လိတ်ဗွောင်မဲ့နား

"လိတ်ဗွောင်မဲ့နား-ဟောဝ်ဟော်ꩻထွား အမုဲင်(၁)"

အွိုးခꩻတလဲင်ႏ နီဗွေႏဘုရာꩻ အဝ်ႏအုံသာဝတ္ထိခမ်း၊ ကျောင်ꩻဇေႏဝွန်ႏကိုအတွင်ꩻ ခွန်တန်ကောသလောဝ်းရီ နီဗွေႏဘုရာꩻနုဲင်းယို- "ဩဗွေႏဂေါတမ- 'ပုရာဏကဿပ၊ မက္ခလိဂေါသာလ၊ အဇိတကေသကမ္ဗလ၊ ပကုဓကစ္စာယန၊ သဉ္စယဗေလဋ္ဌပုတ္တ၊ နိဂဏ္ဌနာဋပုတ္တ' တိတ္ထိဆရာႏတန် ယိုသူပါꩻဖုံႏနဝ်ꩻ တပဲ့ꩻတကာႏဖုံႏတဲ့ ကအာ၊ ထွာဂိုဏ်ꩻဆရာႏဖုံႏ၊ ထွာပုဂ္ဂိုလ်ႏကျောႏဖုံႏ၊ တယ်ႏထောင်ႏနွောင်ꩻစွဉ်ႏ အယူႏဝါႏဒဖုံႏ၊ လိုꩻဖုံႏကထီႏ ဝွေꩻဗွေႏသီးနောဝ်ꩻ ရိုꩻလွ လိုꩻဟောဝ် သူႏတောႏကောင်ꩻဖုံႏ၊ နောဝ်ꩻမဉ်ႏတဲ့ ဝွေꩻဗွေႏသီးသူပါꩻဖုံႏနဝ်ꩻ 'ခွေလꩻ သဗ္ဗညုတဉာဏ်ႏ' ဝွန်ႏခံႏတဝ်းနုဲင်းနဝ်ꩻ၊ တွိုႏနီဗွေႏနဝ်ꩻ ခွိုꩻနွယ်ႏဇာတ်တဲ့ပေႏပေႏ၊ ထွာရဟန်ꩻတဲ့ (လꩻညတဝ်း နုဲင်းဝွေꩻဗွေႏသီး) ထွာနေက ရဟန်ꩻပေႏလွုမ်ꩻ၊ နောဝ်ꩻမဉ်ႏတဲ့ 'ခွေလꩻ သဗ္ဗညုတဉာဏ်ႏ'နီဗွေႏမွော့ သမ်းဝွန်ႏခံႏဗွုန်ႏစွဉ်ႏနုဲင်းနဝ်ꩻအီ" "တကာႏတောႏ ခွန်တန်ဟွေး - ပေႏပေႏတဲ့ယဝ်း ထီႏဖွီ-မာꩻကြွို့ꩻကြꩻ တလꩻတောဝ်းနဝ်ꩻ အဝ်ႏလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ -

၁။ ခွန်ပေႏ ခွန်ပေႏယို ပေႏပေႏလွုမ်ꩻ၊ ဒေါ့ꩻတယွို့၊ ထီႏဖွီ-မာꩻကြွို့ꩻကြꩻတလꩻတောဝ်း၊ အမဉ်ႏထွာခွန်မဲ့ꩻ အမာꩻသီချာဒါႏလိုꩻ။

၂။ ရူးပေႏ ရူးပေႏယို ပေႏပေႏလွုမ်ꩻ၊ ထီႏဖွီ-မာꩻကြွို့ꩻကြꩻတလꩻတောဝ်း၊ အအဲင်ႏသီချာဒါႏလိုꩻ။

၃။ မေႏစျꩻ မေႏစျꩻပေႏလွုမ်ꩻ၊ ထီႏဖွီ-မာꩻကြွို့ꩻကြꩻတလꩻတောဝ်း၊ မေႏခိုးဒါႏလမ်း၊ မေႏခိုးဒါႏဒုံ။

၄။ ရဟန်ꩻပေႏ ရဟန်ꩻယို (စင်ꩻယို) ပေႏပေႏလွုမ်ꩻ၊ ထီႏဖွီ-မာꩻကြွို့ꩻကြꩻလꩻတောဝ်း၊ ခံႏဗာႏ (ရဟန်ꩻပေႏသီႏလ)အပဲစ်၊ သွုမ်ꩻတေင်၊ သွုမ်ꩻခြေင်ဒါႏ" နီဗွေႏဘုရာꩻ သျင်ꩻနယ်ချာ နုဲင်းနောဝ်ꩻသွူ။ (သဂါထာဝဂ္ဂ၊ သံယုတ်ပါဠိတောႏ၊ ဒဟရသုတ်)