ရဟန်ꩻကဿပဂေါတ္တ
"ရဟန်ꩻကဿပဂေါတ္တဝတ္ထု (အပဲစ်အဲဉ်ထောဝ်း ဝါးထိုꩻလꩻတောဝ်း)"
အွိုးခꩻတလဲင်ႏ ကာသိခမ်းကိုနဝ်ꩻ "ဒုံဝါသဘ"အဝ်ႏတဒုံ၊ ဗွေႏဗွန်နဝ်ꩻ အမဉ်ꩻတောႏဟဲ့ꩻ "ကဿပဂေါတ္တ"၊ ဗွေႏဗွန်နဝ်ꩻ လိုꩻရိုႏသေႏသီႏလသိက္ခာႏ၊ သꩻရင်ꩻတဲ့ဟောဝ်ငါႏ၊ ပေါႏရဟန်ꩻထဉ်ႏဖျော်တဲ့ သꩻရောင်းသꩻရေꩻ ကျိုႏဆွုမ်ႏ၊ တွောင်ဖေႏထီ ဟွာႏခင်ႏတာႏ၊ အွဉ်ႏလင်ꩻဖေႏဖွိုင်ꩻခေါဝ် (တွစ်အီခင်ႏတာႏ)။ ထူႏအွဉ်ႏဟောဝ်ဖေႏသပိတ်၊ ဒါဖေႏခင်ႏလမ်း၊ အွဉ်ႏတံꩻဖေႏထီအွꩻ၊ တွောင်ဖေႏထီလူးတာႏ၊ သဲင်ꩻဒေါ့ꩻတကာႏ ထွဉ်ႏပသာသွမ်ꩻ၊ မာꩻတာႏဝွန်ႏကေႏကေႏနုဲင်းနဝ်ꩻတဲင် ထဉ်ႏအာဂန္တုဖုံႏနဝ်ꩻ သꩻချမ်ꩻသာႏ အံႏဖြာႏမွေးစွဉ်ႏ ဗွေႏဗွန်နောဝ်ꩻသွူ။ ရဟန်ꩻထဉ်ႏ အာဂန္တုဖုံႏနဝ်ꩻ "ဗွေႏဗွန်သဘော်ꩻဟောဝ်ငါႏ"ရိုꩻနုဲင်းနဝ်ꩻတဲင် လွဉ်ဆိုႏလွဝါႏ ဒုံဝါသဘ၊ ဗွေႏဗွန်ကဿပဂေါတ္တကျောင်ꩻကို၊ မဉ်ႏထွဉ်ႏငါႏ တကာႏပသာသွမ်ꩻ စွုမ်ႏနီꩻနီꩻတဲ့ မဲ့ꩻတကာႏကျွိုက်တဝ်း၊ သွံနီꩻမာꩻငါနဝ်ꩻ ထွဉ်ႏလွေꩻတွုံꩻနေးသွမ်ꩻ၊ ရဟန်ꩻထဉ်ႏဖုံႏ ထွိုင်ႏသေတဖူꩻတဲင် ဗွေႏဗွန်ကျွꩻလွဉ်ꩻတဝ်းဒွုမ်၊ ဒေါ့ꩻရီညတဝ်းဒွုမ် ရဟန်ꩻထဉ်ႏဖုံႏ၊ ဗွေႏဗွန်နဝ်ꩻ အားထွုတ်ကျပ်ဒျာႏ တရာꩻနောဝ်ꩻသွူ။ တွိုႏနဝ်ꩻခါ ရဟန်ꩻထဉ်ႏဖုံႏ ပေါႏနာႏလိုႏဒွုမ်ဗွေႏဗွန်၊ ဝွေꩻသီးမဉ်လꩻပဲင်ႏထိုꩻဝင်ꩻကျောင်ꩻ၊ ကွပ်နဝ်ꩻမꩻ ရဟန်ꩻထဉ်ႏဖုံႏနဝ်ꩻ ရိုꩻစွဉ်ႏဗွေႏဗွန်နုဲင်းယို- "ယိုဗွေႏ- နီဗွေႏနဝ်ꩻ နီသွဉ်းသီး ကလွဉ်ခါနဝ်ꩻ သꩻရောင်းသꩻရေꩻ ကျိုႏဆွုမ်ႏနီသွဉ်းသီး၊ တာႏဝွန်ႏကေႏကေႏ မာꩻဖေႏနီသွဉ်းသီး၊ နီသွဉ်းသီး ကအံႏဖြာႏ၊ တွိုႏယိုခါ ဒေါ့ꩻရီအာဒွုမ်နီသွဉ်းသီး၊ 'နီဗွေႏနဝ်ꩻ အာပတ်သင်ꩻလဲဉ်း (အပဲစ်အဝ်ႏလဲဉ်း)၊ ထွားချာ နီဗွေႏအပဲ့စ်နောဝ်ꩻဟုဲင်း"ရိုꩻစွဉ်ႏနုဲင်းနဝ်ꩻ။ ဗွေႏဗွန်ကဿပဂေါတ္တရိုꩻချာ- "ခွေသွဉ်း အာပတ်တသင်ꩻတောဝ်း၊ အပဲစ်တအဲဉ်ထောဝ်း၊ ထွားခရာႏတလိုႏတောဝ်း" "နီဗွေႏနဝ်ꩻ ကွပ်ထွားတောဝ်းအာပတ် (ကျာꩻတဝ်းဒေႏသနာႏ)တဲင် အုံညီꩻနီသွဉ်းသီး အပ်တောဝ်း၊ ထန်ႏထိုꩻကျောင်ꩻယိုဟုဲင်း" ဝါးထန်ႏတသဉ်ဆော့ထိုꩻစွဉ်ႏဗွေႏဗွန်နုဲင်းနောဝ်ꩻသွူ။ ဗွေႏကဿပဂေါတ္တ လွေꩻလောဝ်းဗွေႏဘုရာꩻ၊ ဗွေႏဘုရာꩻရိုꩻ- "တပဲ့ꩻကဿပဂေါတ္တဟွေး- နာꩻနဝ်ꩻ အာပတ်တသင်ꩻတဝ်း၊ အပဲစ်တအဲဉ်ထဝ်း၊ သဲင်ꩻအုံချာ နာꩻကျောင်ꩻသူꩻဟုဲင်း" ဗွေႏဘုရာꩻရိုꩻနုဲင်းနဝ်ꩻတဲင် ဝွေꩻဗွေႏသဲင်ꩻအုံချာအကျောင်ꩻ၊ ထွိုင်ႏသေလွေꩻလောဝ်းဘုရာꩻတဲင် ရဟန်ꩻထဉ်ႏဖုံႏနဝ်ꩻ သꩻဝꩻ၊ ကော့ꩻမာႏနမ်းပငါပရာꩻ၊ လွေꩻထေ့ဗွေႏဘုရာꩻ၊ ကန်းတော့ꩻချာယင်း ဗွေႏဗွန်ကဿပဂေါတ္တ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- ရဟန်ꩻအပဲစ်တအဲဉ်ထဝ်းနဝ်ꩻ ဝါးထိုꩻလꩻတဝ်း၊ ပေါႏဝါးထိုꩻဝင်ꩻနဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနောဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ စီဝရက္ခန္ဓက)[၁][၂]