ဗ
၁။ ဗီႏလာႏလောင်းကီ တဆံꩻထီဗွို့ꩻ၊ ဆꩻကီမွူးရောင်ႏ ကထွိုင်ႏတောႏလျားစာႏ ပြုဲင်ထိုꩻမား။ ၂။ ဗဲးဖြို့ꩻဒို့ꩻဆင်သီ တဗဉ်ႏအီတောဝ်း။ ၃။ ဗုဲင်ကီသင်္ကန်ꩻ သꩻအောဝ်ႏပါႏ၊ ခြွိုင်းကီစီႏဝရာႏ သꩻအောဝ်ႏဒုံ၊ အုံကီအွိုးကျောင်ꩻ သꩻအဝ်ႏလမ်း။ ၄။ ဗုဲင်ငါႏလဲ့ အံႏမ၊ လွꩻငါႏလဲ့ အောဝ်ႏငလီꩻ။ ၅။ ဗော့ꩻကေ ထွာကေ၊ ဗော့ꩻထံ ထွာထံ။(အုံညီꩻအဝ်ႏရဝ်း လွေꩻညီꩻသဲင်ꩻသွို ပေါင်ꩻကွိုက်ꩻအာ လိုꩻမွိုက်လိုꩻရွိုင်ꩻ လိုꩻကုဲလဲ့ မွိုက်ရွိုင်ꩻ ကုဲင်ပဲစ်စီꩻနုဲင်းနုဲင်းနဝ်ꩻသွူ။) ၆။ ဗော့ꩻစံႏငါး ထွာစံႏငါး၊ ဗော့ꩻမုံꩻသွိုꩻ ထွာမုံꩻသွိုꩻ။ ၇။ ဗော့ꩻမဲ့ ညာꩻခင်ႏ။(ထင်ႏလင်ꩻထွေထောင် ကောင်ဒေင်နာဖုဲင်း။) ၈။ ဗော့ꩻမုံꩻသွိုꩻ ထွာမုံꩻသွိုꩻ၊ ဗော့ꩻစံႏငါး ထွာစံႏငါး၊ ဗော့ꩻဘုရာꩻကာႏ ထွာဘုရာꩻကာႏ။ ၉။ ဗက်ꩻတထွောင်း၊ လဲဉ်းတထွောင်း။ ၁၀။ ဗက်ꩻတအာႏ ဗာႏနီသွံထွောင်း။(မာꩻထာꩻမာꩻတမျိုꩻ၊ ဒေါ့ꩻငေါဝ်းတငွါ ထွူလို့ပါ၊ အောင်ႏမျင်ႏပါထာꩻမာꩻ နီသွံမျိုꩻ၊ ငေါဝ်းနီသွံငွါ တကာႏတောဝ်းသွူ။) ၁၁။ ဗေင်ႏခွုမ်းလဲဉ်းရွဉ်၊ ဗေင်ႏနောင်လဲဉ်းခံꩻ၊ ရွဉ်ခြေားငါႏသောင်ခြင်ꩻ ဝင်ꩻတယွုမ်းတောဝ်း။ ၁၂။ ဗေင်ႏထာꩻမဲ့ခြင်ꩻ ထာꩻနန်ꩻလေ၊ လွေꩻထာꩻရွိုးလွား တဖူꩻညာꩻ၊ သေတဝ်းတရာꩻ သံႏသရာႏည။ ၁၃။ ဗေင်ႏလွဉ်ꩻငါႏလဲ့ဖြန်၊ အံႏတန်ငါႏလဲ့ ကေန်ꩻ။ ၁၄။ ဗွာငါႏလဲ့ နွုမ်ꩻလီး၊ တသီးငါႏလဲ့ နွုမ်ꩻအေႏ၊ ဖြေင်းပေႏပေႏမꩻ နွုမ်ꩻဟွမ်။(ကာႏကွဲႏရဲးကင်ꩻ အုပ်ꩻအံႏဖြာႏ၊ အညမ်းဖျင်ꩻ အကရွူးအတကုဲင်။) ၁၅။ ဗွူခြွီဟောဝ် အမွူးယန်ꩻ၊ လိုꩻမဉ်ႏယံ မာႏနလင်ꩻ။ ၁၆။ ဗွူသိုႏ ထန်ႏတလင်ꩻ၊ လိုꩻဖျင်ꩻ ထန်ႏဒုံ။ ၁၇။ ဗွူသိုႏအမျိုꩻ ထန်ႏဗာႏတလင်ꩻ၊ လိုꩻဖျင်ꩻအမျိုꩻ ထန်ႏဗာႏခမ်း။ ၁၈။ ဗွူဟဝ်တဟဝ်တောဝ်း ထောင်းစံꩻ၊ လိုꩻဟဝ်တဟဝ်တဝ်း ကွိုက်ꩻစံꩻ။ ၁၉။ ဗွူႏဒျာႏညောဝ်ႏလဲ့ ယူးတကြောက်ကြဲ့ တကတ်ꩻရီး။ ၂၀။ ဗွူႏသွူအဆာႏလဲ့ အူႏချာလိုꩻ ထွီႏသီးအမျိုꩻ။ ၂၁။ ဗွေႏတဟဝ်တဝ်း အသွဉ်းရောင်ꩻ၊ လိုꩻကျောင်ꩻတဟောဝ်တောဝ်း တကာႏပယ်ႏ။ ၂၂။ ဗွေႏဗွန်အထွုံꩻ ကွဲးထိုꩻမားမား၊ လိုꩻဖြားအထွုံꩻ ကွဲးဖေ့ေဖ့၊ သူႏတောႏအလေ့ ကွဲးကုဲင်ကုဲင်။ ၂၃။ ဗွန်ကတန်မွိုးဖါ၊ ကေꩻဇူꩻကအာ ဆရာႏ။ ၂၄။ ဗွန်ထွက် ထွာစောက်ꩻဖါး၊ စင်ꩻထွက်ထွာခွန်၊ သျင်ႏတန်ထွက် ထွာမေႏတွိုင်ႏ။ ၂၅။ ဗွန်ထွက် ထွာဟော်ခံꩻ၊ စင်ꩻထွက် ထွာစောက်ꩻဖါး၊ သျင်ႏလုံဖြားထွက် ထွာဒုံဆောႏ(ဖြားဆောႏ)။ ၂၆။ ဗွိုန်ထီတဲႏ ထီတံꩻ၊ ပီတဆံꩻထီ ခွꩻစုံ။ ၂၇။ ဗွိုန်ပီကောဝ်ႏတုဲင် အလွီးသုဲင်။ ၂၈။ ဗွိုန်ပီနုဲင်းသာႏထဲ့ထီ၊ မေႏလူးတလီꩻနွန်ႏ၊ ခမ်းအွုမ်ႏ တလီꩻထွာႏ။ ၂၉။ ဗွိုန်ပီကောဝ်ႏတင်ႏ နင်ꩻလွိုးသွင်ႏ။ ၃၀။ ဗွိုန်ပီပန်ꩻသေꩻ နင်ꩻယောင်ꩻရေꩻ၊ ဗွိုန်ပီကောဝ်ႏဗို နင်ꩻသွောင်းထို။ [၁][၂][၃]