ဗွေႏဗိုန်ဣန္ဒြိယ

စောက်ꩻခမ်းနယ်ႏ၊ ဝေင်ꩻဖအံ၊ ကျောင်ꩻမဲဗောင် ပဓာနနာယကဗွေႏဗွန် ဘဒ္ဒန္တဣန္ဒြိယ (အဘိဓဇအဂ္ဂမဟာသဒ္ဓမ္မဇောတိက) ထေရုပ္ပတ္တိအအဲဉ်ႏ

လွူးဖွာꩻဇာႏတိ ဒုံရပ်ရာႏတွမ်ႏမွိုးဖါ

ဗွေႏဆရာႏတောႏလောင်ꩻလျာႏယိုနဝ်ꩻ ဝေင်ꩻနယ်ႏကျိုက်ထိုႏ၊ ဒုံသရက်ကုန်းကို ကအုံဒါႏ စင်ꩻဖါနန္ဒိယ+စင်ꩻမွိုးအဲင်းသီး လွူးဖွါꩻလင်ꩻ ၁၂၇၃-ဗာႏ၊ ဒဲဉ်စေတ်ꩻဆန်ꩻ(၁၂)နီꩻ၊ မွူးနီꩻ-တနင်္နွေႏနဝ်ꩻသွူ။

အုံကျောင်ꩻဗုဲင်သျင်ႏ ခံႏရဟန်ꩻ

ဗွေႏဆရာႏတောႏယို အသက်ထင်ႏလꩻ (၁၃)နေင်ႏနဝ်ꩻ မွိုးဖါယို ခံႏထူႏပစ္စေꩻလစ်ꩻပါꩻတဲင် ဗုဲင်ခန်းသျင်ႏသာႏမဏေႏ ကျောင်ꩻသရက်ကုန်း ဗွေႏဆရာႏတောႏဘဒ္ဒန္တနန္ဒထျꩻနဝ်ꩻသွူ။ အသက်(၂၀)ကထင်ႏဗွေ မွိုးဖါဖုံႏယို ခံႏထူႏထွူဝင်ꩻ ပစ္စေꩻလစ်ꩻပါꩻ ရဟန်ꩻတကာႏတဲင် ဝေင်ꩻနယ်ႏဘီးလင်း၊ ကျောင်ꩻကရဝေးဆိပ် ဗွေႏဆရာႏတောႏ ဘဒ္ဒန္တစန္ဒိမာ ထွာဖေႏဥပဇ္ဈာယ်ႏဆရႏ ဒင်ႏဖေႏခန်းသိက္ခာႏ ၁၂၉၂-ဗာႏ၊ ဒဲဉ်ဟားဆန်ꩻ(၈)နီꩻ၊ မွူးရဝ်ꩻခိုႏ (၈)နားရီႏအခိန်ႏ ကျောင်ꩻသရက်ကုန်း ဥဒကုက္ခေပ သိမ်ႏထီကိုနဝ်ꩻမꩻ သျင်ႏဣန္ဒြိယယို အဝ်ႏသာႏမဏေႏ ထွာဗꩻထင်ႏခန်း ရဟန်ꩻတောႏအရန်းနဝ်ꩻသွူ။

သွဉ်ထူႏလွေꩻဗာႏ လောကုတ္တရာႏပညာႏ

၁။ အသက်နေင်ႏ(၁၀)အရွယ်ႏ အဝ်ႏကျောင်ꩻသားဘဝ ဗွေႏဗွန်ကျောင်ꩻသရက်ကုန်း ဘဒ္ဒန္တနန္ဒထျꩻ ၂။ ဝေင်ꩻသထုံႏ ဗွေႏဗွန်ကျောင်ꩻနောင်ဗို ဘဒ္ဒန္တရာဇိန္ဒ၊ ဘဒ္ဒန္တသာသန ၃။ ဝေင်ꩻသထုံႏ၊ ဝင်းစိန်အလယ်ရွာကျောင်ꩻ၊ ဗွေႏဆရာႏတောႏ ဘဒ္ဒန္တပဏ္ဍိတ ၄။ ဝေင်ꩻမန္တလေꩻ၊ ကျောင်ꩻညောင်ကန် ဆရာႏတောႏ ဘဒ္ဒန္တကောဝိဒ ၅။ ဝေင်ꩻမန္တလေꩻ၊ ဘုရားကြီးတိုက် ဆရာႏတောႏ ဘဒ္ဒန္တနာရဒ၊တွမ်ႏဆရာႏတောႏဦးကြယ် ၆။ ဝေင်ꩻမန္တလေꩻ၊ အသောကာရာမတိုက် ဆရာႏတောႏ ဘဒ္ဒန္တသုမင်္ဂလစတဲင် ဗွေႏဆရာႏတောႏသီးထျꩻဖုံႏနဝ်ꩻသွူ။

သောင်ႏသာလွေꩻဗာႏ သာႏသနာႏထာꩻမာꩻ

သိက္ခာႏဝါႏတောႏကထင်ႏလꩻ (၂၀)နဝ်ꩻ တကာႏမဲ့ဘောင်ပင်ꩻနဝ်ꩻမꩻ တယ်ႏထောင်ႏဗွောင်လွေꩻခန်း မဲ့ဘောင်ပရိယတ္တိလိတ်သွဉ်တွိုက်နဝ်ꩻသွူ။ ဗꩻလွဉ်ဟန်ႏနီꩻ သံႏဃာႏ (၉၀)လွို အဝ်ႏသွဉ်ထူႏလွေꩻ ပရိယတ္တိကျမ်ꩻဂန်ႏဖုံႏနဝ်ꩻသွူ။ ၁။ ဗွေႏဆရာႏတောႏတဲမ်းပျုစုဖေႏဗာႏ စောက်ꩻ+မန်းနီဘာႏသာႏ ဂါႏထာႏပဒေႏသာႏကျမ်ꩻ ၂။ တည်းဖြတ်မွဉ်းဖျင်ဖေႏဗာႏ မုက္ကဒိဆရာႏတောႏ ဗွေႏဥတ္တမ ကတဲမ်းပြန်ႏဒါႏ စောက်ꩻဘာႏသာႏ သီလက္ခန်ႏ ပါဠိတောႏ၊ သဒ္ဒါႏ၊ သင်္ဂြိုဟ်ႏ၊ ဝိနည်းငယ်လေးစောင် လိတ်အုပ်ဖုံႏနဝ်ꩻသွူ ၃။ တည်းဖြတ်မွဉ်းဖျင်ဖေႏဗာႏ ဗွေႏစန္ဒနကတဲမ်းဒါႏ စောက်ꩻဘာႏသာႏပြန်ႏ ဓမ္မစကျာႏအဖြေႏတွမ်ႏ ဓမ္မပဒကျမ်ꩻဖုံႏနဝ်ꩻသွူ

သောင်ႏသာကျိုꩻစာꩻ သာႏသနာႏထာꩻမာꩻ

ဗွေႏဆရာႏတောႏယို ပရိယတ်/ ပဋိပတ် ဓူရနီပါꩻ သောင်ႏသာမာꩻလွေꩻထွူတကာႏတဝ်း တယ်ႏစနေင်ႏ ၁၃၄၂-ဗာႏ ထူႏတာႏဝွန်ႏလွေꩻ (နိုင်ငံတော်ဗဟိုသံဃဝန်ဆောင်)တာႏဝွန်ႏ၊ တယ်ႏစ ၁၃၄၇-ဗာႏ ထွာလွဉ် (နိုင်ငံတော်ဩဝါဒါစရိယ)တာႏဝွန်ႏ၊ ဇွဲကပင်ဆံတော်ရှင်စေႏတီႏ ပျုပျင်ႏမွဉ်းဖျင်ရေꩻတာႏဝွန်ႏ၊ နုဲင်ႏငန်ႏတောႏပရိယတ္တိသာသနာ့တက္ကသိုလ်ႏ ဝိဇ္ဇာလယ ကျောင်ꩻဆောင်တယ်ႏဆို့ꩻရေꩻအစွိုꩻ နာယကဆရာႏတောႏတာႏဝွန်ႏ၊ "အစိုးရစာဖြေဌာန"ယံဖေႏကလꩻနဝ်ꩻ ကျိုꩻစာꩻဆောင်ႏရွက်လွေꩻဖေႏဗာႏနဝ်ꩻသွူ။

နဲင်ႏငန်ႏတောႏလူႏကပ် ဘွဲ့တောႏမျတ်

ဗွေႏဆရာႏတောႏယို ပွိုးစွဉ်ႏကျိုꩻစာꩻသောင်ႏသာလွေꩻဖေႏ စွိုးခွိုꩻဘာႏသာႏ သာႏသနာႏကိစ္စ၊ အမျာꩻကိစ္စဖုံႏထွူတကာႏတဝ်း ဓူရနီပါꩻကျိုꩻစာꩻကံကျင်ꩻ အုံအဝ်ႏလွေꩻနဝ်ꩻမꩻ နဲင်ႏငန်ႏတောႏသီး လူႏကပ်ထင်ႏဗာႏ "အဘိဓဇအဂ္ဂမဟာသဒ္ဓမ္မဇာတိက"ဘွဲ့တောႏမျတ်နဝ်ꩻသွူ။