ရီဗာႏလိုꩻပိုစဲစ်နဝ်ꩻ

"မနုဿောသိ-လိုꩻပိုစဲစ်စဲစ်မွေးနေဟောင်း-ကရီဗာႏနုဲင်းနဝ်ꩻအကျောင်ꩻ(အအဲဉ်ႏ)"

အွိုးခꩻတလဲင်ႏ နဂါꩻတဗာႏနဝ်ꩻ ဗွိုႏငါႏနဂါꩻဘဝတဲင် ဖေႏကထွာယိုꩻယိုꩻလိုꩻတွော့ꩻ ဖန်ဆင်ꩻအနမ်းလိုꩻထွူတဲင် ကွီဗုဲင်စင်ꩻ၊ ထင်းဒျာႏလိုꩻစဲစ်စဲစ်တဲင် ဗွေႏသံဃာႏသီး အွဉ်ႏဗုဲင်ဖေႏစင်ꩻ၊ စင်ꩻနဂါꩻနဝ်ꩻ တွမ်ႏစင်ꩻတပါꩻ ကိန်ꩻညီꩻလို့ဝင်ꩻ ကျောင်ꩻပေႏကို၊ ကျောင်ꩻပေႏနောဝ်ꩻ အောဝ်ႏခေါ်ဒျာႏဝင်ꩻ။ တွိုႏတရောဝ်ꩻ စင်ꩻတပါꩻနဝ်ꩻ ထွိုင်ႏစောဝ်း၊ ထောင်ချာထောင်ငါတဖူꩻ၊ စင်ꩻနဂါꩻနဝ်ꩻ ဗေင်ႏချာယင်းထာꩻ၊ နဂါꩻသီးအမျိုꩻနဝ်ꩻ ပေါႏဗေင်ႏထာꩻတဲ့နဝ်ꩻ၊ ပေါႏပျောႏတွမ်ႏ နဂါꩻမွူးတဲ့နဝ်ꩻ အနမ်းထွာစွူစွူဒျာႏနဂါꩻ။ စင်ꩻတပါꩻ ထောင်တဖူꩻထွူ အီႏနွို့ကျောင်ꩻကို သဲစ်ကဗွောင်တခါꩻတဲ့ ထီႏစဲင်းစဲ့စွဉ်ႏဒျာႏ ရူးတန်မရမကတဗာႏ အဝ်ႏဗေင်ႏသော့ꩻ စင်ꩻနဂါꩻခင်ႏလမ်းဗင်ႏကို။ ဟွုန်ငမ်းသꩻဝꩻတွော့ꩻ ခြောဝ်သန်စွော့ꩻအငေါဝ်း "ရူး-ရူး-၊ ရူးတန်တဗာႏ အဝ်ႏကျောင်ꩻကိုယို"ရိုꩻနုဲင်းနဝ်ꩻတဲင် အသွꩻစင်ꩻလင်ဖုံႏလောႏလွဉ်၊ စင်ꩻနဂါꩻနဝ်ꩻ ဟွုန်စင်ꩻဖုံႏငေါဝ်းတဲင် မဲ့သေ၊ လောႏဖန်ဆင်ꩻယင်း အနမ်းစင်ꩻ၊ အုံလင်ꩻပီပဲ့ အခင်ႏလမ်းဗေင်ႏကို၊ ကထီႏစဲင်းစဲ့သား၊ ကကိန်ꩻညီꩻသား စင်ꩻတပါꩻနဝ်ꩻ ရီနုဲင်းယို - "ယိုဗွေႏ - နီဗွေႏခင်ႏလမ်းကိန်ꩻကို နဝ်ꩻဟွဉ်ႏနဝ်ꩻ ခွေသွဉ်းထီႏဒျာႏ ရူးတန်တဗာႏ၊ တွိုႏယိုခါမွော့ ရူးတန်နဝ်ꩻ ထီႏဒွုမ်၊ ထီႏတောဒျာႏနီဗွေႏ၊ ထမုဲင်ꩻခရာႏအီ၊ နီဗွေႏနဝ်ꩻ ပါꩻမုဲင်ꩻ၊ ရူးတန်နဝ်ꩻ နီဗွေႏသွူနဲ့" "မွေးဗွေႏ၊ ခွေသွဉ်းနဝ်ꩻ နဂါꩻဒျာႏဗွေႏဩ" "အွို-ထမုဲင်ꩻခရာႏတန်နဝ်ꩻ၊ မမာꩻတွိုႏနုဲင်းနောဝ်ꩻအီ" "ခွေသွဉ်း ဗွိုႏငါႏနဂါꩻဘဝတဲင် ဖေႏကထွာယိုꩻယိုꩻလိုꩻ-ယူႏနုဲင်းနဝ်ꩻမꩻ မာꩻဗာႏနုဲင်းယို ဗွေႏဩ" "ပေါႏနုဲင်းနဝ်ꩻနဝ်ꩻ လွေꩻလောဝ်းဗွေႏဘုရာꩻမꩻ၊ လွေꩻ-လွေꩻ ဗွေႏဘုရာꩻထျꩻသူꩻ" နီဗွေႏဘုရာꩻရိုꩻ- "နဂါꩻဟွေး - သီနဂါꩻဖုံႏနဝ်ꩻ အုံစွဉ်ႏသာႏသနာႏကိုတဲ့ အကျိုꩻအဲဉ်ထဝ်း၊ သဲင်ꩻအုံချာသွော့ နဂါꩻခမ်းသူꩻ၊ လာသွစ်ꩻလာဗွေ လာမား ဥပုသ်နီꩻဖုံႏနဝ်ꩻ ထူႏသီႏလ ဆောက်တဲႏသွော့နော၊ နာꩻမဉ်ႏဆောက်တဲႏနုဲင်းနဝ်ꩻနဝ်ꩻ မဲ့ꩻနာꩻအီႏထွာမွိုင်ဒျာႏလိုꩻကွေး" နဂါꩻနဝ်ꩻ ငွိုးမွေးစွဉ်ႏထာꩻ၊ ဝုဲင်ႏဘုရာꩻထွူခါ သဲင်ꩻချာဗာႏစွဉ်ႏသွူ၊ နီဗွေႏဘုရာꩻရိုꩻ- "ရဟန်ꩻသီးဖုံႏဟွေး - တိရစ္ဆာန်ႏနဝ်ꩻ တထွာတဝ်းရဟန်ꩻ၊ အွဉ်ႏဗုဲင်စင်ꩻ အပ်တဝ်း၊ မဉ်ႏအွဉ်ႏဗုဲင်မာႏ ဗွောင်ႏချာထိုꩻဗာႏသင်္ကန်ꩻ"မိန်းနုဲင်းနောဝ်ꩻသွူ။ (ဝိနယ၊ မဟာဝဂ္ဂပါဠိ၊ မဟာခန္ဓက)