ဗွေႏဗွန်နရိန္ဒ

ဇာႏတိလွူးဖွာꩻရပ်၊ မွိုးဖါ

နီဗွေႏဗွန်ယိုနဝ်ꩻ သထွုံႏခမ်း၊ ဝေင်ꩻနယ်ႏသိမ်ဆိပ်၊ ဒုံတံတားဦးအကို ကအဝ်ႏအုံဒါႏ ဓမ္မကာရီကျောင်ꩻတကာႏ စင်ꩻဖါခွန်+စင်ꩻမွိုးအုပ်သီး လွူးဖွါꩻလင်ꩻလွဉ် ၁၂၇၅-ဗာႏ၊ ဒဲဉ်ရုတ်ꩻလောင်း(၄)နီꩻ၊ မွူးနီꩻ-စနေႏ အခိန်ႏမွူးဟာ(၁၁)နားရီႏ(၄၀)မိနစ်နဝ်ꩻသွူ၊ တဖူးဝေး အဝ်ႏ(၅)ဖြာꩻအကို ဒုတိယပိုခိုရတနာႏနဝ်ꩻသွူ။

ခံႏရဟန်ꩻ

ဗွေႏဆရာႏတောႏယို ဟင်္သာတ၊ အင်္ဂပူဝေင်ꩻနယ်ႏ၊ သမ္ပရာတိုင်း၊ သက်ငယ်ပြင်ကျောင်ꩻတွိုက် ပဓာနမဟာနာယက သက်တောႏ(၅၉)၊ သိက္ခာႏ(၄၀)ဝါႏကလꩻဒါႏ ဗွေႏဗွန်ဘဒ္ဒန္တမုနိန္ဒ မဟာႏထေရ်ႏ ထွာဥပဇ္ဈာယ်ႏတဲင် မွိုးဖါနီပါꩻ ခံႏထူႏသွူပစ္စေꩻလစ်ꩻပါꩻတကာႏ ကောႏဇာႏသက္ကရာဇ်နေင်ႏ ၁၂၉၅-ဗာႏ၊ ဝါႏဆိုႏလာဆန်ꩻ(၇)နီꩻနောဝ်ꩻ ဒင်ႏလွေꩻသိက္ခာႏ သထွုံႏခမ်း၊ ဝေင်ꩻနယ်ႏသိမ်ဆိပ်၊ ကျောင်ꩻတံတားဦး ခဏ္ဍသိမ်ႏတောႏအကိုနဝ်ꩻသွူ။

သွဉ်ထူႏပညာႏ

၁။ ကျောင်ꩻတံတားဦး ဗွေႏဆရာႏတောႏ ၂။ ဝေင်ꩻကျိုက်ကောႏ ဗွေႏဗွန်ကုလိနာႏရုံႏ ၃။ ဝေင်ꩻကျိုက်ကောႏ သုခိတာရုံကျောင်ꩻတွိုက်တသာ ဆရာႏတောႏဘဒ္ဒန္တဘဒ္ဒန္တစာရိန္ဒ ၄။ ဝေင်ꩻမန္တလေꩻ ဘုရားကြီးတိုက်၊ အောင်မြေရွှေဘုံတိုက်၊ စကုတိုက်၊ ဘုရားကြီးတိုက် ချꩻလိတ်ဆရာႏတောႏ ဗွေႏဝိမလတွမ်ႏ ချꩻလိတ်ဗွေႏဇာဂရ ရွှေရေးဆောင်တွိုက် တိုက်အုပ်ဗွေႏအာဒိစ္စရံသီ ၅။ တောင်မြို့ မင်္ဂလာတိုက် ဆရာႏဦးအုန်း ၆။ ဝေင်ꩻမြင်းခြံ၊ ဝေင်ꩻနယ်ႏဆီမီးခုံ ဖက်အိုင်ကျောင်ꩻတွိုက် ဗွေႏဆရာႏတောႏဗွေႏဒီပ စတဲင်ဆရာႏတောႏအထျꩻဖုံႏယို သွဉ်ထူႏလွေꩻဗာႏ လိတ်လောကုတ္တရာႏဖုံႏနောဝ်ꩻသွူ။

သာႏသနာႏအတွက် ဆောင်ႏရွက်လွေꩻဗာႏ

ဝေင်ꩻကျိုက်ထို ဘုရာꩻတန်ကျောင်ꩻတွိုက်အကို ချꩻလွေꩻဗာႏဖိုလိတ်၊ ဝေင်ꩻဟံသာဝတီ၊ ဝေင်ꩻခရမ်း၊ မဟာဓမ္မိကာရာမကျောင်ꩻ၊ ဝေင်ꩻသထွုံႏ ကျောင်ꩻပုဗ္ဗာရုံ ဗွေႏဆရာႏတောႏ ချꩻဖေႏလွေꩻဗာႏ လိတ်ဝါႏဖုံႏနောဝ်ꩻသွူ။ တယ်ႏ ၁၃၀၇-ဗာႏ ဗꩻတွိုႏဟန်ႏသနီꩻ နီဗွေႏဆရာႏတောႏယို အုံသတင်ꩻသွုံꩻလွေꩻသွူ ဝေင်ꩻတောင်ႏကီꩻ ပထမကျောင်ꩻတန်မွဉ်ခြဲင်ကိုတဲင် သာႏသနာႏအတွက် ဆောင်ႏရွက်အွဉ်ငါလွေꩻဖေႏနဝ်ꩻမꩻ နီခမ်းကောင်တခြောင်ႏ သာႏသနာႏအရောင်ႏ လေတောင်ႏလွဉ်ဗာႏနောဝ်ꩻသွူ။

နဲင်ႏငန်ႏတောႏလူႏကပ် ဘွဲ့တောႏမျတ်

နီဗွေႏဗွန်ဖြားယို သာႏသနာႏတောႏအတွက် ဆောင်ႏရွက်ကျိုꩻစာꩻတရန်မာꩻလွေꩻဖေႏ ဂွုဏ်ႏကေꩻဇူꩻတန်အာငါႏနဝ်ꩻမꩻ ၁၃၄၁(၁၉၇၉)-ဗာႏနဝ်ꩻ နဲင်ႏငန်ႏတောႏကပ်လူႏထင်ႏဗာႏ အဂ္ဂမဟာပဏ္ဍိတ ဘွဲ့တောႏနဝ်ꩻသွူ။