လိတ်ပအိုဝ်ႏတန်ႏဖိုꩻ

အဝ်ႏ ဝီခီပီးဒီးယား ကို

"လိတ်ပအိုဝ်ႏတန်ႏဖိုꩻ" လိတ်ပအိုဝ်ႏယိုခါနဝ်ꩻ အသွဉ်သား ကွဲးဆေ့ꩻဆေ့ꩻထိုꩻလဲဉ်း၊ အွဉ်ႏသွဉ်လိတ်ပအိုဝ်ႏလဲ့ တကုဲင်းလွတဝ်းဒွုမ်သွူ၊ ယဟန်ႏသားနဝ်ꩻရိုꩻ "ဒါႏတဝ်းလိတ်ပအိုဝ်ႏတဲ့ ထွာလေႏကဲးတမုဲင်ꩻ"နုဲင်းနဝ်ꩻ၊ ယဟန်ႏသားနဝ်ꩻရိုꩻ "ဒါႏစွဉ်ႏလိတ်ပအိုဝ်ႏတဲ့ ထူႏလေႏကဲးတမုဲင်ꩻ"နုဲင်းနဝ်ꩻ။

ဝင်ꩻမဲဉ်ရိုꩻနုဲင်းမုဲင်ꩻရိုꩻ ခွေသွဉ်းတဖြာꩻအနေႏနဝ်ꩻ ထူႏတာႏဝွန်ႏဖေႏ တဗွုန်ႏတဝ်း၊ အာႏမခံႏဖြေႏသျင်ꩻဖေႏ တဗွုန်ႏတဝ်းသွူ၊ ပွိုးနုဲင်းမုဲင်ꩻနဲးတဲင် လိတ်ပအိုဝ်ႏထီသိမ်ႏမူယိုခါနဝ်ꩻ စွုမ်ႏလဲ့တစွုမ်ႏတဝ်း၊ သရငဝ်း၊ အသွတ်ꩻငဝ်းဖုံႏလဲ့ တမဲဉ်ႏလို့တဝ်း၊ သရစဲဉ်ႏ၊ အသွတ်ꩻစဲဉ်ႏလဲ့ တမဲဉ်ႏလို့တဝ်း၊ သရစဲဉ်ႏ၊ အသွတ်ꩻစဲဉ်ႏလဲ့ တမဲဉ်ႏလို့တဝ်းတဲင် အီႏသွဉ်ကေႏကေႏလဲပ်လဲပ်ဗာႏယို တယိုꩻတဝ်းသွူ။ တနယ်ꩻမီႏဒေါ့ꩻဗာႏနဝ်ꩻ ခွေသွဉ်းနမ်း ထွာသွူပအိုဝ်ႏတဖြာꩻလဲ့ နီလိတ်ပအိုဝ်ႏယို ထွိုင်ႏတစွုမ်ႏတဝ်း၊ ထွိုင်ႏတမဲဉ်ႏလို့တဝ်း၊ သွဉ်ထွိုင်ႏတယိုꩻတဝ်းနဝ်ꩻ အဝ်ႏတဲမ်းလေႏကီ၊ အဝ်ႏသုံꩻလေႏကီလဲ့ သုံꩻကြွို့ꩻကြꩻလေႏကြွို့ꩻထာꩻ၊ တနေစ်သက်ငါႏတဝ်း၊ တထင်းတန်ငါႏတဝ်းသွူ။

မီႏဒေါ့ꩻဗာႏတနယ်ꩻနဝ်ꩻ နီလိတ်မွူးပအိုဝ်ႏယို မီႏထွာတခြိုꩻစာလဲ့ အစားဟဝ်စား၊ အငိုꩻတန်စား တမွေးတဝ်း၊ အဗွေႏအာႏမခံႏနုဲင်းယိုနုဲင်းနဝ်ꩻ တမွေးတဝ်း၊ အစားညံး၊ အစားပေါ်ꩻလွုမ်ꩻ ရိုꩻဗာႏနုဲင်းနဝ်ꩻသွူ။ ခွေသွဉ်းထွိုင်ႏရိုꩻနုဲင်းယိုတွော့ꩻ ပုဂ္ဂိုလ်ႏယဟန်ႏ တမဲဉ်ခံႏတဝ်းတဲင် ရိုꩻခွေသွဉ်းဒေါ့ꩻကြွို့ꩻထာꩻ၊ ရိုꩻခွေသွဉ်းထီႏဖွီချာ လိတ်ပအိုဝ်ႏတွော့ꩻ မဲဉ်ဒေါ့ꩻခွေသွဉ်း၊ မဲဉ်ရိုꩻခွေသွဉ်း နုဲင်းယိုနုဲင်းနဝ်ꩻလဲ့ အဝ်ႏသွူ၊ မဲဉ်ဒေါ့ꩻရိုꩻနေးလွုမ်ꩻတမွေးတဝ်း ကဒေါ့ꩻလဲဉ်း၊ ကရိုꩻလဲဉ်းလဲ့ အဝ်ႏသွူ၊ ခွေသွဉ်းအဝ်ႏထီႏ၊ အဝ်ႏဟွုန်ဗာႏဒျာႏနေနေသွူ၊ ကွဲႏတွော့ꩻ ခွေသွဉ်းသꩻတလျားတဝ်း၊ သꩻတပေႏတဝ်းသွူ။ ပွိုးနုဲင်းမုဲင်ꩻနဲးတဲင် ကရိုꩻဒါႏ၊ ကဒေါ့ꩻဒါႏခွေသွဉ်းနဝ်ꩻ တသေတဝ်း ခွေသွဉ်းစေႏတနာႏ၊ တသေတဝ်း ခွန်သွဉ်းဝါႏသနာႏတွော့ꩻ အရိုꩻဒျာႏ မတ်ဗာႏနုဲင်းနဝ်ꩻလွုမ်ꩻသွူ၊ ခွေသွဉ်းစေႏတနာႏနဝ်ꩻ နီလိတ်ပအိုဝ်ႏယို စွုမ်ႏလဲ့ဖေႏကစွုမ်ႏ၊ မဲဉ်ႏလဲ့ဖေႏကမဲဉ်ႏ၊ သွဉ်လဲ့ဖေႏကယိုꩻ မဲဉ်အွဉ်ႏထွာလိတ်မွူး အမျိုꩻနုဲင်းယိုသွူ။ ကွဲႏတွော့ꩻ ခွေသွဉ်းစေႏတနာႏအဝ်ႏအတွိုင်ꩻ ဝင်ꩻတဝါႏသနာႏလွဉ်ꩻတဝ်းတဲင် ခွေသွဉ်းယိုနဝ်ꩻ ထွာတေားစွဉ်ႏ လိုꩻထူꩻဆန်ꩻ၊ ထွာတေားစွဉ်ႏ လိုꩻဗွိုန်တဝ်းဝင်ꩻတန်သွူ။

နီသွဉ်းသီး လိတ်မွူးပအိုဝ်ႏယို ဖေႏကထွာ "စွုမ်ႏ-မဲဉ်ႏ-ယိုꩻ"လိတ်မူမျိုꩻနဝ်ꩻ ခွုင်းခွေသွဉ်းကသေ၊ ခွုင်းခွေသွဉ်းကဒါႏ၊ ခွုင်းခွေသွဉ်းကယူႏလꩻ အဝ်ႏလိုႏနုဲင်းယို၊ အဝ်ႏလိုႏနုဲင်းနဝ်ꩻ၊ မီႏထဲမ်နုဲင်းယိုနဝ်ꩻဟဝ်၊ မီႏဖျင်နုဲင်းယိုနဝ်ꩻမွေး၊ မီႏတဲမ်းနုဲင်းနဝ်ꩻနဝ်ꩻစွို့ꩻ၊ မီႏသော့ꩻနုဲင်းယိုနဝ်ꩻမဲဉ်ႏ-စတဲင် ငဝ်းအကျံႏဉာဏ်ႏဖုံႏယို ပအိုဝ်ႏလိတ်အစောင်ႏစောင်ႏကို ခွေသွဉ်းတဲမ်းသော့ꩻဗာႏအာငါႏလဲဉ်းသွူ။ ကွဲးတွော့ꩻ ဗꩻတွိုႏစွဉ်ႏဟန်ႏနီꩻ ခွေသွဉ်းကဒေါ့ꩻနဝ်ꩻမဲဉ်ႏ၊ ခွေသွဉ်းကရိုꩻနဝ်ꩻမွေး ငဝ်းခီႏယော်ꩻ၊ ငဝ်းအံႏဖြာႏ ခွေသွဉ်းနဝ်ꩻ တဟွုန်ဖိုတဝ်းသွူ။ ဝင်ꩻခီႏယော်ꩻ အံႏဖြာႏတဝ်းတယဝ်း ပွိုင်းဝွို့တွမ်ႏ လိတ်ပအိုဝ်ႏအမာႏအမဲဉ်ႏ၊ အဝ်ႏလိုႏအပ်ချက်ဖုံႏယို ပုဂ္ဂိုလ်ႏတဖြာꩻဖြာꩻ သꩻဝင်ႏစာꩻတွော့ꩻ မီႏလွဉ်ရီ၊ မီႏလွဉ်ဆွေꩻနွေꩻဒါႏနဝ်ꩻ သꩻရေꩻငါႏ၊ အီႏခြုဲင်းနယ်ဖေႏ၊ အီႏဒေါ့ꩻနယ်ဖေႏယို တလွꩻတဝ်းလာꩻလာꩻ၊ ခံႏအုံမဒဲဉ် ခြုဲင်းနယ်နေးစွဉ်ႏသွူ။ လိတ်ပအိုဝ်ႏယို ခွေသွဉ်းကမဲဉ်အွဉ်ႏထွာအတွိုင်ꩻ မီႏတထွာတဝ်း၊ မီႏအဝ်ႏဗော့ꩻတွိုင်ꩻတွိုင်ꩻ၊ စွုမ်ႏတဝ်း၊ မဲဉ်ႏလို့တဝ်း၊ သွဉ်ယိုꩻတဝ်း နုဲင်းယိုခါနဝ်ꩻ ထွာလိတ်မွူးငိုꩻတန်၊ လိတ်မွူးအထီထွူႏ တမွေးတဝ်း၊ ထွာလိတ်မွူးငိုꩻပေါ်ꩻ၊ ထွာလိတ်မွူးအကယ်ꩻဖွီလွုမ်ꩻသွူ၊ ခွေသွဉ်းကမဲဉ်အွဉ်ႏထွာအတွိုင်ꩻ မီႏထွာလွေꩻ "စွုမ်ႏ-မဲဉ်ႏ-ယိုꩻ"ကရိုꩻဒါႏ လိတ်မွူးမျိုꩻနဝ်ꩻ စွုမ်ႏလဲ့စွုမ်ႏ၊ မဲဉ်ႏလဲ့မဲဉ်ႏ၊ သွဉ်လဲ့ယိုꩻတဲင် ထွာလိတ်မွူးအငိုꩻတန်၊ ထွာလိတ်မွူး အထီထွူႏမျိုꩻသွူ။

မီႏထွာသွူ စွုမ်ႏ-မဲဉ်ႏ-ယိုꩻ လိတ်မွူးမျိုꩻနဝ်ꩻ ပအိုဝ်ႏငဝ်းလွုမ်ꩻတကာႏတဝ်း လိုꩻမျိုꩻလင်ငဝ်းဖုံႏလဲ့ တဲမ်းအီလꩻအာတဲင် ပအိုဝ်ႏလွုမ်ꩻတကာႏတဝ်း လိုꩻမျိုꩻလင်ဖုံႏလဲ့ မဲဉ်အွဉ်ႏသွဉ်စွဉ်ႏဒျာႏသွူ၊ "ကမ္ဘာႏသုံꩻလိတ် အဝ်ႏလိုႏပျဌာန်းဒျာႏ လိတ်ပအိုဝ်ႏယို"ခွေအီႏရိုꩻနုဲင်းနဝ်ꩻသွူ။ မီႏမော့ꩻမန်းလိုꩻမျိုꩻ လိုꩻသေလိုꩻဒါႏ၊ လိုꩻလꩻဘွဲ့သားဖုံႏလဲ့ "သီလိတ်မန်းနဝ်ꩻ တဲမ်းအီအင်္ဂလိပ်ငဝ်း လꩻဆေ့ꩻငါႏ၊ တဲမ်းအင်္ဂလိပ်ငဝ်းဖေႏကလꩻအာ၊ ဖေႏကလꩻစွုမ်ႏနဝ်ꩻ သွဉ်လိတ်ပအိုဝ်ႏဟုဲင်း"ခွေအီႏရိုꩻနုဲင်းနဝ်ꩻသွူ။ "ဖေႏကဒါႏလဲပ် အင်္ဂလိပ်လိတ်နဝ်ꩻ သွဉ်ဗာႏငတ်ꩻနေင်ႏ ရိုꩻခန်းဟုဲင်း၊ ဖေႏကဒါႏလဲပ် လိတ်ပအိုဝ်ႏနဝ်ꩻ သွဉ်ငါငတ်ꩻနီꩻငါလဲ့ ဒါႏ"ခွေအီႏရိုꩻနုဲင်းနဝ်ꩻသွူ။ ခွေသွဉ်းအဝ်ႏအုံ ပခုက္ကူတွင်ꩻနဝ်ꩻ ဖြဝ်ꩻ၊ ပလောင်း၊ မဲင်ꩻ၊ စောက်ꩻလိုꩻမျိုꩻဖုံႏလဲ့ အဝ်ႏတဲင် ဝွေꩻသီးလိုꩻမျိုꩻ ငဝ်းတမျိုꩻအငွါသိုမ်ဆီယို ခွေသွဉ်းရီသွူတွော့ꩻ တဲမ်းမတ်တွမ်ႏ ခွေသွဉ်း စွုမ်ႏ-မဲဉ်ႏ-ယိုꩻ လိတ်ဖြုံႏတဲင် ထွိုင်ႏဗွေအငွါသိုမ်ဆီနဝ်ꩻ တဲႏအထျꩻ ဟော်ꩻနယ်လွေꩻချာယင်း တငွါစီႏနဝ်ꩻ တမျိုꩻမျိုꩻ၊ တငွါငွါ တရွို့ꩻတဝ်း၊ မဲဉ်ႏလို့ဒျာႏ ဝွေꩻသီးလိုꩻမျိုꩻ အငဝ်းထန်ႏဖုံႏသွူ၊ ကမဲဉ်ႏလို့ဗာႏနဝ်ꩻ နီသွဉ်းသီးလိတ်ပအိုဝ်ႏနဝ်ꩻ အစွုမ်ႏငါႏတွော့ꩻ မဲဉ်ႏလို့ဗာႏဒျာႏသွူ။ ကမ္ဘာႏသုံꩻလိတ်ယို ဝင်ꩻအွဉ်ႏတီႏပျဌာန်းဗာႏ လိတ်အင်္ဂလိပ်နဝ်ꩻ လိတ်အင်္ဂလိပ်ယို စွုမ်ႏတွော့ꩻ၊ မဲဉ်ႏတွဗာ့ꩻ၊ သွဉ်ယိုꩻတွော့ꩻ ဝင်ꩻပျဌာန်းဗာႏ တမွေးတဝ်း၊ ဝွေꩻသီးလိုꩻမျိုꩻနဝ်ꩻ အပညာႏတန်၊ အရွဉ်လွိုင်ႏတွဗာ့ꩻ ကမ္ဘာႏလောင်းယို အရေꩻအမျိုꩻမုဲင်ꩻလဲ့ အွဉ်ဝင်ꩻဆꩻငါတွော့ꩻ ဝင်ꩻသုံꩻဗာႏဒျာႏအလိတ်သွူ၊ ခယ်ႏလိတ်ယို ဝင်ꩻကသုံꩻအာလဲ့ နုဲင်းနဝ်ꩻနေနေသွူ၊ မီႏနုဲင်းစွုမ်ႏလဲ့စွုမ်ႏ၊ မဲဉ်ႏလဲ့မဲဉ်ႏ၊ သွဉ်လဲ့ယိုꩻနဝ်ꩻ သွုမ်ꩻလို့ဒျာႏလိတ်ပအိုဝ်ႏသွူ။

နဝ်ꩻတွော့ꩻ နီသွဉ်းသီး လိတ်ပအိုဝ်ႏယို မီႏထဲမ်ဖျင်တဝ်း၊ မီႏအဝ်ႏဗော့ꩻဒျာႏတွိုင်ꩻတွိုင်ꩻ နုဲင်းယိုခါနဝ်ꩻ စွုမ်ႏတဝ်း၊ မဲဉ်ႏလို့တဝ်း၊ သွဉ်ယိုꩻတဝ်းတဲင် ထွာဒျာႏလိတ်မွူး အဖိုꩻတတန်ႏတဝ်းစားလွုမ်ꩻသွူ။ ခွေသွဉ်းကမဲဉ်အွဉ်ႏထွာအတွိုင်ꩻ လိုႏထဲမ်လဲ့ထဲမ်၊ လိုႏဖျင်လဲ့ဖျင်၊ လိုႏစဲဉ်ႏစွို့ꩻလဲ့ မီႏစဲဉ်ႏစွို့ꩻနဝ်ꩻ ထွာ"စွုမ်ႏ-မဲဉ်ႏ-ယိုꩻ"လိတ်မွူးမျိုꩻတွော့ꩻ ထွာလိတ်မွူးအဖိုꩻတန်ႏ၊ ထွာလိတ်မွူးအထီထွူႏသွူ။ နဝ်ꩻတွော့ꩻ ရီဗာႏ နီပအိုဝ်ႏသီးသွူ။

  • - နီလိတ်ပအိုဝ်ႏယိုနဝ်ꩻ မဲဉ်အွဉ်ႏထွာ လိတ်မွူးအငိုꩻပေႏနဲ့၊ လိတ်မွူးအငိုꩻတန်နဲ့?။
  • - မဲဉ်အွဉ်ႏထွာ လိတ်မွူးအစွုမ်ႏစားနဲ့၊ မဲဉ်အွဉ်ႏထွာ လိတ်မွူးအစွုမ်ႏတဝ်းစားနဲ့?။
  • - မဲဉ်အွဉ်ႏထွာ လိတ်မွူးတန်ႏဖိုꩻပေႏနဲ့၊ မဲဉ်အွဉ်ႏထွာ လိတ်မွူးတန်ႏဖိုꩻတန်နဲ့?။
  • = နီလိတ်ယို တန်ႏဖိုꩻဖေႏကပေႏလဲ့ နီမာꩻဒျာႏ၊ တန်ႏဖိုꩻဖေႏကတန်လဲ့ နီမာꩻဒျာႏသွူ။
  • = နီလိတ်ပအိုဝ်ႏ တန်ႏဖိုꩻယို နီအွဉ်ႏထွော့ချာဗာႏဒျာႏ၊ နီဆုံꩻဖျတ်ချာဗာႏဒျာႏသွူ။[၁]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကုဝေ-မုဲင်းကောင်၊ ဒဲဉ်သီႏလက်ဆောင်ႏ အမုဲင်-၄၀