လိုႏငါႏဒေႏသငိမ်ꩻချံꩻ

"အောဝ်ႏလိုႏငါႏ နီဒေႏသငိမ်ꩻချံꩻရေꩻ" နီလိုꩻချင်ꩻ တဖြာꩻတွမ်ႏတဖြာꩻ မဉ်ႏတတဲ့ꩻခေါဝ်းတောဝ်းဝင်ꩻနောဝ်ꩻ လိုꩻတသဉ်ဖုံႏ သွင်ꩻသꩻလꩻ၊ သွေꩻကုဲင်လꩻနောဝ်ꩻမꩻ ထာꩻလုပ်ꩻထာꩻမာꩻကုဲင်အီ၊ ထွာတခြိုꩻသွုမ်ꩻထိုꩻအီအကျောင်ꩻတရာꩻတဲင် လꩻခြေင်ပါꩻထီႏဖွီ၊ ပါꩻသေထွꩻအီထဲင်း နီအကိုရေꩻ ပျဿနာႏဖုံႏသွူတကာႏတောဝ်း ကွပ်လိုꩻတဖြာꩻ ခွိုက်လွဉ်လိုꩻအမျာꩻတွော့ꩻ အနာလွို ခွိုင်းလွဉ်ဒါႏ နီရပ်ရာႏ ငိမ်ꩻချံꩻရေꩻနောဝ်ꩻသွူ။ တဒုံချင်ႏ မဉ်ႏတတဲ့ꩻခေါဝ်းတောဝ်းဝင်ꩻနောဝ်ꩻ ဒေါ့ꩻသွဉ်ဝင်ꩻယပ်ꩻ၊ လိုꩻကောမာꩻဖေႏ အတန်အကဲႏဆေ့ꩻခြော၊ လိုꩻမွိုက်လိုꩻရွိုင်ꩻအာ၊ စွန်တခွန်ꩻအာ၊ အချင်ꩻချင်ꩻယားကုဲင်ဝင်ꩻ ထာꩻလုပ်ꩻထာꩻမာꩻ၊ ပါꩻဒုံလင်ထီႏဖွီ၊ ပါꩻကွီခြေင်ဒါႏအခွဉ်ႏ၊ ပါꩻထွဉ်ႏခြေင်ဒါႏလိုꩻနောဝ်ꩻသွူ။ တဒုံတွမ်ႏတဒုံ မဉ်ႏတတဲ့ꩻခေါဝ်းတောဝ်းဝင်ꩻနောဝ်ꩻ လွေꩻနွောင်ꩻတောဝ်း ပွယ်ꩻနောဝ်ပွယ်ꩻထင်ꩻ၊ မာꩻညီꩻနွောင်ꩻတောဝ်း ဝင်ꩻပွယ်ꩻပေႏပွယ်ꩻတန်၊ ထူႏသိမ်ꩻဒါႏ ဝင်ꩻဟံႏယာႏ၊ တရိမ်ဒါႏဝင်ꩻဟံႏယာႏဖုံႏနောဝ်ꩻသွူ။ လိုꩻမျိုꩻတမျိုꩻတွမ်ႏတမျိုꩻ မဉ်ႏတတဲ့ꩻခေါဝ်းတောဝ်းဝင်ꩻနောဝ်ꩻ ကျံႏတကုဲင်ဒါႏဝင်ꩻ၊ အံႏနွောင်ꩻနိစ်စက်ဒါႏဝင်ꩻ၊ ယားကုဲင်ဒါႏဝင်ꩻ အခွင်ꩻအရေꩻဖုံႏ၊ စီꩻပွာꩻရေꩻဖုံႏနောဝ်ꩻသွူ။ လိုꩻတွိုင်ꩻစွုမ်ႏဖြာꩻ သဲစ်ကလွူးလင်ꩻ အခွင်ꩻအရေꩻ အောဝ်ႏထွူလဲဉ်းဒျာႏတဲ့ အဗွေတဗာႏ ခံႏစာꩻခွင်ꩻဖေႏကလေꩻနောဝ်ꩻ အရေꩻတန်သွတ်ꩻ အောဝ်ႏလိုႏငါႏ နီလွောင်ႏဗူႏရေꩻ၊ အောဝ်ႏလိုႏနာႏ လိုꩻဖြားလိုꩻတန်ငေါဝ်း၊ အောဝ်ႏလိုႏလွောက်ꩻနာႏ နီရပ်ရာႏစီꩻကန်ꩻ၊ နီအောဝ်ႏလိုႏဖေႏအာႏ ပိုလီꩻပညာႏဖုံႏနောဝ်ꩻသွူ။ နီလိုꩻမျိုꩻသမဲင်ꩻ လိုꩻပေႏလိုꩻယွဲးဖုံႏ ဖေႏကသေထွꩻ ကထွာမွိုးဖါ လိုꩻဖြားလိုꩻတန် အွဉ်ႏနယ်ဗာႏ၊ သွဉ်နယ်ဗာႏ နမ်းတွမ်ႏနမ်းတဲ့ ဟော်ꩻထွားဗာႏ၊ သွဉ်လွူꩻဗာႏ၊ ထူႏဗာႏသတိꩻ ထူႏဗာႏသွဉ်ခန်ꩻ၊ အောဝ်ႏသွဉ်ခန်ꩻကို နေးတွမ်ႏအနယ်ꩻပညာႏ ခေတ်အလွောက်ꩻ ပြောင်ꩻလုဲင်ႏဖေႏဗာႏ နီရပ်ရာႏထင်ႏထိုရေꩻ၊ နီလိုꩻမျိုꩻထင်ႏထိုရေꩻနောဝ်ꩻသွူ။ ဟံႏငိုꩻထွိုင်ႏအောဝ်ႏလွဉ် နီပအိုဝ်ႏရပ်ယိုခါ ဟံႏစာꩻသားလွိုင်ႏအာလွဉ်၊ ကောဖြေꩻသားနောဝ်ꩻ မဉ်ႏထွာနီလိုꩻမျိုꩻချင်ꩻ တဗာႏခုဲင်ႏတောဝ်း၊ ကွီလုပ်ꩻကွီမာꩻချာ လꩻစွဉ်ႏလဲ့ မဉ်ႏထွာဝင်ꩻလိုꩻမျိုꩻနောဝ်ꩻ နီလုပ်ꩻမာꩻတာႏတဲ့ ဝင်ꩻတသေနာႏတောဝ်း၊ လွေꩻသဲင်ꩻချာငါတာႏ တဖူꩻလဲ့ ဝင်ꩻတဖေႏတောဝ်း၊ အုံဗော့ꩻဖေႏကလꩻမွိုန်းတဲ့ ဝင်ꩻမာꩻဝင်ꩻကျံႏ၊ ဥပမာႏ- ဝင်ꩻလွူးထော့ꩻ လွူးဆျာတဲင် အအံႏအအွꩻကုဲင်၊ ခြွိုင်ႏသန်ꩻရေꩻကုဲင်တွော့ꩻ အုံထေ့အုံဗော့ꩻလꩻဒွုမ်၊ ထွာအီနီရပ်ရာႏ အန္တရာယ်ႏ၊ ယားကုဲင်ထိုꩻအီ နီခင်ႏလမ်းငိမ်ꩻချံꩻရေꩻနောဝ်ꩻသွူ။ နီလိုꩻမျိုꩻချင်ꩻ တဒုံတွမ်ႏတဒုံ ကလွေꩻသဲင်ꩻချာငါဒါႏ တဖူꩻဖုံႏလဲ့သင်၊ တဖူꩻလွေꩻသဲင်ꩻ သွို့ꩻခြံဖုံႏတာႏလဲ့သင် အောဝ်ႏလိုႏမာꩻလုဲင်းလုဲင်း၊ အောဝ်ႏလိုႏဖျင်ဟောဝ်ဟောဝ်၊ အောဝ်ႏလိုႏဖွေါင်ꩻတွိုက်တောဝ်း တဖူꩻလွေꩻသဲင်ꩻရေꩻဖုံႏ၊ ခေတ်ယိုခါ လိုꩻတဲ့အာလွဉ်၊ ဒုံတဲ့တန်လွဉ်၊ ကာꩻဆိုင်ကယ်လဲ့ လွိုင်ႏလွဉ်တဲင် တဖူꩻလွေꩻသဲင်ꩻရေꩻလဲ့ အောဝ်ႏလိုႏမာꩻလုဲင်းငါႏနောဝ်ꩻသွူ။ ဒုံကိုရပ်ကို ကအောဝ်ႏထိန်ꩻထွားဒါႏ လိုꩻအမျာꩻ ဖြားဒုံလိုꩻတန်ဖုံႏနောဝ်ꩻ ဖေႏကထွာအမျာꩻအာႏကွိုꩻလꩻ၊ လိုꩻအမျာꩻယွုမ်းအံႏလꩻလဲ့ ကျိုꩻစာꩻဗာႏ၊ သောင်ႏသာဗာႏ၊ အုံအောဝ်ႏမဲဉ်ႏမဲဉ်ႏဗာႏ တွမ်ႏနာယကဂွုဏ်ႏ(၆)ပါꩻနောဝ်ꩻသွူ။ လိုꩻသေလိုꩻဒါႏ အွဉ်ငါတွော့ꩻ နီဒုံဆောင်ႏ နီရပ်ရာႏကို ကလိုႏအပ်ဒါႏ တဖူꩻတထာ ခြွိုင်ႏသန်ꩻရေꩻ လိတ်သွဉ်ကျောင်ꩻဖုံႏနောဝ်ꩻ တွမ်ထူႏစွုမ်ႏစွုမ်ႏ အချက်ဖုံႏတွော့ꩻ ဒင်ႏနယ်ဗာႏ အုပ်ချွုတ်ရေꩻကဲႏ၊ ဒင်ႏနယ်ဗာႏ နီကလွိုက်ခါꩻ လွတ်တောႏနမ်းခြောင်ꩻတင်ထျꩻနောဝ်ꩻမꩻ နီရပ်ရာႏ ငိမ်ꩻချံꩻလွဉ်နောဝ်ꩻသွူ။ နီရပ်ရာႏငိမ်ꩻချံꩻရေꩻ ကရိုꩻနောဝ်ꩻ ဆဲင်ႏဒျာႏအတွိုက်ꩻအခꩻ အွဉ်ႏဆွိုးရေꩻတကာႏတောဝ်း နဲင်ႏငံႏရေꩻ စီꩻပွာꩻရေꩻ လိုꩻမုအုံအောဝ်ႏရေꩻဖုံႏလဲ့ ဆဲင်ႏတွမ်ႏနီခင်ႏလမ်း ငိမ်ꩻချံꩻရေꩻတဲင် အောဝ်ႏမဲ့ထွား အောဝ်ႏနားနာႏတွော့ꩻ ဝင်ꩻနေးတွမ်ႏ အအံႏအအွꩻ အသွုံꩻအဆောင်ႏ ကျံႏတကုဲင်လွဉ်နီ ဖေႏကလꩻမွိုန်း၊ ယားကုဲင်နီလိုꩻမျိုꩻ နီခင်ႏလမ်းငိမ်ꩻချံꩻရေꩻ ဖေႏကလꩻမွိုန်း၊ ဖေႏကပꩻထိုꩻမွိုန်းနောတ်ꩻ နီအောဝ်ႏလိုႏလွောင်ႏဗူႏဝင်ꩻ၊ နီအောဝ်ႏလိုႏအုံအောဝ်ႏငါႏ တွမ်ႏနီရပ်ရာႏစီꩻကန်ꩻ၊ နီခမ်းထီဥပဒေႏဖုံႏအကျောင်ꩻ ဖေႏသေဗာႏနုဲင်းယိုသွူ။