ဖြေ့လင်ꩻရောႏဂါႏ

ဖြေ့လင်ꩻရောႏဂါႏ ကရိုꩻယိုနဝ်ꩻ ကဲန်းအာအာထွာဒျာႏလိုꩻခိုသွူ၊ ကွယ်ႏတွော့ꩻ လိုꩻမူႏလဲ့ အဝ်ႏထွာဒါႏဒျာႏနေနေသွူ၊ ကထွာဗာႏ ဖြေ့လင်ꩻရောႏဂါႏနုဲင်းယိုနဝ်ꩻ တလီꩻလင်ꩻလ ကထွာဒါႏ အပါနတလီꩻ(အဓောဂမတလီꩻ)ကုဲင်ဖေါက်ပြန်ႏတရိုꩻတဝ်း၊ ယွော့ထွူႏ ယွော့နွိုင်ႏငါႏ တစွိုးစွိုးတရိုꩻတဝ်း၊ အွဉ်ႏတောင်းလွဲ့ꩻခင်ႏတွော့ꩻ ဗူꩻသေင်ႏ၊ ဗူꩻဝါႏ၊ ဗူꩻထာꩻတစွိုးစွိုးတရိုꩻတဝ်း ဗွုတ်ꩻထွူႏ ထမ်ႏထွူႏငါႏထာꩻ တစွိုးစွိုးတရိုꩻတဝ်း ကုဲင်းထွာဒါႏသွူ။ မိန်ႏမာꩻနုဲင်းကီယို တစွိုးစွိုးနဝ်ꩻ ကအဝ်ႏထိန်ꩻရဲခါꩻဒါႏဖြေ့၊ ဖြေ့တွမ်ႏဒီႏကင်အခါႏကို ကအဝ်ႏဒါႏ ယပ်ယားဗွို (အမြှေးပါး)ယို ခြေင်းထိုꩻ၊ သဲ့တိုထိုꩻတွော့ꩻ ဖြေ့နဝ်ꩻ လင်ꩻလသော့ꩻထိုꩻ ဒီႏကင်ကိုသွူ၊ ကထွာစနဝ်ꩻ ယပ်ယားဗွိုယို သဲ့စွဉ်ႏတဝ်း ယန်ꩻထိုꩻယာႏထိုꩻတွော့ꩻ ကယန်ꩻကယာꩻအတွိုင်ꩻ ဖြေ့လင်ꩻလွဉ်ꩻထိုꩻသွူ။

ကယန်ꩻကယာꩻနေးလွုမ်ꩻနုဲင်းယိုနဝ်ꩻ ကလင်ꩻဒါႏဖြေ့ယို မီႏနွန်ႏထင်ႏ၊ နျꩻထင်ႏယင်းလဲ့ ထင်ႏယင်းဒျာႏသွူ၊ ကွယ်ႏတွော့ꩻ တညတဝ်း လင်ꩻယင်းဒျာႏသွူ၊ ကအဝ်ႏရဲထိန်ꩻခါꩻဒါႏ ဖြေ့ယပ်ꩻယားဗွိုယို မီႏသဲ့တိုထိုꩻမွေးနဝ်ꩻ နျꩻထင်ႏစွဉ်ႏလဲ့ တထင်ႏနွောင်ꩻတဝ်းဒွုမ်သွူ။ မီႏမော့ꩻ မီႏထွာဖြေ့လင်ꩻရောႏဂါႏနုဲင်းယိုနဝ်ꩻ ဆီႏဖြွီꩻ၊ ဟို့ꩻဖြွီꩻဖုံႏ ခြေင်းလွဉ်တဲင် ခြေ့ငါႏဆာငါႏ ခံႏတဒါႏတဝ်း၊ ယူႏပက်မွေးစွဉ်ႏထာꩻသွူ၊ ပေါႏထွာတန်နဝ်ꩻ လွေꩻငါထာꩻတဲ့ တဒါႏတဝ်းသောင်ခြင်ꩻဗာႏစွဉ်ႏထာꩻသွူ။ ဖြေ့လင်ꩻရောႏဂါႏနုဲင်းယိုနဝ်ꩻ လွေꩻတသီႏယုံႏတွော့ꩻ မီႏဖြဲ့ꩻနေးနဝ်ꩻ ဖြဲ့ꩻလဲ့တယပ်ꩻတဝ်း၊ ဟဝ်လဲ့ဟဝ်ယိုꩻသွူ။ လိုꩻယင်ဟန်ႏနဝ်ꩻ ထာꩻဝင်ꩻသꩻတန်၊ ငမ်းဝင်ꩻဖြဲ့ꩻတွော့ꩻ တလွေꩻတဝ်းတသီႏယုံႏ၊ ကျံႏခံႏဗော့ꩻဒျာႏတေ့ꩻတေ့ꩻသွူ၊ ဆီႏနွိုး သွီႏနွိုးရောႏဂါႏ ကအဝ်ႏဒါႏလိုꩻနဝ်ꩻ မီႏဖြဲ့ꩻလဲ့ အကဲင်တောတော တဟဝ်ချာတဝ်းတဲင် ဖြဲ့ꩻတလꩻတဝ်းသွူ။

နဝ်ꩻတွော့ꩻ မီႏမဲန်ဖြဲ့ꩻတဝ်း၊ နမ်းတွမ်ႏနမ်းမီႏမဲန်လိုမ်ꩻလာꩻချာဒျာႏလဲ့ ဖေႏကလိုမ်ꩻလာနွောင်ꩻနဝ်ꩻ ကထီႏကမော့ꩻ ကရွမ်ကမတ်ခါꩻဒါႏ တသီႏနယ်ꩻဖုံႏယို တဲမ်းနယ်လွေꩻဗာႏ နုဲင်းလယိုအတွိုင်ꩻသွူ။ ကွယ်ႏတွော့ꩻ အနယ်ꩻမုဲင်ꩻဟဝ်ယိုꩻ၊ အနယ်ꩻမုဲင်ꩻသေႏချာႏနဝ်ꩻ ဒေါ့ꩻတဒါႏတဝ်းတဲင် ချင်းထူႏ ချင်းသုံꩻဗာႏဒျာႏသွူ။

ဖြေ့လင်ꩻရောႏဂါႏ လိုမ်ꩻလာꩻနယ်ꩻဖုံႏ

• ၁။ ဖြေ့လင်ꩻရောႏဂါႏတသီႏနယ်ꩻနဝ်ꩻ မန်းကဟဲ့ꩻဒါႏ "ကလိန်စေ့"ယို အိုႏထိုꩻအပီ၊ ထူႏအွိုအယာႏအကိုဖဲ့ꩻတွော့ꩻ ထောင်းဖွန်ႏဖွန်ႏ အံႏဖေႏတွမ်ႏထီလိုမ်ꩻ၊ အံႏတနီꩻတလဲင်ႏ၊ အံႏတလဲင်ႏဆေ့ꩻအာနဝ်ꩻ တစေားနေင်းထီနွိုးရပ်နဝ်ꩻသွူ။ ကလိန်စေ့ယိုနဝ်ꩻ ခါႏငါႏတဲင် မီႏအံႏဝွေꩻခြေင်ခြေင်နဝ်ꩻ အံႏယပ်ꩻတွော့ꩻ မီႏလုံꩻအံႏတွမ်ႏ တောင်းလျက်ꩻထန်ႏစတဲင် ထာꩻအံႏတစွိုးစွိုးတရိုꩻတဝ်း၊ ငိုးကျော်အံႏတွမ်ႏ ဆျာဒီႏတရိုꩻတဝ်း လꩻဒျာႏသွူ။ ကလိန်စေ့ယိုနဝ်ꩻ ဘယတသီႏဆဲင်ႏဝေင်ꩻကိုနဝ်ꩻ ဝင်ꩻအဝ်ႏစာသွူ၊ ပအိုဝ်ႏဟဲ့ꩻနုဲင်းမုဲင်ꩻနဝ်ꩻ သေတဝ်းတဲင် တဲမ်းနယ်နေးဗာႏအမိဉ်ꩻမန်း "ကလိန်စေ့"နုဲင်းနဝ်ꩻသွူ။
• ၂။ တသီႏဖြ့လင်ꩻနယ်ꩻ ထဲင်းတနယ်ꩻနဝ်ꩻ ယာမန်းလာႏတဗီႏယို ချင်းရုဲင်ꩻမဲန်ႏမဲန်ႏတွမ်ႏ ကီႏခါႏတွော့ꩻ သူႏဟံးဗွိုဗွိုသွော့ ထွန်အိုမ်နေား၊ ထွူနဝ်ꩻ ထူႏတွမ်ႏတစေင်ႏတနျာႏ(ကြက်ဆူရိုးနီ)လာႏတွော့ꩻ ရုဲင်ꩻဟံးဖါးလဲန်း ယာမန်းလာႏနဝ်ꩻပေႏပေႏတွော့ꩻ အွဉ်ႏဒင်ႏလင်ꩻသွော့ ယာမန်းလာႏ ကသူႏထွူထွန်နဝ်ꩻနေား၊ ထွူနဝ်ꩻ ယာမန်းလာႏနဝ်ꩻ အွဉ်ႏဒပ်ꩻဒီႏကင်၊ တစေင်ႏလာႏနဝ်ꩻ အွဉ်ႏအထန်ႏဖဲ့ꩻတွော့ꩻ ဖေႏကတဉ်ႏနဝ်ꩻ တွမ်ႏတိတ်တမျိုꩻမျိုꩻ အွဉ်ႏပယ်ထိန်ꩻခါꩻသွော့ အထန်ႏဖဲ့ꩻနေား။

ဖေႏကတဉ်ႏ၊ ယာမန်းလာႏဖေႏကခွို့ထိုꩻပုဲင်ႏနဝ်ꩻ တစေင်ႏလာႏယို မီႏအွဉ်ႏထပ်တဝင်ꩻနီဗီး၊ တစေင်ႏလာႏအထန်ႏဖဲ့ꩻ မီႏဒပ်ꩻခါꩻသမ်းတွမ်ႏ စေးလိတ်အုပ်ယာႏနဝ်ꩻ ယိန်းဟဝ်ဟဝ်သွူ၊ အွဉ်ႏဒပ်ꩻမွူးဟာခိုႏအီႏဗေင်ႏ နုဲင်းမွူးရဝ်ꩻ ထာꩻလေဗင်ႏထွိုင်ႏမꩻ ထူႏထိုꩻနဝ်ꩻ ဆာဒွုမ်ခြေ့ဒွုမ်၊ ဟဝ်ထိုꩻစွဉ်ႏဒျာႏရိုꩻနဝ်ꩻသွူ။ အွဉ်ႏဒပ်ꩻတဟာ(တနာꩻ) မီႏတဟဝ်လွစ်တဝ်းလဲ့ စီႏရင်ꩻထဲင်ႏ၊ အွဉ်ႏဒပ်ꩻထဲင်းသွော့နေား၊ ကဲန်းအာအာနဝ်ꩻ တနာꩻငါလဲ့ ဟဝ်ဒျာႏသွူ၊ ခွန်ကုဝေ မာꩻဖေႏဗာႏ လိုꩻဆာတဖြာꩻနဝ်ꩻ ဒပ်ꩻဗာႏတနာꩻလွုမ်ꩻ ဟဝ်တငါဒျာႏ တွိုႏဟန်ႏနီꩻသွူ။ တစေင်ႏလာႏနဝ်ꩻ တစေင်ႏတနျာႏ မီႏအဲန်ထဝ်းနဝ်ꩻ တစေင်ႏဗွာလဲ့ အလွိုးအဝ်ႏလꩻဒျာႏသွူ၊ ယာမန်းလာႏ အဗီႏနေး မီႏအဲန်ထဝ်း၊ မီႏအဝ်ႏဒျာႏ အဖွန်ႏလွုမ်ꩻနဝ်ꩻ ထွန်ယို သူႏလုဲင်ႏတစေင်ႏလာႏ၊ ယာမန်းဖွန်ႏနဝ်ꩻ ဖြွေႏဒင်ႏဒွုန်ဒွုန်လုဲင်ႏ တစေင်ႏလာႏနဝ်ꩻတွော့ꩻ အွဉ်ႏဒပ်ꩻဖေႏနနဝ်ꩻလဲ့ အလွိုးအဝ်ႏလꩻဒျာႏသွူ။

• ၃။ တသီႏဖြေ့လင်ꩻနယ်ꩻ ထဲင်းတနယ်ꩻနဝ်ꩻ ပအိုဝ်ႏဟဲ့ꩻ "ဟန်ႏသင်ႏ"၊ မန်းဟဲ့ꩻ "သီဟရာဇာ"အရွီးယို မူတွမ်ႏဟူထီတဲင် သူႏဖေႏထွူ ပတ်ခါꩻတွမ်ႏပတ်တီး၊ ထိန်ꩻခါꩻတွမ်ႏတိတ်တမျိုꩻမျိုꩻနဝ်ꩻ အတအွိုလိုမ်ꩻထန်ႏယိုꩻ၊ အဝ်ႏသေနာႏစွဉ်ႏရိုꩻနဝ်ꩻသွူ။

သူႏဖေႏတလဲင်ႏဟဝ်တဝ်းလဲ့ သူႏဗာႏထဲင်းထဲင်းသွူ၊ ခါးလားကဟဝ်လွစ်နဝ်ꩻ ထင်ႏတခါႏ လင်ꩻတခါႏ ထွာဒါႏတဲင် ညညနဝ်ꩻ ထင်ႏတငါ ဟဝ်လွစ်ထိုꩻဒျာႏသွူ။

• ၄။ တသီႏဖြေ့လင်ꩻနယ်ꩻ ထဲင်းတနယ်ꩻနဝ်ꩻ မဲလေင်းကြွဉ်အို ကတဲႏဒါႏ အခြုံဟံႏ(နဂျီအိမ်)ယို မူတွမ်ႏမောက်ꩻဖါးထီတွော့ꩻ သူႏဖေႏဒီႏကင်နဝ်ꩻ သူႏတလဲင်ႏငါတဲ့ သေနာႏထွူစွဉ်ႏ အသက်သာႏ၊ ပေါႏသူႏဖေႏလစ်ꩻငတ်ꩻလဲင်ႏငါနဝ်ꩻ ဟဝ်လွစ်ထိုꩻဒျာႏ၊ တောႏတောႏတလင်ꩻချာတဝ်း ရိုꩻနဝ်ꩻသွူ။

မဲလေင်းကြွဉ်အိုခြုံနဝ်ꩻ အခြုံတန်ကတဲႏဒါႏ လံးကိုတထွောင်းထွောင်းနဝ်ꩻလဲ့အဝ်ႏ၊ အခြုံပေႏကတဲႏသော့ꩻဒါႏ ခွမ်ꩻလာꩻခါႏ၊ လိတ်အုပ်ခါႏဖုံႏလဲ့ အဝ်ႏ၊ အဝ်ႏ ၂-မျိုꩻတဲင် မီႏမော့ꩻအခြံတန်နဝ်ꩻ ယိန်းဟဝ်သွူ။

• ၅။ တသီႏဖြေ့လင်ꩻနယ်ꩻ ထဲင်းတနယ်ꩻနဝ်ꩻ ဖက်ꩻဗိုႏဒီႏ ဟံးတန်တန်တဒီႏယို သွယ်ꩻဗွိုဗွိုသွူတွော့ꩻ သော့ꩻတွမ်ႏတသာႏသီကျာꩻ တစေားအံႏဟန်ႏအိုရပ်၊ သော့ꩻထီတကောက်ꩻငါတွော့ꩻ စဲဖေႏတနာꩻ၊ နုဲင်းမွူးရဝ်ꩻ ဗေင်ႏထွိုင်ႏအွꩻနဝ်ꩻလဲ့ ဖြေ့လင်ꩻရောႏဂါႏ ဟတ်ဒျာႏနေနေရိုꩻနဝ်ꩻသွူ။

အနယ်ꩻယိုနဝ်ꩻ မာꩻယိုꩻအွꩻယိုꩻတဲင် အဝ်ႏလိုႏသုံꩻအွꩻစံꩻငါႏ သေႏသေႏချာႏချာႏ၊ မုဲင်ꩻလဲင်ႏလဲင်ႏ မုဲင်ꩻခြွိုက်ခြွိုက်သွူ။

• ၆။ ဖြေ့လင်ꩻဟဝ်နယ်ꩻ ထဲင်းတနယ်ꩻနဝ်ꩻ ခုံꩻရာႏဟံးတန်တန်တဖြုံႏယို ဖြေ့လင်ꩻသား နမ်းကိုႏတဲင်ႏဖြေꩻသွူတွော့ꩻ ကတဲမ်းနယ်ဒါႏ နမူႏနာႏပုံႏအတွိုင်ꩻ ခုံꩻရာႏလောင်းနဝ်ꩻ တွမ်ႏပသီႏစျူတရိုꩻတဝ်း၊ တွမ်ႏထꩻတရိုꩻတဝ်း တဲမ်းသွူတဲင် ထူႏတွမ်ႏခုံꩻရာႏ တဲမ်းထွူနဝ်ꩻ အွုန်တလီꩻအွဉ်ႏဆောင်ႏသွော့ ဖြေ့လင်ꩻခင်ႏလမ်း(ရပ်)နဝ်ꩻ (၇)ဆင်ႏနေား၊ ထွူနဝ်ꩻ ခုံꩻရာႏယို စွိုင်တွမ်ႏတစွိုးစွိုးတဲင် အွဉ်ႏဟွဲးသွော့သွုမ်နေား၊ ပေါႏခုံꩻရာႏတညိုႏတဝေ့ꩻထိုꩻတဲ့ ဖြေ့လင်ꩻရောႏဂါႏနဝ်ꩻလဲ့ ဟဝ်သက်သာႏလွဉ်ဒျာႏသွူ။ အနယ်ꩻနုဲင်းယို အဓိပ္ပါယ်ႏ အခရာႏနဝ်ꩻ ယူႏလွဉ်ꩻတထွꩻတဝ်းတဲင် ရိုꩻဗာႏ"ဂမ္ဘီရနယ်ꩻ"တနယ်ꩻသွူ။
• ၇။ ဖြေ့လင်ꩻဟဝ်နယ်ꩻ ထဲင်းတနယ်ꩻနဝ်ꩻ ဖြေꩻသွူမုတ်ခါႏ အွိုးပရတသီႏဆဲင်ႏဝေင်ꩻကိုတွော့ꩻ မာꩻဖွန်ႏ၊ ကွယ်ခြီတွမ်ႏမောက်ꩻဖါးထီတဲင် သူႏဖေႏတနီꩻ ၂-၃လဲင်ႏနဝ်ꩻလဲ့ ဟဝ်ဒျာႏရိုꩻနဝ်ꩻသွူ။

မုတ်ခါႏနဝ်ꩻ ဝင်ꩻဒွိုႏယမ်းဖြေꩻ (ရှားစောင်းလက်ပပ်)တဲင် ယမ်းဖြေꩻမီႏအဝ်ႏလဲ့ သူႏဖေႏယမ်းဖြေꩻအောက်ꩻယုဲင်ꩻအကိုတွမ်ႏ မောက်ꩻဖါးထီနဝ်ꩻလဲ့ လꩻဒျာႏသွူ။ ၈။ တသီႏဖြေ့လင်ꩻနယ်ꩻ ထဲင်းတနယ်ꩻနဝ်ꩻ ဟန်ႏနွန်းသီးမောင်ꩻသဲင်ယို မူတွမ်ႏဟူထီတွော့ꩻ သူႏဖေႏခွိုꩻခွိုꩻနဝ်ꩻလဲ့ ဟဝ်ဒျာႏနေနေရိုꩻနဝ်ꩻသွူ။

• ၉။ တသီႏဖြေ့လင်ꩻနယ်ꩻ ထဲင်းတနယ်ꩻနဝ်ꩻ ဇာႏတိဇိုလ်ႏရာႏအခူꩻယို မူတွမ်ႏဆျာဒီႏအထီစွူ(အထီဗွာ)နဝ်ꩻ လုံးပဲန်လောင်းတွော့ꩻ ပေါႏလဲင်ꩻသူႏသွူလဲ့ သူႏဖေႏဖြေ့လင်ꩻခင်ႏလံးနဝ်ꩻ တနီꩻ(၃)လဲင်ႏနဝ်ꩻလဲ့ ဟဝ်ဒျာႏနေနေသွူ။
• ၁၀။ တသီႏဖြေ့လင်ꩻနယ်ꩻ ထဲင်းတနယ်ꩻနဝ်ꩻ ရီဖြေꩻသွူ 'ကနုကမာခွံ'အွိုးပရတသီႏဆဲင်ႏတွော့ꩻ မူတွမ်ႏမောက်ꩻဖါးထီ၊ ပေါႏလဲင်ꩻသူႏသွူလဲ့ သူႏဖေႏဖြေ့လင်ꩻဖဲ့ꩻ၊ ဖြေ့ကလင်ꩻခင်ႏလံးနဝ်ꩻ ပင်ႏကီနွန်ႏကီဖေႏပါသွော့၊ သူႏဖေႏသွော့ တနီꩻ ၂-၃လဲင်ႏနေား၊ ရောႏဂါႏအညအမွိုင်အလွောက်ꩻ မဲ့ꩻဟဝ်သက်သာႏလွဉ်ဒျာႏသွူ။

အနယ်ꩻမုဲင်ꩻတယဝ်း မာꩻဖေႏတလဲင်ႏနီလဲင်ႏ အီႏဟဝ်နဝ်ꩻ နပ်တောတဝ်းတဲင် အွဉ်ႏသꩻဆွာꩻဆွာꩻမာꩻဖေႏထဲင်းထဲင်းသွော့နေား။

• ၁၁။ ဖြေ့လင်ꩻရောႏဂါႏ လိုမ်ꩻလာꩻနယ်ꩻ ထဲင်းတနယ်ꩻနဝ်ꩻ မီႏသေငါꩻဒါႏ အဂ္ဃိယသား မာꩻခယ်ꩻဒါႏပတာꩻနဝ်ꩻ ဖြေꩻပတာꩻထီ အွိုးပရတသီႏဆဲင်ႏ အယာႏခဉ်ႏ တကျပ်ငါတွော့ꩻ အွဉ်ႏမာꩻခယ်ꩻဖေႏသွော့နေား၊ ပတာꩻခယ်ꩻတူႏယို အအို(သော့ꩻအဖြွီꩻတာႏ) ဖေႏကအဝ်ႏနဝ်ꩻ ခါးလားကခယ်ꩻနဝ်ꩻ အွဉ်ႏစိခါꩻဗာႏ တွမ်ႏပသီႏပေႏပေႏသွူ။

ပေါႏခယ်ꩻဆွော့ꩻသွူတဲ့ ထူႏထိုꩻထွူ ပသီႏကအဝ်ႏစိသော့ꩻနဝ်ꩻတွော့ꩻ ကအဝ်ႏကုဲင်ဒါႏ အအိုကိုနဝ်ꩻ သော့ꩻတွမ်ႏတဖြွီꩻလူႏတဲင် စွိုင်ဗော့ꩻဗော့ꩻဗာႏ ဖြေ့လင်ꩻခင်ႏလံးနဝ်ꩻသွူ။ ကွယ်ႏတွော့ꩻ ဟဝ်သွူတဲ့ တွမ်ႏထူႏထိုꩻမွိုင်ပုဲင်ႏ၊ ဟွဲးဖေႏညညနဝ်ꩻ ယိန်းသေႏချာႏသွူ။ ကဟဝ်အီဗာႏ လိုꩻယဖြာꩻဖြာꩻနဝ်ꩻ အွဉ်ႏဟွဲးစွဉ်ႏ ပိဉ်နေင်ႏနေင်ႏတဲင် ရောႏဂါႏအလင်ဖုံႏတဲ့ ထိုꩻမားပါရိုꩻနဝ်ꩻသွူ။ ပတာꩻခယ်ꩻ မီႏဖြားခံႏမေႏတွော့ꩻ မီႏထွာပတာꩻဓာတ်လုံꩻနဝ်ꩻ လိုမ်ꩻလာꩻအီနွောင်ꩻ ရောႏဂါႏအမျိုꩻမျိုꩻ၊ အဖိုꩻတန်ႏငါႏသွူ။ ကွယ်ႏတွော့ꩻ ပတာꩻဖေႏကဖြားနဝ်ꩻ တယိုꩻတဝ်း၊ တယိုꩻတဝ်း၊ တယိုꩻတဝ်းလာꩻလာꩻသွူ။ ခွန်ကုဝေနဝ်ꩻ ခြွိုင်ႏသန်ꩻရေꩻအမုဲင် ဆꩻချာချာဖုံႏ ကတဲမ်းနယ်ဒါႏအတွိုင်ꩻ ဝါႏသနာႏတသီႏဖဲ့ꩻဆဲင်ႏရာꩻဖုံႏတဲင် တသီႏအင်္ဂလိတ်အုတ်ဖုံႏလဲ့နဝ်ꩻ၊