩻနဝ်ꩻ ကထွာယယ်ꩻယို ဆွမ်ꩻထွူတဲင် အွဉ်ႏခံအချုက် နီသွံနီꩻတရိုꩻတဝ်း၊ ရွဉ်တံႏ အရေင်အသောင်ꩻတန်ꩻတရိုꩻတဝ်း ဖေႏပဲစ်ဖေႏတံႏဗာႏ။ ၈။ မီႏမော့ꩻလိုꩻလွိုစီꩻကန်ꩻတွော့ꩻ ယယ်ꩻမီႏဆွမ်ꩻလꩻနဝ်ꩻ ကလꩻဒါႏရွဉ်တံႏယို စောင်ႏသျောက်ရေꩻသားယယ်ꩻယို ယံကဗဲင်းစုဲင်းသွော့လွဝင်ꩻ။ တောင်ꩻခါꩻ- ခွေသွဉ်းခွန်ကုဝေ ငဝ်းဖေႏကျံႏဉာဏ်ႏ ရွမ်ဖြုဲင်ꩻယို ဖေႏကတွိုႏခွန်ကွဉ် လိုꩻတန်ထျꩻနဝ်ꩻ သွုန်ႏဟဝ်သꩻဒါႏ ကအဝ်ႏဒါႏ လိုꩻဝေင်ꩻဟိုပုံꩻသားနဝ်ꩻ ယံအွဉ်ႏအရေꩻ ကူႏညီႏကိုသွော့။ နေးတွမ်ႏစေႏတနာႏဟဝ်တဲင်-[၁][၂]