ဗွေႏဗွန်ခန္တီဓဇ၊ ထီဟန်ႏဆွေး

ဝေင်ꩻနယ်ႏတောင်ႏကီꩻ၊ ကျောင်ꩻထီဟန်ႏဆွေး-ဆင်တွူး အရိယမဂ္ဂင်ႏ ဗွေႏဗွန်ဘဒ္ဒန္တခန္တီဓဇ (ဂန္ထဝါစကပဏ္ဍိတ) ထေရုပ္ပတ္တိအအဲဉ်ႏ

• လွူးဖွာꩻဇာႏတိတွမ်ႏ ဒုံရပ်မွိုးဖါ- ဝေင်ꩻနယ်ႏတောင်ႏကီꩻ၊ ဒုံဆင်တွူးကို ကအဝ်ႏအုံဒါႏ စင်ꩻဖါပန်းအောင်+စင်ꩻမွိုးပျာꩻသီး လွူးဖွာꩻလွဉ် ၁၃၂၀-ဗွေ၊ တောႏလင်ꩻဆန်ꩻ (၁၀)နီꩻနဝ်ꩻသွူ။
• အုံကျောင်ꩻဗုဲင်သျင်ႏ ခံႏရဟန်ꩻ- သက်လꩻ (၁၄)နေင်ႏ ထင်ႏဗုဲင်ခန်းသျင်ႏ ကျောင်ꩻထီဟန်ႏဆွေး ဗွေႏဆရာႏတောႏ ဘဒ္ဒန္တစိန္တာႏထျꩻနဝ်ꩻသွူ။ အသက်(၂၀) ကထင်ႏဗွေနဝ်ꩻ ဒုံဆင်တွူးကို ကအဝ်ႏအုံဒါႏ ဖြားစိန္တာႏကံႏ၊ ထွက်ဉာဏ၊ ဖြားမော်သီး ထွာအထျꩻထွူတဲင် တွမ်ႏဒုံဆင်တွူးတကာႏအမျာꩻဖုံႏ ခံႏထူႏလွေꩻပစ္စေꩻလစ်ꩻပါꩻတကာႏတဲင် ဝေင်ꩻနယ်ႏတောင်ႏကီꩻ နောင်ကာꩻကျောင်ꩻနဝ် ဗွေႏဆရာႏတောႏ ဘဒ္ဒန္တပဏ္ဍိတယို ထွာဥပဇ္ဈာယ်ႏ ဒင်ႏလွေꩻဖေႏသိက္ခာႏနဝ်ꩻမꩻ ဗꩻလꩻထင်ႏခန်း ရဟန်ꩻနဝ်ꩻသွူ။

သွဉ်လွေꩻဗာႏ လောကုတ္တရာႏပညာႏ

ကျောင်ꩻထီဟန်ႏဆွေး ဗွေႏဆရာႏတောႏ ဘဒ္ဒန္တစိန္တာႏ၊ ကျောင်ꩻနောင်ကာꩻ ဗွေႏဆရာႏတောႏ ဘဒ္ဒန္တပဏ္ဍိတ၊ ဝေင်ꩻပင်ႏလုံ ဝေဠုဝန်ကျောင်ꩻ ဘဒ္ဒန္တပညာဝံသ၊ ဝေင်ꩻရန်ႏကုန်ႏ ခြောက်ထပ်ကြီးဘုရာꩻတန်ဆရာႏတောႏ ဘဒ္ဒန္တအာစိဏ္ဏ၊ ဘဒ္ဒန္တပညာဝံသ သရက်တောကျောင်ꩻတွိုက် သာသနာဒယကျောင်ꩻ ဘဒ္ဒန္တပဝါရာဘိဝံသ၊ ဘဒ္ဒန္တသုန္ဒရ။ ဝေင်ꩻပဂိုꩻ သာသနာ့မဏ္ဍိုင်ပါဠိတက္ကသိုလ်ႏ တိုက်အုပ်ဆရာႏတောႏ၊ ဘဒ္ဒန္တဓမ္မာနန္ဒ၊ ဝေင်ꩻအောင်ပန်း၊ အောင်ချမ်းသာလိတ်သွဉ်တွိုက် ဆရာႏတောႏ ဘဒ္ဒန္တပညာဝံသ၊ တွမ်ႏလိတ်ချꩻပုဂ္ဂိုလ်ႏစတဲင်ဆရာႏတောႏသီးအထျꩻသွဉ်ထူႏလွေꩻဗာႏ ပညာႏဖုံႏနဝ်ꩻမꩻ အောင်ႏမျင်ႏလꩻခန်း အစိုႏရ ငယ်-လတ်-ကြီးတန်ꩻဖုံႏနဝ်ꩻသွူ။

အဝ်ႏနဝ်ꩻထွူမꩻ အားထုတ်တရာꩻနယ်ꩻဖုံႏ ယံဖေႏကလꩻနဝ်ꩻ အုံလွေꩻယင်း ဝေင်ꩻရန်ႏတကွုန်ႏ ဗဟန်းမဟာစည်ကျောင်ꩻဆရာႏတောႏ ဘဒ္ဒန္တပဏ္ဍိတာဘိဝံသ၊ ဘဒ္ဒန္တလက္ခဏ(ကျစွာ) ဘဒ္ဒန္တသာသန၊ ဗဟန်းဝေင်ꩻနယ်ႏ၊ ပဏ္ဍိတာရာမ ရွှေတောင်ကုန်းဆရာႏတောႏ ဘဒ္ဒန္တပဏ္ဍိတာရာမ၊ ရွှေတောင်ကုန်းဆရာႏတောႏ ဘဒ္ဒန္တပဏ္ဍိတာဘိဝံသ အထျꩻဖုံႏတဲ့ဖုံႏယို နေးထူႏအားထုတ်လွေꩻဗာႏ တရာꩻဖုံႏနဝ်ꩻသွူ။ နဲင်ႏငန်ႏတောႏလူႏကပ် ဘွဲ့တောႏမျတ်

ဗွေႏခန္တီဓဇယို ပရိယတ် ပဋိတ်ပတ်ထာꩻမာꩻဖုံႏ ကျိုꩻစာꩻဆောင်ႏရွက်လွေꩻဖေႏထွူတကာႏတဝ်း ဒုံဆောင်ႏကိစ္စ၊ အမျာꩻကိစ္စဖုံႏယို အွဉ်ဟိုကျိုꩻဆောင်ႏဖေႏနဝ်ꩻမꩻ နေင်ႏ ၁၃၆၆-ဗာႏ(၂၀၀၅)ဗာႏနဝ်ꩻ နဲင်ႏငန်ႏတောႏကပ်လူႏကပ်ဒါႏ "ဂန္ထဝါစကပဏ္ဍိတ"ဘွဲ့တောႏမျတ်ယို အလူခံႏလꩻလွေꩻဗာႏနဝ်ꩻသွူ။