မီဒီယာကရိုꩻနဝ်ꩻ

"မီဒီယာကရိုꩻနဝ်ꩻ ငမ်းမွုန်းတရျိုးမွုန်း၊ သွုံꩻအာႏကွိုꩻခရာႏ တထာဒျာႏ" ခမ်းထီတဖြုံႏယို မဉ်ႏထောင်မဉ်ႏကျင်ꩻသွုံꩻလွေꩻသွူ ဒီမိုကရေသီတဖူꩻ၊ ဒီမိုကရေသီစနစ်နဝ်ꩻ မီဒီယာလွစ်တခြင်မုယို အဝ်ႏဗာႏနဝ်ꩻသွူ၊ ဒီမိုကရေသီခမ်းထီ အသက်သွီႏဖြွီꩻယို ထွာဒျာႏမီဒီယာနဝ်ꩻသွူ၊ မီဒီယာလွစ်တခြင်မု မဉ်ႏအဝ်ႏနဝ်ꩻမꩻ ခမ်းထီနဝ်ꩻ ကမဉ်လွေꩻဒါႏ ဒီမိုကရေသီခမ်းထီနဝ်ꩻ အီႏသေန်ႏဗွိုန်ပီနဝ်ꩻသွူ။ ဒီမိုကရေသီခခမ်းထီကရိုꩻယို အာႏဏာႏတယ်ႏဒျာႏ ခမ်းသားထံꩻသာꩻအလောင်း၊ ခမ်းထီတဖြုံႏအကို မာꩻထာꩻမာꩻဖုံႏတရိုꩻတဝ်း၊ အုပ်ချုတ်ရေꩻထာꩻမာꩻ အခန်ꩻကဏ္ဍဖုံႏဒျာႏတရိုꩻတဝ်း ခမ်းသားအတာႏ ဖြောင်တောႏမုꩻအဝ်ႏဗာႏယို အရေꩻတန်ငါႏသွူ၊ ဖြောင်တောႏမု ဖေႏကအဝ်ႏနဝ်ꩻ မီဒီယာကရိုꩻယို ထွာလွဉ်ဖျင် အရေꩻအဝ်ႏ အခန်ꩻကဏ္ဍတဗာႏနေနေသွူ။ မီဒီယာကရိုꩻနဝ်ꩻ ထိုမ်ႏယားထိုမ်ႏကန်ႏကွက် အစိုႏရထာꩻမာꩻ၊ အုပ်ချုတ်ရေꩻသားထာꩻမာꩻနုဲင်းနဝ်ꩻ တမွေးတဝ်းသွူ၊ မီဒီယာကရိုꩻနဝ်ꩻ ထိုမ်ႏသွေꩻကုဲင် လိုꩻတစွိုꩻတဗူႏထာꩻမာꩻ တမွေးတဝ်း၊ ထိုမ်ႏအောကုဲင် ခမ်းသားနုဲင်းနဝ်ꩻတဲ့ တမွေးတဝ်းသွူ၊ မီဒီယာကရိုꩻနဝ်ꩻ ထိုမ်ႏယားလီ မာꩻပြုဲင်လိုꩻမု အသောင်အရင်ꩻ လွောင်ႏဗူႏမုꩻနုဲင်းနဝ်ꩻတဲ့ တမွေးတဝ်းသွူ။ မီဒီယာကရိုꩻနဝ်ꩻ ခမ်းသားတွမ်ႏအစိုႏရ အုပ်ချုတ်ရေꩻသားအခါႏ ထွာဖေႏဒျာႏ တထာအနေႏသွူ၊ အစိုႏရ မာꩻထမုဲင်ꩻ ဖေႏနေးခမ်းသား ကသေရိုမ်းဗာႏနဝ်ꩻ မီဒီယာယို အဝ်ႏအခါႏကျိုꩻဆောင်ႏဖေႏသေဒျာႏသွူ။ အုပ်ချုတ်ရေꩻသား မာꩻလဲဉ်းထမုဲင်ꩻ၊ အုပ်ချုတ်ရေꩻသား ပျဌာန်းလဲဉ်း ဥပဒေႏမုဲင်ꩻ၊ အစိုႏရ ထွို့ꩻခါꩻစီႏမံႏကိန်ꩻ အဝ်ႏလဲဉ်းနုဲင်းမုဲင်ꩻစတဲင်နုဲင်းယိုဖုံႏယို ကွပ်စွဉ်ႏမီဒီယာယို အဝ်ႏအခါႏ ခွုမ်မာꩻဖေႏသေ တဲမ်းထေဖြေ့ꩻတုတ်ꩻတဲင် ခမ်းသားထံꩻသာꩻသီး ယိုꩻယိုꩻမာꩻမာꩻ သေထွꩻနွောင်ꩻလꩻသွူ။ တဲမ်းထေဒျာႏ အစိုႏရကပျဌာန်ꩻလွုမ်ꩻတကာႏတဝ်း ခမ်းသာယို မဉ်ထွာတမုဲင်ꩻ၊ အဝ်ႏလိုႏထမုဲင်ꩻ ခမ်းသားအငဝ်းဖုံႏယို အုပ်ချုတ်ရေꩻသား အစိုႏရသီး ဖေႏကဟွုန်နွောင်ꩻနဝ်ꩻ မီဒီယာ အဝ်ႏအခါႏ ထာꩻမာꩻနဝ်ꩻသွူ၊ ဖဝဆင်ႏရန်းအစားစား အငဝ်းတထန်ႏနွောင်ꩻတဝ်း ခမ်းသားဖဝယို ကခံႏဗာႏဆင်ꩻရဲꩻတံႏတဲ့နဝ်ꩻ၊ စဲ့ꩻတံႏတဲ့နဝ်ꩻ၊ တရာꩻတဝ်း ဝင်ꩻထူႏသိမ်ꩻခြေင်ထာꩻခြိုꩻ၊ ဟံႏယာႏတဲ့နဝ်ꩻ အငဝ်းဖေႏကထန်ႏ ကခြဝ်သင်ႏဖေႏနဝ်ꩻ ခမ်းသားတွမ်ႏအစိုႏရအခါႏ မီဒီယာတထာဒျာႏနဝ်ꩻသွူ။ မီဒီယာယို ဝင်ꩻခမ်းလင်ဖုံႏ ကအဝ်ႏသွုံꩻ ကအဝ်ႏခွုမ်မာꩻအီနဝ်ꩻ ညလဲဉ်းလဲ့ နီခမ်းထီ နီလိုꩻမျိုꩻခြာကိုနဝ်ꩻ စထူႏသွုံꩻဒျာႏ မွူးဟာမွူးရဝ်ꩻလွုမ်ꩻတဲင် လꩻခုဲင်ႏသေငါꩻလို့တဝ်းဒွုန်း၊ အီႏသေငါꩻ သေနာႏမွိုင်မွိုင်ဗာႏနဝ်ꩻ အယပ်ꩻအခုဲင်ႏ အဝ်ႏနေကနဝ်ꩻသွူ။ နဝ်ꩻမꩻ ယရပ်ရပ်နဝ်ꩻ မဉ်ႏထီႏသွူ မီဒီယာနဝ်ꩻ အဝ်ႏယူႏအဝ်ႏထင်းဒျာႏ အမျိုꩻမျိုꩻတဲင် အဝ်ႏဟွုန်ငမ်းလွဒျာႏဖုံႏသွူ။ နုဲင်းယိုခါ နီပအိုဝ်ႏဒေႏသရပ်ကို ကဲဉ်းအာအာနဝ်ꩻ ထာꩻမာꩻဖုံႏဖြောင်တောႏမု အာႏဖေႏကသန်လွဉ်နဝ်ꩻ ပင်ႏထိုလွေꩻဖေႏဗာႏ မီဒီယာအာႏနဝ်ꩻသွူ၊ မီဒီယာကို ဖောႏထန်ႏအီတာႏ သတင်ꩻဖုံႏ၊ ခမ်းသားထာꩻခံႏစာꩻဖုံႏ၊ ထာꩻထီႏရွမ်ဖြုဲင်ꩻဖုံႏ၊ ရွုတ်တယွို့ဖုံႏယို အဝ်ႏလိုႏနဝ်ꩻသွူ၊ တဲမ်းလိတ်သားဖုံႏ၊ ထူႏသတင်ꩻ(သတင်ꩻထောက်)သားဖုံႏယိ အဝ်ႏဗာႏအွဉ်ႏဗာႏနဝ်ꩻသွူ။ ဂျာနယ်၊ လိတ်အုပ်လိတ်စောင်ႏ၊ မဂ္ဂဇင်းယိုဖုံႏနဝ်ꩻ ထွာအတဲမ်းဖဲ့ꩻ၊ တွဲႏနျꩻနေးမီဒီယာ၊ ရေဒီယို၊ ရွုတ်ထီႏငဝ်းဟွုန်၊ အင်တာနက် ယိုဖုံႏနဝ်ꩻ ထွာတလီꩻလောင်းဖဲ့ꩻ အွဉ်ႏလွင်ႏနေးမီဒီယာစတဲင် မီဒီယာအဝ်ႏနီစွိုးနဝ်ꩻသွူ၊ ယိုဖုံႏအတာႏ သတင်ꩻထောက်သားနဝ်ꩻ အဝ်ႏဗာႏလွဉ်းလွဉ်းသွူ။ သတင်ꩻထောက်(ထူႏသတင်ꩻ)သားယို ထွာဒျာႏ ထူႏဖောႏဖေႏ ခမ်းသားအတာႏတဲင် ငမ်းခရာႏ တရျိုးခရာႏလိုꩻအစား တမွေးတဝ်းသွူ၊ နုဲင်းယရပ်ရပ်နဝ်ꩻ မဉ်ႏထီႏသွူ မီဒီယာသားယို အဝ်ႏထင်းတေား နုဲင်းထောက်လှမ်းရေး(စောႏတနာႏရေꩻ)သားတဲင် ဟွုန်နန်းငမ်းတေားဒျာႏသွူ၊ မီဒီယာသားတာႏ ထူႏသတင်ꩻသားယို ထောက်လှမ်းရေးသား တမွေးတဝ်းတဲင် ငမ်းခရာႏ တမွေးတဝ်း၊ ခမ်းသားအတာႏ သွုံꩻခရာႏအာႏကွိုꩻအီတာႏဒျာႏသွူ။ ထောက်လှမ်းရေးသားနဝ်ꩻ လိုꩻတစွိုꩻတာႏ ထံႏဝွန်ႏသားဒျာႏတဲင် ထိုမ်ႏထောင်ဖေႏလိုꩻတစွိုꩻတာႏ၊ ကလꩻလွဉ်ဒါႏ အချက်အလျက်ဖုံႏနဝ်ꩻလဲ့ ဖောႏနယ်ခမ်းသားတာႏ တမွေးတဝ်း၊ သွုံꩻဒျာႏအစွိုꩻထာꩻမာꩻစဲဉ်ႏတာႏ၊ ထွာဒျာႏ လိုꩻတစွိုꩻအကျိုꩻသွူ၊ မဉ်ႏနုဲင်းအစိုႏရ ထောက်လှမ်းရေးသားလဲ့ ထွာဒျာႏထိုမ်ႏထောင်ဖေႏ အစိုႏရထာꩻမာꩻစဲဉ်ႏတာႏ၊ အစိုႏရအကျိုꩻတာႏဒျာႏသွူ။ ထွိုင်ႏတွိုႏသတင်ꩻသားနဝ်ꩻ ကလယ်ႏထိုမ်ႏထူႏဒါႏသတင်ꩻ မန်ႏသမျယို သွုံꩻလိုꩻတစွိုꩻတာႏ တမွေးတဝ်း၊ ကလꩻလွဉ်ဒါႏ အချက်အလျက်မန်ႏသမျယို အီႏတဲမ်းဖေါႏထန်ႏနယ် ဖေႏသေလို့လို့ဒျာႏ ခမ်းသားအတာႏဒျာႏသွူ။ နဝ်ꩻမꩻ မီဒီယာ ထူႏသတင်ꩻသားယို ထောက်လှမ်းရေး မွေးတဝ်းတဲင် ဒေႏသခံႏသားသီး ငမ်းမွုန်း၊ တရျိုးမွုန်းဝင်ꩻတွော့ꩻ သွုံꩻသွော့ဝင်ꩻ၊ အာႏကွိုꩻထေ့သွော့ဝင်ꩻ ခမ်းသားငဝ်းသတင်ꩻစောင်ႏသားစွိုꩻအနေႏ မဉ်ဒေါ့ꩻတမာလွေꩻဖေႏငါႏ နုဲင်းနဝ်ꩻသွူ။