ပွိုင်းဝွို့တွမ်ႏလိတ်
"ပွိုင်းဝွို့တွမ်ႏလိတ်ပအိုဝ်ႏ ငဝ်းရီပုစ္ဆာႏတွမ်ႏ အစေမဲဉ်ႏ" နီပအိုဝ်ႏလိုꩻမျိုꩻယိုနဝ်ꩻ ပွိုင်းဝွို့တွမ်ႏလိတ်ပအိုဝ်ႏယို စွုမ်ႏတစွုမ်ႏတဝ်း၊ မဲဉ်ႏတမဲဉ်ႏတဝ်း ကအီႏထောင်လွူꩻ(လေ့လာ)ဒါႏလိုꩻနဝ်ꩻ ဆေ့ꩻခြေားငါႏသွူ၊ တကာႏတဝ်း ထွာသွူပအိုဝ်ႏလဲ့ တဲမ်းဟော်ꩻလိတ်ပအိုဝ်ႏ တဒါႏတဝ်းသားလဲ့ အဝ်ႏပြုံႏပြင်ႏနေဒွိုန်းသွူ၊ လိုꩻသာမညတွမ်ႏရိုꩻပုဲင်ႏ လိုꩻဝိသေသကထါာဒါႏ ပအိုဝ်ႏဆရာႏတဲမ်းလိတ်ဖုံႏ၊ လိတ်ပအိုဝ်ႏဆရာႏဖုံႏမဉ်ႏတဲ့ တေသထောင်လွူꩻတဝ်းသွူ။
ထွာသွူပအိုဝ်ႏတဲ့ ပအိုဝ်ႏလိတ် အတ္ထုပ္ပတ္တိသမဲင်ꩻ၊ ပအိုဝ်ႏလိတ်အကျောင်ꩻယို တသေထောင်လွူꩻကြွို့ꩻတဝ်း၊ သေဗော့ꩻကြွို့ꩻ ပအိုဝ်ႏလိုꩻမျိုꩻနဝ်ꩻ အလိတ်အဝ်ႏ၊ ပအိုဝ်ႏလိတ်နဝ်ꩻ နီလိတ်၊ နီလိတ်ပအိုဝ်ႏယို ပါꩻမုဲင်ꩻယားလꩻတဝ်း၊ ပါꩻမုဲင်ထဲမ်ဖျင်လꩻတဝ်း၊ ပါꩻမုဲင်ꩻဝွေႏဖန်ႏလꩻတဝ်း၊ နေးတွမ်ႏသꩻပုဂ္ဂိုလ်ႏစွယ်ꩻ၊ သꩻလိုꩻမျိုꩻစွယ်ꩻတွော့ꩻ ရဲးကာႏကွယ်ႏလေႏကြွို့ꩻနုဲင်းနဝ်ꩻလွုမ်ꩻသွူ။ ကွပ်နဝ်ꩻမꩻ ပွိုင်းဝွို့တွမ်ႏ လိတ်ပအိုဝ်ႏယို သကဝင်ႏစာꩻသား၊ ကမဲဉ်သေစဲင်း အခရာႏသားဖုံႏအတာႏ တဲမ်းနယ်လွေꩻဗာႏ ပွိုင်းဝွို့တွမ်ႏ လိတ်ပအိုဝ်ႏ အရီအစေ နုဲင်းဆꩻငါယိုအတွိုင်ꩻသွူ။
၁။ ဗွေႏဗွန်သုနန္ဒ၊ ကျောင်ꩻထီသိမ်ႏ ကတဲမ်းထွင်ႏထန်ႏဒါႏ လိတ်မွူးပအိုဝ်ႏနဝ်ꩻ တဲမ်းထွူအနေင်ႏမုဲင်ꩻ?၊ လာမုဲင်ꩻ?၊ မွူးနီꩻမုဲင်ꩻဟောင်း?
- = တဲမ်းထွူ နေင်ႏ ၁၃၀၉-ဗာႏ၊ ဒဲဉ်ရုတ်ꩻလာဆန်ꩻ (၁၅)နီꩻ၊ မွူးနီꩻ-တနင်္နွေႏသွူ။
- ၂။ တဲမ်းထွူ လꩻခွိုင်းမုဲင်ꩻနေင်ႏ? သက္ကရာဇ် အနေင်ႏမုဲင်ꩻမꩻ ဗွေႏဗွန်ဉာဏ ကျောင်ꩻထမ်းဘုရာꩻ တွယ်ႏနျꩻထန်ႏ "ပအိုဝ်ႏအက္ခရာႏလိတ်မွူးတသာစောင်ႏ"ဟောင်း?
- = တဲမ်းထွူ လꩻအနေင်ႏတဆီ၊ နေင်ႏ ၁၃၁၉-ဗာႏကိုမꩻ ဗွေႏဗွန်ဉာဏ ကျောင်ꩻထမ်းဘုရာꩻ တွယ်ႏနျꩻထန်ႏ "ပအိုဝ်ႏအက္ခရာႏလိတ်မွူးတသာ"သွူ။
- ၃။ ဗွေႏဗွန်သုနန္ဒ ကျောင်ꩻထီသိမ်ႏ ကတဲမ်းထန်ႏထန်ႏဗာႏ လိတ်မွူးပအိုဝ်ႏနဝ်ꩻ ဗွေႏဆရာႏတောႏကျောင်ꩻမုဲင်ꩻဖုံႏ ပဲးတဲက်တွန်ꩻဟောင်း?
- = ဗွေႏဆရာႏတောႏ ဘဒ္ဒန္တနရိန္ဒ ကျောင်ꩻတန်၊ တောင်ႏကီꩻတွမ်ႏ ဗွေႏဆရာႏတောႏ ဘဒ္ဒန္တမေဓိယ ကျောင်ꩻကံဦး၊ တောင်ႏကီꩻသီးဖုံႏ ပဲးတဲက်တွန်ꩻသွူ။
- ၄။ လိတ်မွူးထီသိမ်ႏယိုနဝ်ꩻ တဲမ်းသား ဗွေႏဗွန်သုနန္ဒလဲ့နဝ်ꩻ၊ တွယ်ႏနျꩻသား ဗွေႏဗွန်ထမ်းဘုရာꩻလဲ့နဝ်ꩻ "လိတ်မွူးယိုနဝ်ꩻ စွုမ်ႏလဲဉ်း၊ မဲဉ်ႏလို့လဲဉ်းတဲင် တွိုႏဆုဲင်ꩻဆုဲင်ꩻ ပါꩻမုဲင်ꩻတယဝ်း ထဲမ်ဖျင်လꩻတဝ်း"ငဝ်းနုဲင်းယို တဲမ်းပါနျꩻပါနေဟောင်း?
= တဲမ်းပါတဝ်း၊ နျꩻပါတဝ်း။
- ၅။ လိတ်မွူးပအိုဝ်ႏယိုခါနဝ်ꩻ သွဉ်ခန်ꩻလဲ့နဝ်ꩻ၊ ဖတ်လွူꩻခန်ꩻလဲ့နတ်ꩻ ဗွေႏဗွန်ထီသိမ်ႏကတဲမ်းအတွိုင်ꩻ ဗွေႏဗွန်ဉာဏ ကတွယ်ႏနျꩻဒါႏ ပအိုဝ်ႏအက္ခရာႏလိတ်မွူးတသာစောင်ႏအတွိုင်ꩻ မွေးလို့နေဟောင်း?
= မွေးလို့တဝ်း၊ မဲဉ်ႏလို့တဝ်း။
- ၆။ ဗွေႏဗွန်ထီသိမ်ႏ ကတဲမ်းခါꩻဒါႏ လိတ်မွူးပအိုဝ်ႏနဝ်ꩻ ဗီးအဝ်ႏခွိုင်းမုဲင်ꩻဖြုံႏ? သရအဝ်ႏခွိုင်းမုဲင်ꩻဖြုံႏဟောင်း?
= ဗီးအဝ်ႏ (၃၆)ဖြုံႏ၊ သရအဝ်ႏ (၁၂)ဖြုံႏသွူ။
- ၇။ လိတ်ပအိုဝ်ႏယိုခါနဝ်ꩻ ဗီးအဝ်ႏခွိုင်းမုဲင်ꩻဖြုံႏ? သရအဝ်ႏခွိုင်းမုဲင်ꩻဖြုံႏဟောင်း?
= ဗီးအဝ်ႏ(၃၃)ဖြုံႏ၊ သရအဝ်ႏ(၁၆)ဖြုံႏသွူ။
- ၈။ ဗွေႏဗွန်ထီသိမ်ႏ ကတဲမ်းခါꩻဒါႏအတွိုင်ꩻ လိတ်ပအိုဝ်ႏယိုခါနဝ်ꩻ ရဿ၊ ဒီဃ သရတဖြုံႏဖြုံႏယို ငဝ်းရန်းအဝ်ႏခွိုင်းမုဲင်ꩻရန်းဟောင်း?
= ရဿသရ တဖြုံႏဖြုံႏနဝ်ꩻ ငေါဝ်းရန်းအဝ်ႏ(၂)ရန်း၊ ဒီဃသရ တဖြုံႏဖြုံႏနဝ်ꩻ ငဝ်းရန်းအဝ်ႏ(၄)ရန်းတဲင် ရဿ၊ ဒီဃသရတခုမ်ꩻခုမ်ꩻနဝ်ꩻ စုစုခြွဉ်း ငဝ်းရန်းအဝ်ႏ(၆)ရန်းသွူ။
- ၉။ ပအိုဝ်ႏလိုꩻမျိုꩻ ကအဝ်ႏဒေါ့ꩻဒါႏ ငဝ်းယိုခါနဝ်ꩻ ငဝ်းရန်းအဝ်ႏခွိုင်းမုဲင်ꩻရန်းဟောင်း?
= အဝ်ႏ(၈)ရန်းသွူ။
- ၁၀။ လိတ်မွူးပအိုဝ်ႏယိုခါနဝ်ꩻ အသွတ်ꩻဗီးအက္ခရာႏ အဝ်ႏခွိုင်းမုဲင်ꩻဖြုံႏဟောင်း ဒေါ့ꩻနယ်နေး အသွတ်ꩻအက္ခရာႏနမ်းဖုံႏမွိုင်?
= လိတ်ပအိုဝ်ႏယိုခါနဝ်ꩻ အသွတ်ꩻအက္ခရာႏဗီးအဝ်ႏ က၊ င၊ စ၊ ဉ၊ တ၊ န၊ ပ၊ မ၊ ယ၊ ဝ- အဝ်ႏအဖြုံႏ(၁၀)သွူ။
- ၁၁။ အသွတ်ꩻအက္ခရာႏ ဖြုံႏတဆီယို ပအိုဝ်ႏငဝ်းအနေႏ မဉ်ႏအွဉ်ႏကုဲင်ထိုꩻ ယဟန်ႏနဝ်ꩻ လꩻနေဟောင်း?
= စ၊ ဉ-သွတ်ꩻ တတွယ်ꩻတွမ်ႏ တ၊ န-သွတ်ꩻတတွယ်ꩻ ယို ၂-တွယ်ꩻနဝ်ꩻ အငေါဝ်းထန်ႏဌာႏန ဌာန်ခင်ႏလမ်းတကွာႏအာငါႏတဝ်း၊ အသွတ်ꩻအနေႏနဝ်ꩻ အငဝ်းထန်ႏဗွိုန်တဝင်ꩻတဲင် အွဉ်ႏကုဲင်ထိုꩻ တတွယ်ꩻတွယ်ꩻ လꩻဒျာႏ၊ ကွယ်ႏတွော့ꩻ ပအိုဝ်ႏအနေႏ မီႏထူႏ တ-နသွတ်ꩻနဝ်ꩻဟဝ်။ ယ-သွတ်ꩻယိုလဲ့ ပအိုဝ်ႏအနေႏနဝ်ꩻ ထေင်းခွဉ်း အဲ့-အဲ သရတွယ်ꩻ အဝ်ႏလဲဉ်းတဲင် မီႏတတွက်တဝ်း ပါဠိကုဲင်ငဝ်းနဝ်ꩻ အွဉ်ႏကုဲင်ထိုꩻ လꩻဒျာႏနေနေသွူ။
- ၁၂။ လိတ်မွူးပအိုဝ်ႏယိုခါ ကစဲဉ်ႏဒါႏသွဉ်ခန်ꩻ လိတ်မွူးရဲဉ်ႏဖုံႏနဝ်ꩻ သရအစဲဉ်ႏအတွိုင်ꩻ၊ အသွတ်ꩻအစဲဉ်ႏအတွိုင်ꩻ မွေးလို့နေဟောင်း?
= မွေးလို့တဝ်း၊ မွေးယဟန်ႏလွုမ်ꩻသွူ။
- ၁၃။ လိတ်ပအိုဝ်ႏယိုခါနဝ်ꩻ ငဝ်းတငွါ လိတ်တဖြုံႏ မွေးနေဟောင်း?
= မွေးတဝ်း၊ ငေါဝ်းတငွါ လိတ် ၂-ဖြုံႏလဲ့ အဝ်ႏသွူ။ ဥပမာႏ - ကံ့ ကံ့ꩻ ကံ ကံꩻ ကံး ကံႏ။
- ၁၄။ လိတ်တဖြုံႏ ငဝ်းတငွါ မွေးနေဟောင်း?
= မွေးတဝ်း၊ လိတ်တဖြုံႏ ငဝ်း(၂)ငွါလဲ့ အဝ်ႏသွူ။ ကပ် ကပ်ꩻ ကမ် ကမ်ꩻ ကမ်း ကမ်ႏ-စတဲင်အငဝ်းဗွိုန်တဝင်ꩻ လိတ်ရဲဉ်ႏဖုံႏအဝ်ႏသွူ။ ကွတ် ကွတ်ꩻ ကွန် ကွန်ꩻ ကွန်း ကွန်ႏ။ ကွုပ် ကွုပ်ꩻ ကွုမ် ကွုမ်ꩻ ကွုမ်း ကွုမ်ႏ။ ကွစ် ကွစ်ꩻ ကွဉ် ကွဉ်ꩻ ကွဉ်း ကွဉ်ႏ။ စတဲင်နုဲင်းယိုဖုံႏနဝ်ꩻ ထွာလိတ်တဖြုံႏ ငဝ်းနီငွါဖုံႏသွူ။
- ၁၅။ လိတ်ပအိုဝ်ႏယိုခါနဝ်ꩻ သရငဝ်း၊ အသွတ်ꩻငဝ်း မဲဉ်ႏလို့နေဟောင်း?
= မဲဉ်ႏလို့တဝ်း၊ မဲဉ်ႏနဝ်ꩻ ကဲဉ်းအာအာလဲ့ ကဲဉ်းဆေ့ꩻဆေ့ꩻနဝ်ꩻ မဲဉ်ႏတဝ်းသွူ။
- ၁၆။ ဝ-သွတ်ꩻနဝ်ꩻ တွယ်ꩻအသရမဲဉ်ႏနဲ့၊ တွယ်ꩻအောသရမဲဉ်ႏနဲ့ ပျꩻနယ်တွမ်ႏအကျောင်ꩻတဲင် ဆွုံꩻဖျတ်ဖေႏမွိုင်
= ဝ-သွတ်ꩻနဝ်ꩻ တထန်ႏတဝ်း အောသရငဝ်း၊ ထန်ႏဒျာႏ အသရငဝ်းတဲင် တွယ်ꩻတွမ်ႏအသရတွော့ꩻ တဲမ်းအဒွေါင်ႏစား "အဝ်"နုဲင်းနဝ်ꩻမꩻ မဲဉ်ႏသွူ။
- ၁၇။ နီလိုꩻမျိုꩻမဉ်ꩻ "ပအိုဝ်ႏ"ယို ကတဲမ်းတွမ်ႏ ဝ-သွတ်ꩻနဝ်ꩻ ပအိုဝ်ႏလိတ်မွူးတွယ်ꩻကို အဝ်ႏနေဟောင်း?
= အဲဉ်ထဝ်း၊ အိုသရနဝ်ꩻ တွယ်ꩻတွမ်ႏ ဝ-သွတ်ꩻလဲ့ အငဝ်းတထန်ႏထူꩻချာꩻတဝ်း၊ အို-ဒျာႏတွိုင်ꩻတွိုင်ꩻသွူ။
- ၁၈။ "အုဲင့်-အုဲင်"သရကိုကပါဒါႏ င-သွတ်ꩻယို မီႏအွဉ်ႏကုဲင်ထိုꩻခန်းနဝ်ꩻ ထွာနုဲင်းမုဲင်ꩻဟောင်း?
= ထွာတဝ်းမုဲင်ꩻမုဲင်ꩻ၊ အုဲင့်-အုဲင် သရယိုနဝ်ꩻ မီႏအွဉ်ႏကုဲင်ထိုꩻခန်း င-သွတ်ꩻနဝ်ꩻမꩻမဲဉ်ႏ၊ င-သွတ်ꩻမီႏပါနဝ်ꩻ တွိုႏအသွတ်ꩻခန်ꩻကို မီႏတွယ်ꩻတွမ်ႏ က-သွတ်ꩻ၊ င-သွတ်ꩻနဝ်ꩻ အသွတ်ꩻထပ်ထိုꩻတဝင်ꩻသွူ၊ အုဲင့်-အုဲင် သရနဝ်ꩻ အငဝ်းထန်ႏနွောင်ꩻ က-သွတ်ꩻ၊ င-သွတ်ꩻလွုမ်ꩻ၊ အသွတ်ꩻလင်နဝ်ꩻ အငဝ်းထန်ႏနွောင်ꩻတဝ်းသွူ။
- ၁၉။ အော်-သရကို ကပါဒါႏ ထွို့ꩻစွဲႏယို မဉ်ႏအွဉ်ႏကုဲင်ထိုꩻခန်းနဝ်ꩻ ထွာနုဲင်းမုဲင်ꩻ?
= ထွာတဝ်းနုဲင်းမုဲင်ꩻမုဲင်ꩻ၊ အော်-သရကို ကပါဒါႏ ထွို့ꩻစွဲႏနဝ်ꩻ ထူꩻတဝ်းတမုဲင်ꩻမုဲင်ꩻ၊ တဲမ်းဗာႏပိုႏလွုမ်ꩻ၊ ထွို့ꩻစွဲႏတပါတဝ်းလဲ့ အငဝ်းထန်ႏလဲဉ်း "အော်"ဒျာႏရင်ꩻ၊ ယိုခါ "အော"ယို ကဟောꩻတေား"အေား"နဝ်ꩻ ဟောꩻမာႏဒျာႏသွူ။ ပေါႏမုဲင်နီဖြုံႏတပါတဝ်းနတ်ꩻ အောယို တဟောꩻဗာတဝ်း အေား၊ ဟောꩻဗာႏဒျာႏ အော(အော်)မꩻမဲဉ်ႏသွူ။
- ၂၀။ မန်းလိတ်၊ အင်္ဂလိပ်လိတ်၊ ပအိုဝ်ႏလိတ် လိတ်ယို(၃)မျိုꩻနောဝ်ꩻ အမျိုꩻမုဲင်ꩻစွုမ်ႏလွို၊ မဲဉ်ႏလွို၊ သွဉ်ယိုꩻလွိုဝင်ꩻဟောင်း?
= လိတ်ပအိုဝ်ႏသွူ။
- ၂၁။ လိတ်ပအိုဝ်ႏယိုခါနဝ်ꩻ သရအဝ်ႏပဉ် ၁၆-ဖြုံႏ၊ မာꩻထူꩻအီငဝ်းရန်း သင်္ကေတ အဝ်ႏပဉ်(၃)ဖြုံႏမွော့ ပွိုးထမုဲင်ꩻ တဲမ်းပအိုဝ်ႏငဝ်း လꩻလို့တဝ်းဟောင်း?
= သရငဝ်း၊ အသွတ်ꩻငဝ်းဖုံႏယို အွဉ်ႏထန်ႏမဲဉ်ႏလို့တဝ်း သွူတကာႏတဝ်း လိတ်ရဲဉ်ႏယဟန်ႏယို ထူႏသွုံꩻတဝ်း၊ အွဉ်ႏကုဲင်ထိုꩻဒျာႏဝင်ꩻဟ တဲမ်းပအိုဝ်ႏငဝ်း အီႏလꩻလို့ပဲးနဲ။ ဥပမာႏ- "ကွောတ် ကွောတ်ꩻ ကွောန် ကွောန်ꩻ ကွောန်း ကွောန်ႏ"လိတ်ရဲဉ်ႏယိုနဝ်ꩻ ထူႏသွုံꩻတဝ်းသွူ၊ လိတ်တဖြုံႏယို ငဝ်းနဝ်ꩻတဲမ်းအီတွမ်ႏ "ကွစ် ကွစ်ꩻ ကွဉ် ကွဉ်ꩻ ကွဉ်း ကွဉ်ႏ"ရဲဉ်ႏယိုတဲင် လိတ်ရဲဉ်ႏယိုနဝ်ꩻ အငဝ်းထန်ႏတေား ၂-မျိုꩻသွူ။ ၂၂။ ဗွေႏဗွန်ထီသိမ်ႏ ကတဲမ်းထွင်ႏဒါႏ လိတ်မွူးပအိုဝ်ႏနဝ်ꩻ စွုမ်ႏလို့၊ မဲဉ်ႏလို့နေဟောင်း? = ဗွေႏဗွန်ထီသိမ်ႏ ဗွေႏသုနန္ဒနဝ်ꩻ သဒ္ဒဝိဒူ၊ ဘာသန္တရသဗ္ဗညူ ပိဋကတ္တယပါရဂူတမွေးတဝ်းတဲင် စွုမ်ႏလို့မဲဉ်ႏလို့တဲ့ ရိုꩻတလꩻတဝ်းသွူ၊ ကွပ်တစွုမ်ႏလို့ မဲဉ်ႏလို့တဝ်းနဝ်ꩻမꩻတဲင် ကဖျင်၊ ကထဲမ်လဲဉ်းလဲ့ ဖျင်ထဲမ်လဲဉ်း၊ ကလိုႏဖျင်ထဲမ်နေလဲ့ အဝ်ႏနေဒွိုန်းသွူ။ ၂၃။ ပအိုဝ်ႏလိတ်လုဲင်ꩻစွစ်ꩻလီတာႏထာꩻမာꩻ ကေꩻဇူꩻတရာꩻကအာဒါႏ (က)ပုဂ္ဂိုလ်ႏလိုꩻကျောင်ꩻတပါꩻတွမ်ႏ (ခ) ပုဂ္ဂိုလ်ႏလိုꩻလမ်းတဖြာꩻ အဘွဲ့၊ အမဉ်ꩻယို ကဉ်းတဲမ်းနယ်မွိုင် = (က) ဗွေႏဗွန်ကောဝိဒ၊ ကျောင်ꩻဇဝနာရာမ၊ ဝေင်ꩻသီႏသဲင်ႏ။ (ခ) မျိုꩻရက်ခွန်ထွန်းလှိုင်၊ စက်နျꩻလိ်ပအိုဝ်ႏ၊ ပထမကျောင်ꩻတန်၊ ဝေင်ꩻတောင်ႏကီꩻ။ ၂၄။ လိတ်ပအိုဝ်ႏယိုခါ လိတ်တဖြုံႏ အငဝ်းကအဝ်ႏဗာႏ နီငွါ၊ ငဝ်းတငွါ လိတ်ကအဝ်ႏဗာႏနီဖြုံႏ၊ စွုမ်ႏတဝ်းအဝ်ႏလွို၊ ကထွာဗာႏနုဲင်းယိုနဝ်ꩻ ပွိုးအကျောင်ꩻနုဲင်းမုဲင်ꩻဟောင်း၊ ဖေႏကထွာ "စွုမ်ႏ၊ မဲဉ်ႏ၊ ယိုꩻ"လိတ်မွူးမျိုꩻနဝ်ꩻ အနယ်ꩻအဲဉ်ထဝ်းဟောင်း? = အဝ်ႏဒျာႏ၊ ယိုꩻပေႏလွုမ်ꩻ၊ ပအိုဝ်ႏလိုꩻမျိုꩻ ကဒေါ့ꩻဒါႏ ငဝ်းရန်းသွစ်ꩻရန်းအတွိုင်ꩻ လိတ်လဲ့သဘာဝယုတ္တိအဝ်ႏအဝ်ႏ အွဉ်ႏနုဲင်းနုဲင်း သွစ်ꩻရန်းထွူတဲင် တဲႏအထျꩻ ဗꩻအသွတ်ꩻ သရငဝ်း၊ အသွတ်ꩻငဝ်း မီႏအွဉ်ႏထန်ႏမဲဉ်ႏမဲဉ်ႏလို့နဝ်ꩻ လိတ်ပအိုဝ်ႏယို ထွာခန်းဒျာႏ "စွုမ်ႏ-မဲဉ်ႏ-ယိုꩻ"လိတ်မူအထီသွီႏဗွေနဝ်ꩻသွူ။ ၂၅။ ပွိုင်းဝွို့တွမ်ႏလိတ်မွူးကိစ္စလဲ့နဝ်ꩻ၊ အရေꩻအရာႏ အလောင်ႏအလင်ဒျာႏလဲ့နဝ်ꩻ နီမဉ်ႏတသေနာႏလို့တဝ်း၊ ဒါႏလဲပ်လို့တဝ်းတွော့ꩻ ကိစ္စပျဿနာႏ ဖေႏကထွူနဝ်ꩻ အီႏကျင်ꩻသွုံꩻဗာႏ အနယ်ꩻနုဲင်းမုဲင်ꩻဟောင်း? = ယိုꩻပေႏလွုမ်ꩻ၊ ချꩻမာန်ႏမာႏန၊ ပယ်ႏထိုꩻပုဂ္ဂိုလ်ႏစွယ်ꩻ၊ လိုꩻမျိုꩻစွယ်ꩻတွော့ꩻ စူꩻဝင်ꩻကသေနာႏ ဒါႏလဲပ်သားနဝ်ꩻ နီနမ်းတဲ့ တခံႏဗာႏတဝ်း ကနောက်ꩻလျား၊ လိုꩻမျိုꩻအတာႏ အယပ်ꩻအခုဲင်ႏ ပျဿနာႏအမျိုꩻမျိုꩻလဲ့ လွစ်ထန်ႏနွောင်ꩻဒျာႏနဝ်ꩻသွူ။ ယိုဖုံႏနဝ်ꩻ ပွိုင်းဝွို့တွမ်ႏ လိတ်ပအိုဝ်ႏအကျောင်ꩻခရာႏ တဲမ်းနယ်လွေꩻဖေႏဒျာႏ အရီအစေ ပဉ်ချက်ချက် ပဉ်ငွါငွါသွူ။ ခွေသွဉ်း ငဝ်းရီစေ ၂၅-ချက်ယိုအကို အချက်မုဲင်ꩻတရိုꩻတဝ်း နေးတွမ်ႏပျꩻအကျောင်ꩻ တဉ်ႏတဉ်ႏခွေါင်ခွေါင်တဲင် မဉ်ႏရိုꩻတမွေးတဝ်း တမဲဉ်ႏတဝ်း၊ မဉ်ႏရိုꩻတလက်ခံႏနွောင်ꩻတဝ်းလဲ့ မဲဉ်ဒေါ့ꩻခွေသွဉ်းနုဲင်းမုဲင်ꩻဒေါ့ꩻ ခွေသွဉ်းနေးတွမ်ႏဂါရဝနိဝွတတရာꩻတဲင် ခွေသွဉ်းအွဉ်ႏချꩻအတ္တမာႏနတရာꩻတွော့ꩻ ခွေသွဉ်းနေးခံႏဒျာႏ အွီႏအွီႏနွိုးနွိုးသွူဩ။ နေးတွမ်ႏ အဝိဇ္ဇာႏ မောဟ အတ္တမာႏနတရာꩻတွော့ꩻ မဉ်ႏကဲ့ꩻရဲ့ꩻသဲ့ꩻသွမ်ꩻခွေသွဉ်းနဝ်ꩻ ပအိုဝ်ႏစွိုးခွိုꩻအတာႏ ခွေသွဉ်းသꩻပေႏငါႏသွူဩ။ နေးတွမ်ႏမေတ္တာႏ ကရုဏာႏတရာꩻတဲင်-[၁][၂]