ဖေႏကထွာဒျာႏ
"ဖေႏကထွာဒျာႏ ပအိုဝ်ႏစွိုးခွိုꩻရေꩻတာႏ ပြွူႏဖြိုလွိုင်ႏကွုန်ꩻသာႏယာႏမု အစဲစ်အမဲဉ်ႏ" မာꩻအမျိုꩻသာꩻရေꩻ၊ မာꩻစွိုးခွိုꩻရေꩻကရိုꩻယို မာꩻအရေꩻနုဲင်းမုဲင်ꩻ၊ မာꩻအခန်ꩻကဏ္ဍမုဲင်ꩻနဝ်ꩻ ထွာစွိုးခွိုꩻတာႏ၊ ထွာအမျိုꩻသာꩻတာႏ အထျꩻထာꩻမာꩻဟောင်း၊ ခုမ်မာꩻ ပါတီနဲင်ႏငံႏရေꩻမꩻဟောင်း၊ ခုမ်မာꩻဒေႏသလွိုင်ႏကွုန်ꩻရေꩻ ရုက်ဖဲ့ꩻဆဲင်ႏရာꩻ ပြွူႏဖြိုရေꩻဖုံႏယိုမꩻ ထွာမာꩻစွိုးခွိုꩻရေꩻဟောင်း၊ မိဉ်ႏဒေါ့ꩻဗာႏ မျိုꩻသွုပ်တသာ လိုꩻပေႏသီးအရေꩻယို စွိုးခွိုꩻရေꩻ၊ အမျိုꩻသာꩻရေꩻအကို ထွာအထျꩻထာꩻမာꩻ တခန်ꩻတကဏ္ဍတစွိုးတမျိုꩻနဝ်ꩻသွူ။ ခမ်းထီတဖြုံႏကို လိုꩻဝါႏသနာႏနဲင်ႏငံႏရေꩻ၊ လိုꩻခုမ်မာꩻခမ်းထီရေꩻ၊ လိုꩻအာႏဇာႏနီႏသန် ခမ်းထီရေꩻ၊ လိုꩻဒါႏသေနာႏကျင်ႏလဲပ်ခန်း နဲင်ႏငံႏရေꩻနုဲင်းမုဲင်ꩻတယဝ်း မိဉ်ႏဒါႏကျင်ႏလဲပ်လုမ်ꩻ၊ မိဉ်ႏအာႏဇာႏနီႏသန်လုမ်ꩻ၊ မိဉ်ႏဝါႏသနာႏလုမ်ꩻ၊ မိဉ်ႏခုမ်မာꩻယံလုမ်ꩻ ဝွေꩻသီးတစုက်နဝ်ꩻ ခမ်းထီရေꩻယို ဟဝ်ဗော့ꩻလုမ်ꩻဝွေꩻသီးတစုက်တာႏတွင်ꩻနဝ်ꩻသွူ။ ဒေႏသတထွောင်းအကို ဒေႏသလွိုင်ႏကွုန်ꩻရေꩻယို ကထွာဒေႏသနဝ်ꩻအွဉ်ငါ အိုပ်ချွုတ်ဒေႏသသားသီး တာႏဝွန်ႏနဝ်ꩻသွူ၊ မိဉ်ႏနုဲင်းခမ်းနယ်ႏတဲ့ ခမ်းနယ်ႏအကို ခမ်းနယ်ႏလွိုင်ႏကွုန်ꩻရေꩻယို ကထွာခမ်းနယ်ႏအွဉ်ငါ အိုပ်ချွုတ်ခမ်းနယ်ႏသားသီး တာႏဝွန်ႏဒျာႏရင်ꩻနဝ်ꩻသွူ။ မိဉ်ႏရိုꩻခမ်းထီတဲ့ ခမ်းထီနဝ်ꩻအွဉ်ငါ အိုပ်ချွုတ်ခမ်းထီသားသီး တာႏဝွန်ႏနဝ်ꩻသွူ။ ကထွာမွိုးဖါယို ပေါႏရိုꩻသွူပိုလီꩻတာႏနဝ်ꩻ အီႏမာꩻဖေႏဗာႏယို တာႏဝွန်ႏအဝ်ႏဒျာႏရင်ꩻသွူ၊ ဗွိုန်နုဲင်းနဝ်ꩻနေနေ ပါႏထွာသွူခမ်းထီအစိုႏရ၊ ခမ်းနယ်ႏအစိုႏရ၊ ဒေႏသအွဉ်ငါနဝ်ꩻ အီႏမာꩻဖေႏဗာႏ ခမ်းသားထီသားတာႏ၊ ခမ်းနယ်ႏလိုꩻထုအတွက်၊ ဒေႏသလိုꩻအမျာꩻနဝ်ꩻ တာႏဝွန်ႏအဝ်ႏတဲင် မာꩻဖေႏဗာႏဒျာႏရင်ꩻနဝ်ꩻသွူ။ မိဉ်မာꩻဖေႏတဝ်းတွော့ꩻ မာꩻဖေႏဗာႏလွိုႏလွိုႏ၊ ဝွေꩻသီးမာꩻမꩻ ယံလွိုႏလွိုႏ၊ ဝွေꩻသီးအဝ်ႏမꩻ ခမ်းသားသီး အသက်အီႏမွန်ဗန်နွောင်ꩻလွိုႏလွိုႏ၊ ဝွေꩻသီးမိဉ်ႏတအဲဉ်ထဝ်းနဝ်ꩻ နုဲင်းစွဉ်ႏခမ်းသားသီး အသက်အီႏမွန်ဗန်နွောင်ꩻတဝ်းဒွုမ်ယောင်ႏယောင်ႏတဲင် တယ်ႏစင်ဝွေꩻသီးကရိုꩻဒါႏ အထိုသွတ်ꩻနဝ်ꩻ မိဉ်ႏဖက်တွမ်ႏခမ်းလင်ယို ထွာဒျာႏအဖွိုႏသွတ်ꩻသွူ၊ ဝွေꩻသီးကဒေါ့ꩻဒါႏ အယံသွတ်ꩻနဝ်ꩻ ခမ်းလင်ဟဲ့ꩻဒျာႏ အညံးသွတ်ꩻသွူ။ နုဲင်းယိုခါ ခမ်းထီအရန်းအိုပ်ချွုတ်ရေꩻတဲ့နဝ်ꩻ၊ ခမ်းနယ်ႏအရန်းအိုပ်ချွုတ်ရေꩻတဲ့နဝ်ꩻ၊ ဒေႏသအိုပ်ချွုတ်ရေꩻတဲ့နဝ်ꩻမာꩻ ကမာꩻလွဉ်ပြွူႏဖြိုရေꩻနဝ်ꩻတဲ့ အဝ်ႏမာꩻလွနဝ်ꩻသွူ။ ကွဲတဲင်တွော့ꩻ အကေႏနပ်လွဗော့ꩻတွမ်ႏဒျာႏ မာꩻထွူတဖူꩻခမုဲင်ꩻလီး၊ မာꩻထွူတထာခမုဲင်ꩻဗာႏ၊ လေနွောင်ႏမေႏလျပ်စစ်ခမုဲင်ꩻထွောင်း၊ မာꩻထွူသွဉ်လိတ်ကျောင်ꩻ ခမုဲင်ꩻဖြုံႏ-စတဲင် ရုက်ဖဲ့ꩻဆဲင်ႏရာꩻပြွူႏဖြိုရေꩻနဝ်ꩻသွူ။ မာꩻထွူတဖူꩻတထာတဲင် လွေꩻသဲင်ꩻဗာႏသာႏယာႏ၊ မာꩻထွူသွဉ်လိတ်ကျောင်ꩻတဲင် လိုꩻပေႏဖုံႏ သွဉ်သော့ꩻဗာႏဟဝ်လိတ်နဝ်ꩻသွူ၊ ရုက်ဖဲ့ꩻဆဲင်ႏရာꩻပြွူႏဖြိုမုယို တဲက်ထွားတွမ်ႏခွဉ်းတဲက် မဲ့ကထီႏအတွိုင်ꩻလꩻနွောင်ꩻလဲ့ ပြွူႏဖြိုမုအကဲဉ်အနဲစ်ယို အီႏတဲက်ထွားဗာႏတွမ်ႏခွဉ်းတဲက်နုဲင်းမုဲင်ꩻဟောင်း။ မာꩻထွူလဲဉ်းလိတ်သွဉ်ကျောင်ꩻ သွဉ်သော့ꩻလိတ်တာႏ ကျောင်ꩻဆောင်အဝ်ႏလဲဉ်းလဲ့ သွဉ်ဖေႏလိတ်သား ဆရာႏဖုံႏ လိုမ်းကိုမ်ႏမု အဝ်ႏနေဟောင်း၊ သွဉ်ဖေႏလိတ်သား ဆရာႏဖုံႏ လိုမ်းကိုမ်ႏမုမိဉ်ႏအဝ်ႏသွူလဲ့ သွဉ်လိတ်စနစ်ယို သွဉ်ဖေႏအထွူစနစ်ဟောင်း၊ သွဉ်ဖေႏကသေ ဖေႏကဒါႏစနစ်ဟောင်း။ နဝ်ꩻမꩻ ပအိုဝ်ႏဒေႏသနဝ်ꩻ ကွီလꩻသွဉ်လိတ်ကျောင်ꩻ၊ ကွီလꩻတဖူꩻတထာ၊ ကွီလꩻမေႏလျပ်စစ်ဖုံႏတဲင် ပအိုဝ်ႏဒေႏသပြွူႏဖြိုထင်ႏထိုလဲဉ်း ဒေါ့ꩻရိုꩻတလꩻတဝ်းနဝ်ꩻသွူ၊ ပအိုဝ်ႏဒေႏသကို ကဖျော်လွဉ်သွဉ်ဖေႏဒါႏ ဆရာႏဖုံႏ အထီအသွီႏတွမ်ႏ သွဉ်လိတ်စနစ်ယို မိဉ်ႏဟဝ်တွော့ꩻ ပအိုဝ်ႏဒေႏသကို လိုꩻပေႏလိုꩻယွဲးသီးတဲ့ မိဉ်ႏဒါႏလွဉ်၊ လိုꩻစွန်ꩻထင် လိုꩻစွန်ꩻယံဖုံႏ မိဉ်ႏပေါႏထန်ႏလွဉ်အာဒျာႏမꩻ ပြွူႏဖြိုထင်ႏထိုလွဉ် ဒေါ့ꩻရိုꩻအီႏလꩻနဝ်ꩻသွူ။ မိဉ်ႏထောင်ထွားချာ ဗꩻတွိုႏဟန်ႏသနီꩻ လိုꩻပေႏအုံနေး ပရဟိတကျောင်ꩻတွော့ꩻ ကသွဉ်ထူႏဗာႏလိတ် ပအိုဝ်ႏပေႏဖုံႏယို အဆေ့ꩻပလွိုႏလွိုႏတဝ်းထာꩻသွူ၊ ဟိုပုံꩻဝေင်ꩻနယ်ႏ နောင်တောင်ꩻပရဟိတကျောင်ꩻ ကျောင်ꩻသားလိုꩻပေႏ အဝ်ႏတရေင်လွို၊ တောင်ႏကီꩻဝေင်ꩻနယ်ႏ လုံးကောင်ပရဟိတကျောင်ꩻ ကျောင်ꩻသားလိုꩻပေႏ အဝ်ႏတရေင်လွို၊ ညောင်ႏရွီႏဝေင်ꩻနယ်ႏ ဘုရာꩻကောင်ပရဟိတကျောင်ꩻ ကျောင်ꩻသားလိုꩻပေႏ အဝ်ႏတရေင်လွို၊ ယိုနဝ်ꩻ ပအိုဝ်ႏဒေႏကိုနဝ်ꩻသွူ၊ ပအိုဝ်ႏပေႏ ကလဲဉ်းလင်ꩻဗာႏဝေင်ꩻရန်ႏကုန်ႏ၊ ဝေင်ꩻမန္တလေꩻ ပရဟိတကျောင်ꩻကို တနေင်ႏတနေင်ႏယို အဝ်ႏအရေင်နးနဝ်ꩻသွူ။ ကွဲတွော့ꩻ ယိုကိုနဝ်ꩻ ကထွာဒါႏ ပအိုဝ်ႏလိုꩻပေႏသီးအမွိုးအဖါယို ခေတ်ယိုခါနဝ်ꩻ ပရဟိတကျောင်ꩻတဲ့ အဝ်ႏအာတဲင် အဝ်ႏလိုႏဆင်ႏချင်ႏဗာႏနေနေနဝ်ꩻသွူ၊ ဝင်ꩻကမာꩻ ပရဟိတကျောင်ꩻနဝ်ꩻ လိုꩻပေႏတသွဉ်နွောင်ꩻတဝ်း သွဉ်လိတ်ကျောင်ꩻသားယို ယံသွဉ်နွောင်ꩻပညာႏတဲင် သွဉ်လွေꩻဖေႏနဝ်ꩻသွူ၊ ယဟန်ႏသားနဝ်ꩻ မွိုးဖါယို အဝ်ႏတွမ်ႏလမ်းတွိုက်၊ အဝ်ႏတွမ်ႏကာꩻ အဝ်ႏခြွေခြာႏငါႏလဲ့ အပိုနီꩻ လွေꩻအွဉ်ႏတရိမ်နွိုင်ႏတေားဒျာႏ လိုꩻပေႏတသွဉ်နွောင်ꩻတဝ်းပညာႏသားတာႏ ခင်ႏလမ်းပရဟိတကျောင်ꩻကိုနဝ်ꩻသွူ။ ယဟန်ႏသားနဝ်ꩻ ပေါႏရိုꩻအွဉ်ႏလꩻခြေင်၊ ပေါႏရိုꩻဝင်ꩻသွဉ်ဖေႏခြေင်တဲင် အွဉ်ႏစွꩻလွဉ်ꩻတငီႏတငါစွဉ်ႏ အပိုနဝ်ꩻသွူ၊ ဗုဒ္ဓဘာႏသာႏ ပရဟိတကျောင်ꩻအဝ်ႏဒါႏအတွိုင်၊ ခရစ်ယာန်ႏဘာႏသာႏ ပရဟိတကျောင်ꩻတဲ့အဝ်ႏ၊ အစ္စလမ်ဘာႏသာႏ ပရဟိတတဲ့ အဝ်ႏနုဲင်းနုဲင်းနဝ်ꩻသွူ။ ရိုꩻလꩻခြေင်တဲင် မိဉ်ႏပသာတငီႏတငါနဝ်ꩻ လဲဉ်းလွေꩻ ပရဟိတကျောင်ꩻနုဲင်းမုဲင်ꩻကရိုꩻနဝ်ꩻ အဝ်ႏလိုႏသေလွဉ်ꩻငါႏနဝ်ꩻသွူ၊ နဝ်ꩻမꩻ လိုꩻပေႏယွဲးသီးအရေꩻ၊ လိုꩻပေႏယွဲးသီးပညာႏရေꩻယို ထွာစွိုးခွိုꩻရေꩻꩻ ထွာအမျိုꩻသာꩻရေꩻ အထျꩻနဝ်ꩻသွူ။ ယိုခါ ပအိုဝ်ႏလိုꩻပေႏ မိဉ်ႏတသွဉ်ဗာႏဟဝ်ဟဝ်တဝ်းပညာႏ၊ မိဉ်ႏတဒါႏတဝ်းပညာႏနဝ်ꩻ ယိုခါ ပအိုဝ်ႏနဲင်ႏငံႏရေꩻ မိဉ်ဟဝ်ခန်းနုဲင်းမုဲင်ꩻဟဝ် အနာႏဂတ်ပအိုဝ်ႏနဲင်ႏငံႏရေꩻ၊ အနာႏဂတ်ပအိုဝ်ႏစွိုးခွိုꩻရေꩻ တဟဝ်နွောင်ꩻတဝ်းနဝ်ꩻသွူ။ ယိုခါ ပအိုဝ်ႏလိုꩻပေႏသီး မိဉ်ႏသွဉ်ဗာႏဟဝ်ပညာႏ၊ မိဉ်ႏဒါႏပညာႏနဝ်ꩻမꩻ အနာႏဂတ်ပအိုဝ်ႏခမ်းထီရေꩻ၊ အနာႏဂတ်ပအိုဝ်ႏစွိုးခွိုꩻရေꩻယိုတဲ့ အီႏဟဝ်နွောင်ꩻသွူ၊ ယိုခါ မိဉ်ႏဟဝ်လဲဉ်းလဲ့ ယိန်းအီႏဟဝ်လွေꩻထဲင်းထဲင်းနဝ်ꩻသွူ။[၁][၂]