ဖ
ငေါဝ်းတွိုင်ꩻ(ဖ) ၁။ ဖမွန်နောဝ်ꩻ ထီႏ၊ ဖသီနောဝ်ꩻ ထိုꩻမား။ ၂။ ဖရာꩻထွူ ယားသာꩻ၊ ထာꩻမာꩻထွူ ယားခြေင်ႏ။ ၃။ ဖါခိုစူထောက်မꩻ ခွုမ်နꩻဝင်၊ ဖါခိုစူတင်မꩻ ခွုမ်နꩻကဲင်ႏ။ ၄။ ဖါဒွိုႏဖေႏဟန်ႏအို တသာႏနွိုး၊ မွိုးဒွိုႏဖေႏဟန်ႏအို တောင်းလျက်ꩻထန်ꩻ။ ၅။ ဖါးလားကဖြေꩻ ပိတ်ဒုံထန်ႏ ကွဉ်ကꩻဗွော့ꩻ ဗန်ႏဒုံကို။(လိုꩻရပ်ကို ဒုံကိုနောဝ်ꩻ အွဉ်ႏအရေꩻအခြောင်ꩻ ထူႏသွုံꩻသွော့။) ၆။ ဖါးလားကအုံ လွေꩻသွောက်ꩻသွောက်ꩻ၊ ခါးလားကကွောက်ꩻ ထံႏနေး။(ခါးလားကခွုမ်မာꩻ စိတ်ꩻစောက်ꩻ ပစော့ꩻပနျꩻထာꩻနဝ်ꩻ ခွုမ်မာꩻသွော့ ဖြွောင်ႏဖြွောင်ႏတန်တန်။ ၇။ ဖါႏသာႏဖဝ ထွုံꩻတက။(လိုꩻမျိုꩻလဲ့ အမျိုꩻမျိုꩻ၊ ဓလေ့ထွုံꩻစံႏလဲ့ အစားစား အဒေါဝ်ႏဒေါဝ်ႏ၊ တဗွိုန်ပီတောဝ်းလွဝင်ꩻ။) ၈။ ဖီးထန်ႏမွူးဟာ ခမ်းငေါဝ်ꩻ၊ ဖီးထန်ႏမွူးရောဝ်ꩻ ခမ်းလော့။ ၉။ ဖူးဝေးတမွေးတောဝ်း ဖူးနေးဒျာႏ။ ၁၀။ ဖူးဝေးအပင်ဗာႏ အလာႏပွိုတ်။(အလာႏပွစ်။)(ဖူးဝေးပသောင်းပသာႏလွုမ်ꩻ၊ ဗော့ꩻငါႏတွိုက်ငါႏ တမွေးတောဝ်း။) ၁၁။ ဖေႏစူခူꩻ ပြွယ်လားနားခေင်း ဗွိုင်းသီႏခင်ႏသွံပင်၊ ဖျင်ဖေႏစူခူꩻ ပြွယ်လာႏနားခေင်း ဆွံႏသွံဖြုံႏ။ ၁၂။ ဖေႏငီႏငါရွဉ် ဝင်ꩻထောင်ဒါႏ တဖူꩻကျမ်ꩻ၊ ဖေႏငီႏငါခံꩻ ဝင်ꩻထောင်ဒါႏ တဖူꩻတကဲင်ႏ။ ၁၃။ ဖေႏတတွာ ခြုံႏမွူး၊ လꩻတတွာ ခြုံႏရာႏ။ ၁၄။ ဖေႏတတွာ ခြုံႏရာႏ၊ လꩻတတွာ ခြုံႏမွူး။(ဖေႏထာꩻ လူႏထာꩻ သꩻစေႏတနာႏ မီႏပါမီႏသန်နဝ်ꩻ အကျိုꩻဖေႏတန်ထွူတဲင်၊ မဉ်ႏပါတဝ်းမဉ်ႏသန်တောဝ်းနောဝ်ꩻ အကျိုꩻဖေႏပေႏသွူ။) ၁၅။ ဖေႏထာꩻဗꩻ ပျꩻထာꩻလေ။(လိုꩻမူႏမဲးဖြဲးသီးဘဝ။) ၁၆။ ဖဲ့တအာႏ ဗာႏနီသွံထွောင်း။(ဖဲ့တအာႏ ဗာႏနီဆင်ႏ။)(ဒေါ့ꩻမာꩻ တမျိုꩻလွုမ်ꩻလဲ့ လꩻပါထွူပါ ထာꩻမာꩻ နီသွံမျိုꩻ။) ၁၇။ ဖို့ꩻသွူ ဗေသေင်လဲ့ တသေနန်းချာတောဝ်း အဗေသေင်။(ရပ်ခံႏသေꩻခါꩻလဲဉ်းသွူ ချွေႏရံႏပရိသတ်အမျာꩻလဲ့ တထွားချာတဝ်း၊ တထိန်ꩻတီချာ စောင်ꩻသျောက်တဝ်း၊ တသွဉ်သင်ဆွုံꩻမꩻတဝ်း။) ၁၈။ ဖိုးခံႏအလျား၊ ပနားခံႏ အခွꩻ၊ လိုꩻလွꩻ ခံႏဝင်ꩻသွမ်ꩻ။ ၁၉။ ဖိုးတသွိုꩻမꩻ နုံꩻထို၊ လိုꩻတသွိုꩻမꩻ ဆွဉ်ႏရေꩻ။ ၂၀။ ဖိုးထီး စပွိုက်၊ ဖိုးထွိုက် စဒင်ႏ။(လိုꩻတသာ စသွဉ်စူသွဉ်ခင်ႏ စလုပ်ꩻမာꩻဒါႏထာꩻ၊ တကျင်ႏတဝ်းဒွိုန်း။) ၂၁။ (က) ဖိုးထန်ႏအဖုံႏ ကေအောဝ်ႏထုမ်ႏ၊ (ခ) ဖိုးထန်ႏအဖုံႏ ကေအဲင်ႏ။(လွောင်ႏဗူႏညီႏညွတ်နွောင်ꩻစွိုꩻမုꩻ ပေါ်ꩻတအဲဉ်ထဝ်း၊ မဉ်ႏကင်ꩻတဲင်ခါ ရန်ႏသူႏနိစ္စက် ဖျက်ယား အံႏမာꩻနွောင်ꩻဒါႏသွူ။) ၂၂။ ဖိုးထေင်းနုံꩻ ဒွီးအီဟံႏ၊ လိုꩻထေင်းကံႏ လွူးအီနမ်း။ ၂၃။ ဖိုးထေင်းနုံꩻ၊ လိုꩻ ထေင်းကံႏ။(ဖိုးအောဝ်ႏထေင်းသွူအနုံꩻလဲ့ တထီႏချာတောဝ်းအနုံꩻ၊ လိုꩻအောဝ်ႏထေင်းသွူအကံႏလဲ့ တထီႏချာတောဝ်း အကံႏဟောဝ်'အကံႏကုဲင်။) ၂၄။ ဖိုးဖြား မက် ထာꩻအီႏဆား။(လိုꩻခိုအသက်တန် အရွယ်ႏဖြား နေးထူႏအုဲင်ႏ လိုꩻမူႏပေႏဆား။) ၂၅။ ဖိုးမီႏသီ လꩻအယာႏ၊ လိုꩻမီႏသီ လꩻဥစ္စာႏ။ ၂၆။ (က) ဖိုးယိန်းငဲး ဝင်ꩻယိန်းဒင်ႏ၊ မုဲးတင်ႏယိန်းတန် ဝင်ꩻယိန်းသော့ꩻ၊ (ခ) ဖိုးယိန်းတန် ဝင်ꩻယိန်းဒင်ႏ၊ ချင်ႏယိန်းတန် ဝင်ꩻယိန်းသော့ꩻ၊ (ဂ) ဖိုးယိန်းတန် ဝင်ꩻယိန်းဒင်ႏ၊ လင်ယိန်းတန် ဝင်ꩻယိန်းသော့ꩻ၊ လိုꩻကယိန်းတန် ဝင်ꩻကယိန်းသော့ꩻ။(လိုꩻသꩻဟဝ် အံႏထွဉ်ႏယိုꩻနောဝ်ꩻ ဝင်ꩻကယိန်းမဉ်အံႏထွဉ်ႏကုဲင်းသေႏသေႏတိတ်ꩻတိတ်ꩻ တလီးတလျားနောဝ်ꩻသွူ။) ၂၇။ ဖိုးသွိုန်းသင်း မင်းထွိုင်းထွူ။(လိုꩻတငွူ တငွဉ်ႏ)။ ၂၈။ ဖိုးအောဝ်ႏတဗာႏ ပနားဆေ့ꩻကယ်ꩻလဲဉ်း ဖိုး။(ကေန်ꩻမွယပ်ꩻဖြန် ဆင်ꩻရယ်ꩻစွတ်ꩻခြောမွေးငါႏထာꩻခရာႏ။) ၂၉။ ဖိုးအောဝ်ႏထင်းသေႏသေႏသွူအနုံꩻမဉ်ႏလဲ့ အနုံꩻအီႏအော့ꩻမုဲင်ꩻခါ အဗွေႏတသေချာတောဝ်း။(နီလိုꩻသီးတသေချာတောဝ်း ကံႏဟောဝ်၊ ကံႏညံးအကျိုꩻဖေႏ။) ၃၀။ ဖက်ꩻဒွိုႏတုဲင်ပုက်ꩻ၊ ကွယ်သာႏရုက်လာကို၊ စောက်ꩻအာႏယိုနဲဉ်းထီ ဗွိုန်ပီခုဲင်ႏငါႏ သာႏသနာႏ။ ၃၁။ ဖစ်ဗာႏတဝ်း လွဉ်၊ အွဉ်ဗာႏတောဝ်း တွိုႏ။ ၃၂။ ဖဉ်းမွိုတ်သွူဝင်ꩻလဲ့ တွိုႏယင်းဒါႏ ထာꩻစင်ꩻ၊ သညင်ꩻသေႏသေႏသွူဝင်ꩻလဲ့ တွိုႏယင်းဒါႏ ထာꩻလွꩻထီႏ။ ၃၃။ ဖဲတ်ထို့တွမ်ႏရွဉ်၊ လုဲင်ႏမွဉ်တွမ်ႏခံꩻ၊ ချို့ꩻယွင်ꩻကုဲင်ပြင်ꩻဒျာႏရင်ꩻင်ꩻ။ ၃၄။ ဖျင်လꩻဒွုမ် ထွာလဲဉ်းယောင်ꩻ၊ ပြောင်ꩻလꩻဒွုမ် ထွာလဲဉ်းလွိုး။(ဇာႏတိမူလ ထွာလွဉ်လဲဉ်းတဲင် ကျံႏဖျင်ကံႏမွဉ်းစွဉ်ႏနုဲင်းမုဲင်ꩻမုဲင်ꩻလဲ့ တတရေꩻနွောင်ꩻတောဝ်း အောဝ်ႏတရွူး တကုဲင်ဒျာႏစွူစွူ။) ၃၅။ ဖျဝ်လွဉ်စွော့ꩻ နီလမ်း၊ ထင်ႏယမ်းစွော့ꩻ နီတွာ၊ လိုႏထာꩻမုဲင်ꩻဟာ။ ၃၆။ ဖြားတဖြားတဝ်း အံႏမꩻသေ၊ ပြေတပြေတောဝ်း စံႏမꩻထီႏ။ ၃၇။ ဖြားထောင်ဒျာႏတဖူꩻ နုဲင်းထွꩻ။(အချိန်ႏလို့ခြေင်လွဉ်ꩻဒျာႏတွမ်ႏ ထာꩻလွေꩻသဲင်ꩻချာငါ ကိစ္စဝိစ္စဖုံႏ။) ၃၈။ ဖြားထွူမꩻ တနံဖန်၊ တန်ထွူမꩻ လူꩻမꩻစꩻ။ ၃၉။ ဖြားလွုမ်ꩻအထန်ႏ နုဲးငဗောင်၊ ဖြားလွုမ်ꩻအသောင် နုဲးဟန်ႏလွူးပုမ်ႏ။(လိုꩻနမ်းနောဝ်ꩻ ဖြားသွူလဲ့ သꩻနောဝ်ꩻ တဖြားတဝ်းတဲင် အောဝ်ႏထွေထောင် လွောက်ꩻစာꩻလွဉ်ꩻဒျာႏ ကာႏမဂွုဏ်ႏအာႏရုံႏငတ်ꩻပါꩻသွူ။) ၄၀။ ဖြေ့ဆွော့ꩻမꩻ ကံနွောင်ꩻသဉ်။ ၄၁။ ဖြေꩻတတောင်ႏ စာတရွဲး၊ ဖြေꩻတစွဲး စာတကွံꩻ၊ မျတ်ရွုမ်ꩻရွုမ်ꩻ။ ၄၂။ ဖြေꩻတွမ်ႏတငါ၊ မာတွမ်ႏဝါꩻ။(အမျိုꩻပေါင်ꩻကွိုက်ꩻ အုံညီꩻအဝ်ႏရောဝ်းလွဝင်ꩻ မီႏတရော့ꩻတောဝ်းလဲ့ အဲင်ႏခြွိုတ်ဗာႏလွဝင်ꩻ၊ ရွို့ꩻရန်ႏဒါႏလွဝင်ꩻ။) ၄၃။ ဖြေꩻတွမ်ႏတငါ၊ မာတွမ်ႏဝါꩻ၊ ရွို့ꩻမေႏဖါႏထျꩻနဝ်ꩻ ဟဝ်မေႏဖါႏထျꩻထင်ꩻ။ ၄၄။ ဖြေꩻဖိုးနဝ်ꩻ တွမ်ႏဖြေꩻမွော့ မွူးဟာ၊ နေးမာနဝ်ꩻ တွံႏနေးမွော့မွူးခေ့ꩻ။(တော်တနꩻကျုံႏမော့ꩻဒါႏ အတုꩻ အကဲက်ꩻ အညံး အဖျင်ꩻ။) ၄၅။ ဖြေꩻဗွူ လꩻပါ ယုံး။ ၄၆။ ဖြေꩻယုံး လꩻပါဗွူ။(ယိုနီပွုတ်နောဝ်ꩻ နေးအုဲင်ႏအပိုမူႏ လွူးခွမ်ꩻဗာႏပါတွမ်ႏ အမွိုးအဖါ၊ နေးအုဲႏအမွိုးအဖါ လွူးခွမ်ꩻဗာႏပါတွမ်ႏ အပိုအလီꩻ။) ၄၇။ ဖြေꩻလꩻ စာစွမ်။(ယောင်ꩻဆင်ꩻတရေꩻငါႏလဲ့ တတွိုႏတဝ်း၊ လွိုးတကုဲငါႏလဲ့ တမွေးတဝ်း၊ မဲဉ်ႏရာႏပေႏလွုမ်ꩻ။) ၄၈။ ဖြေꩻသားနဝ်ꩻ နယ်ꩻအဆာ၊ စာသားနဝ်ꩻ နယ်ꩻအပေါ်ꩻ၊ ကွန်ႏသဖေါ်ꩻ။ ၄၉။ ဖြောဝ်ꩻမူႏတရေꩻ အဝ်ႏသီပေါ၊ မန်းမူႏယာႏချော်ꩻ အဝ်ႏဗောႏတမျင်ႏ။ ၅၀။ ဖြေင်းကရစ်ꩻ မောက်ꩻဖစ်ပွမ်း၊ သွမ်ႏကလွမ်း အေင်ချိုကဲယ်ꩻ၊ ထဲင်းခြာတပဲꩻ ကဲꩻစောက်အာႏ၊ ထဲင်းခြာတဗာႏ ကျောင်ႏဒါႏထာꩻ။ ၅၁။ ဖြေင်းငိုꩻတန်ႏ၊ တကံႏငိုꩻထွိုက်။ ၅၂။ ဖြေင်းစွယ်နာႏ တောက်ꩻအီမုဲင်းနာꩻတဉ်ႏ၊ ဖြေင်းဆွို့ခြိန်ႏ ဆွို့အီနꩻဖျꩻဒါႏတောဝ်း။(ငေါဝ်းသဲ့ꩻသွမ်ꩻဝင်ꩻ။) ၅၃။ ဖြေင်းတွမ်ႏဗွာ၊ ထွာတွမ်ႏကုဲင်၊ ပြုဲင်တွမ်ႏစု၊ လို့တွမ်ႏအောဝ်ႏ၊ စဝ်ႏတွမ်ႏသဲင်၊ လဲင်တွမ်ႏတွောင်း၊ တနွောင်းတွမ်ႏဝꩻ။ ၅၄။ ဖြေင်းထီထွူႏ၊ အွူႏထီတုံ။(ငေါဝ်းအံႏဖြာႏဝင်ꩻ။) ၅၅။ ဖြေင်းထော့ꩻသွိုန်ႏထီ အငိုꩻတန်ႏ၊ တကံႏထံသွိုန်ႏထီ အငိုꩻကား၊ ဖြေင်းကီလဲ့ ဖြေင်းဖုဲင်ႏထွား။ ၅၆။ ဖြေင်းဒဲဉ်ဖွိုင်ꩻဟံႏ၊ တကံႏဒဲဉ်ဖွိုင်ꩻတောင်ꩻ။ ၅၇။ ဖြေင်းနေင်းသဲင် အမျာꩻအံႏ၊ တကံႏနေင်းသဲင် အမျာꩻသွုံꩻ။ ၅၈။ ဖြေင်းမꩻခံႏ၊ တကံႏမꩻခွေါင်၊ ယွောင်မꩻဆွော့ꩻ။ ၅၉။ ဖြေင်းမတ်မီး လွဲꩻတနတ်၊ ဖြေင်းကျောက်မတ် အံႏခံꩻ။ ၆၀။ ဖြေင်းမောက်ꩻလိန်ႏ လွိုကယ်ꩻခံꩻ၊ ဖြေင်းမောက်ဒံ လွိုကယ်ꩻဗောႏ၊ ဖြေင်းငကီလဲ့ ဖြေင်းသတင်ꩻကျောႏ။ ၆၁။ ဖြေင်းယာလံ တဒံယာစီႏ၊ လꩻတသီႏ။ ၆၂။ ဖြေင်းလုံးသူ မူလꩻခံꩻ။(တဲႏစ ၅၂-ဗꩻ ၆၂-ယိုနောဝ်ꩻ ငေါဝ်းတွိုင်ꩻအုံလိုꩻဖြေင်း၊ လိုꩻတကံႏဖဲ့ꩻ၊ အုပ်ꩻအံႏဖြာႏ ခီႏမွမ်ꩻနောဝ်ꩻသွူ။) ၆၃။ ဖြောင်းဆွဉ်ႏဆွာꩻ ကလာꩻမွေးတောဝ်း။ ၆၄။ ဖြောင်းဆွဉ်ႏဆွာꩻ ကလဲဉ်ႏလဲဉ်းကာႏ၊ ကာႏဆွဉ်ႏဆွာꩻ ကလဲဉ်ႏလင်ꩻလဲဉ်း ပြေင်အော့ꩻ၊ ပြေင်အော့ꩻဆွဉ်ႏဆွာꩻ ကလဲဉ်ႏလင်ꩻလဲဉ်း ပဒေ၊ ပဒေဆွဉ်ႏဆွာꩻ ကလဲဉ်ႏလင်ꩻလဲဉ်းကီႏ၊ ကီႏဆွဉ်ႏဆွာꩻ ကလဲဉ်ႏလင်ꩻလဲဉ်း ခင်ႏလောင်ꩻ။ ၆၅။ ဖြောင်းဆွဉ်ႏဆွာꩻဆွာꩻ နုဲင်းမီꩻယာကြွဉ်ႏ၊ ကာႏဆွဉ်ႏထိုထို နုဲင်းသဲင်ꩻမီꩻယာစင်း။ ၆၆။ ဖြောင်းတသေတဝ်းထာꩻဖြန်၊ လဲ့ဖူꩻတန် တသေတဝ်းထာꩻကျာႏပါႏ။(ဖြောင်းထီႏထာꩻမုဲင်ꩻ မဲဉ်အံႏ၊ ဟို့ꩻမဉ်ႏမဲဉ်လွေꩻနောဝ်ꩻ ယွိုန်းယပ်ꩻ။) ၆၇။ ဖြောင်းနုဲင်းအဲင်ႏနား၊ ယာႏနုဲင်းမုဲင်းသေ့ꩻ၊ နေ့ꩻဖူနုဲင်းပေင်ဗဲ၊ နမ်းတကယ်ꩻနုဲင်းသဲစ်ꩻ။(ငေါဝ်းသဲ့ꩻသွမ်ꩻဝင်ꩻ။) ၆၈။ ဖြောင်းနဝ်ꩻဒေါ့ꩻ၊ နမ်းနဝ်ꩻအုံဆွော့ꩻစွူ၊ ထာꩻမာꩻထွူနေဒါႏဟောင်း။ ၆၉။ ဖြောင်းအဲဉ်ထဝ်းအလေꩻ၊ ဖြေꩻအဲဉ်ထဝ်း အဆွတ်ꩻ၊ ဒေါ့ꩻနုဲင်းမုဲင်ꩻဒါႏ၊ ဆာႏနုဲင်းမုဲင်ꩻထွာ။ ၇၀။ ဖြောင်းအွီႏနျာႏခါႏ လိုꩻစောက်အာႏတဒွီ။ ၇၁။ ဖွိုႏငါႏလဲ့ ဝင်ꩻပကျောက်ꩻ၊ တပေါက်ꩻငါႏလဲ့ ဝင်ꩻတဝဲဉ်။(ဉာဏ်ႏပညာႏ အဆင်ႏအရန်း မဉ်ႏထဲ့ဖွိုႏငါႏနဝ်ꩻ ဝင်ꩻတမတ်လောက်တောဝ်း၊ ဝင်ꩻမတ်ဖွီသွင်ꩻပေါ်ꩻသွူ။) ၇၂။ ဖွောင်အထီ ထုမ်ႏအနမ်း။(အဝ်ႏလိုႏအွꩻအံႏ ကွဉ်ကꩻသွုံꩻဆောင်ႏသွူဆဲးဆဲးလဲ့ ကွပ်ပွိုးအထွူ ထာꩻအဲဉ်ထောဝ်းတဲင် ထုမ်ႏကျံႏဗာႏနေဒွိုန်းက ဒုက္ခငါႏ။) ၇၃။ ဖွေါင်ꩻတဉ်ႏတဉ်ႏခါꩻသွော့ တဖွေါင်ꩻ၊ ထွိုင်ꩻပစ်ꩻပစ်ꩻခါꩻသွော့ ခေါင်ꩻငွါ။ ၇၄။ (က) ဖွိုင်ꩻကင်တတစ်ꩻတောဝ်း ဖွိုင်ꩻခိုႏတစ်ꩻ၊ (ခ) ဖွိုင်ꩻကင်တလျားတောဝ်း ဖွိုင်ꩻခိုႏလျား။(ကထွာ ကာယကံႏဗွေႏနမ်း တခိုးလျားနန်းခီတဝ်း ထာꩻမုဲင်ꩻမုဲင်ꩻလဲ့ လိုꩻလင် တဆဲင်ႏတဝ်းသား အဝ်ႏခိုးလျား၊ နန်းခီတေားဒျာႏ။) ၇၅။ ဖွိုင်ꩻစောင်းခေင်ႏ၊ ဝန်ႏစောင်းဝဲင်း။ ၇၆။ (က) ဖွိုင်ꩻတလျားတောဝ်း ဖွိုင်ꩻဒို့ꩻလျား၊ (ခ) ဖွိုင်ꩻတလျားတောဝ်း ဝန်ႏလျား။(အဓိပ္ပါယ်ႏ ထွားချာသွော့ ၇၄-ကိုနေား။) ၇၇။ ဖွိုင်ꩻတကွစ်ꩻလဲ့ တောႏဒျာႏဝန်ႏတခေါဝ်။ ၇၈။ ဖွိုင်ꩻတောင်းတဲင်း၊ ဝန်ႏစောင်းဝဲင်း။(ဝန်ႏယောင်းယဲင်း။)(၇၄-၇၆-၇၈ ယိုဖုံႏနဝ်ꩻ လိုꩻကရွူး၊ လိုꩻတကုဲင်နုဲင်းနုဲင်း၊ လိုꩻတဟုံဟင်တဝ်းနုဲင်းနုဲင်း၊ ပေါးရင်းမဲးရင်း၊ ပေါးမုဲးမဲးမုဲင်းချင်ꩻချင်ꩻမော့ꩻလွဝင်ꩻ။) ၇၉။ ဖွိုင်ꩻနမ်းပန်ႏ ဝန်ႏတောင်ႏကီꩻ။(လိုꩻသꩻသဖော်ꩻ ပီဗွိုန်နုဲင်းနုဲင်း မော့ꩻကျုံႏခွဲးတော်လွဝင်ꩻ။) ၈၀။ ဖွိုင်ꩻဗော့ꩻ ဖွိုင်ꩻဆင်း၊ ဝန်ႏဗော့ꩻ ဝင်ꩻခွိုင်း။(ထတ်မွူးတွမ်ႏထတ်ထီး၊ လိုꩻမူႏတွမ်ႏလိုꩻခို မီႏအုံအောဝ်ႏဗော့ꩻလွဝင်ꩻနောဝ်ꩻ မေႏတင်ႏဒါႏ၊ ပဲစ်မာႏဒါႏ၊ လွဉ်ꩻကျူႏဒါႏလွဝင်ꩻ။) ၈၁။ ဖြွꩻငလ အေႏလီ၊ ဖြွꩻငကီ ဖြော့ꩻသွီႏ။ ၈၂။ ဖြွုမ်ပေႏခမ်းလဲ့ ဖြွုမ်ပေႏစံႏ၊ ဖြွုမ်တန်ခမ်းလဲ့ ဖြွုမ်တန်စိုꩻ။(လိုꩻပေႏလိုꩻတန် အခြောင်ꩻအခင်ႏလမ်း အရာႏဌာႏန ပငါပရာꩻဒျာႏ၊ ထာꩻမာꩻသီꩻချာꩻ ခေါ်ခေါ်ဒျာႏ။) ၈၃။ ဖြွမ်းဗူႏထွာအာႏ၊ စွိုးခွိုꩻတာႏ။[၁][၂][၃]