လိုႏအွဉ်ႏရေꩻငါႏပညာႏရေꩻ

"အောဝ်ႏလိုႏအွဉ်ႏရေꩻငါႏ ပညာႏရေꩻ" "ပညာသမာ အာဘာ နတ္ထိ-မွူးရောင်ႏတဲ့ယောဝ်း၊ လာရောင်တယောဝ်း၊ မေႏရောင်ႏတယောဝ်း အရောင်ႏတထွꩻတောဝ်း ပညာႏရောင်ႏ"၊ ပညာႏကရိုꩻဒါႏအရောင်ႏယို မွူးခေ့ꩻလဲ့ လေနွောင်ꩻ၊ မွူးယာလဲ့လေနွောင်ꩻတဲင် ထွာစွဉ်ႏအယံသွတ်ꩻ အရောင်ႏနောဝ်ꩻမꩻ လိုꩻတွိုင်ꩻစွုမ်ႏဖြာꩻ ဖေႏကဒါႏ ကျိုꩻစာꩻသွဉ်ထူႏဗာႏ၊ ဒါႏတဖြာꩻလဲ့ အရောင်ႏတင်ႏတဖြာꩻ၊ ဒါႏတရျာꩻလဲ့ အရောင်ႏတင်ႏတရျာꩻ၊ ဒါႏတခွိုꩻလွုမ်းလဲ့ အရောင်ႏတင်ႏ တစွိုးခွိုꩻလွုမ်းနောဝ်ꩻသွူ။ ပညာႏကရိုꩻယို လောကီꩻပညာႏ၊ လောကုတ္တရာႏပညာႏ အောဝ်ႏနီမျိုꩻ၊ တယ်ႏစအခေႏခံႏ မူလတန်ꩻပညာႏ ဗꩻလွေꩻတက္ကသိုလ်ႏ မဟာဝိဇ္ဇာဘွဲ့ အရန်းရန်းယို လွူးအီနမ်း ကမ်းအီကြိုအတာႏ အောဝ်ႏလိုႏသွဉ်ထူႏငါႏ ပညာႏအမျိုꩻမျိုꩻနောဝ်ꩻသွူ။ မဉ်ႏဒေါ့ꩻထဲင်းဗာႏ လောကီꩻပညာႏနောတ်ꩻ ဖျင်ကာꩻ၊ ဖျင်ဆုဲင်ကယ်၊ ဖျင်စက်၊ ဖျင်မေႏ-စတဲင်လွူးအီနမ်းတာႏ သွဉ်ထူႏဗာႏတောဝ်း အခေႏခံႏကျောင်ꩻကို ပညာႏအမျိုꩻယိုနောဝ်ꩻ ထွာဒျာႏနမ်းမော့ꩻ လောကီꩻပညာႏဒျာႏနောဝ်ꩻသွူ။ တယ်ႏစအခေႏခံႏပရိယတ္တိ မူလတန်ꩻ ဗꩻထင်ႏဓမ္မာစရိယဘွဲ့ အရန်းရန်းယို နမ်းသꩻနီပါꩻ ချံꩻသာႏအီတာႏ ပစ္စုပ္ပန်ႏ အနာႏဂတ် တဖူꩻသံႏသရာႏ စွို့ꩻစွဉ်ႏအီတာႏ အောဝ်ႏလိုႏသွဉ်ထူႏငါႏ ပညာႏအမျိုꩻနောဝ်ꩻသွူ။ မဉ်ႏဒေါ့ꩻထဲင်းဗာႏ လောကုတ္တရာႏပညာႏနောဝ်ꩻ နာႏမော် နာႏတရာꩻ နွို့တရာꩻစခန်ꩻ အားထုတ်တရာꩻ ပွါꩻမျာꩻဘာႏဝနာႏ ဗေင်ႏကျောင်ꩻကန်ႏ ဆောက်တယ်ႏသီႏလ စတဲင်သꩻဖေႏကချံꩻသာႏ အုံအောဝ်ႏကျင်ꩻသွုံꩻလွဉ်ꩻဒါႏ ပညာႏအမျိုꩻယိုနောဝ်ꩻ သွဉ်ထူႏဗာႏတောဝ်း ပရိယတ္တိ အခေႏခံႏဗွေႏဗွန်ကျောင်ꩻ ထွာဒျာႏနမ်းကျိုꩻစာꩻမုꩻ သꩻသေလောကုတ္တရာႏပညာႏဒျာႏနောဝ်ꩻသွူ။ ဘဝယို ဖေႏကချံꩻသာႏ လောကီꩻပညာႏလဲ့ ကျိုꩻစာꩻသွဉ်ထူႏဗာႏ၊ လောကလိုꩻခမ်း အုံအောဝ်ႏရေꩻ ဖေႏကဒါႏ၊ ဘဝငါ သံႏသရာႏဖေႏကချံꩻသာႏ လောကုတ္တရာႏပညာႏတဲ့ ဒါႏခါꩻဗာႏနောဝ်ꩻမꩻ နမ်းသꩻနီပါꩻ ဘဝယိုဘဝငါ ဗွေပြဲ့ꩻစွုမ်ႏ၊ သဲင်ꩻထွာလိုꩻဘဝ ကွိုင်ႏတန်ႏလိုꩻတဖြာꩻ နီနာꩻသီး သဲင်ꩻစံႏစာꩻဗာႏနောဝ်ꩻသွူ။ နီပအိုဝ်ႏဒေႏသကို ခေတ်ယိုခါနောဝ်ꩻ တဖူꩻလွေꩻသဲင်ꩻရေꩻလဲ့ ဟောဝ်လွဉ်လဲဉ်း တနီꩻတစိꩻစိꩻ၊ တသီႏယွုံႏ တသီႏခန်ꩻဖုံႏလဲ့ ကွဲအာအာ၊ လိတ်သွဉ်ကျောင်ꩻလဲ့ အောဝ်ႏတိုꩻထဲင်းထဲင်းစွဉ်ႏတဲ့ လိုꩻသေလိုꩻဒါႏ လိုꩻပညာႏသားနောဝ်ꩻ အောဝ်ႏဆေ့ꩻနေကနောဝ်ꩻသွူ။ လိုꩻပေႏလိုꩻယွဲး လိုꩻလꩻဘွဲ့သားဖုံႏ၊ မဉ်ႏထွားနုဲင်းခေတ်ယိုခါနောဝ်ꩻ စွုမ်ႏဒုံစွုမ်ႏဆောင်ႏ အောဝ်ႏလွဉ်လဲဉ်းသွူတဲင် နီစွိုးခွိုꩻတာႏ အကျိုꩻအောဝ်ႏအာငါႏ၊ ဟွိုန်ဟောဝ်သꩻရေꩻကိုငါႏ၊ ကွဲတွော့ꩻ ဝင်ꩻခမ်းကိုဝင်ꩻလိုꩻမျိုꩻအခါႏ နေးတွမ်ႏပညာႏ အီႏတွူႏဖါႏနောဝ်ꩻ အောဝ်ႏဆေ့ꩻနေကနောဝ်ꩻသွူ။ ဟန်ႏသနီꩻယိုခါ နီပအိုဝ်ႏခြာနောဝ်ꩻ လိုꩻဒါႏတောဝ်းလိတ် ဖေႏကထိုꩻမား၊ ဖြားဆားမူႏခိုစွုမ်ႏဖြာꩻဖြာꩻ အောဝ်ႏလိုႏငါႏပညာႏ၊ အောဝ်ႏလိုႏဟော်ꩻငါႏလိတ်၊ လိုꩻဖြားဖုံႏနောဝ်ꩻ အီႏသွဉ်ယင်း အတန်ꩻကျောင်ꩻပညာႏ ဉာဏ်ႏတထွꩻတောဝ်းလဲ့ နီလိတ်ပအိုဝ်ႏနောဝ်ꩻ ဖေႏကဒါႏစွုမ်ႏဖြာꩻ အောဝ်ႏလိုႏသွဉ်ထူႏငါႏဝင်ꩻနောဝ်ꩻသွူ။ ပညာႏလဲ့ကျိုꩻစာꩻသွဉ်၊ မဉ်ႏဒါႏလွဉ်တနီꩻခါ စွိုးခွိုꩻတာႏ နွောင်ꩻရာꩻနီခွုမ်မာꩻကိုဗာႏ နမ်းတာႏလမ်းတာႏ၊ ဒုံဆောင်ႏထင်ႏထိုရေꩻတာႏလဲ့ ကျိုꩻစာꩻသောင်ႏသာဗာႏ၊ ခေတ်ယိုခါ လꩻဗော့ꩻတက္ကသိုလ်ႏဘွဲ့လွုမ်ꩻနောဝ်ꩻ တထွူထွာတောဝ်း၊ အရန်းထိုပညာႏကထွာဒါႏ မဟာသိပ္ပံဘွဲ့ဖုံႏ မဟာဝိဇ္ဇာဘွဲ့ဖုံႏ၊ ပီအိချ်ဒီဒေါက်တာဘွဲ့ဖုံႏတဲ့ အောဝ်ႏလိုႏလꩻ၊ အောဝ်ႏလိုႏအောင်ႏနောဝ်ꩻသွူ။ မဉ်ႏအောင်ႏပါ အရန်းထိုပညာႏနုဲင်းနောဝ်ꩻမꩻ ထွာနွောင်ꩻဝင်ꩻဆရာႏ၊ ထွာနွောင်ꩻဝင်ꩻထာꩻအာႏကွိုꩻ၊ ထွာနွောင်ꩻပါမောက္ခချုပ်သွူတကာႏတောဝ်း ထွာနွောင်ꩻအနယ်ꩻပညာႏ အတန်အကဲႏနောဝ်ꩻသွူ။ နီလိုꩻမျိုꩻတဲ့နောဝ်ꩻ၊ ဝင်ꩻလိုꩻမျိုꩻတဲ့နောဝ်ꩻ သစ္စာႏအောဝ်ႏချာဗာႏ နီစွိုးခွိုꩻလိုꩻမျိုꩻအလောင်း၊ ထီႏဖွီချာဗာႏတောဝ်း စွိုးခွိုꩻလိတ်လုဲင်ꩻ အကွဉ်အကꩻ ယိုꩻယာႏခြွိုင်းခြိုꩻ၊ နီကဒါႏ နီကသေတွိုင်ꩻ ပင်ႏတသွောင်းကိုဗာႏ ကမ္ဘာႏဖေႏကျောႏ၊ ဝင်ꩻဖေႏကသေငါꩻ နီလိုꩻမျိုꩻ၊ ကျိုꩻစာꩻတွူႏတရန်ဗာႏ-စတဲင် သမဲင်ꩻဖေႏတာႏဝွန်ႏဖုံႏနောဝ်ꩻ အောဝ်ႏဒင်ႏခေတ်ပညာႏဒါႏ လိုꩻပေႏလိုꩻယွဲးသီးပြေင်လောင်းနောဝ်ꩻသွူ။ မဉ်ႏဒါႏပညာႏ၊ မဉ်ႏထွာသွူလိုꩻယံတဖြာꩻနောဝ်ꩻ ထွားငါႏမွိုန်းနမ်းတာႏ၊ ယူႏဗဲင်းစွိုးခွိုꩻတာႏ၊ နီကဝါႏသနာႏဒါႏ ခမ်းထီထာꩻမာꩻ အစိုꩻရဌာႏနကို တထွောင်းထွောင်းနောဝ်ꩻ နွို့ခွုမ်မာꩻသွော့ဝင်ꩻ၊ ဖေႏကထွာလꩻ အစိုႏရဌာႏန အတန်အကဲႏနောဝ်ꩻ လွောက်ꩻနာႏသွော့ အစိုႏရဥပဒေႏဖုံႏ၊ နောဝ်ꩻမꩻ နီကမဲဉ်လꩻခမ်းထီပွုံႏစံႏနောဝ်ꩻ နီဖောႏထန်ႏနွောင်ꩻ အနမ်းအခြုံနောဝ်ꩻသွူ။ နေးတွမ်ႏပညာႏ ဝွေႏဖန်ႏချာစွိုးခွိုꩻ၊ ထင်းပေႏချာလိုမျိုꩻနောဝ်ꩻ မာꩻဗာႏတောဝ်း၊ နီစွိုးခွိုꩻပညာႏရေꩻ ထင်ႏထိုရေꩻတာႏ ဖေႏကျံႏဉာဏ်ႏကိုဗာႏ၊ အောဝ်ႏလိုႏမွဉ်းဖျင်မဉ်ႏအောဝ်ႏလဲ့ ဖျင်ဖေႏအွဉ်ဖေႏ သွဉ်ဖေႏချာမꩻ နိလိုꩻမျိုꩻတာႏ ကဖေႏဒါႏတာႏဝွန်ႏနောဝ်ꩻ ကေႏနွောင်ꩻအကျောင်ꩻ တဲမ်းနယ်ဗာႏ ထွားလိတ်သား ဗွေႏခွန်နင်ꩻသီးဖုံႏသွူဩ။