လိတ်ပအိုႏခရာႏခြုဲးနဲဗာႏ

"လိတ်ပအိုဝ်ႏခရာႏခြုဲင်းနယ်ဗာႏ" ပအိုဝ်ႏလိုꩻမျိုꩻ ကအဝ်ႏဒေါ့ꩻဒါႏ ငဝ်းယိုနဝ်ꩻ ပွိုင်းလဲင်ႏစခါ ပျူလိုꩻမျိုꩻကဒေါ့ꩻဒါႏငဝ်းအတွိုင်ꩻ ရဿ'ဒီဃ သရနီဖြုံႏတတွယ်ꩻယို ငဝ်းအဝ်ႏလွေꩻ (၈)ရန်းသွူ။ (၈)ရန်းကရိုꩻနဝ်ꩻ ဥပမာႏ- "အ၊ အာ"သရတတွဲꩻယို "အ"သရနဝ်ꩻ "အ အꩻ အး အႏ"အဝ်ႏလွေꩻလစ်ꩻဖြုံႏသွူ၊ "အာ"သရနဝ်ꩻလဲ့ "အာ အာꩻ အား အာႏ"အဝ်ႏလွေꩻလစ်ꩻဖြုံႏနေနေသွူ။ ကအဝ်ႏကုဲင်ဒါႏ သရအလင်(၇)တွဲꩻနဝ်ꩻလဲ့ လွေꩻနုဲင်းယိုအတွိုင်ꩻသွူ။

ပအိုဝ်ႏပွိုင်းလဲင်ႏ လိတ်မွူးခေါ်ခေါ်အဲန်ထဝ်း၊ ထူႏမန်းလိတ်မွူး၊ ထူႏမန်းလိတ်ဖြုံႏတဲင် တဲမ်းအီဒျာႏ ပအိုဝ်ႏငဝ်းသွူ၊ ကတဲမ်းအီတွမ်ႏ မန်းလိတ်ဖြုံႏနုဲင်းယိုနဝ်ꩻ ငဝ်းတငွါလိတ်တဖြုံႏ၊ လိတ်တဖြုံႏ ငဝ်းတငွါ တမွေးတဝ်းတဲင် တဲမ်းအီတလꩻလို့တဝ်း၊ ဖမ်ꩻဟော်ꩻချင်းဟော်ꩻဗာႏနေးသွူ။ ပအိုဝ်ႏလိုꩻမျိုꩻနဝ်ꩻ ကောပ်လိတ်မွူးခေါ်ခေါ် တအဝ်ႏတဝ်းနဝ်ꩻမꩻ စောက်ꩻဖါးညောင်ႏရွီႏဟော်ကို ဖြဝ်ꩻခမ်းသံႏဃာႏ အစီꩻအဝွေꩻကိုနဝ်ꩻ ဗွေႏဗိုန်ဖြဝ်ꩻဖုံႏ သဲ့ꩻပအိုဝ်ႏ၊ ရိုꩻပအိုဝ်ႏလိတ်အဲန်ထဝ်းနုဲင်းနဝ်ꩻတွော့ꩻ အစီꩻအဝွေꩻကိုကပါဒါႏ ဗွေႏဗိုန်သုနန္ဒ ကျောင်ꩻထီသိမ်ႏနဝ်ꩻ ဟွုန်ကဲန်းငါႏတဲင် တဲႏထွင်ႏထန်ႏဖေႏဗာႏ လိတ်မွူးပအိုဝ်ႏ ထီသိမ်ႏမူယိုခါနဝ်ꩻသွူ။

ဗွေႏဗိုန်သုနန္ဒ ထီသိမ်ႏလိတ်မွူးမူကို ကဒင်ႏစက် လိတ်မွူးတသာစောင်ႏနဝ်ꩻ အဝ်ႏ"ပအိုဝ်ႏအက္ခရာႏလိတ်မွူးတသာ"တစေောင်ႏလွုမ်ꩻသွူ၊ ပအိုဝ်ႏအက္ခရာႏလိတ်မွူးတသာစောင်ႏနဝ်ꩻ တစောင်ႏလိုမ်းလိုမ်း အဝ်ႏလွေꩻလိတ်မွူးတွယ်ꩻတောမ်ႏ ဥဒါႏဟရုဏ်ႏဖတ်ခန်ꩻလွုမ်ꩻတဲင် ခေတ်အခေႏအနေႏအလꩻ အီႏသွဉ်လွေꩻနဝ်ꩻ တယိုꩻတဝ်း၊ သꩻဝင်ႏစာꩻခရာႏလဲ့ တပေါႏအဝ်ႏတဝ်းတဲင် တွိုႏဆုဲင်ꩻနဝ်ꩻ မျိုꩻရက်ခွန်ထွန်းလှိုင် ပအိုဝ်ႏစက်နျꩻလိတ် ကျောင်ꩻတန်နဝ်ꩻ တဲမ်းထန်ႏလွေꩻဖေႏယင်း "မူလရန်းတွမ်ႏ ပထမရန်း"လိတ်စောင်ႏသွူ။ ခွန်ထွန်းလဲင် ကတဲမ်းထန်ႏဒါႏ လိတ်မွူးစောင်ႏနဝ်ꩻ ခေတ်အလွောက်ꩻ သော့ꩻပါတွမ်ႏအရုပ်ဖုံႏ၊ ဖတ်လွူꩻခန်ꩻငဝ်းပစိုႏဖုံႏတဲင် သွဉ်ဟမ်းပေါင်းယိုꩻ၊ ထွားဟမ်းပေါင်းစွယ်ꩻ ရိုꩻဗာႏနုဲင်းနဝ်ꩻသွူ၊ ကွဲႏတွော့ꩻ အတွင်ꩻနဝ်ꩻနဝ်ꩻ ပအိုဝ်ႏလိတ်လုဲင်ꩻရုဲင်ꩻတသွိုးရေꩻအစွိုꩻ တဲးတဲးဝါးဝါးနုဲးယိုခါ တအဝ်ႏတဝ်းဒွိုန်းတဲင် သွဉ်သားဒါႏသား တပေါႏအဝ်ႏတဝ်းဒျာႏစွူစွူသွူ။

ပအိုဝ်ႏလိုꩻမျိုꩻနဝ်ꩻ လိတ်အဝ်ႏခေါ်ခေါ်ရိုꩻစွဉ်ႏလဲ့ သွဉ်သားဒါႏသား ထွိုင်ႏတပေါႏအဝ်ႏတဝ်းနဝ်ꩻ သꩻရက်ခွိုꩻကအဝ်ႏဒါႏ ခမ်းကောင်ခမ်းဒေါမ် ပုဂ္ဂိုလ်ႏယင်ဟန်ႏနဝ်ꩻ အာႏလꩻတွိုႏသꩻငါႏတဝ်းသွူ။ ကောပ်တတွိုႏသꩻတဝ်းနဝ်ꩻမꩻ ခမ်းဒေါမ်သားတာႏနဝ်ꩻ ဗွေႏဗိုန်သပြေတန်း (ဗွေႏဗိုန်တဖြေရဲန်ႏ) တဲမ်းတဲႏထွင်ႏထန်ႏခေါ်ဖျင်ဗာႏ လိတ်မွူးပအိုဝ်ႏတမျိုꩻသွူ၊ ဗွေႏဗိုန်တဖြေႏရဲန်ႏလိတ်မွူးနဝ်ꩻ ဖေႏအပ်ဗွေႏဗိုန် အခြဲမ်တရျာꩻတွော့ꩻ အဝ်ႏအခြဲမ်တရျာꩻ သာႏသနာႏပျုဌာႏနကို တွဲႏနျꩻဖြေ့ꩻလီ အွဉ်ႏစွꩻကျောင်ꩻဆရာႏဖုံႏတဲင် ခမ်းဒေါမ်မဲင်ꩻခမ်း၊ စောက်ꩻခမ်းကအဝ်ႏဒါႏ ပအိုဝ်ႏဒုံဖုံႏနဝ်ꩻ သွဉ်ထူႏလွေꩻဝင်ꩻဖုံႏသွူ။ ခမ်းဒေါမ်လွုမ်ꩻတကာႏတဝ်း ခမ်းကောင်(ဖြဝ်ꩻခမ်း)ကိုလဲ့ ဝေင်ꩻနယ်ႏပင်လောင်ꩻ၊ ဝေင်ꩻနယ်ႏတောင်ႏကီꩻ၊ ဝေင်ꩻနယ်ႏဟိုပုံꩻ၊ ဝေင်ꩻနယ်ႏသီႏသဲင်ႏ ကျောင်ꩻယဟန်ႏနဝ်ꩻ သွဉ်ထူႏလွေꩻဒျာႏ လိတ်ခမ်းဒေါမ်သွူ၊ ခမ်းကောင်ကို ကသွဉ်ထူႏလွေꩻဒါႏ လိတ်ခမ်းဒေါမ်နဝ်ꩻ ဗွေႏဗိုန်နောင်ဟဲင်း ဗွေႏဆရာႏတောႏဦးနေမိ အွဉ်ငါ ဖေႏအာႏလွေꩻဒျာႏသွူ၊ ဗွေႏဗိုန်ဦးနေမိ ကဖေႏအာႏဗာႏ လိတ်ခမ်းဒေါမ်နဝ်ꩻ ခမ်းဒေါမ်သားနဝ်ꩻ မာꩻမွေးထာꩻမာꩻ၊ ခမ်းကောင်သားနဝ်ꩻ တပေါႏမာꩻတဝ်းထာꩻမာꩻ၊ လိတ်လုဲင်ꩻရုဲင်ꩻတသွိုးမုꩻ အာႏပေႏငါႏတွော့ꩻ ဖေႏအာႏဗာႏ လိတ်ခမ်းဒေါမ်ရိုꩻနဝ်ꩻသွူ။

ကသွဉ်ဒါႏ လိတ်ခမ်းဒေါမ်ကျောင်ꩻဖုံႏနဝ်ꩻ လိတ်မွူးတကာႏတဝ်း သမ်းတွဲꩻတောမ်ႏ အရိမေတ္တယျဘုရာꩻဝါႏဒ၊ အံႏသက်လွစ်ဝါႏဒတဲင် သံႏဃာႏခမ်းကောင် တလက်ခံႏတဝ်း ကဲန်းအာအာတွော့ꩻ နေးတွမ်ႏအနယ်ꩻအမျိုꩻမျိုꩻ ရဲဆီꩻယားကုဲင်ဆွုမ်ႏနဝ်ꩻမꩻ အောင်ႏမျင်ႏမုꩻ တပေါႏအဝ်ႏတဝ်းသွူ၊ ဝေင်ꩻဟိုပုံꩻ ကျောင်ꩻအောင်ႏပွယ်ꩻနဝ်ꩻ တွိုႏယိုခါ အဝ်ႏသွဉ်လွေꩻဒျာႏ လိတ်ခမ်းဒေါမ်သွူ။ လိတ်ခမ်းဒေါမ်ယိုခါနဝ်ꩻ ဗွေႏဗိုန်တဖြေရဲန်ႏ ကတဲႏထွင်ႏဒါႏအတွိုင်ꩻ တမွေးတဝ်းဒွုမ်၊ ဗွေႏဗိုန်သုဲင်ꩻခဝ် ကျောင်ꩻတန် ဗွေႏဣန္ဒာစရိယ ကလင်ꩻအဝ်ႏခမ်းဒေါမ်တွင်ꩻနဝ်ꩻ ခြုဲင်းနယ်လွေꩻ လိတ်မွူးသဘော်ꩻတရာꩻတဲင် ဆရာႏခွန်ဝေးတန် သဘော်ꩻဗွောင်လက်ခံႏလွေꩻတွော့ꩻ လိတ်မွူးခမ်းဒေါမ်နဝ်ꩻ ဖျင်လွေꩻခန်းဒျာႏ သရငဝ်းမဲန်ႏ၊ အသွတ်ꩻငဝ်းမဲန်ႏ နုဲင်းယိုခါအတွိုင်ꩻနဝ်ꩻသွူ။ ခမ်းကောင်သားနဝ်ꩻ ခမ်းဒေါမ်သား ထွိုင်ႏရုဲင်ꩻတသွိုးသော့ꩻနဝ်ꩻမꩻ ခံႏတဒါႏတဝ်းတဲင် ကျမ်ႏရုဲင်ꩻတသွိုးနုဲင်းနုဲင်း၊ ကျမ်ႏဖေႏအာႏသွဉ်လွေꩻနုဲင်းနုဲင်း လိတ်မွူးထီသိမ်ႏသွူ။ လိတ်ခမ်းကောင်ယို နေင်ႏ ၁၃၃၉-ဗာႏ၊ ပွယ်ꩻတန်မွူးနီꩻခွိုꩻပအိုဝ်ႏ ဝေင်ꩻနယ်ႏတောင်ႏကီꩻ နောင်ယာသုဲင်ꩻတွင်ꩻကို ဥက္ကဋ္ဌဗွေႏဆရာႏတောႏ ဘဒ္ဒန္တအရိယဝံသ၊ ကျောင်ꩻမြို့ဦး ဝေင်ꩻတောင်ႏကီꩻ တွဲႏနျꩻကျောႏညာႏလိတ်စေးလာႏ အွဉ်ႏတီႏလွေꩻသမ်းယင်းနဝ်ꩻသွူ။ ပွယ်ꩻနောင်ယာသုဲင်ꩻကိုနဝ်ꩻ ပွိုင်းဝွို့တောမ်ႏ လိတ်ပအိုဝ်ႏယို ဆွေꩻနွေꩻတွိုင်ႏပင်ႏ ဒင်ႏပျꩻတဝ်းနုဲင်းမုဲင်ꩻမုဲင်ꩻ၊ လိတ်ပအိုဝ်ႏနဝ်ꩻ အွဉ်ႏအတီႏစွူစွူဒျာႏ လိတ်မွူးထီသိမ်ႏအကျောင်ꩻ တွဲႏနျꩻဖြေ့ꩻလီနေးဗော့ꩻ လိတ်စေးလာႏလွုမ်ꩻတွော့ꩻ ထွူလွေꩻဗော့ꩻနုဲင်းနဝ်ꩻလွုမ်ꩻသွူ။ တပါꩻဒင်ႏသွင်ꩻ၊ တပါꩻထောက်ခံႏ၊ သဘာပတိ ကွီသံႏဃာႏဆန္ဒတဲင် ကားကအဝ်ႏ သဘော်ꩻတူႏ၊ ဟဲ့ꩻသာႏဓု အတီႏပျုလွေꩻ နုဲင်းဗဟိုႏသံႏဃာႏ ကမာꩻယိုအတွိုင်ꩻ တမွေးတဝ်းသွူ။

ပွယ်ꩻနောင်ယာသုဲင်ꩻကိုနဝ်ꩻ ဗွေႏဗွန်ကောဝိဒ သီႏသဲင်ႏယိုခါလဲ့ အဝ်ႏပါတဲင် "ပွိုင်းဝွို့တောမ်ႏ လိတ်ပအိုဝ်ႏယို ထူႏတာႏဝွန်ႏသွဉ်ထူႏ ရုဲင်ꩻတသွိုးလွေꩻဖေႏဒျာႏအကျောင်ꩻ"အာႏမခံႏ ဝွန်ႏခံႏလွေꩻခန်းဒျာႏ သံႏဃာႏအမျာꩻနဝ်ꩻသွူ။ ဗွေႏဗိုန်သီႏသဲင်ႏနဝ်ꩻ ပွယ်ꩻနောင်ယာသုဲင်ꩻကို ကအာႏမခံႏခါꩻဒါႏအတွိုင်ꩻ တွိုႏလွေꩻ ၁၃၄၀-ဗွေ၊ လာဒဲန်စေတ်ꩻနဝ်ꩻ မာꩻလွေꩻခန်း သံႏဃာႏအစီꩻအဝွေꩻ ဝေင်ꩻတောင်ႏကီꩻ ပထမကျောင်ꩻတန် သံႏဃာႏဆေးယုံကိုထွူတဲင် အစီꩻဝွေꩻနဝ်ꩻ ပထမဖွဲ့လွေꩻ လိတ်လုဲင်ꩻဗဟိုႏသံႏဃာႏစွိုꩻ၊ ဒုတိယမွဉ်းဖျင်လွေꩻ လိတ်မွူးထီသိမ်ႏ၊ တတိယ ဖွဲ့ဗူႏလွေꩻ တဲမ်းလိတ်ဆရာႏစွိုꩻ အင်းရွယ်ႏချက်အဝ်ႏနုဲင်းနဝ်ꩻလဲ့ ပထမဖွဲ့ဗူႏသံႏဃာႏစွိုꩻထွူ ထွိုင်ႏမွဉ်းဖျင်လွေꩻလိတ်နဝ်ꩻ တနာႏလိုႏတဝ်း ပုဂ္ဂိုလ်ႏတပါꩻ လွေꩻလဝ်းခန်းဒျာႏ ဥက္ကဋ္ဌ ဗွေႏဗွန်မြို့ဦးထျꩻတွော့ꩻ ထွိုင်ႏစယင်းအစီꩻဝွေꩻနဝ်ꩻ ဗွေႏဗိုန်မြို့ဦး ခွန်းထုဲင်ခါႏကရစ်ꩻခန်းဒျာႏ ကလိုႏမွဉ်းဖျင်လိတ်ခရာႏ ကဒင်ႏပျꩻသား ဗွေႏဗွန်သီႏသဲင်ႏနဝ်ꩻသွူ။

ကထွိုင်ႏခံႏဗာႏ ဗွေႏဗိုန်မြို့ဉီးငဝ်းခွန်းနဝ်ꩻ ဗွေႏဗိုန်ကောဝိဒ မဲ့ထီလင်ꩻနေးစွဉ်ႏရိုꩻနဝ်ꩻသွူ၊ နဝ်ꩻတွော့ꩻ လိတ်မွဉ်းကိစ္စ တရတ်ထိုꩻထွူတဲင် ဖန်ဖေႏဗော့ꩻ က-ရီး၊ ခ-ရီး ကအစ ဗီးမဉ်ꩻဖုံႏ၊ ဒင်ႏဝွိုန်ꩻ-ထွို့ꩻခင်ႏကအစ အဟဲ့ꩻအဟောင်မဉ်ꩻဖုံႏတွော့ꩻ ဗွောင်သွဉ်လွေꩻဖေႏခန်းဒျာႏ ထွာဆရာႏသွဉ်တန်ꩻနဝ်ꩻသွူ၊ သွဉ်တန်ꩻနဝ်ꩻ ဗွေႏဗွန်-ကောဝိဒ သီႏသဲင်ႏ ကေားသွဉ်ဖေႏနဝ်ꩻသွူ။ တဲႏနဝ်ꩻမာꩻငါ ဗွေႏဉာဏောဘာသ သက်စေ့ရန်အောင် အွဉ်သွဉ်သွုပ်လွေꩻထဲင်းထဲင်း၊ တဲမ်းလွေꩻဖေႏပါ "ထွားဗာႏတဲင်သေ"လိတ်စောင်ႏနဝ်ꩻသွူ။ တွိုႏလွေꩻနေင်ႏ ၁၃၄၇-ဗာႏနဝ်ꩻ ဗဟိုႏသွဉ်တန်ꩻ အမုဲင်(၁)ယို ဗွောင်သွဉ်လွေꩻဗာႏခန်း ဝေင်ꩻနယ်ႏတောင်ႏကီꩻ ကျောင်ꩻထီဖေါင်းကိုနဝ်ꩻသွူ။ ၁၃၄၈-ဗာႏ၊ ဗဟိုႏသွဉ်တန်ꩻ အမုဲင်(၂)နဝ်ꩻ အွဉ်ႏလွေꩻဝေင်ꩻနယ်ႏတောင်ႏကီꩻနေနေ ကျောက်တလွုံꩻကိုထွူတဲင် အမုဲင်(၃)နဝ်ꩻ အွဉ်ႏလုဲင်ႏဝေင်ꩻနယ်ႏပင်လောင်ꩻ ကျောင်ꩻခြမ်ႏကိုနဝ်ꩻသွူ။ ကဗွောင်ဒါႏခြမ်ႏကိုယိုနဝ်ꩻ သွဉ်လွေꩻပါ ဗွေႏဗွန်သီႏသဲင်ႏ ကတဲမ်းဒါႏ ဒုစရဲက်ဆီပါꩻဘာႏသာႏသွူ၊ တဲႏနဝ်ꩻမာꩻငါ ဗဟိုႏသွဉ်တန်ꩻတာႏ ဘာႏသာႏလိတ်တသာယို ဗွေႏဗွန်သီႏသဲင်ႏ တဲမ်းဖေႏဒျာႏ ကဲန်းအာအာသွူ၊ ဗဟိုႏသွဉ်တန်ꩻယိုလဲ့ ဗွေႏဗွန်ကောဝိဒ သီႏသဲင်ႏ နမ်းကိုႏတဲင်ႏ လွေꩻသွဉ်ဖေႏစွုမ်ႏနေင်ႏနေင်ႏသွူ။

ထွိုင်ႏသွဉ်သွဉ်တန်ꩻနဝ်ꩻ လိတ်ပအိုဝ်ႏယို စွုမ်ႏတဝ်း၊ မဲန်ႏသꩻတဝ်းကရိုꩻနဝ်ꩻ ကွဲးထီႏထီႏ၊ ကွဲးမော့ꩻမော့ꩻလွတဲင် ဖျင်ထဲမ်လွေꩻယွဲးယွဲးဗာႏနဝ်ꩻ (၄)လဲင်ႏဗွေလဲန်းနဝ်ꩻသွူ၊ ကထဲမ်ဖျင်လွေꩻနဝ်ꩻ (၄)လဲင်ႏဗွေလဲန်းလဲ့ တမဲန်ႏသꩻလို့တဝ်း၊ ထဲမ်ဖျင်ခရာႏ အဝ်ႏအာနေဒွိုန်းတဲင် ခွေခြုဲင်းနယ် နာꩻဒင်ႏပျꩻ ဝင်ꩻတောင်ꩻပြန်ႏ ထွဉ်ႏထဲမ်ဖျင်ဖေႏယင်းတဲင်တွော့ꩻ ဥက္ကဋ္ဌဆရာႏတောႏ ဗွေႏဗွန်ကောဝိဒ သီႏသဲင်ႏနဝ်ꩻ တာႏဝွန်ႏအလꩻ ထဲမ်ဖျင်လွေꩻဖေႏယင်း (၅)လဲင်ႏဗွေနဝ်ꩻသွူ။ ကထဲမ်ဖျင်ဒါႏ (၅)လဲင်ႏဗွေ လိတ်မွူးမူယို နေင်ႏ ၁၃၇၂-ဗာႏ၊ လာဒဲန်စေင်ဆန်ꩻ(၇)ဟာ ဝေင်ꩻတောင်ႏကီꩻ ကျောင်ꩻမြို့ဦးကို ကမာꩻလွေꩻဒါႏ ဗဟိုႏသံႏဃာႏ ၆-လာခေါပ် ပွယ်ꩻမော့ꩻခွဲးကိုနဝ်ꩻ ဆရာႏတောႏတပါꩻ ဒင်ႏသွင်ꩻ၊ ဆရာႏတောႏတပါꩻ ထောက်ခံႏ၊ သဘာတိဆရာႏတောႏတန် ကွီသံႏဃာႏဆန္ဒတဲင် ကားကအဝ်ႏ သဘော်ꩻတူႏ ဟဲ့ꩻသာႏဓု (၃)လဲင်ႏ အွဉ်ႏလွေꩻခန်းဒျာႏအတီႏနဝ်ꩻသွူ။ "ဒင်ႏသွင်ꩻ၊ ထောက်ခံႏ၊ ကွီဆန္ဒ၊ အွဉ်ႏအတီႏ"ကမာꩻနုဲင်းယိုနဝ်ꩻ ဗဟိုႏသံႏဃာႏထုံꩻစံႏ ဗွန်ပီဒျာႏ ကမာꩻကရီးဖုံႏနဝ်ꩻအတွိုင်ꩻသွူ။ အစီꩻဝွေꩻကိုနဝ်ꩻ ကန်ႏကွက်သားအဲန်ထဝ်း၊ အွဉ်ႏလွေꩻလဲန်းအတီႏလဲ့ တွိုႏဆုဲင်ꩻနဝ်ꩻ ကတမဲန်ထဲမ်ဖျင်တဝ်း ပုဂ္ဂိုလ်ႏယင်ဟန်ႏ အော်လွဝင်ꩻတဲမ်းလိတ်ကန်ႏကွက် အစောင်ႏစောင်ႏ၊ တုတ်ꩻဖြေ့ꩻလီလွေꩻတဲင်တွော့ꩻ ဥက္ကဋ္ဌဆရာႏတောႏလဲ့ ငမ်းသံႏဃာႏပꩻလီလွဝင်ꩻတွော့ꩻ အုံယေန်လွေꩻယင်းဒျာႏ တွိုႏဟန်ႏနီꩻနဝ်ꩻသွူ၊ နဝ်ꩻတွော့ꩻ လိတ်ပအိုဝ်ႏလဲ့ အဝ်ႏထွာစွူစွူဒျာႏ ထာꩻဝီႏဝါးနဝ်ꩻသွူ။