မာဝါꩻအဝ်ႏလစ်ꩻခိုမ်ꩻ
"ပဌမသံဝါသသုတ် (မာဝါꩻ အဝ်ႏလစ်ꩻခိုမ်ꩻ)" နီဗွေႏဘုရာꩻဟော်ꩻဖေႏ သဌေꩻတမာဝါꩻ တရာꩻနုဲင်းယို- "သဌေꩻမူႏခိုသီးဟွေး- တောႏလမ်းတောႏပါႏ တမာဝါꩻနဝ်ꩻ အဝ်ႏလစ်ꩻခိုမ်ꩻ၊ လစ်ꩻခုမ်ꩻကရိုꩻနဝ်ꩻ- ၁။ ဆဝေါ ဆဝါယ သဒ္ဓိံ သံဝသတိ- 'အဝါꩻနဝ်ꩻ ဗွန်လိုꩻသီ-အမာနဝ်ꩻ ပီလိုꩻမား'၊ ဗွန်ပီနုဲင်းမုဲင်ꩻနဲတဲင် အဝါꩻတဲ့ အကျင်ꩻဂွုဏ်ႏသီ-အကျင်ꩻဟောဝ်တဝ်း၊ အမာတဲ့ အကျင်ꩻဟောဝ်တဝ်း၊ မာမာဝါꩻဝါꩻ မာꩻသီဝင်ꩻသက်၊ ထူႏတခွန်ꩻဝင်ꩻတခြိုꩻ၊ ပဲ့စ်ႏမာႏဝင်ပိုမာ၊ ပဲ့စ်မာႏဝင်ꩻပိုဝါꩻ၊ ဒေါ့ꩻလဲဉ်ထာꩻ၊ အွꩻဒေါဝ်၊ သီႏလအဲဉ်ထဝ်း၊ သꩻရင်ꩻဟောဝ်တဝ်း၊ တကေးဒါႏဝင်ꩻ၊ ခွန်းထွမ်ဒါႏ သမဏဗြာဟ္မဏ (ရဟန်ꩻပုဏ္ဏာꩻ)၊ ယိုနဝ်ꩻ ပထမတခိုမ်ꩻ (မာမာဝါꩻဝါꩻ) ဟောဝ်တဝ်းနီဖြာꩻဖြာꩻ။ ၂။ ဆဝေါ ဒေဝိယာ သဒ္ဓိံ သံဝသတိ- 'အဝါꩻနဝ်ꩻ ဗွန်လိုꩻသီ-အမာနဝ်ꩻ ပီနင်ꩻလူꩻမူႏ'၊ အဝါꩻနဝ်ꩻ အကျင်ꩻဟောဝ်တဝ်း၊ သီႏလအဲဉ်ထောဝ်း၊ သꩻရင်ꩻဟောဝ်တဝ်း၊ တကေးဒါႏဝင်ꩻ၊ ခွန်းထွမ်ဒါႏ သမဏဗြာဟ္မဏ၊ တွိုႏအမာနဝ်ꩻ အကျင်ꩻဟောဝ် (နုဲင်းနင်ꩻလူꩻမူႏ)၊ သီႏလအဝ်ႏ၊ သꩻရင်ꩻဟောဝ်၊ တကေးဒါႏတဝ်းဝင်ꩻ၊ ခွန်းထွမ်ဒါႏတဝ်း သမဏဗြာဟ္မဏ၊ ယိုနဝ်ꩻ ဒုတိယတခိုမ်ꩻ၊ အဝါꩻဟောဝ်တဝ်း၊ အမာဟောဝ်။ ၃။ ဒေဝေါ ဆဝါယ သဒ္ဓိံ သံဝသတိ- 'အဝါꩻနဝ်ꩻ ဗွန်ခွန်လူꩻ(နတ်သာꩻ)-အမာနဝ်ꩻ ပီလိုꩻသီ'၊ အဝါꩻနဝ်ꩻ မာꩻသီတဝ်းဝင်ꩻသက်၊ ထူႏတခွန်ꩻတဝ်းဝင်ꩻတခြိုꩻ၊ ပဲ့စ်မာႏတဝ်းဝင်ꩻပိုမာ၊ ဒေါ့ꩻလဲဉ်တဝ်းထာꩻ၊ အွꩻတဝ်းဒေါဝ်၊ သီႏလအဝ်ႏ၊ သꩻရင်ꩻဟောဝ်၊ တကေးဒါႏတဝ်းဝင်ꩻ၊ ခွန်ထွမ်ဒါႏတဝ်း သမဏဗြာဟ္မဏ၊ တွိုႏအမာနဝ်ꩻ ပီလိုꩻသီ၊ အကျင်ꩻဂွုဏ်ႏသီထိုꩻ၊ အကျင်ꩻဟောဝ်တဝ်း၊ မာꩻသီဝင်ꩻသက်၊ ထူႏတခွန်ꩻဝင်ꩻတခြိုꩻ၊ ပဲ့စ်မာႏဝင်ꩻပိုဝါꩻ၊ ဒေါ့ꩻလဲဉ်ထာꩻ၊ အွꩻဒေါဝ်၊ သီႏလအဲဉ်ထဝ်း၊ သꩻရင်ꩻဟောဝ်တဝ်း၊ တကေးဒါႏဝင်ꩻ၊ ခွန်းထွမ်ဒါႏ သမဏဗြာဟ္မဏ၊ ယိုနဝ်ꩻ တတိယတခိုမ်ꩻ၊ အဝါꩻဟောဝ်ꩻ အမာဟောဝ်တဝ်း။ ၄။ ဒေဝေါ ဒေဝိယာ သဒ္ဓိံ သံဝသတိ- 'အဝါꩻနဝ်ꩻ ဗွန်ခွန်လူꩻခို-အမာယို ပီနင်ꩻလူꩻမူႏ'၊ မာမာဝါꩻဝါꩻ၊ အကျင်ꩻဟောဝ်နုဲင်းနုဲင်းဝင်ꩻ၊ သီႏလအဝ်ႏနုဲင်းနုဲင်းဝင်ꩻ၊ သꩻရင်ꩻဟောဝ်နုဲင်းနုဲင်းဝင်ꩻ၊ တကေးဒါႏဝင်ꩻ နုဲင်းနုဲင်းဝင်ꩻ၊ ခွန်းထွမ်ဒါႏတဝ်း သမဏဗြာဟ္မဏနုဲင်းနုဲင်းဝင်ꩻ၊ ယိုနဝ်ꩻ စတုတ္ထတခိုမ်ꩻ၊ အဝါꩻတဲ့ထွာလိုꩻဟောဝ်၊ အမာတဲ့ထွာလိုꩻဒါႏ၊ အုံညီꩻလို့ဝင်ꩻ အချမ်ꩻသာႏသွတ်ꩻနောဝ်ꩻသွူ။
"မာဝါꩻလစ်ꩻခိုမ်ꩻ-ငေါဝ်းလင်္ကာႏ" ၁။ ဝါꩻညမ်း-မာညမ်း ၊ လိုꩻအခမ်း ၊ လွူးနမ်း ကေန်ꩻခြောထွာ ။
၂။ မာဟောဝ်-ဝါꩻညမ်း ၊ လိုꩻအခမ်း ၊ လွူးနမ်း ဒုက္ခအာ ။
၃။ ဝါꩻဟောဝ်-မာညမ်း ၊ လိုꩻအခမ်း ၊ လွူးနမ်း ယပ်ꩻခုဲင်ႏအာ ။
၄။ မာဝါꩻ-မညမ်း ၊ လိုꩻအခမ်း ၊ လွူးနမ်း ချမ်ꩻသာႏထွာ ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ပဌမသံဝါသသုတ်)[၁][၂]