လိုႏသေနာႏလိုꩻပေႏ(၃)
"လိုꩻပေႏသီးတာႏ လိုႏသေနာႏအကွို့ꩻ(၃)" "ခွုမ်လွူꩻပဆိုးထာꩻတဲင် ဆဲင်ႏရာꩻဉာဏ်ႏ အထီအသွီႏတွမ်ႏ နမ်းခန္ဓာႏ" လိုꩻပေႏဖုံႏနောဝ်ꩻ အောဝ်ႏပေႏခါ အုံတဲင်ထာꩻဒါႏတောဝ်းဒွိုန်းတဲ့ အမွိုးဖါဖုံႏ အွဉ်ႏအုံတဲင်ဖေႏ၊ အုံတဲင်ဒါႏထွူ ထီႏလိုꩻတန် လွေꩻထာꩻတွော့ꩻ လိုꩻပေႏမဲဉ်လွေꩻနုဲင်း၊ ကွပ်မဲဉ်လွေꩻနုဲင်းတွော့ꩻ လိုꩻပေႏလွေꩻတခွစံꩻနေး၊ ဝွေꩻကမဲဉ်လꩻ တခြိုꩻထျꩻသူꩻ ဖေႏကတွိုႏလဲ့ လွေꩻတခွနေးသွူ။ နောဝ်ꩻမဉ်ႏထွူ ဖေႏနေးကအုံတဲင်နွောင်ꩻနောဝ်ꩻ အွဉ်ႏအုံတနွောင်းဖေႏစံꩻ၊ အုံတနွောင်းမဉ်ႏဒါႏလဲဉ်းတဲ့ လွေꩻထာꩻဖေႏကဒါႏတဲင် ကထွာဒါႏ မွိုးဖါဖုံႏ ခွုမ်အစူတွော့ꩻ အွဉ်ႏလွေꩻစံꩻနေး ပဉ်ကာပဉ်ကာ၊ ကွဲညညတဲ့ လိုꩻပေႏယို အလွေꩻဒါႏလွဉ်စွဉ်ႏနောဝ်ꩻသွူ။ အရွယ်ႏမဉ်ႏတန် တနေင်ႏထွူတနေင်ႏတဲ့ လိုꩻပေႏနမ်းခန္ဓာႏယို တန်ဖြိုလွဉ်၊ တနေင်ႏတွမ်ႏတနေင်ႏယို ကွာႏလွဉ်နောဝ်ꩻသွူ။ ကွဲတဲင်တွော့ꩻ လိုꩻပေႏတဖြာꩻတွမ်ႏတဖြာꩻယို တဗွိုန်လွတောဝ်းလို့ဝင်ꩻ၊ ကဲဉ်းအာအာ အခိန်ႏမဉ်ႏတွိုႏနောဝ်ꩻ တန်ဖြိုလွဉ်ဒျာႏရိုꩻကီလဲ့ လိုꩻပေႏယဖြာꩻဖြာꩻနောဝ်ꩻ အခိန်ႏအရွယ်ႏတွိုႏလဲဉ်းလဲ့ နမ်းခန္ဓာႏတတန်ဖြိုလွဉ်တောဝ်း၊ ယိုနောဝ်ꩻ ကွပ်ပွိုးစွဉ်ႏ အသွီႏယာႏမာꩻထွာနဲ့၊ ကွပ်ပွိုးစွဉ်ႏဒျာႏ အခွိုꩻနဲ့၊ ကွပ်ရုဲင်ꩻတသွိုးနမ်းဆေ့ꩻနဲ့ ကရိုꩻဒါႏ အကျောင်ꩻတရာꩻဖုံႏယို အောဝ်ႏသွူ။ နောဝ်ꩻအကို ကွပ်စွဉ်ႏနမ်းရုဲင်ꩻတသွိုးမုꩻ ဆေ့ꩻတဲင် နမ်းခန္ဓာႏတန်ႏဖြိုလဲဉ်းလဲ့ တတန်ဖြိုတောဝ်း လိုꩻပေႏဖုံႏနောဝ်ꩻ တဲႏပေႏပေႏခါကာႏ ကွပ်တခွုမ်ဆိုးတောဝ်း တမုဲင်ꩻမုဲင်ꩻ၊ ထာꩻရုတ်တဲ့ တမဲဉ်ခွုမ်ဆိုးတောဝ်း၊ တွမ်ႏအသွꩻပေႏဖုံႏတဲ့ တခွုမ်ဆိုးညီꩻတောဝ်း၊ နောဝ်ꩻထွူတကာႏတောဝ်း လွင်းဒါႏတောဝ်းထာꩻ၊ မဉ်ႏထွာနုဲင်းယိုနောဝ်ꩻ ကထွာဒါႏ လိုꩻပေႏယို ပွိုင်းဝွို့တွမ်ႏ ဉာဏ်ႏတဲးတဲ့ ယံခန်းရိုꩻကီလဲ့ ကွပ်နမ်းရုဲင်ꩻတသွိုးဆေ့ꩻတဲင် နမ်းခန္ဓာႏချို့ꩻယွင်ꩻမုꩻယို အောဝ်ႏလွဉ်ဒါႏသွူ။ နုဲင်းယိုစားနောဝ်ꩻ ကွပ်ပွိုးစွဉ်ႏဒျာႏ အမွိုးဖါဖုံႏ ကအောဝ်ႏဗော့ꩻဒါႏလိုꩻတန်ဖုံႏ ကွပ်တဖေႏအာႏတောဝ်း လိုꩻပေႏထာꩻခွုမ်ဆိုးဟောင်း၊ လိုꩻပေႏဖုံႏ လွေꩻသဲင်ꩻဒါႏလဲဉ်းသွူနောဝ်ꩻ ဝွေꩻသီးတာႏ ထာꩻခွုမ်ပဆိုးခရာႏ ထာꩻရုတ်ဖုံႏ အောဝ်ႏလိုႏမာꩻဖေႏ၊ အောဝ်ႏလိုႏအွဉ်ႏဖေႏသွူ။ လိုꩻပေႏဖင်းငါဖင်းချာထာꩻဖုံႏ၊ ခွုမ်ဆိုးလေ့ လောႏလေ့ဖုံႏ၊ တစွိုꩻတွမ်ႏတစွိုꩻ ကခွုမ်ဆိုးဒါႏ၊ ကမာꩻပြဲင်ႏဒါႏ ဟံႏဗော့ꩻထာꩻရုတ်ဖုံႏယို အောဝ်ႏလိုႏစွꩻခွင်ꩻ၊ အောဝ်ႏလိုႏဖေႏခွုမ်ဆိုးငါႏသွူ။ နုဲင်းယိုစားနောဝ်ꩻ လိုꩻပေႏထာꩻယူႏ အောဝ်ႏနုဲင်းမုဲင်ꩻတဲ့ သေလွဉ်၊ ကွပ်ခွုမ်ဆိုးရုဲင်ꩻတသွိုးတဲင်တွော့ꩻ ဝွေꩻသီးစူ၊ ဝွေꩻသီးခင်ႏ၊ ဝွေꩻသီးနမ်းခန္ဓာႏယို တန်ဖြိုလွဉ်၊ ဝွေꩻသီးထာꩻယူႏ ထာꩻတွေꩻဖုံႏယို တန်ဖြိုလွဉ်အာလွဉ်နောဝ်ꩻသွူ။ လိုꩻပေႏဖုံႏ ပွိုင်းဝွို့တွမ်ႏ နမ်းခန္ဓာႏရုဲင်ꩻတသွိုး ထာꩻခွုမ်ပဆိုးနောဝ်ꩻ ဝွေꩻသီးတာႏ ပျောႏသွင်ႏအီတာႏလွုမ်ꩻတကာႏတောဝ်း ဝွေꩻသီးနမ်းခန္ဓာႏတန်ဖြိုအီ အစွဲးအကမ်းတဲ့ထွာ၊ အရွယ်ႏမဉ်ႏတန်နောဝ်ꩻ ထွာဒါႏလိုꩻတလျူꩻ လိုꩻအကင်ဖွီ၊ ပေါင်ꩻကွိုက်ꩻညီꩻဒါႏ တွမ်ႏလိုꩻအသောင်အရင်ꩻ၊ ယွုမ်းအံႏချာဒျာႏနမ်းတဲင် ထာꩻမာꩻကျံꩻဖုံႏယိုတဲ့ မာꩻဒါႏ၊ မာꩻနွောင်ꩻနောဝ်ꩻသွူ။ လိုꩻပေႏခေတ်လဲင်ႏခါ ကဲဉ်းအာအာနောဝ်ꩻ အောဝ်ႏအတန်ꩻကျောင်ꩻသဲင်ꩻလမ်း၊ ထွိုင်ႏတွိုႏလမ်း ထွားဒျာႏတီဗီဖုံႏ၊ ခွုမ်ဆိုးဒျာႏ ကွန်ပျူတာဖုံႏသွူ။ တခွုမ်ဆိုးတောဝ်းတမုဲင်ꩻမုဲင်ꩻ၊ မဉ်အုံစွူ ထွားစွူစွူဗော့ꩻ တီဗီ ဗွီဒီယိုနုဲင်းယိုနောဝ်ꩻ လိုꩻပေႏတာႏ ဉာဏ်ႏအထီအသွီႏ ထာꩻယူႏထာꩻတွေꩻတဲးတဲ့ယံ၊ ကွဲတွော့ꩻ လိုꩻပေႏယို မဉ်ႏတန်နောဝ်ꩻ ထွာဒါႏလိုꩻအကင်ထွူႏ၊ နောဝ်ꩻထွူတကာႏတောဝ်း ခြွိုင်ႏသန်ꩻရေꩻတွမ်ႏ နမ်းခန္ဓာႏယို အာႏပေႏဒါႏသွူႏ ကမ္ဘာႏကကျောႏဒါႏ ဂေါက်သီးချန်ပီယံ တိုက်ဂါးဝုတ်ယို ကွပ်နမ်းအရုဲင်ꩻတသွိုးမုꩻယံ၊ နွို့ပြဲင်ႏတွယ်ႏဂေါသီးပွယ်ꩻတဲင် ဝွေꩻယို လꩻစွဉ်ႏဒေါ်လာသန်းပေါင်ꩻ ခွိုင်းမုဲင်ꩻရျာꩻရျာꩻသွူႏ ထာꩻခွုမ်ပဆိုးတမျိုꩻမျိုꩻယို မဉ်ႏယံမွေးနောဝ်ꩻ လꩻအာငါႏရွဉ် တခွိုင်းမုဲင်ꩻကရိုꩻနောဝ်ꩻ အောဝ်ႏသေဒျာႏ ပငါပရာꩻနောဝ်ꩻသွူ။ ထာꩻခွုမ်ပဆိုးနောဝ်ꩻ အောဝ်ႏအမျိုꩻမျိုꩻတဲင် လိုꩻပေႏတာႏ အန္တရာယ်ႏကကင်ꩻဒါႏ ထာꩻခွုမ်ပဆိုးမျိုꩻ၊ လိုꩻပေႏသꩻကဗွို့ꩻဒါႏ ထာꩻခွုမ်ပဆိုးမျိုꩻယို အောဝ်ႏလိုႏအွဉ်ႏခွုမ်ပဆိုး၊ အောဝ်ႏလိုႏဖြေꩻဖေႏ ထာꩻခွုမ်ပဆိုးအမျိုꩻမျိုꩻနောဝ်ꩻသွူ။ ကွပ်နောဝ်ꩻမꩻ လိုꩻပေႏဖုံႏ ဉာဏ်ႏတဲ့ဖေႏကဟောဝ်၊ နမ်းခန္ဓာႏတဲ့ ဖေႏကတန်ဖြိုꩻ ခြွိုင်ႏသန်ꩻရေꩻတဲ့ ဖေႏကဟောဝ်နောဝ်ꩻ တာႏဝွန်ႏကအောဝ်ႏဒါႏ လိုꩻတန်ဖုံႏပွုံႏတာႏ (တာႏဝွန်ႏ)အောဝ်ႏငါႏသွူ။[၁][၂]