ဗွေႏမောဂ္ဂလာန်ႏကျွꩻဗျဟ္မာႏခမ်း
"မဟာမောဂ္ဂလာနသုတ် (ဗွေႏမောဂ္ဂလာန်ႏ ကျွꩻထင်ႏဗျဟ္မာႏခမ်း)" အွိုးခꩻတလဲင်ႏ- ဗွေႏမဟာႏမောဂ္ဂလာန်ႏ အဝ်ႏအုံတပါꩻ စဉ်ꩻစာꩻယူႏနုဲင်းယို- "သောႏတာႏပန်ႏပုဂ္ဂိုလ်ႏသီး အမျိုꩻနဝ်ꩻ တထဲ့နွောင်ꩻဒွုမ် (ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ) အပါယ်ႏလစ်ꩻခမ်း၊ အကျိုꩻဟောဝ်ဖေႏ သေႏသေႏလဲက်းသွူ၊ 'သေႏချာႏလꩻကီထင်ႏ'(သကဒါဂါမိမဂ်၊ အနာဂါမိမဂ်၊ အရဟတ္တမဂ်)၊ 'မဂ်သွံပါꩻလွုမ်ꩻ'ကရိုနꩻဝ်ꩻ လူꩻအမျိုꩻမုဲင်ꩻသေနဲး"စဉ်ꩻစာꩻယူႏနုဲင်းနောဝ်ꩻသွူ။ ဝွေꩻဗွေႏတပဲ့ꩻ 'စင်ꩻတိဿ'နဝ်ꩻ စလွဉ်ႏထိုꩻ၊ ယိုခါ ထင်ႏထွာဗျဟ္မာႏ၊ 'တိဿဗျဟ္မာႏနဝ်ꩻ တံꩻခိုꩻတန်၊ အစွန်ꩻအာနုဘောႏတန်'ကရိုꩻနဝ်ꩻ ဗျဟ္မာႏသီးဖုံႏ အဝ်ႏသေနဝ်ꩻသွူ။ တွိုႏနဝ်ꩻခါ ဗွေႏမဟာႏမောဂ္ဂလာန်ႏ အဝ်ႏကျောင်ꩻဇေႏတဝွန်ႏကို ဖျော်ထင်ႏစွော့ꩻ ဗျဟ္မာႏခမ်း၊ တိဿဗျဟ္မာႏ သဲ့စ်ကထီႏတဲင် သꩻရောင်းသꩻရေꩻ လောႏကျိုႏဆွုမ်ႏ၊ ဗွေႏမဟာႏမောဂ္ဂလာန်ႏ အုံလင်ꩻခင်ႏလမ်းကိုထွူတဲင် ရီတိဿဗျဟ္မာႏနုဲင်းယို- "သောႏတာႏပန်ႏသီးအမျိုꩻနဝ်ꩻ တထဲ့နွောင်ꩻတဝ်းဒွုမ် အပါယ်ႏလစ်ꩻခမ်း၊ အကျိုꩻဟောဝ်ဖေႏသေႏသေႏလဲဉ်းသွူ၊ 'သေႏချာႏလꩻကီထင်ႏ မဂ်သွံပါꩻလွုမ်ꩻ'ကရိုꩻနဝ်ꩻ လူꩻအမျိုꩻမုဲင်ꩻသေဟောင်း" "ဩဗွေႏ မောဂ္ဂလာန်ႏဗွေႏဩ- လူꩻစာတုမဟာရာဇ်နဝ်ꩻ သေဗွေႏဩ" "ဗျဟ္မာႏတိဿ- ပေါႏရိုꩻတဲင် လူꩻစာတုမဟာႏရာဇ်နဝ်ꩻ သေလို့လွဉ်းလွဉ်းနဲ့" "ဩဗွေႏ မောဂ္ဂလာန်ႏဗွေႏဩ- လူꩻစာတုမဟာႏရာဇ်တွိုင်ꩻတဲ့ တသေလို့တဝ်း ဗွေႏဩ" "တိဿဗျဟ္မာႏဟွေး- ကသေသောႏတာႏပန်ႏပုဂ္ဂိုလ်ႏခရာႏနဝ်ꩻ လူꩻစာတုမဟာႏရာဇ်နုဲင်းမုဲင်ꩻစား၊ တသေတဝ်းသားနောဝ်ꩻ လူꩻစာတုမဟာႏရာဇ် နုဲင်းမုဲင်ꩻစားဟောင်း" "ဩဗွေႏ မောဂ္ဂလာန်ႏဗွေႏဩ- ယွုမ်းခြောႏခြဲ့ꩻမွေး ဘုရာꩻ တရာꩻ သံဃာႏ သဒ္ဓါႏတကုဲင်နွောင်ꩻတဝ်း၊ သီႏလတကုဲင်နွောင်ꩻတဝ်း လူꩻစာတုမဟာရာဇ် (လူꩻသောႏတာႏပန်ႏ)နဝ်ꩻမꩻ သေ၊ သဒ္ဓါႏတခွေါင်တဝ်း၊ သီႏလတခွေါင်တဝ်း (သောႏတာႏပန်ႏ တမွေးတဝ်း) လူꩻစာတုမဟာႏရာဇ်နဝ်ꩻ တသေတဝ်း သောႏတာႏပန်ႏပုဂ္ဂိုလ်ႏခရာႏ ဗွေႏဩ" "မွေးသွူ တိဿဗျဟ္မာႏ- သေဒျာႏ လူꩻစာတုမဟာႏရာဇ်လွုမ်ꩻနဲ့၊ အဝ်ႏကုဲင်လူꩻတာတတိံသာႏ၊ လူꩻယာႏမာႏ၊ လူꩻတုသိတာႏ၊ လူꩻနိမ္မာနရတိ၊ လူꩻပရနိမ္မိတဝသဝတ္တီႏ-ဖုံႏနဝ်ꩻဟာ သေတဝ်းသောႏတာႏပန်ႏပုဂ္ဂိုလ်ႏခရာႏနဲ့" "ဩဗွေႏ မောဂ္ဂလာန်ႏဗွေႏဩ- အဝ်ႏကုဲင်လူꩻဖုံႏနဝ်ꩻတဲ့ သဒ္ဓါႏတကုဲင်နွောင်ꩻတဝ်း၊ သီႏလတကုဲနွောင်ꩻတဝ်း လူꩻ(သောႏတာႏပန်ႏ)နဝ်ꩻမꩻ သေထွꩻသောႏတာႏပန်ႏပုဂ္ဂိုလ်ႏခရာႏ၊ သဒ္ဓါႏတခွေါင်တဝ်း (လူꩻသောႏတာႏပန်ႏ တမွေးတဝ်း)သားဖုံႏနဝ်ꩻ သေတဝ်း သောႏတာႏပန်ႏခရာႏ ဗွေႏဩ"တိဿဗျဟ္မာႏ လောဝ်းနယ်နုဲင်းနဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ မဟာမောဂ္ဂလာနသုတ်)[၁][၂]