မေဃိယသုတ်

"မေဃိယသုတ် (နာႏတောဝ်းဘုရာꩻငေါဝ်း လွေꩻနွိုင်ႏနွိုင်ႏ)"

အွိုးခꩻတလဲင်ႏ နီဗွေႏဘုရာꩻအဝ်ႏအုံ "ဝေင်ꩻစာလိကာ-စာလိကာကောင်လောင်း"အတွင်ꩻ စင်ꩻမေဃိယနဝ်ꩻ အဝ်ႏမာꩻဖေႏ ဗွေႏဘုရာꩻဝွတ်ပတ်နောဝ်ꩻသွူ။ "ဗွေႏဘုရာꩻ ဗွေႏဩ- ခွေသွဉ်း မဉ်လွေꩻတွုံꩻသွမ်ꩻ 'ဒုံဇန္တု'သူꩻ ဗွေႏဩ" "လွေꩻတွုံꩻဟုဲင်း လꩻဒျာႏ" ဗွေႏဘုရာꩻ ရိုꩻနုဲင်းနောဝ်ꩻသွူ။ ဗွေႏမေဃိယနဝ်ꩻ တွုံꩻသွမ်ꩻထွူသွုံꩻသွမ်ꩻ၊ သွုံꩻသွမ်ꩻထွူ ကျွꩻလွေꩻအုံပဆား "ကိမိကာဠာ"ထီခြောင်တန်ထျꩻ၊ ထီႏပါꩻဥယျာဉ်ႏခြံတဲင် မဉ်လွေꩻအားထွုတ်တရာꩻတွော့ꩻ သဲင်ꩻရီနီဗွေႏဘုရာꩻအခွင်ꩻ၊ နီဗွေႏဘုရာꩻရိုꩻ- "မေဃိယ- အဝ်ႏကုဲင်ခွေတပါꩻဒျာႏယို၊ ယွုန်းဆောင်းက တဆင်ႏငါလုဲင်း၊ ရဟန်ꩻတပါꩻပါꩻ မဉ်ႏဖျော်မꩻ နာꩻကွဲလွေꩻဟုဲင်း" "ယွုန်းတောဝ်းဗွေႏ- ခွေသွဉ်း အီႏလွေꩻအားထွုတ်ဒျာႏတရာꩻ၊ မဉ်လွေꩻသန်လဲဉ်းသွူ" လောဝ်းစွဉ်ႏဘုရာꩻသွံလဲင်ႏ၊ ဗွေႏဘုရာꩻတဲ့ ရဲခါꩻသွံလဲင်ႏသွူတဲ့ ဗွေႏမေဃိယ သမ်းအဝ်ႏကွီလွေꩻ တိတ်ꩻတိတ်ꩻတဲင် ဗွေႏဘုရာꩻရိုꩻ- "မေဃိယ- ပေါႏရိုꩻ'လွေꩻအားထွုတ်ဒျာႏတရာꩻ'နဝ်ꩻ တစင်းရဲတဝ်း၊ နာꩻမဉ်လွေꩻတဲ့ လွေꩻဟုဲင်း" ဗွေႏဘုရာꩻဖေႏခွင်ꩻတယ်ꩻစွဉ်ႏ နုဲင်းနောဝ်ꩻသွူ။ ဗွေႏမေဃိယနဝ်ꩻ ရေႏအားထွုတ်ယံယံတရာꩻတဲ့ ထွိုင်ႏလွေꩻအားထွုတ်မွေးနဝ်ꩻ သꩻယူႏမွိုင်းဒျာႏ ကာမဂွုဏ်ႏ အာႏရွုံႏငတ်ꩻပါꩻ၊ သꩻကျံႏတကုဲင်ပါꩻ၊ သꩻကျံႏနိစ္စက်ပါꩻဖုံႏတဲ့ အဝ်ႏပေါႏခါႏခါႏဒျာႏတဲင် "ကာမဝိတဲက်၊ ဗျာပါဒဝိတဲက်၊ ဝိဟိံသဝိတဲက်" အကုသိုလ်ႏ ထာꩻယူႏနဝ်ꩻသွံပါꩻ အဝ်ႏယားသေႏသေႏလꩻ၊ သꩻတစွူတဝ်းတွော့ꩻ မွူးခွယ်တန်ခိန်ႏနဝ်ꩻ သဲင်ꩻလောဝ်းဒေါ့ꩻ နီဗွေႏဘုရာꩻ၊ နီဗွေႏဘုရာꩻရိုꩻ- "တပဲ့ꩻ မေဃိယ- သꩻရိုႏသေႏ သူႏတောႏကောင်ꩻမꩻ၊ သီႏလအဝ်ႏမꩻ၊ အဝ်ႏနာႏဗာႏသေႏသေႏ တရာꩻမꩻ၊ ဖေႏကလꩻသေႏသေႏကုသိုလ်ႏ ကျိုꩻလိုႏမွေးမွေးမꩻ၊ ဉာဏ်ႏပညာႏ သမ္မာဒိဋ္ဌိအဝ်ႏမꩻ" တရာꩻယိုငတ်ꩻပါꩻ အာႏတလာမꩻ နွောင်ꩻလꩻသꩻလော်လယ်နောဝ်ꩻသွူ။ တပဲ့ꩻမေဃိယ- ဖေႏကပယ်ႏနွောင်ꩻရာဂနဝ်ꩻ အားထွုတ်ဗာႏ အသုဘ၊ ဖေႏကပယ်ႏနွောင်ꩻ ဗျာပါဒ (ဒေါသ)နဝ်ꩻ ပွါꩻဗာႏမေတ္တာႏ၊ သꩻဖေႏကစွူနဝ်ꩻ အားထွုတ်ဗာႏ အာနာပါနဿတိ၊ ဖေႏကနွောင်ꩻမာႏနနဝ်ꩻ အားထွုတ်ဗာႏ အနိစ္စသညာ"ဗွေႏဘုရာꩻဟော်ꩻစတဲင် နုဲင်းနောဝ်ꩻသွူ။ (သုတ္တန်ႏပိဋကတ်၊ ဥဒါနပါဠိ၊ မေဃိယသုတ်)