လိုႏဖေႏအာႏကရိုꩻနဝ်ꩻ
နီသွဉ်းသီး ပအိုဝ်ႏပေႏယိုခါနဝ်ꩻ အီႏတဲမ်းရွမ်ဖြုဲင်ꩻတရိုꩻတဝ်း၊ အီႏတဲမ်းကဗျာတရိုꩻတဝ်း လိုႏဖေႏအာႏချာငါႏ နီစွိုးခွိုꩻလိတ်လုဲင်ꩻ၊ နီစွိုးခွိုꩻခွမ်ꩻလာꩻ၊ နီစွိုးခွိုꩻငဝ်းငွါ၊ နီစွိုးခွိုꩻထုံꩻစံႏ ငဝ်းတဲက်တွန်ꩻနိုꩻဆောႏနုဲင်းယိုနဝ်ꩻ ဟွုန်ဗာႏအာ၊ ထီႏဗာႏအာငါႏသွူ၊ မွေးသွူ-ယိုဖုံႏနဝ်ꩻ ပေါႏထွာလဲဉ်းသွူ ပအိုဝ်ႏတဖြာꩻနဝ်ꩻ လိုႏဖေႏအာႏဒျာႏရင်ꩻ ခွမ်ꩻလာꩻ၊ ငဝ်းငွါ၊ ထုံꩻစံႏ ယိုသွံမျိုꩻနဝ်ꩻ တမဲဉ်ဗွောင်ဖြုဲင်ꩻတဝ်း၊ မဲဉ်ဗွောင်လုဲင်း၊ ခြုဲင်းဆွာꩻစံꩻ "လိတ်လုဲင်ꩻ"ကရိုꩻဒါႏ ငဝ်းယိုတငွါသွူ။ ခွေသွဉ်း"ခွန်ကုဝေ"ယိုနဝ်ꩻ ဟော်ꩻလိတ်ပရိသတ်သီး အဝ်ႏသေဒျာႏအတွိုင်ꩻ ပွိုင်းဝွို့တွမ်ႏလိတ်ပအိုဝ်ႏယို အထီအသွီႏဖေႏကဗွေနဝ်ꩻ တဲမ်းနယ်၊ ခြုဲင်းနယ်၊ စေနယ်လဲဉ်း အလဲင်ႏလဲင်ႏ၊ အခြွိုက်ခြွိုက်သွူ၊ ကွဲႏတွော့ꩻ ခြုဲင်းနယ်သွူတခွိုင်းနဝ်ꩻတဲ့ တသေနာႏတဝ်းသား၊ သဘော်ꩻတဗွောင်တဝ်းသားနဝ်ꩻ အဝ်ႏအာငါႏနေကသွူ၊ နီသွဉ်းသီး တကာႏလိုꩻထာꩻလိုပ်ꩻသားတွမ်ႏရိုꩻပုဲင်ႏ ထွာသွူဆရာႏလိုꩻကျောင်ꩻလဲ့ တသေနာႏတဝ်းသား အဝ်ႏပြုံႏပြင်ႏနေကဒျာႏသွူ။ ယဟန်ႏသားနဝ်ꩻ လိတ်ပအိုဝ်ႏယို စွုမ်ႏတစွုမ်ႏတဝ်း၊ မဲဉ်ႏတမဲဉ်ႏတဝ်းနဝ်ꩻ အဝ်ႏသေဒျာႏလဲ့ လွꩻဒေါ့ꩻ၊ လွꩻဟော်ꩻ၊ လွꩻထေင်ညင်ꩻဝင်ꩻတွော့ꩻ မာꩻနုဲင်းဒျာႏတသေနာႏတဝ်း၊ အုံတေ့ꩻဒျာႏထာꩻလဲ့အဝ်ႏသွူ၊ ယဟန်ႏသားနဝ်ꩻ ဒေါ့ꩻလဲ့ဝင်ꩻတစူꩻတဝ်းတဲင် တထူꩻတဝ်းတွော့ꩻ ဒေါ့ꩻတယ်ꩻဒွုမ်၊ ယူႏနုဲင်းနဝ်ꩻလဲ့အဝ်ႏသွူ။ ယဟန်ႏသားနဝ်ꩻ နီလိတ်ပအိုဝ်ႏထီသိမ်ႏမူယိုနဝ်ꩻ ဗွေႏဗွန်ဖြားကျောင်ꩻတန် ဘဒ္ဒန္တနရိန္ဒ ငဝ်းငွါဩဝါဒအလꩻ ဗွေႏဗွန်သုနန္ဒ ထီသိမ်ႏတဲမ်းထေထန်ႏဖေႏတဲင် စွုမ်ႏလဲ့နဝ်ꩻ၊ စွုမ်ႏတဝ်းလဲ့နဝ်ꩻ၊ မဲဉ်ႏလဲ့နဝ်ꩻ၊ မဲဉ်ႏတဝ်းလဲ့နဝ်ꩻ လိုႏသွဉ်တေ့ꩻတေ့ꩻ၊ လိုႏဝွေႏဖန်ႏတဝ်း၊ လိုႏယားကုဲင်တဝ်း ယူႏနုဲင်းနဝ်ꩻလဲ့အဝ်ႏသွူ၊ လိုꩻကယူႏနုဲင်းယိုနဝ်ꩻ ဆရာႏစွယ်ꩻ၊ ပုဂ္ဂိုလ်ႏစွယ်ꩻ ရိုꩻဗာႏနုဲင်းနဝ်ꩻသွူ၊ ခွေသွဉ်းခွန်ကုဝေလဲ့ ဗွေႏဗွန်ဖြားနရိန္ဒတပဲ့ꩻနေနေ၊ သꩻနုဲင်းနဝ်ꩻ တအဲဉ်ထဝ်းသွူ၊ အမဲဉ်ႏလဲ့အမဲဉ်ႏတွိုင်ꩻ၊ အမာႏလဲ့ အမာႏအတွိုင်ꩻ လက်ခံႏဒျာႏနုဲင်းနဝ်ꩻသွူ။ ခွေသွဉ်းထွိုင်ႏထီႏထီႏအာငါႏ နီသွဉ်းသီးပအိုဝ်ႏပေႏတဲမ်း လိုႏဖေႏအာႏငါႏ လိတ်ပအိုဝ်ႏအကျောင်ꩻအခရာႏ ကဗျာရွမ်ဖြုဲင်ꩻဖုံႏနဝ်ꩻ တယွို့လိုႏလိုႏ၊ သꩻလျားလိုႏလိုႏ သꩻထွာစွဉ်ႏနုဲင်းနဝ်ꩻသွူ။ ပစ္စေꩻတခြိုꩻအမျိုꩻမျိုꩻယိုနဝ်ꩻ ထူꩻချာꩻချက်မီႏ(မိဉ်ႏ)အဝ်ႏတစွိုးစွိုးမꩻ အတရေꩻလွိုဝင်ꩻနဲ့၊ အခွေါင်ခံႏလွိုဝင်ꩻနဲ့၊ အငိုꩻပေါ်ꩻဟဝ်ငါႏနဲ့ စတဲင်ထူꩻချာꩻချက်နုဲင်းနဝ်ꩻဖုံႏသွူ၊ ထူꩻချာꩻချက်မီႏ(မိဉ်ႏ)အဲဉ်ထဝ်းတစွိုးစွိုး၊ ဗွိုန်နုဲင်းပီထုဲင်ႏဝင်ꩻလွုမ်ꩻနဝ်ꩻ "လိုႏဖေႏအာႏငါႏ"ကရိုꩻဒါႏ ငဝ်းနုဲင်းယိုနဝ်ꩻ လိုႏသွုံꩻတဝ်းသွူ၊ ကွဲႏတွော့ꩻ အဝ်ႏတမျိုꩻ "ပါꩻမုဲင်ꩻပို ပါꩻမုဲင်ꩻဟဲ့ꩻမောင်ႏမောင်ႏ၊ ပါꩻမုဲင်ꩻထီကောင်ႏ ပါꩻမုဲင်ꩻရိုꩻအငဝ်၊ ပါꩻမုဲင်ꩻနမ်း ပါꩻမုဲင်ꩻရိုꩻအဟဝ်"ငဝ်းယိုအတွိုင်ꩻ နီလိုꩻမျိုꩻ ပစ္စေꩻတခြိုꩻတဲင် "ယံလဲ့နဝ်ꩻ၊ ယံတဝ်းလဲ့နဝ်ꩻ နီထွာပအိုဝ်ႏနဝ်ꩻ လိုႏဖေႏအာႏ တာႏဝွန်ႏအဝ်ႏ"မီႏရိုꩻနုဲင်းနဝ်ꩻနဝ်ꩻ ခွေသွဉ်းတစင်းရိုꩻတဝ်းနုဲင်းမုဲင်ꩻမုဲင်ꩻသွူ၊ ကဖေႏအာႏကြံꩻ ဖေႏအာႏကြွို့ꩻထာꩻနုဲင်းယိုနဝ်ꩻ လိုꩻသေလိုꩻဒါႏ၊ လိုꩻပညာႏအဝ်ႏသီး ဖေႏအာႏမုꩻတမွေးတဝ်း ရိုꩻဗာႏနုဲင်းနဝ်ꩻသွူ။ နဝ်ꩻတွော့ꩻ ပုဂ္ဂိုလ်ႏကတဲမ်းဒါႏ "လိုႏဖေႏအာႏငါႏ လိတ်ပအိုဝ်ႏယို"လဲ့ မီႏနုဲင်းခွေသွဉ်းနဝ်ꩻ အဝ်ႏလိုႏတဲမ်းထဲမ်သော့ꩻပါ "လိုႏဖေႏအာႏငါႏအကျောင်ꩻ"သွူ၊ ကလိုႏဖေႏအာႏငါႏ နီလိတ်ပအိုဝ်ႏယိုနဝ်ꩻ အကျောင်ꩻအခရာႏ လိုႏဖေႏအာႏငါႏ အချက်ဖုံႏယို တတဲမ်းနယ်တဝ်းတွော့ꩻ "လိုႏဖေႏအာႏငါႏ"မီႏရိုꩻနုဲင်းနဝ်ꩻလွုမ်ꩻနဝ်ꩻ ထွားနုဲင်းလေႏကြွို့ꩻဝင်ꩻ၊ ဝင်ꩻရိုꩻတွို့ꩻလဲ့တွို့ꩻ၊ ဝင်ꩻရိုꩻကွောန်ႏလဲ့ကွောန်ႏ၊ ဖဲ့ꩻတွို့ꩻနဝ်ꩻ ထာꩻမုဲင်ꩻအဝ်ႏ၊ ဖဲ့ꩻကွောန်ႏနဝ်ꩻ ထာꩻမုဲင်ꩻအဝ်ႏ တသေတဝ်းတဲင် ရိုꩻနုဲင်းဝင်ꩻနဝ်ꩻ အဝင်ႏဒျာႏလိုꩻထာꩻသူႏသေ တအဲဉ်ထဝ်းသွူ။ နီလိတ်ပအိုဝ်ႏယိုခါနဝ်ꩻ- အရွီးအခိုႏအဝ်ႏမုဲင်ꩻလွဉ်၊ ကတဲမ်းကထွင်ႏဖေႏဒါႏ လိတ်ပအိုဝ်ႏယိုနဝ်ꩻ ပုဂ္ဂိုလ်ႏအစားမုဲင်ꩻ၊ လိုꩻကျောင်ꩻနဲ့ လိုꩻလမ်းနဲ့၊ လိတ်ပအိုဝ်ႏယိုခါတွမ်ႏ လိတ်ပအိုဝ်ႏစခါ(ကထူႏတဲမ်းနေးမန်းလိတ်)နဝ်ꩻ အပွိုင်ကွာႏလွဝင်ꩻနုဲင်းမုဲင်ꩻ၊ ဗွေႏဗွန်ထီသိမ်ႏ လိတ်မူစဲစ်စဲစ်(ပအိုဝ်ႏအက္ခရာႏလိတ်မွူးတသာအတွိုင်ꩻ)နဝ်ꩻ အဝ်ႏနုဲင်းမုဲင်ꩻ၊ ပအိုဝ်ႏခမ်းကောင် ကအဝ်ႏသွဉ်ဒါႏယိုခါနဝ်ꩻ ဗွေႏဗွန်ထီသိမ်ႏလိတ်မူစဲစ်စဲစ်မွေးနေဟောင်း၊ ပအိုဝ်ႏငဝ်းရန်းစဲစ်စဲစ်မဲဉ်ႏမဲဉ်ႏနဝ်ꩻ ရဿ' ဒီဃသရနီဖြုံႏအတွယ်ꩻယို အဝ်ႏသွစ်ꩻ(၈)ရန်းလဲ့ ဗွေႏဗွန်ထီသိမ်ႏလိတ်မူနဝ်ꩻ ခွိုင်းမုဲင်ꩻရန်းဟောင်း၊ လိတ်ပအိုဝ်ႏခမ်းကောင်ယိုခါနဝ်ꩻ စွုမ်ႏနေဟောင်း၊ တဲမ်းအီပအိုဝ်ႏငဝ်းလꩻလို့နေဟောင်း၊ မန်းလိတ်ယိုခါတွမ်ႏ ပအိုဝ်ႏလိတ်ယိုခါနဝ်ꩻ ပွိုင်းကွာႏလွဝင်ꩻနုဲင်းမုဲင်ꩻ၊ မန်းလိတ်တွမ်ႏပအိုဝ်ႏလိတ်ယို မီႏတဲမ်းအီလိုꩻမျိုꩻလင်ငဝ်းနဝ်ꩻ ပါꩻမုဲင်ꩻတဲမ်းအီလꩻအာ၊ ပါꩻမုဲင်ꩻစွုမ်ႏပိုႏဟောင်း၊ နီလိတ်ပအိုဝ်ႏယို ဖေႏကစွုမ်ႏလဲဉ်းယို၊ ဖေႏကမဲဉ်ႏလဲဉ်းယို၊ သွဉ်ဖေႏကယိုꩻလဲဉ်းယိုနဝ်ꩻ အနယ်ꩻအဲဉ်ထောဝ်းဟောင်း၊ လိတ်ယို စွုမ်ႏလဲ့စွုမ်ႏ၊ မဲဉ်ႏလဲ့မဲဉ်ႏ၊ သွဉ်လဲ့ယိုꩻနဝ်ꩻ တဟဲ့ꩻတဝ်းလိတ်ထီထွူႏက ဟဲ့ꩻလိတ်ထာꩻမုဲင်ꩻဟောင်း၊ ပွိုင်းဝွို့တွမ်ႏ လိတ်ပအိုဝ်ႏယို ကလိုႏသေထွိုက်၊ သေသင်ꩻဒါႏ အကျောင်ꩻအခရာႏဖုံႏယို တဲမ်းနယ်လွေꩻဗာႏ မာတိကာႏ၊ ကတူႏစဲဉ်ႏအအဲဉ်ႏနုဲင်းကီယိုသွူ၊ ကလိုႏသေဒါႏအလုဲင်း၊ ကလိုႏခြုဲင်းဒါႏအဆွာꩻနဝ်ꩻ ကသေသားလဲ့ အဝ်ႏသေလဲဉ်းတဲင် တဲမ်းနယ်တဝ်းဒွုမ်သွူ။ ပုဂ္ဂိုလ်ႏသꩻရက်စွိုးခွိုꩻ၊ သꩻရက်လိုꩻမျိုꩻသီးနဝ်ꩻ ဟော်ꩻထွားသွူခွေသွဉ်းရွမ်ဖြုဲင်ꩻယိုတဲင် မွေးတမွေးတဝ်း၊ မဲဉ်ႏတမဲဉ်ႏတဝ်း စဉ်ꩻစာꩻဝွေႏဖန်ႏ၊ ယူႏခံႏယွယွထွူတဲင် ရမွေးရမဲဉ်ႏနုဲင်းမုဲင်ꩻ၊ အဝ်ႏလိုႏထဲင်းနုဲင်းမုဲင်ꩻကရိုꩻယို နီသွဉ်းသီးပအိုဝ်ႏလိုꩻမျိုꩻအတာႏ ယူႏခံႏဒျာႏသွော့ဝင်ꩻဩ။ မီႏရိုꩻလိုႏဖေႏအာႏငါႏ လိတ်ပအိုဝ်ႏလဲ့ လိုႏဖေႏအာႏဗာႏအပွုံႏမုဲင်ꩻ၊ မီႏသွဉ်မီႏဒါႏလိတ်ပအိုဝ်ႏနဝ်ꩻ အကျိုꩻတရာꩻအီႏထူꩻချာꩻနုဲင်းမုဲင်ꩻ၊ အကျိုꩻတရာꩻထူꩻချာꩻမုꩻဖုံႏယို ထုမ်ႏမော့ꩻမော့ꩻသွူတွော့ꩻ တဲမ်းနယ်ပါ၊ တဲမ်းသော့ꩻပါ နီဗွေႏသီးကဗျာရွမ်ဖြုဲင်ꩻကို ကလိုႏဖေႏအာႏငါႏအကျောင်ꩻနဝ်ꩻမွိုင်ဩ။[၁][၂]