ဖြောင်းမဉ်ႏကြောင်းသျင်ꩻ

အဝ်ႏ ဝီခီပီးဒီးယား ကို
(အဝ်ႏ ဖြောင်းမဥ်ႏကြောင်းသျင်ꩻ ယီးနယ်ချာခါꩻဒျာႏသွူ)

"ဖြောင်းမဉ်ႏကြောင်းသျင်ꩻ ရောႏဂါႏကင်ꩻ" နီနမ်းလောင်းခန္ဓာႏကို စွုမ်ႏနီꩻကအောဝ်ႏမာꩻဖေႏထာꩻမာꩻ နမ်းအင်္ဂါႏပေႏတန်အကို ဖြောင်းကိုကအောဝ်ႏဒါႏ တငါဖုံႏယိုတဲ့ စွုမ်ႏနီꩻအောဝ်ႏမာꩻဖေႏဗာႏ နီနမ်းခန္ဓာႏထာꩻမာꩻတဲင် တငါမဉ်ႏခြွိုင်ႏသန်ꩻ၊ တငါမဉ်ႏဟောဝ်မꩻ တာႏဝွန်ႏကေႏကေႏ ဝွေꩻအီႏထိန်းထမ်ႏမာꩻနွောင်ꩻဖေႏ နီနမ်းခန္ဓာႏထာꩻမာꩻ၊ တငါဖေႏကခြွိုင်ႏသန်ꩻ၊ တငါဖေႏကဟောဝ်နောဝ်ꩻ အောဝ်ႏလိုႏမာꩻဖေႏဗာႏနုဲင်းမုဲင်ꩻ- ၁။ တငါဖုံႏယို ဆကီတွမ်ႏဆလ ယူႏလꩻမုဲင်ꩻခါ အွဉ်ႏဆိပ်ခွိုꩻခွိုꩻဖေႏဗာႏလွဝင်ꩻ၊ မဉ်ႏမာꩻဖေႏနုဲင်းယိုနောဝ်ꩻ တငါခွေါင်လွဉ်၊ ဗꩻတွိုႏဖြားထံ တငါနန်ꩻအော့ꩻ၊ သꩻကော့ꩻ ဖြောင်းမော့ꩻအမျိုꩻမုဲင်ꩻ အံႏတွိုင်ꩻလꩻသွူ။ အွဉ်ႏဆိပ်တငါနောဝ်ꩻ အဆေ့ꩻသွတ်ꩻ မွူးရောဝ်ꩻခိုႏတလဲင်ႏ၊ မွူးဟာခိုႏတလဲင်ႏ မာꩻဖေႏဗာႏသွူ။ မဉ်ႏအီႏအွဉ်ႏဆိပ်တငါနောဝ်ꩻ အွဉ်ႏဆိပ်ဗွီႏဗွီႏရီးဖြောင်းဗီႏထွူမꩻ တငါတန်ဆချာ အချင်ꩻချင်ꩻအွဉ်ႏဆိပ်သွော့ဝင်ꩻ၊ မဉ်ႏထွူမꩻ တငါစွယ်ႏဆငါဖုံႏ ကွဲအွဉ်ႏဆိပ်လင်ꩻသွော့၊ ဆလတွမ်ႏဆကီ တလဲင်ႏလဲင်ႏယို မဉ်ႏအွဉ်ႏဆိပ်ဖေႏ အဆင်ႏပေါင်ꩻ(၅၀)နောဝ်ꩻယိန်းဟောဝ်သွူ။ ၂။ တငါအချင်ꩻချင်ꩻ အွဉ်ႏဆိပ်ကီလဝင်ꩻ အဆင်ႏပေါင်ꩻထွိုင်ႏအာ ဖြောင်းကိုကထန်ႏထွာလွဉ်ဒါႏ ယုဲင်ꩻထီဖုံႏယို တွမ်ႏပထိုထိုꩻမွုန်း၊ အံႏမျောႏဖေႏသွော့၊ နီကမျောႏဖေႏလင်ꩻဒါႏ ယုဲင်ꩻထီနောဝ်ꩻ တွိုႏလင်ꩻဟို့ꩻကိုသူꩻ လင်ꩻမာꩻပဲစ်ꩻဖေႏ နီကအံႏသော့ꩻဒါႏ အဆာႏအာဟာႏရဖုံႏသွူ။ ၃။ မွူးရောဝ်ꩻခိုႏဗေင်ႏထွိုင်ႏ တလဲင်ႏ၊ မွူးဟာခိုႏ အခိန်ႏအီႏဗေင်ႏထာꩻတလဲင်ႏ ပွစ်ဖေႏသွော့တငါ၊ မဉ်ႏပွစ်ဖေႏမဲဉ်ႏမဲဉ်ႏ အခိန်ႏအီႏဗေင်ႏထာꩻမွူးဟာခိုႏနောဝ်ꩻ ယိန်းဟောဝ်၊ ကွပ်နုဲင်းမုဲင်ꩻနဲတဲင် မွူးဟာခိုႏနောဝ်ꩻ ယုဲင်ꩻထီထန်ႏဆေ့ꩻတဲင် ဖြောင်းကိုယုဲင်ꩻထီသေ့ꩻသဲင်နောဝ်ꩻမꩻ သဘာဝအလꩻ ကထွာလွဉ်ဒါႏ ယုဲင်ꩻထီယို ပသေဖေႏနွောင်ꩻတောဝ်းဖြောင်းနောဝ်ꩻသွူ။ မဉ်ႏပွစ်တငါနောဝ်ꩻ အနယ်ꩻမဲဉ်ႏမဲဉ်ႏ အောဝ်ႏလိုႏပွစ်ဖေႏ၊ ဆကီဆလအခါႏကိုဖုံႏ အောဝ်ႏလိုႏပွစ်ဖေႏစွစ်ꩻစွစ်ꩻ၊ ပွစ်ဖေႏစင်စင်၊ မဉ်ႏမာꩻဖေႏနုဲင်းယိုမꩻ တငါခါႏကို ကအောဝ်ႏခံဒါႏ ဟန်ႏအိုစျꩻထာꩻယာႏစျꩻဖုံႏ ကြောင်းစင်ထိုꩻ၊ ထာꩻစျꩻမဉ်ႏအောဝ်ႏခံညတငါခါႏ ကွဲညည ထွာဒါႏတငါဆာ၊ တငါသေ့ꩻ၊ တငါရောႏဂါႏဖုံႏသွူ။ ၄။ ပေသခွိုꩻခွိုꩻ၊ ပေါက်ꩻဖြူခွိုꩻခွိုꩻသွော့ဖြောင်း၊ အံႏထာꩻမုဲင်ꩻခါခါတယောဝ်း ပေါႏအံႏထွူမဉ်ႏပသေ၊ ပေါက်ꩻဖြူထွူဖြောင်းနောဝ်ꩻ ယိန်းဟောဝ်သွူ။ အံႏတမုဲင်ꩻမုဲင်ꩻတယောဝ်း ပေသ၊ ပေါက်ဖြူဖြောင်းနောဝ်ꩻ တွမ်ႏအွဉ်ႏဖေင်ꩻမွော့ဝင်ꩻ၊ တွမ်ႏထီရိုꩻရိုꩻတဲ့နောဝ်ꩻ၊ တွမ်ႏတသာႏထီတဲ့နောဝ်ꩻ မဉ်ႏပသေဖေႏ၊ ပေါက်ꩻဖြူဖေႏနောဝ်ꩻ ဖြောင်းကိုဒဲဉ်စျꩻအိုစျꩻ၊ အနွုမ်ꩻသူႏအနွုမ်ꩻသေင်ဖုံႏ ကြောင်းစင်ထိုꩻ၊ ဖြောင်းလွီနွုမ်ꩻကုဲင်တဲ့ သက်သာႏ၊ တွမ်ႏနေင်းထီတဲ့ ပေသအီ၊ ပေါက်ꩻဖြူအီနွောင်ꩻဒျာႏ၊ နေင်းထီကိုနောဝ်ꩻ ဖလိုရင်းဓာတ်ပါတဲင် မာꩻခွေါင်ဖေႏတငါသွူ။ ၅။ မဉ်အံႏအာဟာႏရအမျိုꩻတယောဝ်း အံႏယွယွ စုဲင်ပဲစ်ꩻပဲစ်ꩻထွူမꩻ မျောႏလင်ꩻသွော့၊ အထွေတွမ်ႏအစေႏတငါနီဖဲ့ꩻ၊ စုဲင်အီခါႏခါႏတွမ်ႏ အထွေ၊ စုဲင်အီခါႏခါႏတွမ်ႏအစေႏ၊ နီဖဲ့ꩻဖေႏကညီႏမျလွဝင်ꩻနောဝ်ꩻ စုဲင်အီလူႏလုဲင်ႏဖေႏသွော့၊ ယဟန်ႏသားနောဝ်ꩻ ကျင်ꩻစုဲင်ဒါႏဒျာႏတဖဲ့ꩻလွုမ်ꩻ၊ အောဝ်ႏကုဲင်တဖဲ့ꩻနောဝ်ꩻ သမ်းစုဲင်အီဗာႏတောဝ်းတဲင် ကုဲင်းထွာဒါႏတငါဆာ၊ တငါယော့ꩻရောႏဂါႏနောဝ်ꩻသွူ။ ၆။ ဖြောင်းဗီႏဖုံႏယိုတဲ့ အောဝ်ႏလိုႏစိမ်ႏဖေႏ၊ အွဉ်ႏဆိပ်ထွူဖြောင်းတွော့ꩻ ထူႏစူမွူးတွမ်ႏစူယီးနီလီး ဖြောင်းဗီႏသွီႏဖေႏကလျားလွဉ်၊ သွီႏလွေꩻသဲင်ꩻချာငါ မဲဉ်ႏညီႏလွဉ်တဲင် ကာႏကွယ်ႏရဲနွောင်ꩻဖေႏ တငါရောႏဂါႏသွူ။ ကွပ်နောဝ်ꩻမꩻ အံႏအွꩻစွဉ်ႏအမျိုꩻမုဲင်ꩻတရိုꩻတောဝ်း အံႏအီအွꩻအီတွမ်ႏဖြောင်းလွဉ်းလွဉ်းနောဝ်ꩻမꩻ ပေါႏဖြောင်းတကြောင်းတောဝ်းတဲ့ အံႏမျောႏပါလင်ꩻခန်းဒျာႏဟို့ꩻကို၊ မဉ်ႏထွာရောႏဂါႏတဲ့ စွစ်ꩻထံခန်းဒျာႏ နမ်းတဗာႏလွုမ်းနောဝ်ꩻမꩻ အရေꩻတန်ငါႏ ဖြောင်းကြောင်းစင်ရေꩻနောဝ်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. လိတ်လုဲင်ꩻဥယျာဉ်ႏလိတ်စောင်ႏအမုဲင်(၂)
  2. ဘိက္ခုသီလာ-လွယ်ထွယ်ꩻ