လိတ်မူခရာႏ

အဝ်ႏ ဝီခီပီးဒီးယား ကို

"လိတ်မူခရာႏအရေꩻတန်ငါႏလဲဉ်း" နီသွဉ်းမူႏသီး ပအိုဝ်ႏလိုꩻမျိုꩻယို အရေꩻတန်ငါႏ ကိစ္စတစွိုးနဝ်ꩻ အဝ်ႏလိုႏဖြေႏသျင်ꩻဖေႏလဲဉ်းသွူ၊ တမုဲင်ꩻနဲးနဝ်ꩻ နီသွဉ်းမူႏသီး လိတ်လုဲင်ꩻခရာႏဒျာႏသွူ၊ လိုꩻမျိုꩻတမျိုꩻယို တဉ်ႏခွေါင်အီဒျာႏ တွမ်ႏလိတ်လုဲင်ꩻကရိုꩻနဝ်ꩻ အွဉ်ငါတွမ်ႏဗွေႏသင်္ဃာႏသီးဖုံႏတဲ့ အဝ်ႏသေလဲဉ်းဒျာႏသွူ။ နီသွဉ်းမူႏသီး ပအိုဝ်ႏလိုꩻမျိုꩻယို ပတ်သဲစ်တွမ်ႏ လိတ်ခရာႏလုဲင်ꩻခရာႏနဝ်ꩻ လိုꩻလမ်းပုဂ္ဂိုလ်ႏ မာꩻပဲင်ႏခွင်ꩻ၊ ဒေါ့ꩻပဲင်ႏခွင်ꩻ တအဝ်ႏတဝ်းတဲင် နေင်ႏပေါင်ꩻအာ လာပေါင်ꩻတဲ့ ညလဲဉ်း မဉ်ꩻနဝ်ꩻ ပအိုဝ်ႏလိတ်လုဲင်ꩻတွမ်ႏယေန်ႏငဲးရေꩻအစွိုꩻ ဗဟိုႏတဲ့ မာꩻပဲင်ႏတအဝ်ႏတဝ်းနေနေ၊ ဗွေႏသင်္ဃာႏခွုမ်မာꩻ ဆောင်ႏရွက်လွေꩻဒျာႏသွူ။

ကွပ်စွဉ်ႏဒျာႏ ဗွေႏသင်္ဃာႏအွဉ်ငါ မာꩻလွေꩻတဲင် အောင်ႏမျင်ႏမွေး၊ စွစ်ꩻလီမွေးစွဉ်ႏသွူ၊ ကွဲးတွော့ꩻ ခေတ်အပြောင်ꩻအလုဲင်ႏအလꩻ နီသွဉ်းသီး လိတ်ယိုတဲ့ ထွာလွဉ်လဲဉ်းသွူ ပျဿနာႏဖုံႏသွူ၊ ထွာနုဲင်းမုဲင်ꩻနဲးနဝ်ꩻ နီသွဉ်းမူႏသီး ကထေဒါႏလိတ်အုပ်၊ လိတ်စောင်ႏသားနဝ်ꩻ အသေသွတ်ꩻသွူ။ နုဲင်းယိုခါ နီသွဉ်းမူႏသီး ကထေလွေꩻဒါႏ ဂျာနယ်လိတ်လွီးလယ်ႏယိုလဲ့ ပျဿနာႏပေါင်ꩻစွုမ်ႏ အဝ်ႏအာမွေးစွဉ်ႏသွူ၊ အမုဲင်ဖုံႏတစွို့ꩻတဝ်း၊ အမုဲင်ဖုံႏ အဝ်ႏကုဲင်ထိုꩻနုဲင်းယိုနဝ်ꩻ နီသွဉ်းမူႏသီး လိတ်အုပ်လိတ်စောင်ႏသား အမာႏဒျာႏရိုꩻလဲ့ အဝ်ႏကုဲင်လိတ် အသွုံꩻယိုနဝ်ꩻ သရမဲဉ်ႏနုဲင်းမုဲင်ꩻ အသွတ်ꩻမဲဉ်ႏနုဲင်းမုဲင်ꩻနဝ်ꩻ နီသွဉ်းမူႏသီး ဆွုံꩻဖျတ်ခွင်ꩻ အဝ်ႏတဝ်းသွူ။ သွုံꩻဗာႏအမျာꩻကသွုံꩻနဲ့၊ သွုံꩻဗာႏသရမဲဉ်ႏနဲ့ ကရိုꩻနဝ်ꩻ နီသွဉ်းမူႏသီး ဆွုံꩻဖျတ်ခွင်ꩻ မာꩻပဲင်ႏခွင်ꩻလဲ့ အဝ်ႏတဝ်းသွူ။ နီသွဉ်းမူႏသီးထျꩻယိုနဝ်ꩻ တဆင်ႏဆင်ႏ လိတ်ယောင်းထေ့ အဝ်ႏဖျောလွဉ်၊ တဆင်ႏဆင်ႏ ဝွေႏဖန်ႏမု အဝ်ႏဖျောလွဉ်၊ ကွဲးတွော့ꩻ နီသွဉ်းမူႏသီး မာꩻခွင်ꩻဆွုံꩻဖျတ်ခွင်ꩻ တအဝ်ႏတဝ်းကရိုꩻနဝ်ꩻ မဉ်ဒေါ့ꩻလဝ်းနယ်ငါႏ လိတ်ထွားသားဖုံႏသွူ။

ဆရာႏတဲမ်းလိတ် ခွန်ကုဝေ-မုဲင်းကောင်လဲ့ အဝ်ႏဒေါ့ꩻနယ်၊ အဝ်ႏဖြေႏသျင်ꩻနယ်လဲဉ်း အလဲင်ႏပေါင်ꩻအာလဲဉ်း ခွေသွဉ်းမူႏ သေထွꩻနုဲင်းနဝ်ꩻ၊ ကွဲးတွော့ꩻ နီသွဉ်းမူႏသီး လိတ်ပအိုဝ်ႏယိုခါနဝ်ꩻ လိုꩻမျိုꩻအခါႏ ထွာလွဉ်အီမွေးငါႏ ပျဿနာႏ (စိန်ခေါ်မှု)တဗာႏကရိုꩻနဝ်ꩻ တာႏဝွန်ႏအာဝ်ႏသားတွမ်ႏ ဗွေႏသင်္ဃာႏသီးဖုံႏလဲ့ ရသေထွꩻဒျာႏသွူ။ ခမ်းကောင်ခမ်းဒွမ်လဲ့ ထွာအီပျဿနာႏ၊ ခမ်းကောင်ချင်ꩻချင်ꩻလဲ့ ထွာအီပျဿနာႏယိုနဝ်ꩻ အဝ်ႏလိုႏစဲစ်ဆေꩻထွားချာလဲဉ်းသွူ၊ မဉ်ႏဒေါ့ꩻချာယင်းနဝ်ꩻ နီသွဉ်းမူႏသီး လိတ်မူပအိုဝ်ႏခမ်းကောင် ယိုခါနဝ်ꩻ ထီသိမ်ႏမူရိုꩻနဝ်ꩻလဲ့ အစဲစ်မဲဉ်ႏနဝ်ꩻ တနေင်ႏတစိꩻစိꩻ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသင်္ဃာႏ အဝ်ႏမွဉ်းဖျင်လွေꩻလဲဉ်းနဝ်ꩻ ခွိုꩻသွုပ်ဆုဲင်ꩻကရိုꩻဒါႏ နီသွဉ်းမူႏသီးယို တသေထွꩻရောင်တဝ်းဒျာႏသွူ။ မဉ်ႏဒေါ့ꩻဗာႏ ဥပမာႏနဝ်ꩻ "ပအိုဝ်ႏ"လိတ်ဖြုံႏယိုနဝ်ꩻ ထီသိမ်ႏမူကို အဝ်ႏဒျာႏ"ပအိုႏ"နုဲင်းနဝ်ꩻသွူ။ ယိုနဝ်ꩻ အမဲဉ်ႏဒျာႏ၊ မဉ်ႏသွုံꩻချာ ထီသိမ်ႏမူ "ပအိုႏ"ယိုနဝ်ꩻ လိုꩻဖုံႏအီႏရိုꩻ တဲမ်းသွုံꩻတဝ်း လိတ်ထီသိမ်ႏမူနုဲင်းနဝ်ꩻ၊ သွုံꩻတဝ်းအမျာꩻ ကအွဉ်ႏထွော့ ရိုꩻနုဲင်းနဝ်ꩻဖုံႏသွူ။ ယူႏခရာႏတန်ဒျာႏ၊ နီသွဉ်းမူႏသီး ဗွေႏသုနန္ဒ ထီသိမ်ႏကထေခါꩻဒါႏ လိတ်မူယိုနဝ်ꩻ မွဉ်းဖျင်လꩻတဝ်း၊ သွုံꩻလွေꩻဗာႏနုဲင်းယိုအတွိုင်ꩻ ကရိုꩻနဝ်ꩻလဲ့ မိန်းခါꩻဗာႏတဝ်း သေထွꩻနုဲင်းနဝ်ꩻသွူ၊ နောင်ယာသုဲင်ꩻ ပွယ်ꩻမော့ꩻခွဲးကိုလဲ့ ကအွဉ်ႏထွော့ခါꩻနဝ်ꩻလဲ့ တပါတဝ်းနေနေ သေထွꩻနုဲင်းနဝ်ꩻသွူ။

နုဲင်းနဝ်ꩻက နီသွဉ်းမူႏသီး ပအိုဝ်ႏလိတ်မူခရာႏယို အဝ်ႏလိုႏအုံတဲင် တွိုင်ႏပင်ႏဆွေꩻနွေꩻမွေးလဲဉ်းတွော့ꩻ အွဉ်ႏထွော့လွေꩻယင်း (Update)ယင်းတလဲင်ႏနဝ်ꩻမꩻ အီႏဆင်ႏပြေႏ၊ နီသွဉ်းမူႏသီး လိတ်အုပ်လိတ်စောင်ႏ ကထေသားဖုံႏတဲ့ အီႏဆင်ႏပြေႏ နီသွဉ်းမူႏထီႏနုဲင်းနဝ်ꩻသွူ။ ကွပ်စွဉ်ႏ လိတ်မူခရာႏယိုတဲင် မာꩻထွာအီဒါႏ နီသွဉ်းမူႏသီး လိုꩻမျိုꩻလွောင်ႏဗူႏရေꩻကုဲင်၊ သွီႏကွဲꩻ၊ ထာꩻထီႏသျင်ꩻတဝ်းဝင်ꩻတဲင် ဗွေႏသင်္ဃာႏတဲ့နဝ်ꩻ၊ ပုဂ္ဂိုလ်ႏလိုꩻလမ်းတဲ့နဝ်ꩻ တာႏဝွန်ႏအဝ်ႏငါႏ အခိန်ႏတဲ့တွိုႏလဲဉ်း ထီႏနုဲင်းနဝ်ꩻသွူ။ ကခြီခြောဝ်လွေꩻဒါႏ "ငဝ်းတငွါ လိတ်ဖြုံႏ"ယိုလဲ့ အီႏထွာလွဉ်ဗာႏ၊ မန်းကရိုꩻဒါႏ (ဖတ်ရင်အသံ၊ ရေးရင်အမှန်)ကရိုꩻယို နီသွဉ်းမူႏသီး ထွားနုဲင်းခရာႏတလိုႏတဝ်း၊ နီသွဉ်းမူႏသီး နမ်းပဲင်ႏထာꩻခြိုꩻအဝ်ႏဒျာႏကရိုꩻနဝ်ꩻလဲ့ လိုႏယူႏလꩻငါႏသွူ။ မဉ်ႏတွိုင်ႏပင်ႏ ဆွေꩻနွေꩻယင်း၊ အွဉ်ႏထွော့လွေꩻယင်းနဝ်ꩻ လိုꩻကဝွေႏဖန်ႏသားနဝ်ꩻ အီႏဆေ့ꩻထိုꩻမား၊ လိုꩻကယားသားတဲ့ အီႏထိုꩻဆေ့ꩻတဲင် ပါꩻမုဲင်ꩻမာႏ ပါꩻမုဲင်ꩻမဲဉ်ႏလဲ့ အဖြေႏထန်ႏလွဉ်ဒျာႏ ခွေသွဉ်းမူႏ ထီႏနုဲင်းနဝ်ꩻသွူ။ အတည်းတဗာႏ တွမ်ႏပအိုဝ်ႏအဘိဓာန်ႏ၊ ပအိုဝ်ႏသဒ္ဒါႏ (စကားလုံးပေါင်းသတ်ပုံ)ဖုံႏယို မဉ်ႏအဝ်ႏလွဉ်နဝ်ꩻ နီသွဉ်းမူႏသီး လိတ်မူခရာႏယို ထေင်ဗာႏဒွုမ်ဝင်ꩻ၊ ထီႏတရေင်ဗာႏဒွုမ်ဝင်ꩻသွူ၊ မဉ်ႏတမွေးတဝ်းနဝ်ꩻ အဝ်ႏသျုတ်စွူစွူ၊ အဝ်ႏတရေင်စွူစွူဗော့ꩻနုဲင်းယိုတဲင် ကအီႏထွာဒါႏ နီခွိုꩻသွုပ်သီးအတာႏလဲ့ သꩻထွူႏခရာႏထွာအီငါႏသွူ။

လိတ်မူခရာႏယို တာႏဝွန်ႏအဝ်ႏ ပါꩻမုဲင်ꩻအလောင်းနဲး မဉ်ႏထွားချာနဝ်ꩻ သေတဝ်းသွူ။ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏဗွေႏသင်္ဃာႏသီး တာႏဝွန်ႏဟောင်း? နီသွဉ်းမူႏသီး ခွိုꩻပအိုဝ်ႏအွဉ်ငါ ခေါင်းဆောင်သီး တာႏဝွန်ႏဖုံႏဒျာႏဟောင်း သေတဝ်းသွူ။ မဉ်ႏနုဲင်းနီသွဉ်းမူႏသီး ထကွားနဝ်ꩻလဲ့ ဗဟိုႏသင်္ဃာႏလဲ့ မာꩻပဲင်ႏခွင်ꩻအဝ်ႏတဝ်း၊ အွဉ်ငါခေါင်းဆောင်သီးတဲ့ မာꩻပဲင်ႏခွင်ꩻအဝ်ႏတဝ်းသွူ။ ပွိုးနုဲင်းမုဲင်ꩻတဲ့ လိတ်ခရာႏ ကအဝ်ႏသျုတ်တရေင်ယိုနဝ်ꩻ ဖြေႏသျင်ꩻသား၊ ထူႏတာႏဝွန်ႏ မာꩻဖေႏသား မဉ်ႏထွားဒျာႏ ပအိုဝ်ႏလိတ်လုဲင်ꩻတွမ်ႏ ယေန်ႏငဲးရေꩻ ဥက္ကဋ္ဌလဲ့ မာꩻခွင်ꩻတအဝ်ႏတဝ်း၊ ဗဟိုႏသင်္ဃာႏစွိုꩻဥက္ကဋ္ဌလဲ့ မာꩻခွင်ꩻတအဝ်ႏတဝ်းတဲင် ထူႏတာႏဝွန်ႏ မာꩻပဲင်ႏခွင်ꩻ အဝ်ႏသားနဝ်ꩻ ပါꩻမုဲင်ꩻလဲ့ နီသွဉ်းမူႏသီး တသေထွꩻတဝ်းဒွုမ်သွူ။

ကွပ်နဝ်ꩻမꩻ ဝါႏသနာႏလိတ်ထွားသားသီး ကဖေႏလွဉ်ဒါႏ ယောင်းလွဉ်ဒါႏ လိတ်ခရာႏနဝ်ꩻ နီသွဉ်းမူႏသီး ခြွူႏမွဉ်းသားလဲ့ မာꩻပဲင်ႏခွင်ꩻ ဆွုံꩻဖျတ်ခွင်ꩻ တအဝ်ႏတဝ်း မဉ်ဒေါ့ꩻဟွိုန်ပါသမ်း ဟောꩻထွားလိတ်ပရိသတ်သီးဖုံႏသွူ။ လိတ်မုဲင်ဖုံႏ၊ လိတ်ဖြုံႏဖုံႏ ကမာႏနဝ်ꩻ နီသွဉ်းမူႏသီး သတိချို့ꩻယွင်ꩻတဲင် ထွာဗာႏ၊ နီသွဉ်းမူႏသီး အွဉ်ႏသတိꩻတိꩻအီႏကျိုꩻစာꩻ ဖျင်လွေꩻမဲဉ်ႏမဲဉ်ႏယင်းဒျာႏသွူ၊ ကွပ်စွဉ်ႏအကျောင်ꩻတစွိုးစွိုးတဲင် အမာႏကပါနဝ်ꩻလဲ့ ယံအွဉ်ႏစွꩻခွင်ꩻဖေႏပါသွော့ နီသွဉ်းမူႏသီး ခြွူႏမွဉ်းသားစွိုꩻအလောင်းကရိုꩻနဝ်ꩻ ခွေသွဉ်းမူႏ တောင်ꩻပြန်ႏလွေꩻဗာႏနုဲင်းနဝ်ꩻသွူ။ မွူးလာရောင်ႏကိုတဲ့ အဝ်ႏဖွင်ꩻနယ်အဝ်ႏလဲဉ်းတဲင် လိတ်မူပျဿနာႏနဝ်ꩻ ထွားငါနဝ်ꩻကိုငါလဲ့ အဖြေႏထန်ႏလွဉ်လဲဉ်းရင်ꩻနဝ်ꩻမꩻ လိုႏမာꩻထွိုက်သင်ꩻလဲဉ်းရင်ꩻသွူ။ လိတ်မူခရာႏယို ထွာမွေးပျဿနာႏတန်တန်တဗာႏတဲင် ခွေသွဉ်းမူႏသီး ခြွူႏမွဉ်းသားလဲ့ နေႏသာႏတဝ်းတွော့ꩻ ဒေါ့ꩻခြုဲင်းနယ်လွေꩻဗာႏ လိတ်ကတူႏစဲဉ်ႏ မဲဉ်ခြုဲင်းတဝ်းတဲ့ ခြုဲင်းဗာႏဗာႏကို နုဲင်းယိုသွူ။

နဝ်ꩻမꩻ တာႏဝွန်ႏကအဝ်ႏဒါႏ ပုဂ္ဂိုလ်ႏသီးလဲ့ အဝ်ႏလိုႏမာꩻသျင်ꩻသျင်ꩻ အခိန်ႏတွိုႏလဲဉ်း ခွေသွဉ်းမူႏထီႏနုဲင်းနဝ်ꩻတဲင် ဖေႏသတိလွေꩻပါဗာႏနုဲင်းယိုသွူ။ ရေႏရောႏလွေꩻဒျာႏ နီသွဉ်းမူႏသီး ပအိုဝ်ႏလိုꩻမျိုꩻ အနာႏဂတ်ဆꩻငါတာႏဒျာႏတဲင် အမာႏမဉ်ႏပါလဲ့ ခွင်ꩻလွစ်ဖေႏပါသွော့အကျောင်ꩻ-[၁]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. နင်ꩻချောꩻလွိုးလေ၊ ခမ်းသားငဝ်း၊ အမုဲင်-၂၊ အစဲဉ်ႏ-၉၊ မဲ့ငါ-၁၃